Yonn adan sé pibèl moman-la on misyé é madanm a-y ka viv, sé lèwvwè tibébé a yo ka fèt. Men, menmsi sé paran-la enmé timoun a yo onlo, yo pa vlé i rété on tibébé tout vi a-y. An réyalité, si timoun-la pa té ka grandi, yo té’é enkyèt toubònman. Menmjan-la, Jéova ka kontan lè i ka vwè-nou ka koumansé aprann dé biten asi-y, men i vé pa kè nou rété a nivo-lasa (1 Kor. 3:1). Jéova vé pa nou rété dé timoun adan lavérité. Okontrè, i vé nou vin dé « granmoun ». Adan Labib, mo grèk la yo tradui la é ki bay « granmoun » pé vé di « mati », « pawfè » oben « antyè » (1 Kor. 2:6). Pi tan ka pasé é pi on tibébé ka grandi pou vin on granmoun. Menmjan-la osi, pi nou ka aprann konnèt Jéova é pi nou ka vin bon zanmi èvè-y. Kifè nou ka vin dé krétyen dè plizanpli mati. Nou ka tou konprann kè menmsi nou ja vin mati, fò pa nou jen arété pwogrésé (1 Tim. 4:15). w24.04 2 § 1, 3.

Siwvwè yo té ka mandé-w : « Ka Jéova yé a-w ? » Ka ou té’é réponn ? Sèten ou té’é di : « Sé Pap’an mwen, Bondyé an mwen é Zanmi an mwen. » Pétèt osi ou té’é sonjé onlo dòt tit yo ka sèvi èvè yo pou kriyé Jéova. Men, ès ou té’é di kè Jéova sé Sila ki ka envité-w anba tant a-y la ? Wa David konparé lanmityé-la ki ni la antrè Jéova é adoratè a-y ki fidèl èvè on moun ki ka rèsèvwa envité a-y anba tant a-y. Mi sa i maké : « O Jéova, kimoun ki ké envité adan tant a-w ? Kimoun ki ké pé rété adan montangn a-w ki sakré ? » (Sòm 15:1). Bondyé sèvi èvè lèspri sen pou fè-yo maké sé pawòl-lasa. Sé pawòl-lasa ka montré-nou kè Jéova pé envité-nou vin anba tant a-y, kivédi a vin zanmi a-y. Avan i koumansé kréyé tout biten, Jéova té tousèl. Men lè i kréyé Gason a-y, prèmyé timoun a-y, Jéova té kon on moun ki ka rèsèvwa prèmyé envité a-y anba tant a-y, é a pa ti kontan i té kontan fè sa. Labib ka di kè Jézi té Gason-la Bondyé « té pli enmé la » é kè Gason-lasa ‘té toujou kontan lè i té douvan-y’ (Pwov. 8:30). w24.06 2 § 1-3.

Éséyé imajiné sa : On foulmoun ki ni plis ki 340 000 nonm adan sanblé pou mèt David wa asi tout pèp a Izrayèl. Pannan 3 jou, sé nonm-lasa rété koté sé mòn-la ki toupré Ébron. Yo ka palé é yo kontan chanté pou ba Jéova louwanj (1 Kron. 12:39). Anmitan a foulmoun-lasa ni on tiboug non a-y sé Zadòk. Onlo moun pa’a menm ka rèmawké kè i la. Men Jéova vwè-y é i fè ansòt pou nou sav kè i té la (1 Kron. 12:22, 26-28). Zadòk sé té on prèt ki té ka travay ansanm èvè Abyata gran prèt-la. Bondyé té ba Zadòk onlo sajès, é grasa sajès-la i té ni la, i té ka rivé konprann ka ki té volonté a Bondyé (2 Sam. 15:27). Sé té on nonm ki té ni onlo kouraj. Pannan sé dènyé jou-la nou ka viv la, Satan ka pòté bon mannèv pou vwè kijan i ka fè-nou pèd fwa an nou (1 Pyè 5:8). Alò touttan Jéova po’o détwi Satan é mond méchan la nou ka viv adan-y la, nou bizwen kouraj pou nou andiré (Sòm 31:24). Nou osi nou pé montré-nou brav kon Zadòk. w24.07 2 § 1-3.

Lè Jéova fè 1^é misyé-la é 1^é madanm-la, Adan é Èv, i té vé yo ni tchè-kontan. I ba-yo on bèl ti koté pou yo rété é i fè-yo on bèl ti kado : i mayé-yo. I ba-yo osi on travay a fè ki té entérésan toubònman. Fò yo té plen latè èvè pitit a yo, é fò yo té fè toutlatè vin on paradi kon Jadendédèn-la. Onsèl biten Jéova té défann-yo fè. I avèti-yo é i di-yo kè siwvwè yo pa té ka kouté, é kè yo té ka ba-y do, yo té’é mò. Nou ja konnèt sa ki pasé apré. On zanj méchan ki pa té enmé ni lézimen ni Bondyé pousé Adan é Èv pa kouté Bondyé é malérèzman sé sa menm yo fè. Olyé yo té fè Pap’a-yo ki té enmé-yo konfyans, yo té préféré péché pito. Jéova té ja avèti-yo. Konmdi-konmfèt, jou-la yo péché la, yo koumansé vin vyé é yo fin pa mò (Jén. 1:28, 29 ; 2:8, 9, 16-18 ; 3:1-6, 17-19, 24 ; 5:5). w24.08 3 § 3.

