1 Pyè 3:1-22
3 Menmjan-la, zòt sé madanm-la, fò zò soumèt-zòt a mari a-zòt. Konsa si sèwten adan yo pa ka kouté pawòl-la, yo ké pé ni lafwa grasa konpòwtasyon a madanm a-yo san menm sé madanm-lasa di ayen.
2 Pas yo ké vwè an 2 zyé a-yo kè zò ni on konduit ki pwòp é kè zò ka aji on mannyè ki ka montré kè zò ka rèspèkté-yo onlo.
3 A pa sa zò ka mèt anlè zòt ki dwèt montré kè zò bèl (chivé ki ni très, bijou an lò, oben lenj ki ka kouté chè),
4 men sé sa ki an fon a tchè a-zòt ki dwèt bèl ; fò zò sé dé moun ki kalm é ki dous, pas sé dé biten ki ni onlo valè pou Bondyé é ki pé pa dégrenné.
5 Pas an tan lontan, sé grasa sé biten-lasa si sé madanm fidèl* la ki té ka fè Bondyé konfyans té bèl. Yo té ka soumèt-yo a mari a-yo
6 menmjan ki Sara. I té ka obéyi Abraam é i té ka kriyé-y ségnè. Zò sé timoun a-y konnyéla, si zò ka kontinyé fè sa ki byen é si zò pa’a lésé lapè pran lanmen asi zòt.
7 Menmjan-la, zòt sé mari-la, montré madanm a-zòt kè zò ka konprann-yo. Ba-yo lonnè, é aji èvè yo kon zò té’é aji èvè on vaz ki pi frajil, pas yo osi, yo ké ni lavi menmjan ki zòt, grasa bonté èstraòwdinè la Bondyé ni la. Konsa, ayen pé’é anpéché Bondyé kouté priyè a-zòt.
8 Pou fin, fò zòtout ka pansé menmjan-la*, fò zò montré kè soufrans a lézòt ka fè-zòt on biten, fò zò montré frè é sè a-zòt kè zò enmé-yo, fò zò aji èvè on konpasyon ki plen tandrès, é fò zò ni imilité.
9 Si on moun ka fè-zòt on biten ki mové, fò pa zò aji menmjan ki-y, é si on moun ka jiré-zòt, fò pa zò jiré-y osi. Okontrè, fò zò aji byen èvè-y*, pas sé pou zò aji konsa Bondyé kriyé-zòt, é i ké béni-zòt.
10 Pas si on moun vlé enmé lavi é si i vlé pwofité dè-y, fò i kenbé lang a-y pou i pa di mové biten, é fò pa i kouyonné moun*.
11 Fò i ba sa ki mové do, é fò i fè sa ki bon. Fò i fè éfò pou viv anpé èvè lézòt é fò i kontinyé fè sa.
12 Pas zyé a Jéova* ka gadé moun ki jis, é zòrèy a-y ka kouté lè yo ka sipliyé-y, men moun ki ka fè sa ki mové, Jéova* ka ba-yo do.
13 É kimoun ki ké fè-zòt on biten si zò toujou ka pòté mannèv pou fè sa ki byen ?
14 É menmsi fò zò té’é soufè pas zò fè sa ki byen, zò kontan. Men zò pa bizwen pè sa ki ka fè lézòt pè*, é pa lésé ayen tèwbolizé lèspri a-zòt.
15 Men andidan tchè a-zòt, fò zò rèkonnèt kè Kris sé Ségnè-la é kè sé on moun ki sen. Konsa zò ké toujou paré pou zò réponn tout moun ki ka pozé-zòt kèsyon asi èspwa-la zò ni la, men fè sa èvè dousè é onlo rèspé.
16 Fè ansòt pou zò toujou ni on konsyans ki nèt, konsa kèlkanswa sa yo ka di asi zòt, sé moun-la ki ka malpalé-zòt la ké hont, pas zò ni on bèl konduit davwa zò sé disip a Kris.
17 Vométan nou soufè pas nou ka fè sa ki byen, si Bondyé vlé pèwmèt sa, olyé nou soufè davwa nou ka fè sa ki pa bon.
18 Pas Kris, on moun ki jis, mò onsèl fwa pou fè péché a moun ki pa jis disparèt. I fè sa pou pèwmèt-nou wouvin byen èvè Bondyé. Lè yo tchouyé-y sé té on nonm, men i vin on lèspri lè Bondyé résisité-y.
19 É sé konsa i ay préché ba sé lèspri-la ki lajòl la,
20 ki dézobéyi Bondyé ni lontan dè sa, an tan a Noé. Bondyé té ka pran pasyans pannan yo té ka konstwi lawch-la. Sé adan lawch-lasa déotwa moun, kivédi 8 moun, rivé sové é kè yo pa pèd vi a-yo an dlo-la.
21 Sa ki pasé an tan-lasa ka rèprézanté batèm-la. I ka sové-zòt konnyéla la, davwa Jézi résisité. Apapoudi i ka woté sa ki sal anlè kò-la, men sé on mwayen pou mandé Bondyé on konsyans ki nèt.
22 Jézi ka touvé-y adwat a Bondyé, pas i ay an syèl-la ; é ki sé zanj-la, ki séla ki puisan la, ki séla ki ni otorité la, Bondyé fè-yo soumèt-yo douvan Jézi.
