1 Pyè 5:1-14
5 Konm an sé on ansyen osi, kè an vwè Kris soufè é kè menmjan ki zòt, yo ké ban-mwen on glwa kè moun ké pé vwè, mi sa an ka mandé sé ansyen-la ki pawmi zòt la :
2 Bondyé ba-zòt twoupo a-y, alò pran swen a-y menmjan ki on bèwjé. Voyé zyé asi-y ; pa fè sa pas zò oblijé fè-y, men fè-y èvè bonkè pas sé sa Bondyé vlé ; é pa fè sa pas zò toujou anvi ni plis biten, men fè sa pas zò anvi sèvi-y*.
3 Pa dominé sa ki ta Bondyé konsi zò sé mèt a-yo, men fè ansòt pou zò ba twoupo-la on bèl ègzanp.
4 É lèwvwè chèf a sé bèwjé-la ké parèt, zò ké risivwè bèl kouwòn-la ki pé pa dégrenné la.
5 Menmjan-la, zòt sé jennboug-la, fò zò soumèt-zòt douvan séla ki pli gran la*. Men zòtout, fò zò aji èvè imilité yonn èvè lòt*, pas Bondyé kont moun ki ni òwgèy, men i ka aji èvè on bonté ki èstraòwdinè épi moun ki ni imilité.
6 Kifè, soumèt-zòt douvan Bondyé an-nou ki puisan*, konsa lèwvwè moman-la ké rivé, i ké ba-zòt lonnè.
7 An menm balan-la, lagé tousa ki ka enkyété-zòt* an men a-y, pas i ka voyé zyé asi zòt.
8 Pa pèd bon jijman a-zòt é rété véyatif ! Lènmi a-zòt, Dyab-la, ka touné-viré kon on liyon ki ka hélé é ki bizwen valé on moun.
9 Men doubout douvan a-y èvè on fwa ki solid, pas zò sav kè tout frè* a-zòt ki toupatou si latè ka soufè menmjan ki zòt.
10 Men apré zò ké soufè pannan on ti moman, Bondyé-la ki ka aji èvè on bonté ki èstraòwdinè adan tout kalté domenn, ki kriyé-zòt pou zò pé sa soudé èvè Kris é pou zò pé sa risivwè glwa pou touttan, ké fin fòwmé-zòt. I ké fè-zòt rété doubout, i ké fè-zòt vin fò é i ké mèt-zòt asi on fondasyon ki solid.
11 I ni puisans pou touttan. Amèn.
12 Sé grasa Silven*, on sèwvitè a Bondyé ki fidèl, kè an maké sé déotwa mo-lasa ba zòt. Sé té pou ankourajé-zòt é pou zò sèten kè Bondyé aji èvè on bonté ki èstraòwdinè èvè zòt. Kenbé rèd pou Bondyé kontinyé aji konsa èvè zòt.
13 Madanm-la* ki Babilòn la é kè Bondyé chwazi kon zòmenm, ka voyé on bèl bonjou ba zòt, é Mawk gason an-mwen osi.
14 Di-zòt bonjou èvè on bo ki ka montré kè yonn enmé lòt.
Zòtout ki soudé èvè Kris, an ka swété kè zò ni lapé.
Noté sa
^ Kivédi twoupo-la.
^ Oben « sé ansyen-la ».
^ Oben « fò zò abiyé-zòt èvè imilité konsi sé on lenj zò té ka mèt anlè zòt » ; « maré ren a-zòt èvè imilité ».
^ Pi ègzaktèman « men a Bondyé ki puisan ».
^ Oben « ki ka trakasé-zòt ».
^ Dépawfwa, Bib-la ka sèvi èvè èksprésyon-la « sé frè-la » pou palé ki dè misyé ki dè madanm.
^ Yo ka kriyé-y Silas osi.
^ Mo grèk la yo itilizé la sé pou palé dè on madanm. Adan ka-lasa, on biten ki sèten, sé kè yo ka sèvi èvè-y pou palé dè lasanblé-la ki Babilòn la.
