Sakrifis a Jézi ka pwokiré-nou byenfé dépi konnyéla. Pa ègzanp, grasa ranson-la, Jéova ka padonné péché an nou. I pa té oblijé fè-y, men sé anvi i anvi fè-y (Sòm 103:3, 10-13). Sèwten adan nou pé pansé kè yo pa mérité Jéova padonné-yo. Men lè ou byen gadé, ponmoun pa mérité sa. Lapòt Pòl té sav byen kè i pa té « mérité kè yo kriyé-y apòt ». Poutan mi sa i di : « Sé favè a Bondyé kè an pa mérité la ki fè si an vin sa an yé la » (1 Kor. 15:9, 10). Lè nou ka rèpanti-nou lèwvwè nou fè on péché, Jéova ka padonné-nou. Poukwa nou ka di sa ? Jéova pa ka padonné-nou pas nou mérité-y, men sé pas i enmé-nou i ka fè sa. Siwvwè ou ka santi-w tris pas ou ka pansé ou pa mérité Jéova padonné-w, sonjé kè Jéova pa bay ranson-la pou moun ki pa jen ka péché. I bay ranson-la pou moun ki enpawfè é ki ka santi-yo koupab akòz dè péché a yo, é ki vlé chanjé (Lik 5:32 ; 1 Timoté 1:15). w25.01 26-27 § 3-4.

Nou pé’é jen pé anpéché lézòt pansé sa yo vé, ni fè sa yo vé. Pawkont nou, nou pé fè on travay asi nou pou nou réyaji byen. Méyè biten nou pé fè, sé padonné lézòt. Poukwa nou ka di sa ? Pas nou enmé Jéova, é sa i anvi, sé kè nou padonné lézòt. Men siwvwè nou ka kontinyé ni on moun ki fè-nou mal asi tchè, é kè nou vé pa padonné-y, ében a moman-lasa, nou pé touvé-nou ka aji nenpòt ki jan é pétèt santé an nou ké pran plon adan sa (Pwov. 14:17, 29, 30). Lèwvwè nou pa ni moun-la si tchè ankò oben lèwvwè nou pa kòlè èvè-y ankò, sa ka pwotéjé-nou pou nou pa ni rankin an tchè an nou. Anplisdisa, noumenm an nou nou ka fè-nou dibyen : nou ka kontinyé fè douvan é nou ka pwofité dè lavi kon avan. Ka ki pé édé-w pou-w pa fè kòlè ankò é pou ou pa ni ponmoun asi tchè ankò ? Ében sé si ou ka lésé tibwen tan pasé. Lèwvwè on moun blésé bon blésé la é kè yo ka swangné-y, sa pé pran on ti tan pou i woufè kò a-y. Menmjan-la osi, sa pé pran tan pou ou pé sa padonné moun-la ki fè-w soufè la (Ékl. 3:3 ; 1 Pyè 1:22). Priyé Jéova é mandé-y édé-w padonné moun-la. w25.02 16-17 § 8-11.

Pawmi sé ansègnman dè baz la nou aprann-la, nou aprann kè sa enpòwtan kè on moun rèpanti-y, nou aprann dé biten anlè lafwa, lèbatèm, é larézirèksyon (Ébr. 6:1, 2). Pyè osi ni lokazyon palé dè sé biten-lasa èvè on foulmoun ki té sanblé pou Lapannkòt (Akt 2:32-35, 38). Fò nou aksèpté sé biten-lasa si nou vé vin disip a Jézi. Poukwa nou ka di sa ? Lapòt Pòl èspliké pa ègzanp kè si on moun pa ka kwè adan larézirèksyon, i pé pa di kè i sé on vré krétyen (1 Kor. 15:12-14). Men pou nou vin on krétyen ki mati, sé ansègnman-lasa pa ka sifi, fò-nou chèché a konnèt plis biten. Lè nou ka konparé « sé ansègnman dè baz la anrapò èvè Kris » èvè « manjé solid », nou ka vwè kè non sèlman manjé solid la ni lwa a Bondyé adan, men anplisdisa i ni prensip a Bondyé adan osi. Sé sé prensip-lasa ki ka édé-nou konprann kijan Jéova ka pansé. Pou nou bénéfisyé dè nouriti-lasa, fò-nou étidyé Pawòl a Bondyé, pran tan médité anlè-y é apliké sa nou aprann byen konm i fo. Lè nou ka fè sa, nou ka aprann pran dé désizyon ki ka fè Jéova plézi. w24.04 5 § 12-13.