Jéova é Jézi vé nou ni lakontantman. Mi sa moun-la ki maké Sòm 119:2 ni lokazyon di : « Tchè-kontan pou séla ki ka kouté sa Jéova ka fè-yo sonjé la, ki ka chèché-y èvè tout tchè a yo. » É mi sa Jézi ni lokazyon di osi : « Tchè-kontan […] pou séla ki ka tann pawòl a Bondyé é ki ka mété-y an pratik ! » (Lik 11:28). Nou ka adoré Jéova é nou ni tchè-kontan lè nou ka li Pawòl a Bondyé touléjou é pas nou ka mèt sa nou ka aprann adan-y an pratik (Jak 1:22-25). Sa enpòwtan pou nou fè Jéova plézi (Ékl. 12:13). Anplisdisa, nou ka antann-nou pibyen èvè moun an fanmi an nou é nou ka vin pi bon zanmi èvè frè é sè a lasanblé-la. Souvantfwa osi, sa ka pwotéjé-nou pou nou pa jwenn sé difikilté-la kè moun ki pa’a suiv komandman a Jéova ka jwenn. Wa David ni lokazyon palé dè Lwa a Bondyé, dè sé lòd-la i ka bay la é dè jijman a-y adan dé ti chanté. Mi sa i di anrapò èvè sa : « Moun ki ka rèspèkté-yo ka jwenn on gwo rékonpans » (Sòm 19:7-11). w24.09 2 § 1-3.

Jéova ka vwè tousa sèwvitè a-y ka viv. I ka vwè lè nou kontan é i lè nou tris osi (Sòm 37:18). Lè i ka vwè kè nou ka fè tousa nou pé pou nou sèvi-y magré nou ni bobo an tchè an nou, sa ka touché-y toubònman ! I anvi soutyenn-nou é i anvi konsolé-nou. Sòm 147:3 ka di kè Jéova ka pansé bobo a moun tchè a yo fann. Sa vé di kè lèwvwè tchè a on moun an bobo, Jéova ka pran swen a-y èvè onlo tandrès. Men ka nou pé fè pou i pé sa pran swen an nou èvè tandrès ? An-nou pran on ègzanp pou nou konprann sa. Lè on moun malad bon malad la, on bon dòktè pé édé-y onlo menm. Men pousa, fò moun-la ki malad la fè tousa dòktè-la ka mandé-y fè. Menmjan-la, adan Pawòl a-y, Jéova ka palé ba moun tchè a yo an bobo é i ka ba-yo konsèy èvè onlo lanmou. w24.10 6 § 1-2.

Avan, lè piblikasyon an nou té ka palé dè sa ki ké rivé moun ki pa jis, ka yo té ka di ? Yo té ka èspliké kè moun Jéova détwi pé’é résisité. Adan Labib, ni plizyè istwa ki ka montré kijan Jéova ni lokazyon jijé moun ki pa té jis. Pa ègzanp, ni tout sé moun-la Jéova détwi la asi latè pannan Délij-la. Ni sé 7 nasyon-la ki té ka rété asi Tè-la Bondyé té pwomèt pèp a-y la é kè i té mandé sé Israélit-la détwi la. É ni osi sé 185 000 sòlda asiriyen la kè zanj a Jéova tchouyé adan onsèl lannuit (Dét. 7:1-3 ; Iz. 37:36, 37). Lèwvwè nou ka pran tan analizé sé ègzanp-lasa, ès Labib ka ban-nou asé enfòwmasyon pou nou pé di kè lè Jéova détwi tout sé moun-lasa, sé té pou touttan é kè yo pé’é jen résisité ? Awa, nou pé pa di sa. Adan sé ègzanp-la nou sòti vwè la, nou pa sav kijan Jéova jijé chakmoun é nou pa sav nonplis si sé moun-la i détwi-la té ni lokazyon aprann konnèt-li é rèpanti-yo. w24.05 3 § 5-7.

On jou, Jézi bay on ègzanp. I palé dè on vèv ki pa té las ay vwè on jij pou mandé-y jijé afè a-y èvè jistis. Disip a Jézi té pé konprann byen sa madanm-lasa té ka rèsanti pas an tan a yo, té ni onlo moun ki té ka sibi enjistis (Lik 18:1-5). Nou osi nou pé konprann sa madanm-lasa té ka rèsanti, pas sa ja rivé-noutout kè on moun fè-nou on biten ki pa bon. Jòdijou nou lantouré èvè moun ki ja ka fè-yo on mové lidé asi lézòt avan menm yo konnèt-yo. Ni moun osi yo méchan, é ni dòt ankò yo toujou bizwen ni plis ki lézòt. Kifè délè yo pé rivé maltrété-nou é sa pa’a siwprann-nou (Ékl. 5:8). Men, si sé on frè oben on sè adan lasanblé-la ki fè-nou on méchansté, sa pé désèvwa-nou toubònman. Nou ka tou konprann kè frè é sè an nou pa kon sé moun-la ki ka pèwsékité-nou la oben kon séla ki kont nou la. Apa pa èspré, yo ka fè-nou ditò. Sa pé rivé tou senplèman pas yo pa pawfè. Nou pé aprann onlo biten asi jan Jézi réyaji douvan tout méchansté lènmi a-y fè-y. Si nou ka rivé montré-nou pasyan lèwvwè lènmi an nou ka fè nou méchansté, a pa èvè frè é sè an nou nou pé’é pran pasyans ! w24.11 2 § 1-2.

