Yayandikwaga na Marko 6:1-56
6 Arhenga eyola munda aja omu teritware y’emwabo n’abanafunzi bage bamukulikira.
2 Olusiku lwe Sabato lwagerereho, arhondera kuyigiriza omu sinagogi na banene omu baliri bamuyunviriza basomerwa n’okuderha ntya: “Ngahe oyula muntu akulaga ebila bintu byoshi? Bulagurhe ahabirwe obula bwengehe n’obuhashe b’okukola ebisomerene?
3 S’olala muranda mpaho oyula, mugala wa Mariya. Yakobo, Yosefu, Yuda na Simoni barhali bene-babo si? Na bali-babo rhurhali haguma nabo hanola si?” N’eju y’echola barhagwarhaga obwemere muye.
4 Aliko Yesu ababwira: “Omulebi anakengwa ezindi fasi zoshi olekere omu teritware y’emwabo, omu bantu b’omu buko bwage, n’omu mwabo.”
5 Nantyo arhachikolaga bisomerene binene ahola olekere okufumya balwala balebe bonyine omu kubaheba kw’efune.
6 Kweri, alisomerwe okubona nta bwemere baligwerhe. Agenda kuzunguluka omu mavilaje ey’ali ayigiriza.
7 Ava ahamagala balala 12 abarhuma babiri-babiri, abaha n’obuhashe b’okufukuza abazimu.
8 Kandi abarhegeka oku nta chintu bachiyikirage omu lugenzi olekere enkoni, barhahekaga omugati, eshaho y’ebilyo, changwa efuranga.
9 Aliko ababwira oku bayambale ebirato si barhahekaga myambaro ebiri.
10 Kandi ababwira: “Nk’omuntu abakaribisize omu mwage, mubere omola kugera amango mwagaluka.
11 N’efasi yoshi-yoshi barhabakaribisize changwa barhabayunvirize, amango mwamarhenga ahola, mukungurhe oluchuchu luli oku magulu menyu yi buba buhamirizi kubo.”
12 Bava bagenda eyi bali bahubiri okw’abantu bakwanene kuhungama.
13 Bafukuza bazimu banene, n’okushiga amavurha balwala banene n’okubafumya.
14 Mwami Herode ava ayunva eyola myazi, bulala ezino lya Yesu lyali lyamenyikene ku bantu banene, bulala baliri baderha: “Yowane Mubatiza afukire, che chirhumire agwerhe obuhashe b’okujira ebila bisomerene byoshi.”
15 Aliko abandi baliri baderha: “Eliya.” N’abandi baliri baderha: “Ali mulebi kuguma n’abalebi ba mira.”
16 Aliko Herode ayunvirhe eyola myazi aderha: “Ola Yowane nachaga erhwe yi wafukire.”
17 Bulala Herode alirhegekere bahebe Yowane omu prizo banamushweke eju ya Herodiya muka Filipo mwene-wabo Herode, bulala Herode abaga amurholere.
18 Yowane aliri abwira Herode ntya: “Orhakwanene kurhola muka mwene-wenyu.”
19 Eju y’echola Herodiya amubikira omujinya, alonza gurhe akamuyirha aliko arhakagalire.
20 Herode aliri ayubaha Yowane analiri amulanga bulala alimenyere okw’ali munyakunali na muchesibwa. Amango moshi aliri ayunva ebinwa bya Yowane aliri asima, n’eju y’echola amango aliri amuyunviriza aliri abula gurhe ajirage.
21 Herodiya apata orozo l’okuyirhisa Yowane oku lusiku lukulu l’okuburhwa kwa Herode, amango Herode arheganyiza abakulu, bakomanda b’abasoda, n’abantu bamenyikene be Galilaya efete.
22 Na mwali wa Herodiya ayinja azina asimisa Herode na boshi baliri basangira naye. Mwami abwira oyola munyere ntya: “Ompeme buli choshi olonzeze, nakuhacho.”
23 Ahakana* amubwira: “Buli chintu choshi wampema, nakuhacho; chiro n’enusu y’obwami bwani.”
24 Oyola munyere agenda abaza nyina: “Bichi mpemage?” Nyina amubwira: “Oheme erhwe lya Yowane Mubatiza.”
25 Ahola han’aho agenda emunda mwami ali omu kuntu amubwire eby’alonzeze amuhe. Aderha ntya: “Indozeze ompe erhwe lya Yowame Mubatiza oku sahani bonabuno.”
26 Chiro akaba oku byaligayisize mwami bwenene, arhalilonzeze kulahirira oyola munyere eby’ahemere bulala abaga ahakanire* embere z’abageni bage.