Jéova fè Jonas sonjé jan sé Ninivit-la « pa menm [té] sav sa ki byen é sa ki mal » (Jonas 1:1, 2 ; 3:10 ; 4:9-11). Plita, Jézi sèvi èvè ègzanp-lasa pou montré disip a-y jan Jéova jis é jan i ni mizérikòd. Men lè yo ka di kè sé Ninivit-la ké résisité pou on « jijman », ka sa vé di ? Jézi palé dè on « rézirèksyon pou on jijman » ki pou fèt (Jan 5:29). Lè i di sa, i té ka sonjé kè toupannan i ké ka gouvèné pannan 1000 an, ké ni « on rézirèksyon ki pou moun jis, ki pou moun ki pa jis » (Akt 24:15). Pou moun ki pa jis, rézirèksyon-lasa sé ké « on rézirèksyon pou on jijman ». Lè Jéova ké résisité-yo, li é Jézi ké gadé si yo ka aksèpté sa yo aprann-yo apré rézirèksyon a yo é si yo ka mèt sa an pratik. Si janmen on Ninivit yo résisité vé pa adoré Jéova, a moman-lasa Jéova ké jijé-y é i ké kondanné-y (Iz. 65:20). Men touséla ki ka désidé adoré Jéova é ki ka rété fidèl a-y ké pé viv asi latè pou touttan ! (Dan. 12:2). w24.05 5 § 13-14.

Jézi té ni mizérikòd kon Pap’a-y (Jan 14:9). Adan jan-la i té ka palé la é adan jan-la i té ka aji la, i montré jan Pap’a-y té ni konpasyon é jan i té ni mizérikòd. I montré osi jan i enmé limanité é jan i vé édé-yo. Jézi ba moun anvi chanjé é vin disip a-y alòskè yo té ka fè péché (Lik 5:27, 28). Jézi té sav sa ki té ka atann-li. A pa onsèl fwa i di disip a-y kè yo té kay trayi-y é kè yo té kay kloué-y asi on poto (Mat. 17:22 ; 20:18, 19). I té sav osi kè grasa sakrifis-la i té kay fè la, i té’é woté péché-la adan mond-la. É i èspliké kè dèstan i té’é sakrifyé vi a-y, i ‘té’é fè tout kalté moun vin owa a-y’ (Jan 12:32). Moun ki ka fè péché té’é pé fè Jéova plézi siwvwè yo té ni fwa an Jézi, é siwvwè yo té ka suiv komandman a-y. Si yo té ka fè sa, sa té’é ‘wòté-yo anba jouk a péché-la’ (Wom. 6:14, 18, 22 ; Jan 8:32). Sé pousa, èvè onlo kouraj, Jézi té paré a sibi bon abominasyon é a mò pou sové-nou (Jan 10:17, 18). w24.08 5 § 11-12.

Sonjé sa ou rèsanti lèwvwè ou vin konnèt lavérité. Ou aprann kè Pap’a-w ki an syèl-la enmé-w é kè i anvi ou fè pawti a fanmi a-y ki plen èvè moun ki ka adoré-y. Ou aprann osi kè i pwomèt kè tout soufrans ké fin, kè adan nouvo mond-la ou ké pé wouvwè moun kè ou enmé é ki mò, é ou aprann enpé dòt biten ankò (Mawk 10:29, 30 ; Jan 5:28, 29 ; Wom. 8:38, 39 ; Rév. 21:3, 4). Sé vérité-lasa ni onlo valè é yo touché tchè a-w (Lik 24:32). Tèlman ou té enmé tousa ou té ka aprann, ou té anvi palé dè sa èvè dòt moun ! (konparé èvè sa ki maké adan Jérémi 20:9). Lèwvwè nou ka koumansé enmé sa nou ka aprann adan Bib-la, pa ni mwayen nou pa palé sa èvè dòt moun (Lik 6:45). Nou ka rèsanti menm biten ki disip a Jézi ki viv o 1^é syèk. Mi sa yo di : « Nou pé pa arété palé dè sé biten-la nou vwè la é dè sé biten-la nou tann la » (Akt 4:20). Tèlman nou enmé lavérité, nou anvi fè on maksimòm dè moun konnèt-li. w24.05 15 § 5 ; 16 § 7.

Konm nou ka fè pawti a pèp a Bondyé, nou ka préché ba dòt moun pas nou enmé Pap’an nou ki an syèl-la é pas nou anvi édé-yo konnèt-li. Men a pa tout sé frè é sè la ki kontan lèwvwè yo ka préché. Poukwa nou ka di sa ? Paskè ni sèwten adan nou ki on ti jan pè é ki pa sèten dè yo. Ni moun osi ki pa’a santi-yo alèz pou ay douvan pòt a on moun alòskè moun-lasa pa envité-yo. Ni sa osi ki pè yo voyé-yo alé. É ni dòt ankò ki pè trapé bab èvè moun, pas pétèt a pa konsa yo lévé-yo. Alò pou sé frè é sè lasa ay douvan pòt a moun yo pa konnèt pou palé-yo dè lavérité, a pa on biten ki fasil. Ès délè ou k’ay préché men sa pa ka mèt pon jwa an tchè a-w ? Pétèt sé pou yonn adan sé rézon-la nou sòti palé la. Si sé ka a-w, pa dékourajé-w pou sa. Lèfètkè ou pa two sèten dè-w, sa pé vé di kè ou sé on moun ki ni imilité é kè ou pa enmé fè biten pou fè moun vwè-w. Sa pé vé di osi kè ou pa anvi fè moun fè kòlè èvè-w. Ponmoun pa enmé yo voyé-y ponmlé, siwtou lèwvwè ou ka éséyé fè lézòt dibyen. Pap’a-w ki an syèl-la sav ègzaktèman sa ou ka rèsanti é i anvi soutyenn-vou (Iz. 41:13). w24.04 14 § 1-2.