An tan a Labib, sa sé moun-la té ka manjé plis, sé té pen (Jén. 14:18 ; Lik 4:4). Manjé-lasa té tèlman enpòwtan kè délè Labib ka sèvi èvè lèmo « pen » pou i palé dè manjé (Mat. 6:11 ; Akt 20:7, gadé osi nòt-la adan Bib-la ki fèt pou étidyé la an fransé). Jézi itilizé pen adan 2 mirak i fè é kè onlo moun konnèt (Mat. 16:9, 10). Nou ka touvé yonn adan yo adan Jan chapit 6. Apré yo préché bon préché la, sé apòt-la las toubònman, kifè yo ka santi yo bizwen pozé kò-la tibwen. Yo ka pran on bato èvè Jézi, yo ka travèsé lanmè Galilé pou ay lòt koté-la (Mawk 6:7, 30-32 ; Lik 9:10). Yo ka rivé Bètsayid, é yo ka touvé on ti koté apa. Men, moun tann-di kè Jézi té la. Alò, adan on ti moman, onpakèt moun vin pou vwè-y. Olyé i fè konsi yo pa té la, èvè onlo bonté, Jézi ka pran tan a-y pou anségné-yo dé biten asi Wayòm-la é pou géri moun ki malad. Konm i té ja ta, sé disip-la ka mandé-yo kijan tout sé moun-la ki la la ké touvé on biten pou yo manjé. Pétèt sèwten adan sé moun-la té ni on ti dèkwa, men lamajorité adan yo ké oblijé pati pou ay chèché manjé (Mat. 14:15). w24.12 2 § 1-2.

Prèmyé paran an nou, Adan é Èv, té pawfè é yo té ka viv adan on bèl paradi (Jén. 1:27 ; 2:7-9). Yo té’é pé menné on vi ki bèl toubònman é yo té’é pé viv pou touttan. Men on jou, tout biten-la enn chalviré. Jéova fè-yo sòti adan paradi-la é alèla yo pa té’é pé viv pou touttan ankò. Ka yo lésé ba timoun a yo ? Mi sa Labib ka réponn : « Péché-la rantré an mond-la pa onsèl nonm [Adan], é lanmò rantré pa péché-la, kifè lanmò rantré asi toutmoun pas toutmoun té péché » (Wom. 5:12). Sa Adan lésé ban nou la, sé péché-la, é sé péché-la ki ka fè si nou ka mò. Péché-la kon on dèt, é ponyonn adan nou pé pa ranbousé dèt-lasa (Sòm 49:8). Labib ka konparé lè nou ka fè on péché èvè lè nou ka doué on moun (Mat. 18:32-35). Lèwvwè nou ka fè on péché, sé konsi sé doué nou ka doué Jéova. Kifè, Jéova andwa mandé-nou péyé pou péché nou fè. Siwvwè Jéova pa té fè on biten pou padonné péché an nou, sé enki lèwvwè nou té’é mò, nou pa té’é doué-y ankò (Wom. 6:7). w25.02 2-3 § 2-3.

Nou pé palé lézòt dè wayòm a Bondyé. Sé on bèl lonnè nou ni toubònman ! A pa toutmoun ki ni bèl lonnè-lasa. Pa ègzanp, lè Jézi té asi latè, i pa lésé sé démon-la palé dè-y (Lik 4:41). Jòdijou, pou on moun koumansé préché é pou i palé dè Wayòm-la, sa pa’a enn fèt konsa. Fò moun-lasa montré kè i ka viv on mannyè ki ka fè Jéova plézi. Nou ka montré kè bèl lonnè-la nou ni la ni onlo valè pou nou si chakfwa sa posib, nou ka palé moun dè Wayòm a Bondyé kèlkèswa koté-la nou yé la. Kon Jézi, nou vlé fè tousa nou pé pou nou préché é pou nou anségné lézòt lavérité (Mat. 13:3, 23 ; 1 Kor. 3:6). Òwganizasyon a Jéova ka suiv ègzanp a Jézi. I ka fè tousa i pé pou fè moun konnèt non a Bondyé. Sé pousa osi i ka sèvi èvè Bib-la La Bible. Traduction du monde nouveau, pas Bib-lasa ka woumèt non a Bondyé sé koté-la i té maké la odépa lèwvwè yo té ka ékri Labib. Jòdila, ou ka touvé on pawti a Bib-lasa oben ou ka touvé-y annantyé adan pliski 270 lang. w24.04 9 § 8-9.

