1 Pyè 4:1-19
4 Kris soufè lèwvwè i té on nonm, alò zòt osi, préparé-zòt pou zò ni menm mantalité ki-y. Pas moun-la ki ka soufè la ka montré kè i lagé péché-la,
2 konsa tan-la ki ka rété-y la asi latè*, i pa’a sèvi èvè-y ankò pou fè sa lézimen vlé men i ka sèvi èvè-y pou fè volonté a Bondyé.
3 Pas zò ja pasé asé tan ka fè sa sé nasyon-la vlé ; vi a-zòt sé té péché èvè fon-é-toupé*, anvi fè sa ki pa bon, bwasonné, vyé jan dè bòdé-apiyé, bòdé ki fèt pou moun bwè adépasé, é adoré idòl, on biten Bondyé ka kondanné.
4 Konm zò pa’a kontinyé fè sé vyé kalté biten-la yo ka fè la, yo ka touvé sa fò. Kifè, yo ka malpalé-zòt.
5 Men sila ki ka jijé moun ki vivan é moun ki mò ké jijé sé moun-lasa dapré sa yo fè.
6 Sé pousa sé mò-la* osi vin tann bon nouvèl-la. Konsa menmsi lézòm ka jijé-yo dapré sa moun ka pansé, yo pé viv annakò èvè lèspri dapré sa Bondyé ka pansé.
7 Men tout biten toupré bout. Kifè, fò zòt ni bon jijman é fò zò toujou sonjé priyé*.
8 Mi sa ki pi enpòwtan : fò yonn enmé lòt fò toubònman, pas lanmou ka kouvè onpakèt péché.
9 Fò yonn enmé akéyi lòt, é lèwvwè zò ka akéyi lézòt, fò pa zò bougonné.
10 Konm Bondyé ba-zòchak on kapasité*, itilizé-y pou sèvi lézòt menmjan ki on bon sèwvitè, on sèwvitè ki ni diféran kapasité grasa bonté èstraòwdinè a Bondyé é ki ka jéré-yo byen.
11 Si on moun ka palé, fò i palé on mannyè ki ka montré kè mésaj a-y ka vin dè Bondyé. Si on moun ka sèvi lézòt, fò i fèfon asi fòs-la Bondyé ka bay la pou i fè sa. Konsa, grasa Jézi Kris, yo ké pé ba Bondyé glwa adan tout kalté domenn. Bondyé ni glwa é puisans pou touttan. Amèn.
12 Frè é sè an-mwen kè an enmé, fò pa zò rété èstèbèkwè davwa zò ka jwenn éprèv ki ka limé difé asi zòt, konsidiré sa ki ka rivé-zòt la sé dé biten ki pa nòwmal.
13 Okontrè, kontinyé ni tchè-kontan davwa zò ka soufè bon soufè la menmjan ki Kris. Konsa, zò ké pé ni jwa adébòdé osi lèwvwè moun ké vwè glwa-la i ni la.
14 Si yo ka jiré-zòt davwa zò ka suiv Kris, zò kontan, pas sa ka montré kè zò ni lèspri sen a Bondyé, on lèspri ki èstraòwdinè.
15 Men sèlman, fò pa ponyonn adan zòt soufè pas i tchouyé moun, i volé moun, i ka fè sa ki pa bon oben pas i ka mélé-y dè sa ki pa’a gadé-y.
16 Si on moun ka soufè pas i sé on krétyen, fò pa i hont, men fò i kontinyé ba Bondyé glwa toupannan i ka pòté non-lasa.
17 Pas moman-la rivé pou yo koumansé jijé kaz a Bondyé. É si sé nou yo ka jijé an prèmyé, ka sa ké bay pou séla ki pa ka aji annakò èvè bon nouvèl a Bondyé ?
18 « É si on moun ki jis dwèt travay rèd pou Bondyé sové-y, ka ki ké rivé moun-la ki pa ni pon rèspé pou Bondyé é moun-la ki ka péché la ? »
19 Kifè, séla ki ka soufè davwa yo ka fè sa Bondyé vlé, fò yo* kontinyé fè Kréyatè-la ki fidèl la konfyans toupannan yo ka fè sa ki byen.
Noté sa
^ Pi ègzaktèman « tan-la ki ka rété-y la adan chè-la ».
^ An grèk : asélgéïa o pliryèl. Ay adan Èsplikasyon a sé mo-la (Péché èvè fon-é-toupé).
^ On biten ki sèten, sé kè sé moun-lasa sé konsi yo té mò akòz dè péché a-yo.
^ Oben « fò zò toujou paré pou priyé ».
^ Oben « on kado ».
^ Oben « nanm a-yo ».