Lè ou ka li Bib-la, olyé ou chèché a fè tout sé chanjman-la ou ni a fè la onsèl kou, vométan ou montré-w rézonab lè ou ka chwazi òbjèktif a-w. Mi on biten ou pé éséyé fè : maké tout sé chanjman-la pou ou fè la on koté. Aprésa chwazi yonn dé adan yo kè fò ou fè onfwa-onfwa, é lésé sélézòt-la pou apré. Men pwoblèm-la aprézan, sé pa ki biten pou-w koumansé ? Pawmi tout sé biten-la ou ni a chanjé la, pétèt ou ké chwazi on biten ki fasil ba-w pou koumansé, oben pétèt ou ké chwazi on biten ki vréman enpòwtan. Lèwvwè ou ké chwazi pa ki biten ou ka koumansé, fè rèchèch adan piblikasyon an nou. Palé Jéova osi dè òbjèktif-la ou chwazi la é mandé-y ba-w ‘lanvi-la é fòs-la anmenmtan pou ou pé sa aji’ (Filip. 2:13). Aprésa, mèt sa ou aprann an pratik. Lèwvwè ou ké pwogrésé adan on 1^é domenn, sèten sa ké ba-w plis balan pou chèché a pwogrésé adan on 2^èm domenn. É sé vré, pi ou ké vwè kè ou ka rivé travay sèwten kalité, pi sa ké ba-w gou pou fè dòt chanjman. A moman-lasa, ou ké rivé fè sé chanjman-lasa pi fasilman. w24.09 6 § 13-14.

É vinvwè ou fè moun ditò é kè sa ka tèwbolizé lèspri a-w toujou, ka ou pé fè ? Ében fè tousa ou pé pou aji pibyen èvè sé moun-lasa. Mandé-yo padon é fè-yo santi jan ou ka règrété sa ou fè la (2 Kor. 7:11). Ou pé mandé Jéova osi édé sé moun-la ki ka soufè akòz dè mové biten ou fè. Jéova pé édé-yo men i pé édé-w osi pou zò kontinyé sèvi-y é i pé trankilizé lèspri a zòt. Fè ansòt pou sé érè-la ou ni lokazyon fè la sèvi-w lèson, é lésé Jéova sèvi èvè-w jan-la i vlé la. Sonjé sa ki rivé pwofèt Jonas. Olyé i ay Niniv kon Jéova té mandé-y, i chapé kò a-y lwen lwen lwen a Niniv. Men Jéova korijé Jonas. Sé érè-la i fè la sèvi-y lèson (Jonas 1:1-4, 15-17 ; 2:7-10). Jéova pa lagé Jonas. I ba-y ondòt chans : i woumandé-y ay Niniv. Kou-lasa, Jonas pa fè ni yonn ni dé, i obéyi onfwamenm. Menmsi i té ka règrété érè-la i fè la, sa pa anpéché-y aksèpté travay-la Jéova té ka ba-y la (Jonas 3:1-3). w24.10 8-9 § 10-11.

Lè Jéova ka padonné on moun, non sèlman pou-y, moun-lasa pa ka doué-y ankò, men i ka éfasé sé péché-la moun-lasa fè la. An-nou pran on ègzanp pou nou konprann sa. Imajiné kè on moun maké tousa ou ka doué-y asi on papyé é kè i ka baré sa ou ka doué-y la pas i désidé kè ou pa’a doué-y ankò. Menmsi i baré fèy-la, nenpòt ki moun ki ka gadé papyé-lasa ké pé vwè konmen ou té ka doué-y. Men lè on moun ka éfasé on biten, a pa menm biten-la. Pou nou konprann ègzanp-lasa pibyen, fò nou sonjé kè an tan lontan, ou té pé éfasé nenpòt ki biten yo té maké èvè lank-la yo té ka sèvi èvè-y la. Pousa, ou té pé pasé on éponj mouyé asi sa ki té maké la. Sa vé di kè lè yo té ka éfasé on biten on moun té ka doué, sa yo té maké la té ka disparèt. Ou té pé gadé kon ou vlé, men ayen pa té maké ankò. Sé konsi ou pa té jen doué ponmoun. Lè Jéova ka padonné péché an nou, non sèlman pou-y nou pa’a doué-y ankò men i pa’a gadé pon tras a sa nou té ka doué-y la. Mésyé, lè nou ka sonjé sa, a pa ti rèkonésans nou ni pou-y ! (Sòm 51:9). w25.02 10 § 11.