Pawmi sé frè-la ki ni lakontantman adan mayé a yo, ni sa ki pran labitid montré madanm a yo touléjou kè yo enmé-y (1 Jan 3:18). On mari pé montré madanm a-y i enmé-y èvè dé ti jès tousenp, kon pa ègzanp kenbé men a-y oben pran-y an dé bwa a-y. I pé voyé on ti mésaj ba-y pou di-y : « An ka vwè mank a-w » oben pou mandé-y : « Kijan ti jouné-la ka pasé ? ». É dètanzantan i pé menm achté on ti kado ba-y. On mari ki ka aji konsa ka ba madanm a-y lonnè, é i ka fè mayé a-y vin pli solid. On mari ki ka ba madanm a-y lonnè ka ankourajé-y é i ka di-y kè i ni valè. I pa ka oubliyé di-y mèsi pou tousa i ka fè pou édé-y (Kol. 3:15). Lè on mari ka di madanm a-y sa i enmé adan-y, sa ka touché-y an fon a tchè a-y. Madanm-la ka santi-y ansékirité, i ka santi mari a-y enmé-y é kè i ni valè. w25.01 11 § 15 ; 13 § 16.

Sòm 15 la ka fin èvè pwomès-lasa : « On moun konsa pé ké jen bigidi ». Moun-la ki maké sòm-lasa ka èspliké poukwa Jéova vé kè nou suiv sa i ka mandé-nou fè. Sé pas i vé nou ni tchè-kontan. Lè i ka mandé-nou fè on biten, sé pou byen an nou é sé pou pwotéjé-nou. Sé moun-la Jéova envité anba tant a-y la ké ni on landèmen ki ké bèl toubònman. Sé wen-la ké viv ‘koté-la Jézi préparé’ pou yo la an syèl-la (Jan 14:2). Séla ki ka èspéré viv asi latè pou touttan ké vwè sé pwomès-la nou ka touvé an Révélasyon 21:3 réyalizé é yo ké kontan vwè sa. Asirésèten, nou ni on bèl lonnè toubònman davwa Jéova envité-nou a vin zanmi a-y, é a rété anba tant a-y pou touttan ! (Sòm 15:1-5). w24.06 13 § 19-20.

Labib ka montré jan Jéova sé on Bondyé ki èstraòwdinè toubònman. Kèlkètan apré Jéova fè pèp a-y sòti an Éjipt, i montré-yo jan i ni fòs. An-nou imajiné sa : ni milyon é milyon Israélit ki sanblé douvan mòn Sinayi la pou kouté sa Bondyé ni a di-yo. Ni on niyaj ki nwè asi montangn-la. Lèwgadé, montangn-la ka voyé lafimé, latè ka soukré, lowaj, zéklè ka pété é yo ka tann on gwo dézòd konsi on moun ka souflé adan on kòn (Ègz. 19:16-18 ; 24:17 ; Sòm 68:8). Lèwvwè sé Israélit-la vwè tout sé biten-lasa, ou ka imajiné jan yo dwèt té èstèbèkwè. Nou pé ba Jéova lonnè lè nou ka palé moun ki alantou an nou dè puisans a Bondyé ki èstraòwdinè é dè tout bèl kalité a-y. Nou pé ba-y lonnè osi lè nou ka montré kè tousa nou ka réyisi fè sé grasa-y (Iz. 26:12). w25.01 2 § 2-3.

Toupannan sé Israélit-la té an chimen pou ay adan Péyi-la Bondyé té pwomèt-yo la, sèwten nonm ki té ni gwo rèsponsabilité ba Moyiz do. Jéova té chwazi Moyiz pou i té gidonné pèp a-y, men yo pa té dakò èvè sa. Mi sa yo té ka di : « Tout sé moun-la ki adan pèp-la sé dé moun ki sen, [a pa enki Moyiz], yotout sen, é Jéova anmitan a yo » (Nonb 16:1-3). Menmsi « tout sé moun-la ki adan pèp-la » té sen pou Jéova, sé Moyiz i té chwazi pou gidonné pèp a-y (Nonb 16:28). Lèwvwè sé rèbèl-la mèt-yo ka kritiké Moyiz, an réyalité, sé Jéova yo té ka kritiké. Yo pa té ka sousyé-yo dè sa Jéova té vlé, men sèl biten ki té ka entérésé-yo, sé sa yo yo té vé. Yo té ka chèché a ni plis pouvwa é yo té vlé moun pòté-yo anlè. Jéova tchouyé touséla ki té an tèt a sé rèbèl-lasa, é i tchouyé onpakèt dòt Israélit ki té ka soutyenn-yo osi (Nonb 16:30-35, 41, 49). Nou pé sèten kè sé menm biten jòdijou. Jéova pa dakò èvè moun ki ka dérèspèkté dispozisyon òwganizasyon a-y ka pran. w24.07 11 § 11.

Adan épòk-la nou ka viv la, lamajorité a sé moun-la pa ka kwè kè mond-lasa kay bout. Yo ka jous fè jé èvè tèt an nou parapòt a sa (2 Pyè 3:3, 4). Men ni onlo biten nou pa konnèt. Jéova ja désidé kitan lafen ké rivé é i ké pran swen an nou lè moman-lasa ké rivé. Men nou aprézan, fò-nou fè on travay asi nou pou nou sèten dè sa a san pou san. Fò nou fè on travay asi nou osi pou nou pé sa fè gwoup-nonm-la Jéova ka itilizé la pou gidonné-nou jòdila plis konfyans ankò. Gwoup-nonm-lasa sé « èsklav fidèl é prévwayan la » (Mat. 24:45). Lèwvwè gwo tribilasyon-la ké koumansé, yo ké ban-nou sèwten enstriksyon ki ké pé sové vi an nou. Sé pou sa, dépi konnyéla, fò-nou fè ansòt pou nou fè séla ki ka dirijé-nou la konfyans plis ankò é fò-nou suiv sé enstriksyon-la yo ka ban-nou la. Siwvwè nou ja ni dimal a fè sa yo ka di-nou fè jòdila, a pa lè gwo tribilasyon-la ké rivé kè nou ké pé fè sa yo ka mandé-nou fè. w24.09 11 § 11-12.

