Yayandikwaga na Marko 3:1-35
3 Kandi Yesu aja omu sinagogi. Mwaliri omulume ohunzize okuboko.
2 Abafarisayo baliri balolereza Yesu bwinja-bwinja omu kuntu balole akaba afumya oyola muntu olusiku lwe Sabato, yi babona echi bakamusidakako.
3 Abwira oyo mulume walihunzize okuboko: “Yimanga oyinje ahagarhi.”
4 Kisha ababwira: “Esheriya eyemerere okujira ebinja changwa ebibi, okuyirha omuntu changwa okumuchungula olusiku lwe Sabato? Aliko basira.
5 Yesu ayusize kubalolako n’oburhe ey’ayunvirhe kahinda kanene eju y’okubona gurhe emirhima yabo ekomere, abwira oyola mulume ntya: “Lambula okuboko kwawe!” Akulambula, kwava kwafuma.
6 Ahola han’aho Abafarisayo bahuluka, babuganana n’abantu b’omu chama cha Herode omu kupanga okuntu bayirha Yesu.
7 Aliko Yesu arhenga ahola yewe n’abanafunzi bage baja oku mashinji, n’abantu banene barhenga e Galilaya ne Yudeya, bamukulikira.
8 Abantu kamama barhengerera e Yerusalemu, e Idumeya, oku lwindi lunda lwe Yordani, abandi barhengerera e Tiro ne Sidoni, boshi bayinja emunda Yesu ali amango bayunva oku bilolere byoshi aliri ajira.
9 Abwira abanafunzi bage bamurheganyize obwarho bugeke ajemo, y’abola bantu boshi barhamufundeza.
10 Bulala abaga afumizye balwala banene, abandi bantu baherhe amalwala makomere bayinja bamuzunguluka mpu yi bamuhumako.
11 Chiro n’abazimu amango moshi baliri bamubona baliri bafukama embere zage n’okuyama ntya: “Oli Mugala wa Mungu.”
12 Aliko aliri azigana kubakalihira, n’okubabwira barhayinjaga baderha yewe ali inde.
13 Azamukira oku musozi, ahamagala balala analilonzeze babagendage naye.
14 Akola echigusho ch’abantu 12 abayirika intumwa. Abola babalikwanene kumuherekeza, akabarhumire baje kuhubiri,
15 akabahere n’obushobozi* b’okufukuza abazimu.
16 Mw’echola chigusho ch’abantu 12 akolaga, mwaliri Simoni ahaga ezino lya Petro,
17 Yakobo na Yowane mwene-wabo, bagala ba Zebedayo (ab’ahaga ezino lya Bowanerje, k’okuderha “Bagala b’Omukungulo”),
18 Andereya, Filipo, Bartolomayo, Yakobo mugala wa Alfayo, Tadayo, Simoni Mukananayo,*
19 na Yuda Iskariyote wayinjaga kumulenganya.
Buzinda aja omu nju nguma ntya,
20 kandi abantu kamama bayinja ahola, omu kuntu Yesu n’abanafunzi bage barhabonaga chiro okuntu bakalya.
21 Aliko amango abantu b’omulala gwa Yesu bayunva ntyo, bayinja kumufarha bulala baliri baderha: “Asirehere.”
22 Kandi abandisi barhengaga e Yerusalemu baliri baderha: “Belzebuli* amufarhire, anali afukuza abazimu oku buhashe b’omurhegesi w’abazimu.”
23 Nantyo abahamagala aganira nabo kugerera emifano, ababaza: “Gurhe Shetani akafukuza Shetani?
24 Nk’obwami bwamaba m’okurhayunvikana,* burhakagenderera kubaho.
25 Nk’omulala guli m’okurhayunvikana, gurhakagenderera kubera guyimangire.
26 Konakuguma, nka Shetani ali achilwisa yenyine ali mu n’okurhayunvikana, arhakagenderera kubera ayimangire, s’ahola anaba ey’ali aja oku buzinda bwage.
27 Omu bukweri, nta muntu wakaja omu nju y’omulume ogwerhe emisi akayiba ebintu byage arhanarhangire kumushweka. Akwanene kurhanga kumushweka, anaja asahura ebintu bili omu nju yage.
28 Kweri imbabwirire, abantu nji bababalirwa buli choshi, bibe byaha bakolere changwa ebinwa by’okudukanga* Mungu bili gurhe.
29 Aliko owadukanga eroho lichesibwa arhakababalirwa, s’ahubwe aba ey’agwerhe echaha esiku n’amango.”
30 Yesu aderhaga ntyo bulala baliri baderha mpu, “Ali m’omuzimu.”
31 Nyina na bene-babo bava bayinja bayorha embuga barhuma omuntu aje kuhamagala Yesu.
32 Bulala bantu banene baliyikere eyi bamuzungulukire, bamubwira mpu, “Tala, nyoko na bene-benyu bayimangire embuga yibalonza bakubone.”
33 Aliko abashubiza: “Inde ye nyama, na ba nde ba bene-berhu?
34 Ava alola abaliyikere ahola bamuzungulukire, aderha: “Tala nyama na bene-berhu!
35 Buli yeshi oli wajira obulonza bwa Mungu, oyola ye mwene-werhu, ye mwali-werhu, ye na nyama.”