Lèwvwè lézòt ka kritiké-nou oben yo pa ka aji byen èvè nou, nou pé sèten Jéova ka vwè sa. Si nou sèten sa, nou ké pé sipòté tousa yo ka fè-nou sibi pas nou sav kè anfinaldikont, sé-y ki ké mèt on milyé adan sa. Si nou ka lésé toutbiten an men a Jéova, sa ké anpéché-nou rété kòlè, oben lésé rankin pran rasin an fon a tchè an nou. Sé kalté santiman-lasa pé fè-nou fè on biten ki mové, yo pé fè-nou pèd jwa an nou, oben yo pé fè-nou mèt lanmityé an nou èvè Jéova andanjé. On biten ki sèten, sé kè nou pé pa imité Jézi on mannyè ki pawfé. Alò sa pé rivé kè nou ka di oben nou ka fè on biten nou ka règrété apré (Jak 3:2). É délè, on méchansté yo fè-nou pé lésé on soufrans an tchè an nou é menm on blès an kò an nou, tout rèstan a vi an nou. Si sé sa ou ka viv konnyéla, ou pé sèten Jéova sav sa ou ka viv. É Jézi osi ka konprann sa ou ka rèsanti pas limenm a-y soufè alòskè i pa té mérité sa (Ébr. 4:15, 16). A pa ti kontan nou kontan davwa Jéova ka ban-nou onlo konsèy adan Labib pou édé-nou kenbé lè nou ka sibi enjistis. w24.11 6 § 12-13.

Pou on moun pé « ni lavi étèwnèl », fò i ni fwa adan Jézi (Jan 3:16-18, 36 ; Jan 17:3). Pou onlo Juif, yo pa té bizwen ni fwa adan Jézi. Mi sa yo mandé-y : « Ki mirak ou ka fè douvan nou ki ké fè-nou kwè-w ? » (Jan 6:30). Yo di Jézi konsa kè a épòk a Moyiz, zansèt a yo té rèsèvwa lamàn, ki té kon jan dè pen (Néém. 9:15 ; Sòm 78:24, 25). Sèl biten yo té ka sonjé sé té manjé. É lèwvwè Jézi di-yo kè « vré pen-la ki sòti an syèl-la » pé ba-yo lavi étèwnèl, yo pa menm mandé ka sa té vé di (Jan 6:32). Tèlman yo té konsantré asi zafè a manjé, yo pa kouté sa Jézi té ka éséyé anségné-yo alòskè sa té’é pé ba-yo lavi étèwnèl. w24.12 5-6 § 10-11.

Pli timoun a-w ké étidyé lasyans lékòl, pli i ké dékouvè dòt fòwm kè nou ka touvé souvantfwa adan lanati. Pa ègzanp, adan sé pyébwa-la ni dé fòwm ki ka wouvin. Tron a sé pyébwa-la ka fè branch, é sé branch-la a tou a yo ka fè enpé ti branch ki pi piti. Men kimoun ki envanté é ki désiné tout sé bèl fòwm-lasa ? Pli timoun a-w ké pran tan réfléchi asi dé kèsyon kon sila, pli sa ké édé-y fè fwa a-y vin pli fò. Toupannan timoun-la ka grandi, fò zò èspliké-y poukwa fò-nou kouté Jéova. Pétèt on jou zò pé mandé-y : « Si sé Bondyé ki kréyé-nou, ès ou pa’a di kè i sav myé ki pondòt moun kijan pou nou konpòwté-nou ? » Aprésa, montré-y kè Bondyé ban-nou konsèy adan Labib ki ni onlo valè é ki pé ban-nou tchè-kontan. w24.12 16 § 8.

Jéova fè lapòt Pòl maké on lèt ba lasanblé Korent. Adan lèt-lasa, i mandé pou yo ‘woté’ moun-la ki fè péché-la é ki pa rèpanti-y la adan lasanblé-la (1 Kor. 5:13). Kijan lasanblé-la té dwèt aji èvè nonm-lasa ? Pòl di-yo ‘arété frékanté-y’. Ka i té vlé di ojis ? I èspliké kè ‘fò pa yo té menm manjé èvè moun-lasa’ (1 Kor. 5:11). Lèwvwè ou ka manjé on ti biten èvè on moun, pli souvan ki rarman sa ka ba-zòt lokazyon fè on bèl ti kozé. É piti-a-piti, ou pé touvé-w ka pasé tibwen plis tan èvè moun-lasa. Alò sa Pòl té vlé di, sé kè si sa pa té nésésè, fò pa sé frè é sè Korent la té pasé tan èvè on moun konsa. Sa té’é pwotéjé-yo, pas konsa i pa té’é détenn asi yo (1 Kor. 5:5-7). Anplisdisa, sa té’é édé moun-la konprann jan i fè Jéova lapenn. I té’é wont é sa té’é ba-y anvi rèpanti-y. w24.08 15 § 4-5.

