1 Pyè 1:1-25
1 Mwen Pyè, apòt a Jézi Kris, an ka maké lèt-lasa ba zòt, zòt ki adan réjyon a Pon, a Galasi, a Kapadòs, a Lazi é a Bitini, zòt ki étranjé é ki ka rété sé koté-lasa pou on ti moman.
2 Papa Bondyé* chwazi-zòt dapré sa i té ja konnèt alavans, zòt ki vin sen grasa lèspri sen, pou zò pé sa obéyi é pou zò vin pwòp grasa san a Jézi Kris :
An ka mandé pou Bondyé kontinyé aji épi zòt èvè on bonté ki èstraòwdinè, é an ka mandé pou i édé-zòt ni lapé akontinyé.
3 An ka mandé osi kè moun ba Bondyé louwanj, li ki Papa a Ségnè an-nou Jézi Kris, pas konm i plen mizérikòd, i pèwmèt-nou fèt on dézyèm fwa pou nou ni on èspwa ki pa ka disparèt davwa Jézi Kris résisité.
4 I fè sa osi pou nou érité on biten ki pé pa gaté, ki pé pa vin sal, é ki pé pa détwi. Éritaj-lasa séré an syèl-la ba zòt,
5 zòt kè Bondyé ka pwotéjé grasa puisans a-y davwa zò ni lafwa. Sa ja ka atann-zòt*, é zò ké pé vwè sa byen konm i fo an tan a lafen.
6 Kifè, tchè a-zòt kontan toubònman menmsi fò zò jwenn diféran éprèv ki ké fè-zòt vin tris pannan on ti moman,
7 konsa, sa ké montré fòs a fwa a-zòt (fwa-lasa ni plis valè ki lò ki ka dégrenné magré yo pasé-y an difé), é Bondyé ké ba-zòt louwanj, glwa é lonnè lè Jézi Kris ké parèt*.
8 Menmsi zò po’o jen vwè-y, zò enmé-y. Menmsi zò pa’a vwè-y konnyéla, zò ni fwa adan-y é tchè a-zòt kontan toubònman ; zò pa menm pé èspliké ankijan tchè a-zòt kontan, é jwa-la zò ni la èstraòwdinè,
9 pas fwa-la zò ni la ké pèwmèt-zòt sové*.
10 Sé pwofèt-la ki palé* dè jan Bondyé té’é aji èvè zòt épi on bonté ki èstraòwdinè, pozé onlo kèsyon anrapò èvè jan-la Bondyé té’é sové-zòt la. Yo fè onlo rèchèch asi sa osi.
11 Dépi alavans, lèspri sen* té fè-yo sav kè Kris té’é soufè é kè yo té’é ba-y glwa apré. Alò sé pwofèt-la kontinyé chèché ki enfòwmasyon lèspri sen té’é ba-yo pou sav a ki moman sé biten-lasa té’é fèt.
12 Bondyé fè-yo sav kè sa yo té ka anonsé la, a pa té pou yomenm, men sé té pou zòt yo té ka fè sa. É konnyéla, zò vin konnèt sé biten-lasa grasa sé moun-la ki anonsé-zòt bon nouvèl-la. Yomenm a yo, yo fè sa pas Bondyé fè lèspri sen la sòti an syèl-la pou édé-yo. A pa ti anvi sé zanj-la anvi konprann sé biten-lasa !
13 Kifè, préparé lèspri a-zòt pou travay rèd ; kontinyé fè tout biten èvè bon jijman ; é konm Bondyé ké aji èvè on bonté ki èstraòwdinè épi zòt lèwvwè Jézi Kris ké parèt, fò zò toujou ni èspwa.
14 Menmjan ki on timoun ki ka obéyi, pa lésé sé lanvi-la zò té ni la lèwvwè zò pa té konnèt Bondyé gidonné-zòt.
15 Men okontrè, kèlkanswa sa zò ka fè, fò zò sen menmjan ki Sila ki chwazi-zòt* la.
16 Pas mi sa ki maké : « Fò zò sen, pas an sé on Bondyé ki sen. »
17 É si zò ka priyé Papa-la ki ka jijé moun dapré sa yo ka fè é ki ka fè sa san fè préférans, aji on mannyè ki ka montré kè zò ka rèspèkté-y onlo pannan ti moman-la zò ka viv kon étranjé adan mond-lasa.
18 Pas zò sav kè a pa èvè biten ki pé dégrenné, kon awjan é lò yo libéré-zòt* pou zò té arété viv kon zò té ka viv la. Vi-la zò té ka menné la pa té ka sèvi ayen ; sé zansèt a-zòt ki aprann-zòt viv konsa.
19 Men sé grasa san a Kris zò vin lib, on san ki ni onlo valè é ki kon san a on timouton ki pa ni pon défo é pon tach.
20 Bondyé chwazi Kris avan mond-la vin ka ègzisté, men Kris parèt pou édé-zòt lè sé épòk-la bout.
21 Grasa-y, zò ka kwè an Bondyé, kivédi sila ki résisité-y la é ki ba-y glwa, pou zò ni fwa adan Bondyé é pou èspwa-la zò ni la ka vin dè-y.
22 Piskè konnyéla zò* vin pwòp davwa zò ka fè sa ki adan vré ansègnman-la, yonn vin enmé lòt kon frè é sè, é zò pa ipokrit. Kifè, fò yonn enmé lòt onlo menm ; fò lanmou-lasa sòti an fon a tchè a-zòt.
23 Pas a pa grasa on grenn ki pé pouri zò fèt ondòt fwa, men sé grasa on grenn ki pé pa pouri, é grasa pawòl a Bondyé-la ki vivan la é ki étèwnèl la.
24 Pas « toutmoun* ka touvé-yo kon zèb, é tout bèlté a-yo kon on flè ki an savann-la ; zèb-la ka vin sèk, é flè-la ka tonbé,
25 men pawòl a Jéova* pé’é jen disparèt ». É ‘pawòl-lasa’, sé bon nouvèl-la yo anonsé-zòt la.
Noté sa
^ Oben « Bondyé Papa-la ».
^ Oben « délivrans a-zòt ja paré ».
^ Oben « lè toutmoun ké pé vwè kè Jézi Kris la ».
^ Oben « pèwmèt nanm a-zòt sové ».
^ Oben « ki anonsé pwofési anrapò èvè ».
^ Oben « lèspri sen la ki té adan yo la ».
^ Oben « kriyé-zòt ».
^ Oben « péyé on pri pou libéré-zòt ».
^ Oben « nanm a-zòt ».
^ Pi ègzaktèman « tout chè ».
