Yayandikwaga na Marko 5:1-43
5 Bagera oku lwindi lunda lw’enyanja omu teritware ya Bagerasene.
2 Yesu arhengere omu bwarho ntya, ahola han’aho mulume muguma walifarhirwe n’omuzimu arhengerera ewa mashinda abuganana na Yesu.
3 Alilamire omu mashinda na kugera agola mango nta muntu n’omuguma wali wagalire kumushweka bwinja-bwinja haba chiro m’obulegule.
4 Baliri bazigana kumushweka mw’amapingu n’obulegule, aliko aliri acha obulegule n’okuvunangula amapingu na nta muntu n’omuguma waliherhe emisi y’okumufumbamiza.
5 Esiku zoshi ebudufu n’ezuba agendaga abera ayamuziza omu mashinda n’omu misozi ey’anali achikerera n’amabale.
6 Aliko abere alangira Yesu, alibirhira emunda ali amuyunamira.
7 Av’aderha ntya n’omulenge gunene: “Chibazo chihe ngwerhe nawe, Yesu Mugala wa Mungu oli Enyanya Bwenene? Ohakane* embere za Mungu ok’orhanjira kubi.”
8 Bulala Yesu abaga amubwirire: “Ego muzimu, rhenga m’oyula muntu.”
9 Aliko Yesu amubaza: “Ezino lyawe wende?” Ashubiza: “Ezino lyani nye Lejiyo, bulala rhuli banene.”
10 Agenderera kulakirira Yesu arhafukuzaga abola bazimu mw’echola chihugo.
11 Haliri ngulube zinene zaliri zalisa oku musozi.
12 Abola bazimu bahema Yesu ntya: “Orhurhume rhuje mu zilira ngulube.”
13 Yesu abayemerera. Abola bazimu bagenda baja mw’ezola ngulube, n’ezola ngulube zagenda zalibirha zarhoga oku rukumba, zoshi okuzili hofi 2 000, zarhogera omu nyanja zazika.
14 Aliko abangeri b’ezola ngulube bagenda balibirhira omu vile n’omu vilaje baja kubala ebyarhengerere, n’abantu bayinja kulola ebyabere.
15 Bava bayinja emunda Yesu ali babona ola mulume waliri mw’abazimu, k’okuderha olala waliri mwe lejiyo, eyayikere, ayambere n’obwenge bwage bwagalukire haguma, bayubaha bwenene.
16 N’ababonaga ebyola byabere, babalira abola bantu ebyahikiraga oyola mulume waliri mw’abazimu n’ebyahikiraga ezola ngulube.
17 Bava barhondera kurhebereza Yesu arhenge mw’eyola teritware yabo.
18 Yesu abere y’aja omu bwarho, oyola mulume waliri mw’abazimu arhondera kumurhebereza bagende haguma naye.
19 Aliko Yesu arhamuyemereraga, amubwira ntya: “Ogende emwawe, emw’abantu b’omulala gwawe, obabalire ebi Yehova akujirire n’okuntu akuyerekere olukogo.”
20 Oyola mulume agenda arhondera kutangaza omu Dekapoli* ebintu byoshi Yesu amujirire n’abantu boshi basomerwa.
21 Yesu amalire kuja omu bwarho aja oku lwindi lunda lw’enyanja, agerere eshi bantu banene bachigusha ahali.
22 Muguma omu bemangizi b’esinagogi waliyirikirwe Yairo, ayinja, abere abona Yesu achikabula omu magulu mage.
23 Alakirira Yesu turu zinene omu kuderha ntya: “Akanyere kani kalwere bwenene. Wekalamawe oyinje omuhire kw’efune zawe y’achiyunva bwinja anagenderere kulama.”
24 Yesu ava agenda naye, n’abantu banene bamukulikira eyi bali bamufundeza.
25 Sasa haliri omukazi wali wamamala myaka 12 eyi alwere obulwala b’okuva eshagama.
26 Abaga alibukire bwenene omu kugera ku banganga banene anabaga akoleseza efuranga zage zoshi. Aliko chiro ebyola byoshi, arhafumaga, s’ahubwe ehali yage yagenderera kubiha.
27 Abere ayunva oku myazi eli yaderhwa oku bilolere Yesu, arhengerera enyuma asheshera omu bantu kamama ayegera Yesu ahuma oku mwambaro gwage,
28 bulala aliri achibwira ntya: “Inkafa chakuhuma oku mwambaro gwage konyine, nafuma.”
29 Ahola han’aho eshagama yaleka kuva, ayunva omu mubiri gwage okw’amafuma oyola kobika w’obulwala.
30 Ahola han’aho Yesu arhegera oku hali emisi yamamurhengamo. Ahindamuka eyi n’eyi omu bantu abaza: “Inde wahumire oku myambaro yani?”
31 Aliko abanafunzi bage bamushubiza: “Obwene okuntu abantu bakufundezeze eyi n’eyi, gurhe wakaja wabaza mpu nde wakuhumireko?”
32 Aliko agenderera kulola eyi n’eyi yabona inde wamuhumireko.
33 Bulala oyola mukazi abaga amenyere ebyamuberere, ayinja adirhima n’obuba achikabula embere zage amubwira obukweri boshi.
34 Yesu amubwira ntya: “Mwali wani, obwemere bwawe bwakufumize. Ogende n’omurhula ofume n’oyola kobika w’obulwala.”
35 Oku Yesu anachili aderha, bantu baguma barhengereraga em’olala mwimangizi w’esinagogi baderha: “Mwali wawe afire! Bulagurhe oli wagenderera kubuza Mwalimu omurhula?
36 Aliko Yesu ayunvirhe ebi baderhere, abwira oyola mwimangizi w’esinagogi ntya: “Orhayubahaga, ofechakugwarha obwemere.”
37 Arhayemeraga owindi muntu amukulikira olekere Petro, Yakobo na Yowane mwene-wabo Yakobo.
38 Bahikire aha m’oyola mwimangizi w’esinagogi, Yesu abona abantu bali bajira lwamo lunene, bali balira n’okubanda endulu.
39 Amalire kuja omu nju, Yesu ababaza: “Bichi bili byarhuma mwalira n’okujira olwamo? Omwana arhafire s’ajire ero.”
40 Abantu barhondera kumushekera omu kumuha akanyabwinyo. Aliko amalire kubabwira baje embuga, arhola eshe w’oyola munyere na nyina na balala aliri nabo, baja ah’oyola mwana aliri.
41 Yesu ava afarha okuboko k’oyola mwana, amubwira ntya: “Talita kumi,” omu kubitafusiri k’okuderha: ‘Kanyere wee, inkubwirire yimanga!”
42 Ahola han’aho oyola munyere ayimanga arhondera kulambagira. (Aliherhe myaka 12.) Bava bagwarha busime bunene.
43 Aliko abakomereza turu zinene oku nta muntu babwirage ebyabere, anaderha oku bahe oyola mwana eby’alya.