An Israèl, chak lanné yo té ka sélébré jou a Rékonsilyasyon-la. Jou-lasa, gran prèt-la té ka sakrifyé bèt anlè lotèl-la pou pèp-la. Men nou ka tou konprann kè sakrifis a zannimo tousèl pa té ka sifi pou péyé pou péché a sé Israélit-la, pas on zannimo ni mwens valè ki on moun. Lè sé Israélit-la té ka fè sakrifis pou péché a yo kon Jéova té ka mandé, sa té ka montré kè yo té ka rèpanti-yo. Toutotan yo té ka fè sa, Jéova té paré a padonné-yo (Ébr. 10:1-4). Dispozisyon-lasa té ka édé-yo sonjé kè yo té péchè. Men ka Jéova fè pou i té pé sa padonné péché an nou ? I fè ansòt pou Gason a-y « ofè vi a-y onsèl fwa pou i té pé sa pòté péché a onlo moun » (Ébr. 9:28). Jézi « bay vi a-y kon on ranson pou libéré onlo moun » (Mat. 20:28). w25.02 4 § 9-10.

« Sé vré, lèspri-la cho-cho-cho, men chè-la fèb » (Mat. 26:41b). Lè Jézi di sé pawòl-lasa, sa montré kè i té sav byen kè konm nou enpawfè nou ka fè érè. Men Jézi avèti-nou osi lèwvwè i di sa. I té vlé di-nou kè fò pa nou two sèten dè nou. On ti moman avan Jézi té di sé pawòl-lasa, sé disip-la té di-y kè yo pa té’é jen lagé-y, é yo té sèten dè yo a moman-lasa (Mat. 26:35). Sa yo té anvi fè la té byen. Men yo pa té ka imajiné jan on moun pé bigidi adan on batzyé lè yo ka mèt présyon anlè-y. Alò Jézi ba-yo ti konsèy-la nou ka touvé an tèks-di-jou a jòdla. Malérèzman, sé disip-la pa rété véyatif. Lèwvwè yo vin arété Jézi, ès sé disip-la rété èvè Jézi oben ès yo chapé kò a yo pas yo lésé lapè pran lanmen asi yo ? Konm yo pa té véyatif, sa yo té di kè yo pa té’é jen fè la, sé ègzaktèman sa yo fè : yo lagé Mèt a yo (Mat. 26:56). w24.07 14 § 1-2.

Lè Adan é Èv ba Bondyé do, yo pa té pé rété bon zanmi èvè Pap’a yo Jéova. Odépa, yo té ka fè pawti a fanmi a-y (Lik 3:38). Men lèwvwè yo désidé pa kouté-y, i fè-yo sòti adan fanmi a-y. Tousa pasé avan yo té koumansé fè timoun (Jén. 3:23, 24 ; 4:1). Alò nou ki sé pitit a pitit a Adan é Èv, fò nou fè on biten pou nou rékonsilyé èvè Bondyé (Wom. 5:10, 11). Sa vé di kè fò nou fè on biten pou nou wouvin byen èvè-y. Dapré sa on liv ka di, mo grèk la yo tradui la é ki bay « rékonsilyé » pé vé di osi « fè on moun ki lènmi èvè-w vin on zanmi a-w ». Sa ki bèl la menm, sé kè sé Jéova ki désidé rékonsilyé èvè nou. Kijan i fè sa ? Jéova fè ansòt pou moun ki enpawfè pé sa vin zanmi a-y. Pousa, i òwganizé-y pou nou wouni sa Adan pèd la, kivédi i bay on biten ki ni menm valè-la. w25.02 3-4 § 7-8.

Adan 2^èm lèt-la Pòl té maké la ba sé Korentyen-la, Pòl di-yo : « Jan-la lamajorité adan zòt rèpran moun-lasa, ja ni asé pou-y » (2 Kor. 2:5-8). Sa vé di kè apré yo té woté adan lasanblé-la misyé-la ki té ka kouché èvè madanm a pap’a-y, misyé-lasa rann-li kont kè fò i té rèpanti-y. É konm i rèpanti-y, i pa té bizwen yo korijé-y pou sa i té fè la ankò (Ébr. 12:11). Aprésa, Pòl mandé lasanblé-la ‘padonné moun-la ki péché la volontyé, konsolé-y’, é i di lasanblé-la kè fò-yo té ‘fè-y santi kè yo enmé-y’. Nou ka tou konprann kè Pòl pa té vlé kè yo enki pèwmèt moun-la wouvin adan lasanblé-la. Sa i té vlé, sé kè yo montré-y kè yo té padonné-y vréman é kè yo té enmé-y, ki sé adan jan-la yo té ka aji èvè-y la, ki sé adan sa yo té ka di-y. A moman-lasa, yo té’é montré-y kè yo té ka akéyi-y bra gran wouvè. w24.08 15 § 4 ; 16-17 § 6-8.

