Yayandikwaga na Marko 11:1-33
11 Bahikire hofi ne Yerusalemu e Betfaje ne Betaniya oku musozi gw’emizeyituni, arhuma babiri omu banafunzi bage.
2 Ababwira ntya: “Mugende mw’elira vilaje muli mwalangira, hano munahikamo ntya, mwabona omwana gw’epunda bashwekere, na nta muntu osaga kuyiyikalako. Muyishwekule muyinderhere.
3 Hakajira owababaza mpu ‘Bulagurhe muli mwashwekula eyola punda?’ Mumubwire mpu ‘Waliha ayikenere aliko ashuba kuyigalula.’”
4 Bava bagenda, babugana ogola mwana gw’epunda gushwekerwe embuga oku mulyango hofi n’ebarabara; bayishwekula.
5 Aliko baguma omu baliyimangire ahola babaza: “Bulagurhe muli mwashwekula ogola mwana gw’epunda?”
6 Bababwira ebi Yesu anababwiraga, nantyo abola bantu baleka abanafunzi bagende.
7 Bahekera Yesu ogola mwana gw’epunda, basasa kw’emyambaro yabo, Yesu ayiyikalako.
8 Banene basasa emyambaro yabo omu barabara, n’abandi bacha ebibabi by’emirhi omu mashwa.
9 Abaliri embere n’abaliri enyuma baliri baderha ntya n’omulenge gunene: “Mungu, rhukuhemere omuchungule! Ogishirwe ali olala oyinjire omu zino lya Yehova!
10 Obugishirwe buli Bwami bwayinjire, Obwami bwa darha Daudi! Rhukuhemere woyo oli enyanya bwenene, omuchungule!”
11 Yesu ahika omu Yerusalemu, aja omu hekalu n’okulola ebintu byoshi eyi n’eyi, aliko bulala bwaliri hofi kuyira agenda e Betaniya haguma na balala 12.
12 Olusiku lwakulikiragaho, oku banali barhenga e Betaniya ava ayunva enzara.
13 Alangira omurhi gw’etini guli kw’ebibabi, aguyegera alola akaba akagupata kw’echintu. Aliko ahikire aha guli, nta tunda agubweneko olekere ebibabi; bulala garhaliri mango etini zikulire.
14 Yesu ava abwira ogola murhi ntya: “Nta muntu nj’ochilyage etunda likurhengereko haba n’eliguma.” Abanafunzi bage baliri bayunviriza.
15 Bahika e Yerusalemu. Yesu aja omu hekalu arhondera kufukuza abantu boshi baliri baguza n’okuguliramo, akumbagaza ameza m’abaliri bakaba* efuranga n’ebichumbi by’abaliri baguza epijo,*
16 arhanayemereraga omuntu yeshi-yeshi ohekere echintu agere omu hekalu.
17 Aliri abayigiriza n’okubabwira ntya: “Kabirhayandikirwe, ‘Enju yani yayirikwa nju y’esala oku bantu b’amashanja moshi’? Aliko mwabo mwayijirire lukunda lw’ebishambo.”
18 Abakulu b’abadahwa n’abandisi bayunvirhe ntyo barhondera kulonza gurhe bakamuyirha, s’aliko baliri bayubaha bulala abantu boshi baliri basomerwa n’okuntu aliri ayigiriza.
19 Lyabere golo Yesu n’abanafunzi bage barhenga omu vile.
20 Esezi bashubire kugera ah’ogola murhi gwaliri, babugana goshi gwayumire kugera oku mizi.
21 Petro ava ayibuka eb’inji byabaga abwira Yesu: “Mwalimu, tala! Gula murhi nji wavumaga gwayumire.”
22 Omu kushubiza, Yesu ababwira: “Mugwarhe obwemere mu Mungu.
23 Kweri mbabwirire, nk’omuntu yeshi-yeshi abwirire ogula musozi, ‘Kunduka ochikabule omu nyanja;’ nk’arhagwerhe engangane omu murhima s’agwerhe obwemere okw’eby’aderhere byaba; byanabako.
24 Che chirhumire mbabwirire, ebintu byoshi-byoshi mwakahema omu sala, mugwarhe obwemere oku mwabipatire, nantyo mwabipata.
25 N’amango mwamasalira, mubabalire abantu boshi bakaba babajirire amagosa, omu kuntu Yisho oli omu mbingu naye ababalire amagosa menyu.”
26 ——
27 Bashuba kuja e Yerusalemu. Okw’anali alambagira omu hekalu, abakulu b’abadahwa, n’abashamuka bayinja
28 bamubwira ntya: “Ku ruhusa luhe oli wajira ebila bintu? Changwa inde okuhere oruhusa l’okujira ebila bintu?”
29 Yesu ababwira: “Ingwerhe chibazo chiguma chonyine nababaza, mukanshubiza nani nababwira indi najira ebila bintu ku ruhusa luhe:
30 “Obubatizo bwa Yowane bwarhengaga emwa Mungu changwa emw’Abantu? Munshubize.”
31 Barhondera kuwaza n’okubwirana: “Rhukaderha oku bwarhengaga embingu, arhubaza, ‘Bichi byajaga byarhuma murhamuyemera?’
32 Aliko rhukapima rhwaderha mpu ‘Bwarhengaga emwa bantu, hebe...’ Baliyubahire abantu bulala baliri babona Yowane oku kweri aliri mulebi w’okuli.
33 Bava bashubiza Yesu ntya: “Rhurhenji.” Yesu naye ababwira: “Akaba ntyo nani intababwira indi najira ebila bintu ku ruhusa luhe.”
