Yayandikwaga na Marko 2:1-28
2 Chiro akaba ntyo, enyuma wa siku zinene ashuba kugaluka e Kapernaumu na bantu banene bamenya kw’agerere eka.
2 Nantyo abantu kamama bayunjula omu nju alirimo bafunderamo kugera chiro n’embere w’omulyango. Arhondera kubayigiriza emyazi minja.
3 Bantu bane bayinja bahekere omuntu ohunzize bamulerheraye.
4 Babwene barhakagala kumuhisa aha Yesu ali bulala abantu balilugire bwenene, bashona oku nju bashakambula elugulu w’aha Yesu aliri, habere echirhule bayandagaza h’echipoyi oyola muntu walihunzi alilyamireko.
5 Yesu abere abona obwemere bwabo, abwira oyola muntu walihunzize ntya: “Mwana wani, ebyaha byawe byababalirwe.”
6 Ahola haliri bandisi baguma baliyikere eyi bali bawaza ntya omu mirhima yabo:
7 “Gurhe oyula muntu ali aderha ebili ntya? Ali adukanga* Mungu. Inde wakababalira ebyaha olekere Mungu yenyine?”
8 Ahola han’aho Yesu arhegera ebi baliri bawaza omu mirhima yabo, ababwira ntya: “Bulagurhe muli mwawaza ebintu bili ntyo omu mirhima yenyu?
9 Bichi biyorohere ey’okubwira omuntu ‘Ebyaha byawe byababalirwe’ changwa ey’okumubwira ‘yumanga orhole echipoyi chawe olambagire’?
10 Aliko yi mumenya oku Mwen’omuntu agwerhe oburhwali b’okubabalira ebyaha oku gulu...” abwira oyola muntu walihunzize ntya:
11 “Inkubwirire, yumanga orhole echipoyi chawe oj’eka.”
12 Ahola han’aho ayimanga arhola echipoyi chage alambagira embere z’abantu boshi. N’eju y’echola boshi basomerwa n’okukuza Mungu, baderha: “Rhurhachigeraga kubona ebintu bili nk’ebi.”
13 Yesu ashuba kuja oku chinyantambi ch’enyanja, abantu kamama baja emunda ali arhondera kubayigiriza.
14 Abere yagera, alangira Lawi mugala wa Alfayo ayikere oku biro by’okulipisa ekoli, amubwira: “Yinja onkulikire.” Ahola han’aho amukulikira.
15 Buzinda Yesu abere yalya ebilyo omu mwa Lawi, abantu banalipisa ekoli n’abanyabyaha banene baliri basangira naye n’abanafunzi bage, bulala banene mubo babaga bamukulikire.
16 Aliko abandisi b’Abafarisayo babwene okw’ali asangira n’abanalipisa ekoli n’abanyabyaha, barhondera kubwira abanafunzi bage ntya: “Arhula asangira haguma n’abalipisa ekoli n’abanyabyaha si?
17 Yesu ayunvirhe ntyo ababwira: “Abagwerhe amagala menja barhakenere munganga s’abalwere babamukenere. Nayinjaga kuhamagala abanyabyaha s’arhali abanyakunali.”
18 Abanafunzi ba Yowane n’Abafarisayo bagendaga bachishalisa.* Eju y’echola bayinja bamubwira: “Bulagurhe abanafunzi ba Yowane n’abanafunzi b’Abafarisayo banachishalisa aliko abanafunzi bawe bowe barhachishalisa?”
19 Yesu abashubiza ntya: “Amango abera b’omuhya-mulume bali haguma n’omuhya-mulume, barhakaba baherhe empanvu y’okuchishalisa.* Arhali ntyo si? Amango moshi omuhya-mulume ali haguma nabo barhakachishalisa.
20 Aliko esiku nji zahika, omuhya-mulume anakulwa haguma nabo, n’agola mango y’inji bachishalisa.*
21 Nta muntu onahangira echiraka chihyahya oku mwambaro gushajire. Nk’ajirire ntyo echiraka chihyahya chanafunyaza ogola mwambaro gwanaja gwabereka na kulusha.
22 Echindi, nta muntu wakabikira edivayi y’omuhyo omu ndaha y’oluhu eshajire. Nk’ajirire ntyo, endaha yanabasha n’edivayi yanasheshekala anabula byoshi. Aliko edivayi y’omuhyo banayibika omu ndaha mpyahya y’oluhu.”
23 Abere ali agera omu mashwa m’engano olusiku lwe Sabato, abanafunzi bage barhondera kuhagula amahunga m’engano oku banali bagenda.
24 Eju y’echola Abafarisayo bamubwira: “Lolaga! Bichi birhumire abanafunzi bawe yibajira ebilahizwe ne Sheriya olusiku lwe Sabato?”
25 Abashubiza ntya: “Murhashubiraga kusoma ebi Daudi ajiraga amango aliri omu bulagirire eyi yewe n’abalume aliri nabo bayunvirhe ezara?
26 Okuntu omu ngani y’omudahwa mukulu Abiyatari, Daudi ajaga omu nju ya Mungu alya emigati y’okuyerekanwa embere za Mungu, n’obola erhalikwanene kulibwa n’omuntu yeshi-yeshi olekere abadahwa, ayiha n’oku balume aliri nabo?”
27 Ashuba kubabwira ntya: “Esabato yabagaho eju y’omuntu s’arhali omuntu yiwabagaho eju ye Sabato.
28 Che chirhumire Mwen’omuntu chiro ye Mukulu we Sabato.”