Sé paran-la ka rèkonnèt kè a pa paskè yo ni lafwa kè timoun a yo ké ni lafwa osi. Sa pa’a enki fèt konsa. Kifè piti-a-piti, sa pé rivé kè timoun a zòt pozé-y sèwten kèsyon kon pa ègzanp : « Ki prèv an ni kè Bondyé ka ègzisté ? Ès an pé vréman kwè sa Labib ka anségné ? » É sa nòwmal kè i pozé-y sé kèsyon-lasa pas Labib ka ankourajé-nou sèvi èvè ‘kapasité nou ni pou rézonné’ é « vérifyé tout biten » (Wom. 12:1 ; 1 Tés. 5:21). Alò, kijan zò pé édé timoun a zòt fè fwa a-y vin pli fò ? Ankourajé-y vérifyé limenm a-y kè sa Labib ka di sé vérité. Lèwvwè timoun a zòt ka pozé sèwten kèsyon, pwofité dè sé lokazyon-lasa pou montré-y kijan i pé touvé répons a kèsyon a-y. Pousa, montré-y kijan i pé sèvi èvè zouti pou fè rèchèch kon Index des publications des Témoins de Jéhovah é Guide de recherche pour les Témoins de Jéhovah. Adan Guide de recherche la, i pé ay adan « La Bible » é i pé gadé ribrik-la « Inspirée par Dieu », pou touvé prèv ki ka montré kè Labib a pa on bon liv ki ka vin dè lézòm, men sé « Pawòl a Bondyé » (1 Tés. 2:13). w24.12 14-15 § 4-5.

Kijan sé ansyen-la pé imité Jézi ? Fò sé ansyen-la fòwmé sé frè-la pou montré-yo kijan pou yo pran swen a lasanblé-la, menmsi sèwten adan sé frè-la yo ka fòwmé la jenn toujou. Sé ansyen-la ka konprann byen kè sé frè-la ké ni onlo biten pou yo aprann. Sa enpòwtan kè sé ansyen-la ba-yo dé ti konsèy èvè onlo lanmou. Sa ké édé-yo pou yo aprann aji èvè imilité, pou yo montré-yo fidèl é pou yo toujou paré pou édé lézòt (1 Tim. 3:1 ; 1 Pyè 5:5). Jézi mandé sé disip-la préché bon nouvèl-la men i mandé-yo anségné sé moun-la osi. Pétèt kè pou sé disip-la, yo pa té’é pé fè sa. Men li Jézi té sav yo té’é rivé fè travay-lasa é i pa té ni pon dout asi sa. Dayè, i di-yo sa. Mi sa i di-yo pou montré-yo jan i té ka fè-yo konfyans : « Menmjan Pap’an-mwen voyé-mwen, sé konsa an ka voyé-zòt osi » (Jan 20:21). w24.10 16 § 15 ; 17 § 17.

David té on bon wa toubònman. I té fidèl é i toujou sèvi Jéova. Sé té on mizisyen é on poèt. Sé té on sòlda é on pwofèt osi. I jwenn onlo difikilté. Pannan bon enpé lanné, fò i té kaché-y pas wa Sayil té ka chèché tchouyé-y. Apré i vin wa, fò i té kouri kaché ankò pas gason a-y Absalon té vé vin wa anplas a-y, kifè Absalon té ka chèché tchouyé-y. Magré sé pwoblèm-lasa é magré sé péché grav la David fè la, i pa lagé Jéova jistan i mò. Pou Jéova, David té ‘on nonm ki té ka fè ègzaktèman sa ki té ka fè Jéova plézi’. Alò nou pé fè David konfyans zyé-fèmé é kouté sé konsèy-la i bay la pas ni onlo sajès adan sé konsèy-lasa ! (1 Wa 15:5). An-nou réfléchi asi konsèy-la David ba gason a-y Salomon, alòskè i té kay vin wa a Israèl apré David. Jéova té chwazi on jennmoun kon Salomon pou konstwi on tanp, é sé la moun té ké vin adoré Jéova (1 Kron. 22:5). Salomon té ni onlo travay ki té ka atann-li é i té bizwen Jéova édé-y pou dirijé pèp-la. Alò, ki konsèy David té kay ba-y ? David di gason a-y kè si i ka obéyi Jéova, i ké on bon wa é Jéova ké béni-y (1 Wa 2:2, 3). w24.11 10 § 9-11.

