Yayandikwaga na Marko 12:1-44
12 Naho arhondera kubayigiriza kugerera emifano: “Mulume muguma alihingire eshwa ly’emizabibu, alizungulusa olugurhu, achimbula mw’efasi y’okukandira mw’edivayi, ayumbaka m’omunara,* naho alilekera abahinzi abalamira omu chindi chihugo.
2 Omu mango m’okushalula, arhuma omukozi wage emw’abola bahinzi omu kuntu bamuhe oku matunda ma mw’elyola shwa ly’emizabibu.
3 Aliko bamufarha bamushurha n’okumugalula maboko momu.
4 Ashuba kubarhumira owindi mukozi aliko bamushurha oku rhwe n’okumusuzagura.
5 Arhuma owindi, yewe bamuyirha. Arhuma n’abandi banene; baguma mubo babakubirha, abandi babayirha.
6 Aliyorhene windi muguma, yekala omugala muzigirwa. Abarhumiraye ey’ali achibwira mpu ‘Bakenga mugala wani yewe.’
7 Aliko abahinzi babwirana, ‘Oyula yekwanene kuyima.’ Muyinje rhumuyirhe yi rhuyorhana elila shwa.’
8 Bava bamufarha bamuyirha, bamukabula eburhambi bw’eshwa.
9 Gurhe nyina eshwa nj’ajira? Nj’ayinja anayirha abola bahinzi n’okuha abandi elyola shwa.
10 Ka murhasaga kusoma olwandiko luderhere: ‘Ebale abanayumbaka bakabulaga lye lyayinjire kuba bale lizibuzibu ly’oku pembe.
11 Lyarhengaga emwa Yehova, linali lya kusomeza omu masu merhu’?”
12 Eju y’echola balonza bamufarhe bulala baliyinji okw’ahanaga ogola mufano eju yabo, aliko bayubaha abantu kamama. Bamuleka bagenda.
13 Enyuma waho bamurhumira baguma omu Bafarisayo n’ab’omu chama cha Herode omu kuntu bamufarhire omu binwa byage.
14 Bahikire ahali bamubwira ntya: “Mwalimu, rhuyinji ok’onayigiriza obukweri orhanajira ebintu mpu y’abantu bakuyemera, bulala orhalola eshusho ly’abantu n’eby’onayigiriza oku bilolere Mungu biba by’okuli. Biyemererwe n’esheriya okulipa Kayizari ekoli changwa nanga?
15 Rhukwanene kulilipa changwa rhurhakwanene kulilipa?” Abere arhegera obulyalya bwabo, ababwira ntya: “Bulagurhe muli mwalonza kuntega? Munderhere echicheri ch’edinari rhuchiloleko.”
16 Balerha chiguma, naye ababwira: “Eyila foto n’ogula mwandiko byande?” Bamushubiza mpu “Bya Kayizari.”
17 Naho Yesu aderha: “Muhe Kayizari ebintu bya Kayizari, aliko ebintu bya Mungu mubihe Mungu.” Echishubizo chage chabasomeza bwenene.
18 Abasadukayo banaderha mpu harhakaba obufuke, bayinja bamubaza:
19 “Mwalimu, Musa alirhuyandikire oku nka mwene wabo muntu afire akaleka omukazi buzira mwana, mudorho w’oyola wafire akwanene kurhola oyola mukazi y’arhondereseza mwene wabo oluburho.
20 Haliri balume mushanvu ba nda nguma. Ow’oburhanzi arhola omukazi aliko afa buzira mwana.
21 Owakabiri amurhola aliko naye afa buzira kuleka omwana. Owakasharhu konako.
22 Mu boshi oku banaba mushanvu ntaye walekere omwana. Buzinda oyola mukazi naye afa.
23 Bobuno si oku bufuke, nj’aba muka nde? Bulala boshi balimurholere aba mukabo.”
24 Yesu ababwira: “Che chirhumire echola muli omu magosa bulala murhenji amandiko murhenji n’emisi ya Mungu.
25 Bulala amango nji bafuka, abalume nji barhashaba n’abakazi nji barhashabwa, si nji baba kuguma na bamalayika b’omu mbingu.