Lapòt Pòl té byen plasé pou palé dè sa, pas i té sav byen ka sa yé lèwvwè on moun ka jwenn pèwsékisyon é kè i ka andiré. I fè sé krétyen ébré la sonjé kè lèwvwè yo té ka andiré éprèv, fò pa yo té fèfon asi yomenm men sé asi Jéova pou yo té fèfon. Sé sa ki ba Pòl kouraj, kifè i té pé di : « Jéova sé sèkou an mwen, an pé ké pè » (Ébr. 13:6). Sèwten adan frè é sè an nou ka jwenn pèwsékisyon touléjou. Nou pé soutyenn-yo grasa priyè an nou. Dépawfwa osi, nou pé fè ansòt pou yo ni sa yo bizwen (Ébr. 10:33). Labib ka di kè « tout moun ki vlé montré an vi a yo kè yo enmé Bondyé é kè yo vlé vin disip a Jézi ké jwenn pèwsékisyon osi » (2 Tim. 3:12). Sé pousa fò-noutout préparé-nou pou sé moman difisil la nou ké jwenn la. Kijan nou pé fè sa ? Fò-nou kontinyé fè Jéova konfyans a san pou san é fò-nou sèten kè i ké édé-nou andiré nenpòt ki éprèv nou té’é pé jwenn. Lè moman-la ké rivé, i ké sové tout sèwvitè a-y ki fidèl (2 Tés. 1:7, 8). w24.09 13 § 17-18.

Ka ki édé sé Korentyen-la pran lèbatèm ? (2 Kor. 10:4, 5). Pawòl a Bondyé é lèspri sen a-y ki puisan toubònman édé-yo chanjé bout-pou-bout (Ébr. 4:12). Sé Korentyen-la ki aksèpté bon nouvèl-la anrapò èvè Jézikri rivé arété fè dé biten ki mové kon bwè pou sou, volé biten a moun é fè makonmè (1 Kor. 6:9-11). On biten nou pé vwè sé kè menmsi sé Korentyen-la té ni onlo biten a chanjé adan vi a yo pou yo té vin krétyen, yo pa mèt an tèt a yo kè sa té’é two rèd. Okontrè, yo travay rèd pou yo té koumansé maché asi ti chimen-la ki ka menné a lavi étèwnèl (Mat. 7:13, 14). É vou, ès fò ou lagé on vyé labitid pou-w pé sa pran lèbatèm ? Si sé sa, pa lagé ! Mèt jounou atè pou mandé Jéova ba-w lèspri sen a-y pou-w rivé kenbé kò a-w pou-w pa fè sa ki mal. w25.03 6 § 15-17.

Jéova pwomèt-nou i ké ban-nou sajès-la nou bizwen la pou nou sav si on désizyon ka fè-y plézi oben si i pa’a fè-y plézi. Konm « i donan èvè toutmoun é i pa ka babyé », i ké ban-nou sajès. Apré ou mandé Jéova gidonné-w, gadé pou vwè kijan i ka réponn-vou. Pa ègzanp, imajiné ou vwayajé é ou ka pèd on koté. Ou ka mandé on moun ki ka rété an sèktè-la pou i ba-w bon chimen-la. Ès ou ké pati avan i fin palé ba-w ? Awa ! Ou ké kouté pou tann sa i ka di-w. Menmjan-la, apré ou fin priyé Jéova pou i ba-w sajès, éséyé vwè kijan i ka réponn-vou, é chèché ki lwa é ki prensip adan Labib ki ké édé-w adan sitiyasyon a-w. Pa ègzanp, avan ou désidé si ou k’ay adan on fèt oben si ou pa k’ay, ou té’é pé gadé ka Labib ka di asi bòdé-apiyé, asi mové frékantasyon, é asi jan sa enpòwtan pou nou mèt Wayòm-la prèmyé douvan adan vi an nou (Mat. 6:33 ; Wom. 13:13 ; 1 Kor. 15:33). w25.01 16 § 6-7.

Pwofési a Izayi ka montré kè jan-la sé moun-la ki adan paradi èspirityèl la té’é viv pa té’é ni ayen a vwè èvè jan-la sé moun-la ki pa adan-y la té’é viv (Iz. 65:13). A pa ti biten Jéova ka ba sèwvitè a-y pou yo rété bon bon zanmi èvè-y. I ka ban-nou lèspri sen a-y, Pawòl a-y, é onlo piblikasyon ki bazé asi Pawòl a-y. Grasa sa, nou ka « manjé », nou ka « bwè », é nou « kontan » (konparé èvè sa ki maké adan Révélasyon 22:17). Pawkont, sé moun-la ki pa adan paradi èspirityèl la ka « mò-fen », yo ka « mò-swèf », é yo « hont ». Yo pa zanmi èvè Bondyé (Amòs 8:11). Jéova ka ba sèwvitè a-y tousa yo bizwen annabondans, siwtou sa ki ka édé-yo rété bon bon zanmi èvè-y (Joèl 2:21-24). Pa ègzanp, i ka sèvi èvè Labib, piblikasyon an nou, sit Entèwnèt an nou, réinyon an nou é lasanblé an nou pou fè sa. Chakjou, nou pé pwofité dè sé dispozisyon-lasa é konsa nou ka pi anfòm é nou ka woupran fòs. w24.04 21 § 5-6.

