2 Pyè 1:1-21
1 Mwen Simon Pyè, ki sé on èsklav é on apòt a Jézi Kris, an ka maké lèt-lasa pou séla ki vin ni on fwa ki ni onlo valè menmjan ki fwa-la nou ni la, davwa Bondyé an-nou sé on moun ki jis, é Sovè an-nou Jézi Kris osi :
2 An ka mandé pou Bondyé kontinyé aji épi zòt èvè on bonté ki èstraòwdinè, é pou i édé-zòt ni lapé akontinyé osi. Pou sa, i ké fè-zòt konnèt lavérité asi-y é asi Jézi Ségnè an-nou.
3 Pas puisans a Bondyé pèwmèt-nou ni tousa nou bizwen pou nou viv é pou nou adoré-y**. Si nou ni tout sé biten-lasa, sé pas nou konnèt lavérité asi Bondyé. I kriyé-nou pas i sé on Bondyé ki èstraòwdinè é ki bon toubònman.
4 Konm Bondyé èstraòwdinè é i bon toubònman, i pwomèt-nou i ké ban-nou dé biten ki ni onlo valè é ki èstraòwdinè osi. Konsa grasa sé pwomès-lasa, konm nou woté kò an-nou adan sé mové biten-la mond-la ka fè akòz dè sé mové lanvi-la, nou ké pé vin dé lèspri ki menmjan ki Bondyé.
5 Sé pousa, fè tousa zò pé pou fè sa ki dwèt anplis dè ni lafwa, pou zò ni konésans anplis dè fè sa ki dwèt,
6 pou zò ni métriz anplis dè ni konésans, pou zò ni andirans anplis dè ni métriz, pou zò adoré Bondyé anplis dè ni andirans,
7 pou zò enmé frè a-zòt anplis dè adoré Bondyé, é pou zò enmé toutmoun anplis dè enmé frè a-zòt.
8 Pas si zò ni sé kalité-lasa adébòdé, zò ké sèvi èvè sa zò konnèt byen anrapò èvè Ségnè an-nou Jézi Kris, é nonsèlman zò pé’é rété la san fè ayen, men anplisdisa, zò pé’é kon dé moun ki pa’a pòté pon fwi.
9 Pas moun-la ki pa ni sé kalité-lasa, i avèg, i ka fèmé zyé a-y pou i pa vwè limyè-la* é i oubliyé yo té ja padonné* sé péché-la i té fè la ja ni lontan dè sa.
10 Sé pousa léfrè, fè tousa zò pé pou zò rété pawmi séla Bondyé kriyé la é kè i chwazi la, paskè si zò kontinyé ni sé kalité-lasa, zò pé’é tribiché anponjan.
11 Konsa, yo ké béni-zòt on mannyè ki èstraòwdinè é yo ké pèwmèt-zòt rantré an wayòm a Ségnè an-nou é Sovè an-nou Jézi Kris, on wayòm ki étèwnèl.
12 Sé pousa, an toujou paré pou fè-zòt sonjé sé biten-la an maké ba zòt la, menmsi zò ja konnèt-yo é kè zò byen chouké adan lavérité.
13 Men toutotan an adan tabèwnak-lasa*, pou mwen sé on bon biten si an ka kontinyé fè-zòt sonjé sé biten-lasa,
14 piskè an sav an ké kité tabèwnak-lasa talè, kon Ségnè an-nou Jézi Kris fè-mwen sav.
15 An toujou ké fè tousa an pé pou lèwvwè an ké pati, zò pé sa sonjé sé biten-lasa.
16 Lèwvwè nou palé-zòt dè puisans a Ségnè an-nou Jézi Kris é nou fè-zòt sav kè i ké la, nou pa bazé-nou asi tim-tim-bwasèk kè lézòm envanté, men okontrè, nou ni lokazyon vwè an 2 zyé an-nou jan i èstraòwdinè.
17 Pas Papa Bondyé* ba-y lonnè, é i ba-y glwa. Sa fèt lèwvwè sous a glwa-la ki èstraòwdinè la di-y sé pawòl-lasa : « Mi Gason an-mwen, sila an enmé onlo la, é ki ka fè-mwen plézi. »
18 Wi, nou tann sé pawòl-lasa sòti an syèl-la lèwvwè nou té èvè-y asi montangn-la ki sakré la.
19 Sé pousa nou sèten sé pwofési-la ké réyalizé, é sé on bon biten si zò ka rété konsantré asi sé pwofési-lasa ki kon on lanp ki ka kléré on koté ka fè nwè, kivédi an tchè a-zòt, jistan jou wouvè é kè zétwal-la ki ka kléré lèmaten parèt.
20 Pas mi on biten enpòwtan zò konnèt : pon pwofési a Lézékriti pa bazé asi lidé a on moun.
21 Pas a pa lézòm ki fè si yo anonsé sé pwofési-la, men lézòm transmèt mésaj a Bondyé, pas sé lèspri sen a-y ki pousé-yo* fè sa.
Noté sa
^ Oben « ban-nou tousa nou bizwen pou viv é pou adoré-y san nou ni ayen a ba-y anrètou ».
^ Ay adan Èsplikasyon a sé mo-la (Fidèl a Bondyé).
^ Oben pétèt « i avèg, i miyòp ».
^ Oben « lavé-y dè ».
^ Oben « tant-lasa », kivédi kò a-y lè i asi latè.
^ Oben « Bondyé Papa-la ».
^ Pi ègzaktèman « pòté-yo ».