26 Aliko oku bilolere obufuke bw’abafire murhasomaga omu chitabu cha Musa, omu ngani elolere echishaka ch’emishaki oku Mungu aliderhere: ‘Indi Mungu wa Abrahamu, Mungu wa Isaka na Mungu wa Yakobo’?
27 Arhaba Mungu w’abafire, si Mungu w’abazene. Muli omu magosa bwenene.”
28 Muguma omu bandisi ageraho ayunva bali bajira obuhaka. Omu kuba amenyere oku Yesu abashubize bwinja bwenene, amubaza: “Lihe lye rhegeko ly’oburhanzi oku mandi moshi?”
29 Yesu ashubiza: “Ely’oburhanzi lye linola, ‘Yunva, Izraeli we, Yehova Mungu werhu ali Yehova Muguma,
30 onakwanene kuzigira Yehova Mungu wawe n’omurhima gwawe goshi, n’obugumaguma bwawe boshi, n’obwenge bwawe boshi, n’emisi yawe yoshi.’
31 Elyakabiri lye linola: “Okwanene kuzigira omuturanyi wawe nk’ok’ochizigira.’ Nta lindi rhegeko libaho likulu kulusha amola.”
32 Oyola mwandisi amubwira: “Mwalimu waderhere bwinja, ebintu bipatene n’okuli. ‘Mungu aba Muguma, na nta windi mungu obaho omulushire’;
33 n’okumuzigira n’omurhima goshi, n’obwenge boshi, n’emisi yoshi n’okuzigira omuturanyi nk’ok’ochizigira bili by’akamaro bwenene kulusha entulo zoshi z’okusirezwa n’enterekero.”
34 Yesu abona okw’ashubize n’obwenge, amubwira: “Orhali hale n’Obwami bwa Mungu.” Ntaye wachipatire obushiru b’okumubaza echibazo.
35 Yesu agenderera kuyigiriza omu hekalu aderha: “Bulagurhe abandisi banaderha oku Kristu ali mugala wa Daudi?
36 Kugerera eroho lichesibwa, Daudi yenyine aliderhere, ‘Yehova abwirire Nahamwerhu ntya: “Yikala ewa kuboko kwani kw’ekulyo kugera amango nahira abanzi bawe eshishi w’ebishando byawe.”’
37 Daudi yewe yenyine alimuyirikire Nahamwabo, bobuno gurhe akaja aba mugala?”
Abantu kamama baliri bayunviriza Yesu n’obusime.
38 Yesu agenderera kuyigiriza aderha: “Muchilange n’abandisi basima kuchilambagiza eyi bayambere amakanzo, banasima abantu bayinje babalamusa omu masoko,
39 basima n’ebichumbi by’embere omu masinagogi n’efasi z’olukengo bwenene omu fete.
40 Banarhola hyoshi abashumbakazi baligwerhe, banasalira n’amasala malehere yi bachiyerekana. Inji bachirwa echihano chikalihire.”
41 Enyuma waho ayikala emalanga-mbere m’esanduku y’okuhira mw’entulo, arhondera kulolereza gurhe abantu kamama yibarhozeza efuranga omu sanduku, haliri n’abachire baliri barhozeza mu bicheri binene.
42 Naho, mushumbakazi muguma w’omukene ayinja, arhozeza mu bicheri bibiri by’akachiro kageke.
43 Yesu ahamagala abanafunzi bage ababwira: “Kweri imbabwirire, oyula mushumbakazi w’omukene yi wahirire mu zinene kulusha abandi boshi bahirire efuranga omu sanduku.
44 Bulala boshi baliri bahira mw’ezi basigazaga, aliko yewe, chiro akaba okw’ali mukene, ahirire mu hyoshi analiherhe; byoshi aliherhe y’agenderera kulama.”
Mahugulo m'efo
^ Inju elehere abalanzi b’eshwa bagendaga baberamo yi babona akaba nta bezi changwa enyama zakayona zili zaja omu shwa.
