Yayandikwaga na Marko 1:1-45
-
Amahubiri ma Yowane Mubatiza (1-8)
-
Okubatizwa kwa Yesu (9-11)
-
Shetani amageregeza Yesu (12, 13)
-
Yesu amarhondera kuhubiri omu Galilaya (14, 15)
-
Yesu amahamagala abanafunzi bage barhanzi (16-20)
-
Okufukuza omuzimu (21-28)
-
Yesu amafumya bantu banene e Kapernaumu (29-34)
-
Yesu ali asalira ahali yenyine (35-39)
-
Yesu amafumya omuntu walilwere ebibenzi (40-45)
1 Omurhondero gw’emyazi minja oku bilolere Yesu Kristu, Mugala wa Mungu:
2 Nk’oku binayandikirwe omu chitabu ch’omulebi Isaya: “(Tala! Narhuma omurhumwa wani embere zawe, wakurheganyiza enjira.)
3 Omulenge g’omuntu oli wayamuza guli gwayunvikana omu rungu: ‘Murheganye enjira ya Yehova, mulambule amabarabara mage.”
4 Yowane Mubatiza aliri omu rungu ey’ali ahubiri abantu oku bakwanene kubatizwa omu kuyerekana oku bahungamire ebyaha.
5 Abantu boshi b’omu Yudeya na boshi balilamire omu Yerusalemu, baliri baja emunda ali banahungama ebyaha byabo embere z’abantu boshi, anababatiza* omu Lwinji Yordani.
6 Yowane agendaga ayambala omwambaro gw’amoya m’engamiya, n’omukaba g’oluhu omu mankinya. Ebilyo byage maliri mahanzi* n’obuki bw’elubala.
7 Aliri ahubiri omu kuderha ntya: “Hali omuntu wayinja enyuma zani okomere kundusha, intanakwanene kuyunama mpu nashwekula akamba k’ebirato byage.
8 Nyono indi nababatiza n’amenji, aliko yewe nj’ababatiza n’eroho lichesibwa.
9 Mw’ezola siku, Yesu arhenga e Nazareti ye Galilaya, Yowane amubatiza omu Yordani.
10 Okw’anayubuluka omu menji ntya, abona embingu zafunguka, n’eroho lichesibwa lyamuyandagalirako nka pijo.*
11 N’omulenge gwarhenga embingu gwaderha: “Oli Mugala wani, muzigirwa wani; nakuyemerere.”
12 Aho han’ahola, eroho lichesibwa lyayerekeza Yesu omu rungu.
13 Amala siku 40 omu rungu ey’ali ageregezwa na Shetani. Aliri n’ebinyalubala, aliko bamalayika baliri bamukolera eby’akenere.
14 Bamalire kufunga Yowane, Yesu aja e Galilaya ey’ali ahubiri emyazi minja ya Mungu
15 omu kuderha ntya: “Akasanzi kali karheganyizwe kahikire, n’Obwami bwa Mungu buli hofi. Muhungame munagwarhe obwemere omu myazi minja.”
16 Oku Yesu anali alambagira oku chinyantambi ch’enyanja, abona Simoni na Andreya mwene-wabo bali barhoza emilaga yabo omu nyanja, bulala baliri basyana.
17 Yesu ava ababwira: “Munkulikire, nabajira basyana b’abantu.”
18 Ahola han’aho, bava baleka emilaga yabo bamukulikira.
19 Abere nk’ashegera ahambere bugeke, abona Yakobo na Yowane mwene-wabo bagala ba Zebedayo, bali omu bwarho bwabo eyi bali bahangula emilaga yabo,
20 han’aho abahamagala. Bava baleka eshe, yekala Zebedayo omu bwarho n’abakozi, bakulikira Yesu.
21 Barhenga ahola baja e Kapernaumu.
Okwe Sabato yanarhondera ntya, aja omu sinagogi arhondera kuyigiriza.
22 Abantu basomerwa n’okuntu aliri ayigiriza, bulala aliri abayigiriza nka muntu ogwerhe oburhwali, s’arhali kuguma n’abandisi.
23 Mw’akola kasanzi kan’ako, omola sinagogi mwaliri omuntu walifarhirwe n’omuzimu, ayama ntya:
24 “Ego Yesu we Nazareti, hali echibazo rhugwerhe nawe si? Wayinjire kurhuharabisa* si? Imenyere bwinja-bwinja oli inde, oli Muchesibwa wa Mungu!”
25 Aliko Yesu akalihira oyola muzimu n’okumubwira: “Sira, onamurhengemo!”
26 Oyola muzimu amalire kushaganya-shaganya oyola muntu n’okuyamuza n’omulenge gwage goshi, amurhengamo.
27 Abantu boshi bava basomerwa barhondera kubiganirako n’okubazana: “Bye bichi ebi? Ezila zili nyigirizo zihyahya! Agwerhe n’oburhwali b’okurhegeka abazimu, banamukenga.”
28 Emyazi oku bilolere Yesu yava yayenera juba-juba omu Galilaya yoshi.
29 Barhengere omu Sinagogi baja emwa Simoni na Andereya haguma na Yakobo na Yowane.
30 Nazala wa Simoni alilyamire bulala aligwerhe ehoma. Han’aho babwira Yesu okw’alwere.
31 Yesu aja ahaliri, amufarha efune n’okumuyimanza. Ehoma lyachika, arhondera kubarheganyiza eby’okulya.
32 Lyabere golo, ey’ezuba lyamazika, abantu barhondera kumulerhera boshi balwere na boshi bafarhirwe n’abazimu.
33 Abantu boshi b’omu vile balichigushire embere w’omulyango gw’enju Yesu alirimo.
34 Afumya abantu baligwerhe amalwala ma buli lubero, afukuza na bazimu banene. Aliko arhayemereraga abola bazimu baderha, bulala balimenyere oku ye Kristu.*
35 Emiseke-miseke, eyi hachili omwizimya, Yesu azuku aja ahali bwihunze, arhondera kusalira.
36 Aliko, Simoni n’ababo bamulonza bwenene
37 bamubona, bamubwira ntya: “Buli muntu ali akulonza.”
38 Aliko abashubiza: “Rhugende omu zindi vile zili hofi, y’impubiri n’eyola munda bulala echola che charhumaga nayinja.”
39 Agenda ey’ali ahubiri omu masinagogi moshi me Galilaya, ey’ali afukuza n’abazimu.”
40 Eyola munda nayo omuntu olwere ebibenzi ayinja, afukama, arhondera kumurhebereza omu kuderha ntya: “Wekalamawe, akaba olonzeze wakanfumya.”
41 Yesu amuyunvira obonjo, alambula efune yage, amuhumako n’okumubwira: “Indonzeze! Fuma.”
42 Ahola han’aho, ebibenzi byamuhwako, afuma.
43 Yesu amubwira agende aliko amuha erhegeko
44 amubwira: “Ochihangane nta muntu obwirage, s’ogende oje kuchiyerekana em’omudahwa onahane entulo y’okucheswa kwawe nk’oku Musa arhegekaga, yi buba buhamirizi kubo.”
45 Aliko ok’oyola muntu anagenda ntya, arhondera kubalira buli yeshi ebyamuhikire, n’okubigeza buli hoshi, omu kuntu Yesu arhakachigalire kuja omu vile oku mugaragaro. Aliri ayorha omu fasi zili bwihunze. Aliko abantu b’eyi n’eyi baliri bayinja emunda ali.