Si ou anvi frékanté on moun, ou pé ba-y on randévou on koté ki ni moun pou palé ba-y oben ou pé kriyé-y. Di-y franchman kè ou ka touvé-y agou a-w é kè ou té’é anvi konnèt-li pibyen (1 Kor. 14:9). Si i bizwen tan pou réponn-vou, ba-y tan pou réfléchi (Pwov. 15:28). É si janmen i pa dakò, aksèpté désizyon a-y. Kijan pou-w réyaji siwvwè on moun ka vin di-w kè ou ka entérésé-y ? Sèten sa mandé moun-lasa kouraj pou vin palé ba-w, alò montré-w janti èvè-y é rèspèkté-y. Si ou bizwen tan pou réfléchi avan ou pran on désizyon, di-y sa. Men éséyé réponn-li dépi ou ké pé (Pwov. 13:12). Si ou pa entérésé, di-y sa jantiman men fè ansòt pou sa klè an tèt a-y. Si sa ka entérésé-w, di-y sa ou ka rèsanti é pran tan palé èvè-y pou sav kijan zò vlé sa pasé lèwvwè zò ké ka frékanté-zòt. Pétèt sa yonn vé adan domenn-lasa pa oblijé menm biten ki sa lòt-la vé. w24.05 23-24 § 12-13.

Alòskè David dwèt té on jenngason toujou, i ay la lawmé à sé Izraélit-la té ka kanpé. Té ni on kalté boug non a-y sé té Golyat ki sòti Filisti pou « mèt lawmé a Izrayèl odéfi » (1 Sam. 17:10, 11). Sèl biten sé sòlda-la té ka gadé sé grandè a Golyat é sa i té ka di-yo, kifè yo té pè (1 Sam. 17:24, 25). Men li David, a pa sa i té ka gadé. Pou-y, a pa lawmé à Izrayèl Golyat té ka mèt odéfi tousèl, men sé « lawmé a Bondyé-la ki vivan la » i té ka mèt odéfi (1 Sam. 17:26). Prèmyé moun David té ka sonjé sé té Jéova. I té sav kè menm Bondyé-la ki édé-y lèwvwè i té bèwjé té’é édé-y ankò. É konm i té sèten dè sa, David ay goumé èvè Golyat é i fin bat èvè-y ! (1 Sam. 17:45-51). w24.06 21 § 7.

Imajiné kijan vi an nou té’é yé siwvwè nou pa té ka sèvi Jéova. Si nou ka sonjé ki byenfé sa ka pwokiré-nou lè nou ka sèvi Jéova, sa ké édé-nou rété fidèl a-y. É kon nonm-la ki maké Sòm 73 la, nou osi nou ké di : « Kanta mwen, vin toupré Bondyé, sa bon pou mwen » (Sòm 73:28). Asirésèten, nou ké pé kenbé anba nenpòt ki éprèv ki pé rivé-nou adan sé dènyé jou-la, pas nou ka « travay kon èsklav pou on Dyé ki vré é ki vivan » (1 Tés. 1:9). Bondyé an nou ka pran swen an nou é i toujou ka édé-nou. An tan lontan, i pa jen lagé sèwvitè a-y, é jòdijou i pé’é lagé-nou nonplis. Talè, nou kay sibi on manman tribilasyon é sé prèmyé fwa on gwo biten konsa ké fèt asi latè. Men nou pé’é tousèl. Jéova ké èvè nou. Alò an-nou pran kouraj an nou a 2 men, é an-nou di : « Jéova sé sèkou an mwen, an pé ké pè » (Ébr. 13:5, 6). w24.06 25 § 17-18.

Labib ka ban-nou non a plis ki 40 nonm ki gouvèné antankè wa asi Izrayèl. I ka di kè menm sé bon wa-la fè mové biten. Mi sa Jéova di anrapò èvè wa David, ki té on bon wa : « David […] sèvi-mwen èvè tout tchè a-y, é [i] fè enki bon biten anba zyé an mwen » (1 Wa 14:8). Poutan, nonm-lasa té fè on adiltè èvè on madanm-mayé é i té fè ansòt pou yo tchouyé mari a madanm-la adan on lagè (2 Sam. 11:4, 14, 15). Labib ka palé-nou osi dè sèwten bon biten sé wa-la ki pa rété fidèl a Jéova ni lokazyon fè. An-nou pran ègzanp a Roboam. Pou Jéova, wa-lasa « fè sa ki té mové » (2 Kron. 12:14). Poutan Roboam fè sèwten bon biten. Pa ègzanp, lè Jéova mandé-y pa ay goumé èvè sé 10 tribi a Izrayèl la é lésé-yo chwazi wa a yo, i obéyi. Anplisdisa, i pwotéjé pèp a Bondyé lèwvwè i konsolidé diféran vil ki té adan téritwa a Jida é ta Benjamen (1 Wa 12:21-24 ; 2 Kron. 11:5-12). Asi ki biten Jéova bazé-y pou di kilès ki té fidèl é kilès ki pa té fidèl ? I té ka gadé ka ki té an tchè a yo, ès yo té ka rèpanti-yo, é ès yo té enmé vré adorasyon-la. w24.07 20 § 1-3.

