2 Pyè 2:1-22
2 Men menmjan té ni fo-pwofèt anmitan pèp-la, sé menmjan-la osi ké ni fo-anségnan anmitan a zòt. Sé moun-lasa ké fè klan ki ké détwi fwa a-zòt é yo ké fè sa anbafèy. Anplis, yo jous ké ba pwopriyétè-la ki achté-yo la do, é akòz dè sa, yo ké détwi-yo adan on batzyé.
2 Anplisdisa, onlo moun ké péché èvè fon-é-toupé* kon yomenm, é akòz dè sa, moun ké malpalé chimen a lavérité.
3 É konm yo ké toujou anvi pwofité si zòt, yo ké manti ba zòt. Men ni lontan Bondyé prévwa jijé-yo ; jijman-lasa pé’é tadé é asirésèten yo ké détwi*.
4 Bondyé pa frenné balan a-y pou i té pini sé zanj-la ki péché la, men i jété-yo adan on lajòl yo ka kriyé Tartar* é i maré-yo* adan on gwo nwèsè pou yo rété la joustan i pini-yo.
5 Bondyé pa frenné balan a-y nonplis pou i té pini mond-la ki té la avan. Men i pwotéjé Noé, on moun ki té ka préché sa ki jis. I sové-y ansanm èvè 7 moun, lè i voyé on délij asi on mond ki té plen moun ki pa té ka rèspèkté-y.
6 Anplis, i brilé vil a Sodòm é Gomò pou i té pini-yo ; i fè-yo fè sann. Sa i fè la ka montré sa ki ké rivé moun ki pa ni pon rèspé pou Bondyé.
7 Anplisdisa, i sové Lòt, on nonm ki té jis é ki té chouboulé toubònman davwa sé moun-la ki pa té ka suiv lwa-la té ka péché èvè fon-é-toupé*
8 (pas lèwvwè nonm-lasa, on nonm ki té jis, té ka rété anmitan a yo, i té ka vwè sa sé méchan-la té ka fè é i té ka tann sa yo té ka di, é touléjou i* té ka soufè akòz dè sa).
9 Kifè, Jéova* konnèt kijan pou i sové moun ki fidèl a-y* lèwvwè yo ka jwenn éprèv, men moun ki pa jis, i konnèt kijan pou mèt-yo apa joustan i détwi-yo jou-la i ké pini-yo la,
10 siwtou sé moun-la ki bizwen sali kò a lézòt* é ki pa ni pon rèspé pou moun ki ka dirijé-yo.
Sé moun-lasa ni fon-é-toupé, yo wòs, é yo pa pè malpalé sé moun-la Bondyé ka bay lonnè la,
11 alòskè sé zanj-la menm, magré yo ni plis fòs é plis puisans ki yo*, yo* pa’a di pon vyé pawòl asi sé fo-anségnan-la lèwvwè yo* ka palé dè yo, pas yo* ka rèspèkté Jéova*.
12 Men sé fo-anségnan-la ka kritiké dé biten yo pa konnèt. Yo kon zannimo ; sé zannimo-la pa kapab réfléchi, yo ka aji dapré sa yo anvi, é yo fèt pou yo kenbé-yo é pou yo tchouyé-yo. Sé boug-lasa* ké détwi akòz dè sé mové biten-la yo ka fè la ;
13 sé soufrans yo ké rékòlté akòz dè sé mové biten-lasa.
Plézi a-yo sé anmizé kò a-yo, menm lajouné. Sé moun-lasa kon tach anlè on lenj é kon mak anlè figi a on moun. Lè yo ansanm èvè zòt pou fété, yo enmé anségné lézòt dé biten ki pa vré pou kouyonné-yo.
14 Zyé a-yo plen èvè adiltè*, yo pa kapab kenbé kò a-yo pou yo pa péché, é yo ka kouyonné moun* ki fèb. Tchè a-yo antrenné* pou yo toujou anvi ni plis. Bondyé ké pini-yo*.
15 Yo lagé bon chimen-la, é yo pèd chimen. Yo suiv chimen a Balaam gason a Béò ; i té anvi ni rékonpans-la yo té ka pwopozé-y la pou fè sa ki pa bon,
16 men yo korijé-y davwa i pa obéyi. On boukèt ki pé pa palé, mété-y ka palé èvè on vwa a moun, é i anpéché pwofèt-la aji kon moun-fou.
17 Sé fo-anségnan-lasa ka touvé-yo kon sous-dlo ki sèk é kon niyaj van a on gwo tanpèt ka chayé ; sa ki ka atann-yo, sé on gwo nwèsè.
18 Yo ka fè gran diskou, men sé diskou-lasa pa vo hak. Yo ka péché èvè fon-é-toupé* é yo ka sèvi èvè sa kò-la anvi pou yo ba moun anvi fè dé biten kè sé moun-lasa té sòti lagé.
19 Yo ka pwomèt sé moun-la ki ka suiv sa yo ka di la kè yo ké vin lib, alòskè yomenm a yo èsklav a péché-la ; pas si on moun* ka gangné ondòt moun, moun-la yo gangné la ka vin èsklav a sila ki gangné-y la.
20 Siwvwè yo ja woté kò a-yo adan salté a mond-la davwa yo konnèt Jézi Kris byen, li ki sé Ségnè an-nou é Sovè an-nou, é aprésa yo ka viré tonbé adan salté-lasa é kè sa ka pran lanmen asi yo, jan-la yo yé la konnyéla pimové ki jan-la yo té yé la odépa.
21 Vométan yo pa té’é konnèt bon chimen-la, olyé yo lagé lwa a Bondyé, alòskè yo té ja konnèt chimen-lasa byen.
22 Ni on pwovèb ki ka di on bèl vérité, é sé sa ki rivé-yo : « Chyen-la viré adan pwòp vonmi a-y, é fimèl-kochon-la yo té ja bengné la ay woulé kò a-y an labou-la ankò. »
Noté sa
^ An grèk : asélgéïa o pliryèl. Ay adan Èsplikasyon a sé mo-la (Péché èvè fon-é-toupé).
^ Oben « moman-la pou yo détwi la pa ka dòmi ».
^ Ay adan Èsplikasyon a sé mo-la.
^ Oben pétèt « mété-yo adan sé tou-la ».
^ An grèk : asélgéïa. Ay adan Èsplikasyon a sé mo-la (Péché èvè fon-é-toupé).
^ Oben « nanm a-y ki té jis ». Ay adan Èsplikasyon a sé mo-la (Nanm).
^ Ay adan Èsplikasyon a sé mo-la (Fidèl a Bondyé).
^ Kivédi sali akòz dè péché sèksyèl.
^ Kivédi sé zanj-la.
^ Kivédi sé zanj-la.
^ Kivédi sé zanj-la.
^ Kivédi sé fo-anségnan-la.
^ Kivédi sé fo-anségnan-la.
^ Oben « yo anvi fè adiltè toubònman ».
^ Oben « nanm ».
^ Oben « yo antrenné ».
^ Oben « Yo sé timoun ki ni malédisyon. »
^ An grèk : asélgéïa. Ay adan Èsplikasyon a sé mo-la (Péché èvè fon-é-toupé).
^ Oben « si on biten ».