Fò on mari ki ka lévé men asi madanm a-y oben ki ka di-y bétiz pou fè-y mal fè sèwten biten pou i wouvin byen èvè madanm a-y é èvè Jéova. Prèmyèwman, fò limenm a-y rèkonnèt kè sa i ka fè la pa byen. Jéova ka vwè tousa i ka fè é i ka tann tousa i ka di madanm a-y (Sòm 44:21 ; Ékl. 12:14 ; Ébr. 4:13). Dézyèmman, fò i arété fè madanm a-y soufè é fò i chanjé konpòwtasyon a-y (Pwov. 28:13). Twazyèmman, fò i mandé ki madanm a-y ki Jéova padon é fò i montré i sensè (Akt 3:19). I pé sipliyé Jéova pou an fon a tchè a-y i anvi chanjé é pou i édé-y métrizé sa i ka pansé, sa i ka di é kijan i ka aji (Sòm 51:10-12 ; 2 Kor. 10:5 ; Filip. 2:13). Katriyèmman, fò i aji annakò èvè sa i mandé Jéova adan priyè a-y é fò i fè tousa i pé pou i hay tout kalté vyolans é tout kalté vyé pawòl (Sòm 97:10). Senkyèmman, fò pa i pèd tan pou i ay vwè sé ansyen-la pou mandé-yo édé-y (Jak 5:14-16). Sizyèmman, fò i pran dispozisyon pou i pa wouviré adan sé vyé labitid-la i té ni la. w25.01 11 § 14.

Ès ou enmé Jéova, Bondyé-la ki ka ban-nou tout kalté kado ki tini é ki ban-nou lavi ? Ès ou anvi montré-y kè ou enmé-y ? Pibèl biten ou pé fè pou montré-y sa, sé ba-y vi a-w é pran lèbatèm. Sé 2 biten-lasa ké pèwmèt-vou fè pawti a fanmi a Jéova. Kifè, Jéova ki sé Pap’a-w é ki sé zanmi a-w ké gidé-w é ké pran swen a-w pas ou ba-y vi a-w (Sòm 73:24 ; Iz. 43:1, 2). Anplisdisa, lè nou ka ba Jéova vi an nou é kè nou ka pran lèbatèm, sa ka wouvè on bèl pòt ban-nou : nou ka ni lèspwa dè viv pou touttan (1 Pyè 3:21). Ès ni on biten ki ka anpéché-w pran lèbatèm ? Si sé sa, a pa vou tousèl. Ni konmen milyon moun ki té oblijé chanjé konpòwtasyon a yo é létadèspri a yo pou yo té pé sa pran lèbatèm. Jòdijou yo kontan sèvi Jéova é yo ka pòté bon mannèv. w25.03 2 § 1-2.

Adan Labib, souvantfwa yo ka konparé sé péché-la èvè on chaj nou ka pòté é ki lou. Mi sa David ni lokazyon di anrapò èvè sé péché-la i fè la : « Péché an mwen ka monté pi ho ki tèt an mwen. Yo kon on chaj ki lou é yo two fò pou mwen » (Sòm 38:4). Men Jéova ka padonné péché a moun ki ka rèpanti-yo (Sòm 25:18 ; 32:5). Mo ébré la yo tradui la é ki bay « padonné » vé di « lévé on biten » oben « pòté on biten ». Sé konsi yo ka konparé Jéova èvè on misyé ki ni bon fòs é ki ka pran chaj a péché an nou asi do an nou pou menné-y alé on koté ki lwen an nou. Labib ka sèvi èvè ondòt ègzanp pou montré jan Jéova ka voyé péché an nou lwen an nou. Mi sa Sòm 103:12 ka di : « Menmjan koté-la solèy-la ka lévé la lwen koté-la i ka kouché la, sé menmjan-la i ka mété péché an nou lwen an nou. » Solèy-la pé’é jen kouché menm koté ki koté-la i ka lévé la. Sa ka montré kè Jéova ka voyé péché an nou pi lwen ki sa nou pé imajiné. Lèfètkè nou sav kè Jéova ka padonné-nou a san pou san, a pa ti rasiré sa ka rasiré-nou ! w25.02 9 § 5-6.

Apré Jézi viré an syèl-la, lapòt Pyè fè on mirak é i géri on misyé ki té enfim dépi toupiti (Akt 1:8, 9 ; 3:2, 6-8). On foulmoun vwè mirak-lasa é yo vin alantou a Pyè (Akt 3:11). Men Pyè pa té vlé sé moun-la pòté-y anlè, magré i lévé adan on kilti sé moun-la té enmé fè moun vwè-yo. Okontrè i té ni imilité é i èspliké sé moun-la kè sé Jéova é Jézi pou yo pòté anlè. Mi sa i di-yo : « Sé grasa non a [Jézi] é grasa fwa-la nou ni la adan non a-y kè misyé-la zò ka vwè la é kè zò konnèt la vin fò » (Akt 3:12-16). Nou pé imité Pyè siwvwè nou ka kontinyé aji èvè imilité. Nou ka fè dé biten pou lézòt paskè nou enmé Jéova é paskè nou enmé sé moun-la, men a pa paskè nou anvi yo pòté-nou anlè. Nou ka montré kè nou ni imilité vréman lèwvwè nou kontan sèvi Jéova é kè nou kontan édé frè é sè an nou menmsi ponmoun pa’a vwè sa nou ka fè (Mat. 6:1-4). w25.03 10-11 § 11-12.