Vinvwè on jenn ki batizé é ki po’o majè ka fè on péché ki grav, ka pou sé ansyen-la fè ? Sé ansyen-la ké chwazi 2 ansyen ki ké palé èvè jenn-la é paran a-y ki Témwen. Sé ansyen-la ké mandé sé paran-la ka yo fè pou édé timoun a yo rèpanti-y. Si timoun-la ka kouté paran a-y é kè i ka chanjé létadèspri a-y é jan i ka aji, sé ansyen-la pé désidé kè yo pa bizwen fòwmé on komité pou vwè timoun-la é paran a-y. Sé ansyen-la sav kè Jéova mandé sé paran-la korijé timoun a yo èvè lanmou. Sé rèsponsabilité a sé paran-la (Dét. 6:6, 7 ; Pwov. 6:20 ; 22:6 ; Éféz. 6:2-4). Aprésa, dè tanzantan sé ansyen-la ké palé èvè sé paran-la pou yo sèten kè sé paran-la ka kontinyé édé timoun-la. Men vinvwè timoun-la pa’a tann pon lang é kè i ka kontinyé fè mové biten, ka pou sé ansyen-la fè ? A moman-lasa, on komité a 3 ansyen ké palé èvè timoun-la é paran a-y ki Témwen. w24.08 24 § 18.

Lèwvwè on moun ka ban-nou on kado, nou ka kontan. Men nou ka pi kontan ankò lèwvwè sé nou ki ka ofè on moun on biten. Lèfètkè Jéova kréyé-nou konsa, sé konsi i mèt tout kat-la an men an nou. Sa vé di kè pi nou ka chèché a vwè kijan nou pé donan èvè lézòt é pi nou ka ni tchè-kontan. Jan-la Jéova fè-nou la èstraòwdinè menm (Sòm 139:14). Labib ka èspliké kè lèwvwè on moun ka bay, moun-lasa ka ni tchè-kontan. Alò sa pa ka siwprann-nou siwvwè Labib ka di kè Jéova sé « Dyé-la tchè a-y kontan la » (1 Tim. 1:11). Prèmyé moun ki té donan adan linivè sé-y, é pa ni moun ki pi donan ki-y. « Sé grasa li nou ni lavi, nou ka boujé é nou ka ègzisté » (Akt 17:28). Sé vré, « tout bèl don é tout kado pawfè » ka vin dè Jéova (Jak 1:17). Nou sòti vwè kè pi nou ka bay pi nou ni tchè-kontan, é sèten nou anvi ni tchè-kontan plis ankò. Nou ké rivé fè sa siwvwè nou ka imité Jéova ki sé on moun ki donan toubònman (Éféz. 5:1). w24.09 26 § 1-4.

Apré nou wouvwè tout sé kondisyon-la on ansyen dwètèt ranpli la, pétèt on asistan ké pansé kè i pé ké jen rivé vin ansyen. Men sonjé kè Jéova é òwganizasyon a-y pa ka atann kè ou ranpli sé kondisyon-lasa on mannyè ki pawfè (1 Pyè 2:21). Anplisdisa fòs a Jéova ké édé-w adan sé éfò-la ou ka fè la (Filip. 2:13). Ès ou vwè fò ou pwogrésé adan on domenn èspésyal ? Priyé Jéova. Fè rèchèch asi sijé-lasa, é mandé on ansyen kijan ou pé pwogrésé. Kontinyé pwogrésé ! Mandé Jéova fòwmé-w é aji asi-w, pou ou pé sa pli itil pou-y é pou lasanblé-la (Iz. 64:8). Nou ka mandé Jéova béni éfò ou ké fè pou ranpli sé kondisyon-la pou sèvi antankè ansyen ! w24.11 25 § 17-18.

Fò pa nou mèt an tèt an nou kè pas nou ka sèvi Jéova dépi onpakèt lanné, sa toutafè nòwmal kè i padonné-nou. Sé vré kè tout sé lanné-la nou rété fidèl a Jéova ni onlo valè ba-y. Men lèwvwè Jéova voyé gason a-y mò ban nou, sé on kado i fè-nou. A pa pou tout sé bon biten-la nou ja fè la kè Jéova fè sa. Donk sa pa té’é byen ditou si nou té ka mèt an tèt an nou kè nou mérité kè Jéova padonné-nou pas nou ja fè onlo bon biten ba-y. Pas si nou ka kwè sa, sa vé di nou pa bizwen ranson-la menm (konparé èvè sa ki maké adan Galat 2:21). Lapòt Pòl té sav kè a pa pas i té fè onpakèt biten pou sèvi Jéova, kè Jéova té oblijé padonné-y. Alò poukwa i té ka sèvi Jéova èvè tousa balan ? I fè sa pou montré i té ni onlo rèkonésans pou Jéova, davwa Jéova té janti èvè-y é i té padonné-y (Éféz. 3:7). Kon Pòl, an-nou kontinyé sèvi Jéova èvè onlo balan. Nou pé’é fè sa èvè lidé Jéova ké oblijé padonné-nou, men pou montré-y jan nou ni rèkonésans ba-y. w25.01 27 § 5-6.