2 Pyè 3:1-18
3 Alò frè é sè an-mwen kè an enmé, mi dézyèm lèt-la an ka voyé ba zòt la. Menmjan ki adan prèmyé-la, adan dézyèm lèt-lasa, an ka fè-zòt sonjé sèwten biten pou ankourajé-zòt sèvi èvè bon jijman-la zò ni la.
2 Konsa, zò ké sonjé sé pawòl-la sé pwofèt-la ki sen la di ni lontan dè sa, é zò pé’é oubliyé komandman a Ségnè an-nou ki sé Sovè an-nou, é kè sé apòt-la transmèt-nou la.
3 Pou koumansé, mi sa pou zò sav : pannan sé dènyé jou-la, ni moun ki ké fè jé èvè sa ki byen. Yo ké fè sa yomenm a yo anvi,
4 é yo ké di : « I pwomèt i ké la, men ola i yé ? Dépi lè zansèt an-nou mò, tout biten rété ègzaktèman kon yo té yé lèwvwè Bondyé koumansé kréyé mond-la. »
5 Pas yo ka rèfizé sonjé kè an tan lontan syèl-la té ka ègzisté, é kè grasa pawòl a Bondyé, tè-la té byen solid, i té anmitan dlo-la é dlo-la pa té ka kouvè-y.
6 É grasa sé biten-lasa, Bondyé détwi mond-la ki té ka ègzisté an tan-lasa, lèwvwè dlo-la kouvè tout latè.
7 Men grasa menm pawòl-la, syèl-la é tè-la ki ka ègzisté jòdijou ké brilé an difé. Bondyé ké mèt-yo apa joustan jou-la rivé pou i pini é pou i détwi moun ki pa ni pon rèspé ba-y.
8 Men frè é sè kè an enmé, pa oubliyé kè pou Jéova* on jou sé konsi sé 1000 an é 1000 an sé konsi sé on jou.
9 Jéova* pa’a tadé pou i fè sa i pwomèt, kon sèwten moun ka konprann, men i ka pran pasyans èvè zòt, pas i vé pa ponmoun détwi, men i vé kè toutmoun rivé rèpanti-yo.
10 Men jou a Jéova* ké vin kon on vòlè. Jou-lasa, syèl-la ké disparèt é sa ké fè on gwo dézòd, men sé biten-la ki ké vin cho toubònman ké fonn, é tè-la é tousa ki ka fèt anlè-y ké parèt on mannyè ki klè.
11 Konm sé konsa fò tout sé biten-lasa fonn, réfléchi pou vwè ki jan dè moun pou zò yé, kivédi dé moun ki ka aji on mannyè ki sen é dé moun ki ka adoré Bondyé èvè onlo rèspé*,
12 toupannan zò ka atann é kè zò ka kontinyé sonjé* kè jou a Jéova* ka vin* ; akòz dè jou-lasa difé-la ké détwi syèl-la, é gwo chalè-la ké fè sé biten-la ki an syèl-la é ki asi latè fonn.
13 Men kon Bondyé pwomèt-nou, nou ka atann on nouvo syèl é on nouvo tè, é adan yo, lajistis ké rété pou touttan.
14 Kifè, frè é sè an-mwen kè an enmé, toupannan zò ka atann sé biten-lasa, fè tousa zò pé pou Bondyé touvé-zòt san pon tach, san pon défo, é anpé.
15 Anplisdisa, fò zò konprann kè Ségnè-la ka pran pasyans pou i pé sa sové moun. Sé sa Pòl, frè an-nou kè nou enmé, té maké ba zòt osi, dapré sajès-la Bondyé ba-y la,
16 pas i palé dè sé biten-lasa adan tout sé lèt-la i maké la. Men adan sé lèt-lasa, ni sèwten biten ki rèd a konprann, é moun ki pa’a byen konprann é ki fèb, ka tòd sé biten-lasa menmjan yo ka tòd sélézòt biten-la ki adan Lézékriti. É akòz dè sa, sé moun-lasa ké détwi.
17 Sé pousa, frè é sè an-mwen kè an enmé, konm zò ja konnèt sé biten-lasa, rété véyatif, pou sé moun-lasa ki ka twonpé-yo é ki vé pa suiv lwa-la, pa halé-zòt dèyè do a-yo, é pou zò pa bigidi.
18 Men okontrè, fè tousa zò pé pou Jézi Kris Ségnè an-nou é Sovè an-nou, kontinyé aji èvè on bonté ki èstraòwdinè épi zòt, é pou zò aprann konnèt-li pibyen. Jézi mérité yo ba-y glwa dépi konnyéla é pou touttan ! Amèn.
Noté sa
^ Ay adan Èsplikasyon a sé mo-la (Fidèl a Bondyé).
^ Pi ègzaktèman « fè-y vin vit ».
^ Oben « anvi toubònman kè jou a Jéova vin ». Pi ègzaktèman « prézans ».
