1 Pyè 2:1-25
2 Pa fè moun pon méchansté, pa kouyonné moun an pon kalté jan ; fò pa zò ipokrit èvè ponmoun, fò pa zò jalou ponmoun, é fò pa zò malpalé ponmoun.
2 Kon tibébé ki sòti fèt, fè ansòt pou zò anvi bwè lèt ki pa mélanjé èvè ayen, é ki ka vin dè pawòl a Bondyé. Konsa grasa lèt-lasa, zò ké grandi, é zò ké sové,
3 pas zò ja ni lokazyon vwè Ségnè-la aji épi bonté èvè zòt.
4 Lézimen pa té vlé vwè wòch-la ki vivan la, men Bondyé chwazi-y é pou-y, i ni onlo valè. Lè zò ka vin owa a-y,
5 zòt osi, zò ka touvé-zòt kon wòch ki vivan. Bondyé ka sèvi èvè zòt pou konstwi on kaz grasa lèspri sen a-y. Konsa zò ké vin prèt ki sen, zò ké pé ofè sakrifis, é sé grasa lèspri sen zò ké pé fè sé sakrifis-lasa. Bondyé ké pé aprésyé-yo grasa Jézi Kris.
6 Pas mi sa on pasaj ki adan Lézékriti ka di : « Gadé ! A Syon, an ka pozé on wòch an chwazi é ki ni onlo valè, kivédi wòch-la yo ka mèt adan kwen a fondasyon-la. É si on moun ni fwa adan-y, i pé’é jen règrété* sa. »
7 Kifè sé pou zòt i ni valè, pas zò ka kwè adan-y ; men pou moun ki pa ka kwè adan-y, « wòch-la sé moun-la ki ka konstwi la pa té vé la, sé-y ki vin wòch-la ki pi enpòwtan* la »
8 é sé-y ki vin « on wòch ki ka fè moun tribiché é on gwo wòch ki ka jété moun atè ». Yo ka tribiché pas yo pa ka fè sa ki adan pawòl-la. Sé sa ki té pou rivé-yo.
9 Men zò sé « on pèp kè Bondyé chwazi, on pèp èspésyal ki ta-y, zò wa é anmenmditan zò prèt, zò adan on nasyon ki sen, pou zò pé sa palé toupatou dè bonté-la* Bondyé ni la » ; i kriyé-zòt alòskè zò té an nwèsè, pou zò vin adan limyè a-y, on limyè ki èstraòwdinè.
10 Pas avan, zò pa té pèp a Bondyé, men konnyéla zò sé pèp a-y ; avan, Bondyé pa aji èvè mizérikòd épi zòt, men konnyéla i aji èvè mizérikòd épi zòt.
11 Frè é sè kè an enmé, zòt ki étranjé é ki ka viv an mond-lasa pou on ti moman, mi sa an ka ankourajé-zòt fè : kontinyé fè éfò pou zò pa pèd konba-la kont sé biten-la kò a-zòt anvi fè la é ki an lagè èvè zòt*.
12 Kontinyé ni on bon konpòwtasyon anmitan sé nasyon-la, konsa lèwvwè yo ké di kè zò ka fè sa ki pa bon, yo ké pé vwè an 2 zyé a-yo sé bon biten-la zò ka fè la, é anfinaldikont, sa ké ba Bondyé glwa jou-la i ké vin jijé moun.
13 Pou zò fè Ségnè-la plézi, soumèt-zòt douvan tout moun ki ni otorité, ki sé douvan on wa pas i ni plis otorité,
14 oben douvan sé gouvènè-la wa-la ka voyé la pou pini moun ki ka fè sa ki pa bon, é pou félisité moun ki ka fè sa ki bon.
15 Pas sa Bondyé vlé, sé kè zò fè sa ki bon, konsa zò ké pé fè moun ki pa ni pon sajès é ki ka di pawòl initil fèmé bouch a-yo.
16 Aji kon moun ki lib. Men pa sèvi èvè libèté a-zòt kon on vwal pou kouvè sa ki pa bon*. Pawkont sèvi èvè libèté-lasa kon on èsklav a Bondyé dwèt fè-y.
17 Montré kè zò ka rèspèkté tout kalté moun, enmé tout frè a-zòt*, krenn Bondyé, é ba wa-la lonnè.
18 Fò sé sèwvitè-la soumèt-yo a sé mèt-la yo ni la, é fò yo rèspèkté-yo kon sa dwèt fèt. Fò pa yo fè sa enki èvè sé mèt-la ki janti é ki rézonab, men fò yo fè sa èvè séla ki rèd osi.
19 Lèwvwè on moun ka andiré éprèv* i ka jwenn é i ka sipòté on biten yo ka fè-y alòskè i pa mérité sa, davwa i vlé fè Bondyé plézi, sé on bon biten.
20 Pas si yo ka ba-zòt kou pas zò péché é kè zò ka sipòté sa, ki valè sa ni ? Men si zò ka andiré lèwvwè zò ka soufè davwa zò ka fè sa ki byen, Bondyé ka touvé kè sé on bèl biten.
21 Dayè, yo kriyé-zòt pou zò soufè alòskè zò pa mérité sa*, pas Kris menm soufè pou zòt, i ba-zòt on bèl ègzanp pou zò suiv-li alatras*.
22 I pa fè pon péché, é i pa jen di ayen pou kouyonné moun.
23 Lèwvwè yo té ka jiré-y, i pa té ka viré jiré sé moun-la. Lèwvwè i té ka soufè, i pa té ka mennasé ponmoun, men okontrè, i té ka lagé sa an men a Sila ki ka jijé on mannyè ki jis.
24 I pòté péché an-nou adan pwòp kò a-y é i chayé-yo asi poto-la pou nou pa èsklav a péché-la* ankò é pou nou viv pou fè sa ki jis*. É « grasa sé bobo-la i ni la, nou géri ».
25 Pas zò té kon timouton ki pèd chimen, men konnyéla, zò viré owa bèwjé-la ki ka pwotéjé vi* a-zòt.
Noté sa
^ Pi ègzaktèman « hont ».
^ Pi ègzaktèman « tèt a kwen-la ».
^ Kivédi sé bèl kalité-la i ni la é sé biten-la i fè la ki mérité yo palé dè yo.
^ Oben « èvè nanm-la ».
^ Oben « on èskiz pou fè sa ki pa bon ».
^ Dépawfwa, Bib-la ka sèvi èvè èksprésyon-la « sé frè-la » pou palé ki dè misyé ki dè madanm.
^ Oben « tristès », « doulè ».
^ Oben « pou maché asi chimen-lasa ».
^ Oben « aji menmjan ki-y ».
^ Pi ègzaktèman « pou nou mò anrapò èvè péché-la ».
^ Oben « pou nou viv pou sa ki jis ».
^ Oben « nanm ».