Nou ké ni plis balan pou nou ay préché é nou ké pi kontan osi siwvwè nou ka sonjé kè sa ki pi enpòwtan, sé kè nou enmé Jéova é kè nou enmé sé moun-la (Mat. 22:37-39). Pran on ti tan pou imajiné jan Jéova ni tchè-kontan lè i ka vwè-nou ka fè travay-la i ban-nou fè la é kijan sé moun-la ké kontan lèwvwè yo ké koumansé étidyé Labib ! On biten pou ou sonjé osi, sé kè moun ki ka kouté mésaj-la é ki ka désidé sèvi Jéova ké sové (Jan 6:40). Ès ou adan on sitiyasyon ki ka fè kè ou oblijé rété akaz a-w ? Si sé ka a-w, konsantré-w asi sa ou pé fè pou montré jan ou enmé Jéova é pwochen a-w. Pannan pandémi a Covid-19 la, Samuel é Dania rété fèmé akaz a yo. Toutolon a péryòd difisil lasa, yo pran labitid préché pa téléfòn é pa lèt, é yo té ka fè étid a moun osi asi Zoom. Sitiyasyon a Samuel é Dania té ka anpéché-yo fè sèwten biten, men yo fè sa yo té pé é sa pwokiré-yo onlo jwa. w24.04 18 § 15-16.

Menmsi on moun pa bizwen mayé pou i ni tchè-kontan, onlo frè é sè ki sélibatè, té’é byen anvi mayé, ki yo jenn ki yo ja ni on ti laj. Ou ka tou konprann kè avan ou koumansé frékanté, fò ou paré pou mayé. Sa vé di kè fò ou bon bon zanmi èvè Jéova, fò ou konnèt-vou byen, é fò ou ja kapab gangné sou a pen a-w (1 Kor. 7:36). Sa té’é byen si ou té ka chèché a sav èvè kijan dè moun ou té’é anvi mayé. Pas si ou pa fè sa, ou pé mété-w ka frékanté on moun ki pa k’ay èvè-w é tala ki té’é fè on bon mari oben on bon madanm pou-w, ou pé’é vwè-y. Nou ka tou konprann kè ou ké chwazi on moun ki ja batizé (1 Kor. 7:39). Men on biten pou-w sonjé, sè kè a pa paskè moun-lasa batizé kè i ké on bon moun pou-w. Mi déotwa biten pou-w mandé-w : « Ki òbjèktif an ni adan vi an mwen ? Pou mwen, ki kalité fò on moun ni pou di kè an pé mayé èvè moun-lasa ? Ès an pa’a pann chapo an mwen two ho ? » w24.05 20 § 1 ; 21 § 3.

Si pannan zò ka frékanté, dè tanzantan yonn pa’a tonbé dakò èvè lòt, ka zò pé fè ? Ès sa vé di kè zò pa k’ay ansanm ? Pa oblijé. Sa ka rivé tout sé moun-mayé la. Men on mayé ka solid lèwvwè sé moun-mayé la ka travay ansanm pou rivé konprann-yo lè yo pa dakò. Alò sé sa zò ka fè pou réglé pwoblèm a zòt ki ké montré si mayé a zòt ké solid. Alò mi sa pou zò mandé-zòt : « Lèwvwè sa ka rivé, ès nou ka rété kalm lè yonn ka palé ba lòt é ès yonn ka palé ba lòt èvè rèspé ? Lè nou ka fè érè, ès noutoulédé ka rèkonnèt sa, é ès nou ka fè éfò pou chanjé ? Ès yonn ka moli pou lòt, ès yonn k’ay vwè lòt pou èskizé-y é ès yonn paré a padonné lòt ? » (Éféz. 4:31). Nou ka tou konprann kè si pannan tout tan-la zò ka frékanté la, zò pa jen ka tonbé dakò é kè zò toujou ka babyé, a pa lè zò ké mayé sa ké chanjé. Si yonn adan zòt ka touvé kè sa pé’é ay èvè lòt-la, sa té’é myé kè zò arété frékanté-zòt é sé ké on bon biten pou zòtoulédé. w24.05 29 § 12.

Si nou ka obéyi Jéova adan tousa nou ka fè é si nou toujou ka bazé-nou asi prensip a Jéova lè nou ni on désizyon a pran, nou ké vin on bèl ègzanp pou lézòt. Pi nou ka étidyé Bib-la, pi fwa an nou ka vin fò é pi nou ka byen chouké adan lavérité. A moman-lasa, nou ka rivé sav si on ansègnman oben on biten yo ka di-nou pa annakò èvè sa Bondyé ka pansé é nou pa ka lésé sé biten-lasa jouwé an tèt an nou (Éféz. 4:14 ; Jak 1:6-8). É lèwvwè moun ka jwenn éprèv, nou ka rivé soutyenn-yo (1 Tés. 3:2, 3). Fò sé ansyen-la montré kè yo sé dé moun ki pa two radikal adan labitid a yo, ki ka pran tan réfléchi, dé moun zafè a yo annòd é ki rézonab. Sé nonm-lasa ka édé lézòt rété kalm é a fè Jéova konfyans plis ankò lè yo « ka rété byen kolé asi pawòl-la ki fidèl la » (Tit 1:9 ; 1 Tim. 3:1-3). Grasa bèl ègzanp a yo é grasa sé vizit-la yo ka fè la pou ankourajé frè é sè a yo, sé ansyen-la ka édé sé frè é sè la a ni dé bon labitid, kon vin réinyon, préché é étidyé tousèl a yo chak simenn. Lèwvwè sé frè é sè a lasanblé-la ka jwenn dé sitiyasyon ki ka soukwé-yo bon soukwé la, sé ansyen-la pé fè onlo biten pou édé-yo konsantré-yo asi Jéova é pwomès a-y. w24.06 31 § 16-18.

