Yayandikwaga na Marko 8:1-38
8 Agola mango, kandi abantu kamama balizungulukire Yesu. Bulala nta chintu ch’okulya baligwerhe, ahamagala abanafunzi bage ababwira ntya:
2 “Yinayunvira abala bantu obonjo, bulala zikala siku esharhu ezila eyi bali haguma nani, na ntacho baherhe ch’okulya.
3 Inkabaleka bagende emwababo nzara, baholera omu njira, na baguma mubo bali ba hale.”
4 Aliko abanafunzi bage bamushubiza: “Ngahe omuntu akakula emigati yayugusya abala bantu boshi, n’enola munda hali hale n’abantu?”
5 Yesu ava ababaza mpu “Mugwerhe migati enga?” Bamushubiza: “Mushanvu.”
6 Abwira abantu bayikale ahashi. Arhola ela migati mushanvu, asalira abwira Mungu koko. Ayichagulanga, ayiha abanafunzi bage, nabo bayigabira abola bantu kamama.
7 Baligwerhe n’orhufi rhugekegeke, Yesu agisharho, abwira abanafunzi bage nazo bazigabire abantu.
8 Boshi balya bayugurha, barhalagula n’ebichira-chira byasigalaga, bayunjuza rhurhanda mushanvu rhuzibuzibu.
9 Abalyaga baliri hofi balume 4 000. Enyuma waho Yesu abasezera.
10 Ahola han’aho ava aja omu bwarho n’abanafunzi bage bagenda omu teritware ye Dalmanuta.
11 Okw’anali ahola, Abafarisayo bayinja barhondera kumujisa buhaka, n’omu kumurhega bamubwira abayereke echimenyeso chirhengere embingu.
12 Achiyunva kubi, ayisa bwenene, aderha: “Bulagurhe echila chizazi yichalonza echimenyeso? Kweri imbabwirire, inta chimenyeso n’echiguma echila chizazi chahabwa.”
13 Ava abaleka, aja omu bwarho agenda oku lwindi lunda lw’enyanja.
14 Aliko abanafunzi baliyibagire kuheka emigati, na ntacho baliherhe omu bwarho ch’okulya olekere mugati muguma gonyine.
15 Yesu abakomereza ababwira: “Mufungule amasu, munachilange n’elevire* y’Abafarisayo n’eya Herode.”
16 Barhondera kujira obuhaka bonyine oku bonyine bulala nta migati baliherhe.
17 Yesu abimenyere, ababwira ntya: “Bulagurhe muli mwajira obuhaka eju y’emigati? Kugera bunola murhaza kurhegera, murhanaza kuyunva? Emirhima yenyu echikomere nka bale si?
18 ‘Chiro akaba oku mugwerhe amesho, murhali mwabona, n’amarhwiri menyu marhali mayunva? Murhayibukire
19 ela migati erhano nachagulangaga yayugusya balume 5 000; mwaliyunjwize rhurhanda rhunga rhw’ebichira-chira byasigalaga?” Bamubwira: “Rhurhanda 12.”
20 “N’amango nachagulangaga migati mushanvu eyugusya balume 4 000, rhurhanda rhunga rhw’ebichira-chira byasigalaga mwalirhalagwire?” Bamushubiza mpu “Mushanvu.”
21 Eju y’echola ababwira: “Kugera bunola murhanaza kuyunva?”
22 Bagerere e Betsaida bamulerhera omuntu w’empumi bamurhebereza amuhumeko.
23 Afarha oyola muntu w’empumi okuboko amukula mw’eyola vilaje. Achira oku mesho m’oyola muntu w’empumi, amuheba kw’efune amubaza: “Hali ech’oli wabona?”
24 Oyola muntu ayinamula amesho aderha: “Yinabona abantu, aliko bali nka mirhi eli yalambagira.”
25 Yesu ashuba kuhuma oku mesho m’oyola muntu, ava afuma arhondera kubona na buli chintu bwinja.
26 Yesu amubwira: “Oje emwawe aliko orhachigeraga mw’eyila vilaje.”
27 Yesu n’abanafunzi bage bagenda omu mavilaje me Kayisariya ke Filipi. Oku banali omu njira, Yesu arhondera kubaza abanafunzi bage: “Abantu yibaderha oku nyono indi nde?”
28 Bamushubiza: “Yowane Mubatiza, aliko abandi bali badeha mpu Eliya, n’abandi yibaderha mpu muguma omu balebi.”
29 Nabo ababaza echola chibazo chen’echola, aderha: “Bobuno mwabo muli mwaderha oku indi nde? Petro amushubiza: “Woyo we Kristu.”
30 Abakomereza oku nta muntu n’omuguma bapimage babwira yewe ali nde.
31 Kandi arhondera kuyigiriza abanafunzi bage oku Mwen’omuntu akwanene kugera mu mateso manene, n’abakulu b’abadahwa n’abandisi banamulahira, anayirhwa, n’enyuma wa siku esharhu anafuka.
32 Aliri ababwira ebyola bintu byoshi wazi. Aliko Petro amuheka eburhambi arhondera kumukalihira.
33 Yesu ava ahindamuka, alola abanafunzi bage akalihira Petro n’okumubwira: “J’enyuma zani, Shetani! Bulala amawazo oherhe marhali mawazo ma Mungu, si mawazo m’abantu.”
34 Ahamagala abantu kamama haguma n’abanafunzi bage, ababwira: “Buli yeshi olonzeze kunkulikira, akwanene achihakane, anaheka omurhi gwage gw’amateso n’okugenderera kunkulikira.
35 Bulala buli yeshi walonza kuchungula akalamo kage akaheza, aliko owaheza akalamo kage eju yani n’eju y’emyazi minja akachungula.
36 Omu bukweri, bichi omuntu akaba ey’ayungukire nk’apatire ebintu byoshi bili omu gulu aliko akaheza akalamo kage?
37 Omu bukweri, bichi omuntu akahingana n’akalamo kage?
38 Bulala buli yeshi wanyunvira eshoni mw’echila chizazi chirhaherhe bwemere chinajira ebyaha, Mwen’omuntu naye nj’amuyunvira eshoni amango nj’ayinja omu bukuze bw’Eshe haguma na bamalayika bachesibwa.”
Mahugulo m'efo
^ Ao “engezo.”
