Yayandikwaga na Marko 15:1-47
15 Bwanachere ntya, abakulu b’abadahwa, abashamuka n’abandisi, k’okuderha e Sanendrini yoshi yabuganana, bashweka Yesu n’okumuheka emwa Pilato.
2 Pilato amubaza: “We Mwami w’Abayahudi si?” Yesu ashubiza: “Wenyine waderhereko.”
3 Aliko abakulu b’abadahwa baliri bamusidaka bintu binene.
4 Naho Pilato ashuba kumubaza: “Ntacho washubiza si? Orhayunvirhe ebintu bingana abantu bakusidakire?”
5 Aliko kandi ntacho Yesu ashubize, n’eju y’echola Pilato asomerwa.
6 Buli lusiku lukulu, guvernere agendaga ashwekula mushwekwa muguma abantu bachishogere.
7 Agola mango haliri omulume mpu ye Baraba omu prizo walishwekerwe haguma n’abandi bantu baliri bapinga oburhegesi, babaga eyi bayirhire n’abantu omu kukaliha kwabo.
8 Abantu kamama bayinja barhondera kuhema Pilato abajirire nk’okw’arhula abajirira.
9 Abashubiza aderha: “Mulonzeze imbashwekulire Omwami w’Abayahudi si?”
10 Bulala Pilato alimenyere oku bongwa bu bwarhumire abakulu b’abadahwa balerha Yesu emunda ali.
11 Abakulu b’abadahwa bahira abantu mw’amashumi baheme Pilato alikule Baraba ahali ha Yesu.
12 Kandi Pilato ababwira: “Bobuno, gurhe njage najira oyula muli mwayirika mpu Mwami w’Abayahudi?”
13 Kandi abantu baderha n’omulenge gunene: “Omumanike oku murhi!”
14 Aliko Pilato ababwira: “Bulagurhe? Chintu chihe chibi ajirire?” Baja baderha n’omulenge gunene bwenene: “Omumanike oku murhi!”
15 Bulala Pilato alilonzeze kusimisa abola bantu kamama, alikula Baraba. Amalire kushurhisa Yesu, amuhaana baje kumumanika oku murhi.
16 Abasoda bamuheka embuga, k’okuderha aha mwa guvernere, bahamagala abandi basoda boshi.
17 Bamuyambisa omwambaro gw’erangi ly’omushonga, baluka echishema ch’emishaki bamuhiracho oku rhwe;
18 barhondera kumubwira: “Rhwalamusize Mwami w’Abayahudi!”
19 Echindi, baliri bamushurha olusheke oku rhwe, banamuchirako, banafukama n’okuyunama embere zage.
20 Bamalire kumushinyagulira, bamuhogola ogola mwambaro gw’erangi ly’omushonga bamuyambisa emyambaro yage. Baja bamuheka kumumanika oku murhi.
21 Kandi, muntu muguma aliri achigerera arhenga omu shwa mpu ye Simoni we Kirene eshe wa Alegizandre na Rufo, bamuseza aheke omurhi gw’amateso gwa Yesu.
22 Bamuheka efasi eyirikwa Golgota, omu kuchitafusiri k’okuderha, “Fasi y’Echihangasi.”
23 Bagerere ahola, bamuha edivayi echangirwe mw’edroge y’ebirhi biyirikwa manemane, aliko arhayemeraga ayinywa.
24 Bamumanika oku murhi, bagabana n’emyambaro yage omu kuyiyeshera esimbi yi bamenya ogu buli muguma arhola.
25 Bamumanikaga oku murhi eyi zikala hofi sa esharhu z’esezi.
26 Bayandika emyandiko eyerekene ebi bamusidakire: “Mwami w’Abayahudi.”
27 Echindi, bamanika bishambo bibiri eburhambi bwage, chiguma ekulyo n’echindi ekulembe.
28 ——
29 Abaliri bagera baliri bamushinyagulira, banazunguza amarhwe n’okuderha: “Ehe! Si walonzaga kushanduza ehekalu n’okuliyumbaka mu siku esharhu;
30 jaga wachichungula ochimanule k’ogola murhi gw’amateso.”
31 Intyo kon’oko, abakulu b’abadahwa n’abandisi baliri bamushinyagulira n’okuderha: “Aliri achungula abandi; aliko arhakagala kuchichungula!
32 Lekaga Kristu, Mwami we Izraeli amanuke oku murhi gw’amateso rhulole, rhumuyemere.” Chiro na balala balimanikirwe oku mirhi eburhambi bwage baliri bamudukanga.*
33 Yabere midi, omwizimya gwaba omu chihugo choshi kugera sa mwenda.
34 Zabere sa mwenda, Yesu ahamagala n’omulenge gunene aderha: “Eli, Eli, lama sabaktani?” Amango byamatafusiribwa k’okuderha: “Mungu wani, Mungu wani, bulagurhe wandekere?”
35 Baguma omu baliyimangire hofi bayunvirhe ntyo barhondera kuderha: “Muyunve! Ali ahamagala Eliya.”
36 Muntu muguma alibirha arhola eshifo, ayivuvuliza omu divayi ekalirire, ayihira oku lusheke, amuhayo okw’ayinywe, aderha: “Mumuleke! Leka rhulole akaba Eliya ayinja kumumanula.”
37 Aliko Yesu abanda endulu, ava afa.
38 Erido ly’ahachesibwa lyasharhukamo kurhenga enyanya kugera eshishi.
39 Omukulu w’abasoda waliyimangire ahola abere abona byoshi byabaga amango Yesu afa, aderha: “Kweri oyula aliri Mugala wa Mungu.”
40 Haliri na bakazi banene baliri bahenguza ebili byaba eyi banali hale. Mw’abola bakazi haliri Mariya we Magdala, Salome na Mariya nyina wa Yakobo mufi* na Yose,
41 baliri bazigana kumuherekeza n’okumukolera eby’akenere amango aliri e Galilaya, na bandi bakazi banene bagendaga naye amango azamukira e Yerusalemu.
42 Bulala lyalikala lili golo, lwanaliri lusiku lw’Amarheganyo, k’okuderha olusiku lunarhanga Esabato,
43 hayinja omulume okengerwe w’omu baraza ly’abashamuka b’ehano, mpu ye Yosefu we Armateya. Naye aliri alindira Obwami bwa Mungu. Achiha obushiru b’okuja kulola Pilato n’okumuhema omubiri gwa Yesu.
44 Aliko Pilato achibaza akaba Yesu anafire; ahamagala omukulu w’abasoda, amubaza akaba Yesu afire.
45 . Omukulu w’abasoda amalire kuyemeza oku kweri afire, Pilato ayemerera Yosefu arhole omubiri.
46 Amalire kulerha echiraka chikwirire bwenene chinachere, ayandagaza omubiri gwa Yesu, aguzingira mw’echola chiraka, agulyamikiza omu shinda abaga achire omu bale, ayichinga n’olubale luzibuzibu.
47 Mariya we Magdala na Mariya nyina wa Yose babera ahola eyi bali balola ahabamulyamikize.