Toupannan Jézi té asi latè, i toujou fè moun konnèt jan Pap’a-y ni mizérikòd. An-nou vwè ègzanp a gason-la ki té pèd la é ki viré. Gason-la désidé menné on vyé vi. Men aprésa, « i woupran sans a-y » é i viré aka pap’a-y. Kijan papa-la réyaji ? Mi sa Labib ka di : « Alòskè i té ka rété [gason-la] bon tibwen chimen a fè toujou, pap’a-y vwè-y olwen. I kouri jwenn-li, i pran-y an dé bra a-y é i bo-y èvè tandrès. » Pou tiboug-la, pap’a-y pa té’é padonné-y. Alò i mandé-y si i té pé vin on ouvriyé pou travay akaz a-y. Men li papa-la, a pa ti présé i té présé padonné gason a-y. I kriyé-y « gason an mwen » é i wouba-y plas a-y adan fanmi-la. Aprésa, mi sa i ni lokazyon di anrapò èvè gason a-y : « I té pèd, men nou viré touvé-y » (Lik 15:11-32). Avan Jézi té vin asi latè, sèten i ni lokazyon vwè jan Pap’a-y té ni konpasyon é jan i té présé padonné moun ki té ka rèpanti-yo. É a pa onsèl fwa i dwèt vwè sa. Istwa-la Jézi rakonté la ka touché-nou onlo é ka montré jan Pap’an-nou Jéova ni mizérikòd ! w24.08 11 § 11-12.

On krétyen ki ni bon jijman ka chèché a sav ka Jéova ka pansé avan i pran on désizyon. On krétyen ki konsa sav kè sa ki pi enpòwtan adan vi a-y, sé lanmityé a-y èvè Jéova. I pa’a mèt an tèt a-y kè i konnèt plis biten ki ponmoun, men i pa’a mèt an tèt a-y nonplis kè i pa konnèt ayen. I ka montré i ka fè Jéova konfyans. Pousa, i ka priyé-y toutlè pou mandé-y dirèksyon a-y. Fò noumenm an nou rèkonnèt kè nou bizwen Jéova gidé-nou menmsi nou ni onlo kapasité. Lèwvwè fò nou pran on désizyon ki enpòwtan, nou ka priyé Jéova pou i gidé-nou pas nou sèten kè sé-y ki konnèt sa ki pibon ban nou. Nou ni onlo rèkonésans pou Jéova davwa i ka pèwmèt-nou imité kalité a-y (Jén. 1:26). Nou ka tou konprann kè nou pé’é jen pé imité Jéova a san pou san (Iz. 55:9). w25.03 11 § 13 ; 13 § 17-18.

Pa jijé lézòt two vit. Si on moun pa di-w mèsi pou sa ou fè ba-y, mi sa pou mandé-w : « Ès sé engra moun-lasa engra oben ès i oubliyé di-mwen mèsi ? » Pétèt osi moun-la pa di-nou mèsi pou dòt rézon ankò. Délè ni dé moun ki ni onlo rèkonésans pou lézòt men yo ni dimal a montré sa. Ni dòt moun aprézan ki toujou té abityé édé lézòt avan, kifè lèwvwè sé yo yo ka édé, sa ka jenné-yo. Antouka, si nou enmé frè an nou oben sè an nou vréman, nou pé’é mèt an tèt an nou kè i fè sa pa èspré, nou ké kontinyé montré-nou donan èvè-y é nou ké fè sa èvè jwa (Éféz. 4:2). Fò-w ni pasyans. Mi sa wa Salomon ki té plen sajès maké : « Lagé pen a-w an dlo-la, pas onpakèt jou apré ou ké viré touvé-y » (Ékl. 11:1). Kon vèwsé-lasa ka montré, ni sèwten moun, sé « onpakèt jou apré », kivédi lontan apré kè on moun fè on biten ba yo kè yo ka montré moun-lasa rèkonésans a yo. w24.09 30 § 18-19.

Délè sé ansyen-la ka di lasanblé-la kè yo korijé on moun. Ès sa vé di kè fò pa nou frékanté-y ankò ? Awa, pas moun-la rèpanti-y é i arété fè mové biten-la i té ka fè la (1 Tim. 5:20). I ka fè pawti a lasanblé-la toujou é i bizwen frè é sè a-y ankourajé-y pou i kontinyé maché dwèt (Ébr. 10:24, 25). Pawkont, lèwvwè yo ka woté on moun adan lasanblé-la, a pa menm biten-la. Moun-lasa, nou ké ‘arété frékanté-y’ é ‘pa menm manjé nou pé ké manjé èvè-y ankò’ (1 Kor. 5:11). Ès sa vlé di kè pas yo woté on moun adan lasanblé-la, nou pa’a lévé-y digad ankò ? Pa oblijé. Sé vré, nou pé ké frékanté moun-lasa, men ès nou pé envité-y adan réinyon an nou, siwtou si sé té bon moun an nou oben on moun an fanmi an nou ? Sé chakmoun ki ké pran désizyon a-y annakò èvè konsyans a-y. w24.08 30 § 13-14.