27 Ahola han’aho, mwami ava arhuma omulanzi agende alerhe erhwe lya Yowane. Omulanzi agenda omu prizo, acha Yowane erhwe
28 alilerha oku sahani. Aliha oyola munyere, n’oyola munyere alihekera nyina.
29 Abanafunzi ba Yowane bayunvirhe ntyo, bayinja barhola omubiri gwage baja kuguheba omu shinda.
30 Entumwa zayinja zazunguluka Yesu, zamubalira ebintu byoshi zajirire n’okuntu zayigirize.
31 Ababwira ntya: “Muyinje mwenyine rhuje aharhali bantu, mube nka mwahumuka bugeke.” Bulala abantu baliri bagenda, abandi banayinja omu kuntu barhaligwerhe chiro ebisanzi by’okulya.
32 Bava baja omu bwarho bagenda ahantu hali bwihunze omu kuntu babe bonyine.
33 Aliko bantu banene babona gurhe bagenda n’abandi bamenya oku bamagenda; abantu barhenga omu mavile moshi bagenda balibirha oku magulu babarhanga eyola.
34 Yesu arhengere omu bwarho ntya, abona bantu kamama, abayunvira obonjo bulala baliri nka ntama zirhaherhe mungeri, arhondera kubayigiriza bintu binene.
35 Bulala bwali bwamayinja bwayira, entumwa zamuyegera zamubwira ntya: “Hanola hali hale n’abantu n’obola bukala kuyira.
36 Obabwire bagende baje omu mavilaje n’omu mashwa ma hofi-hofi bachigulire ebilyo.”
37 Yesu abashubiza: “Mwabo mubahe ebi balya.” Nabo bamubwira: “Rhugule emigati ya dinari 200 yi rhuha abantu ebi balya si?”
38 Ababwira: “Mugwerhe migati enga? Mugende mulole!” Bamalire kulola, bamubwira: “Rhugwerhe migati erhano na fi ebiri.”
39 Abwira abola bantu boshi bayikale bigusho-bigusho omu bulambo.
40 Bava bayikala bigusho-bigusho bya bantu 100 n’ebya bantu 50.
41 Arhola eyola migati erhano n’ezola fi ebiri, alola embingu asalira omu kubigisha. Achagulanga eyola migati ayiha abanafunzi bage omu kuntu abanafunzi nabo bayihe abola bantu, agabira abantu boshi n’ezola fi ebiri.
42 Boshi balya bayugurha,
43 barhalagula na rhurhanda 12 rhuyunjwire ebichirachira by’emigati, buzira kuganja efi.
44 Abalyaga eyola migati baliri balume 5 000.
45 Buzira kulegama, abwira abanafunzi bage baje omu bwarho babe bamurhanga oku lwindi lunda lw’enyanja engambo ze Betsaida, oku yewe asezera abola bantu.
46 Amalire kubasezera, agenda oku musozi kusalira.
47 Lyabere egolo, ey’obwarho bukala buli ahagarhigarhi k’enyanja, aliko yewe alichili emushengo yenyine.
48 Bwabere hofi kucha, abona gurhe bili byakomerera abanafunzi bage kuvugama, bulala omulaba gwaliri gwabarhengerera embere. Ayinja ali alambagira oku menji, aliko aliri nk’oli walonza kubarhaluka.
49 Bamubwene y’alambagira oku nyanja, baderha ntya: “Rhwamayaganwa!” Babanda n’endulu.
50 Bulala boshi balimubwene bayunva buba bunene. Aliko ava ababwira ntya: “Mukomere! Nyono; murhayubahaga.”
51 Ajire omu bwarho ntya, omulaba gwachika. Basomerwa bwenene,
52 bulala barhaliza kumenya echisomerene ch’emigati bichi chaliderhere, okwenge emirhima yabo erhaliri y’okuyunva juba-juba.
53 Bamalire kuyambuka enyanja, bagera e Genezareti basika obwarho hofi n’ahola.
54 Aliko banarhengere omu bwarho ntya, abantu barhegera Yesu.
55 Balibirha kubwira abantu ba mw’eyola teritware yoshi, barhondera kuheba abalwala oku bipoyi banabaheka emunda bayunvirhe Yesu ali.
56 Na hoshi aliri aja habe omu mavilaje, omu vile changwa omu mashwa, abantu baliri baheba abalwala babo omu masoko, n’okumurhebereza abaleke chiro bahume oku mukunjo g’omwambaro gwage. Na boshi baliri baguhumako baliri bafuma.
