Pou nou pé sa ni lavi étèwnèl grasa chè a Jézi é grasa san a-y, fò nou ni fwa adan ranson-la. (Éféz. 1:7). Chak lanné, lè yo ka sélébré Rèpa a Ségnè-la, séla Jézi kriyé ‘sélézòt mouton-la’ pa ka manjé pen-la é pa ka bwè diven-la. Yo pa andwa fè sa (Jan 10:16). Kanmenmsa, yo ka manjé « pen-la ki ka bay lavi ». Yo ka fè sa lè yo ka montré yo ni fwa adan sakrifis a Jézi é adan tout sé bon biten-la ranson-la ké pwokiré-yo (Jan 6:53). Pawkont séla ki ka manjé pen-la é bwè diven-la pannan Mémoryal-la, ka montré kè yo ka fè pawti a nouvo alyans-la é yo ni lèspérans dè régné èvè Jézi an syèl-la. Donk ki nou sé yonn adan sé wen-la oben yonn adan sélézòt mouton-la, fò nou montré nou ni fwa adan ranson-la pou nou ni lavi étèwnèl. w24.12 13 § 14, 16.

Pannan Rèpa a Ségnè-la, Jézi ba apòt a-y pen ki pa té ni lèven adan-y, é i di kè pen-lasa té ka rèprézanté kò a-y. Aprésa i fè-yo bwè on koup diven, é i di diven-lasa té ka rèprézanté « san a alyans-la » (Mawk 14:22-25 ; Lik 22:20 ; 1 Kor. 11:24). Nouvo alyans-lasa, sé on alyans ki fèt antrè Jéova é « pèp a Israèl », Israèl èspirityèl la, kivédi séla ki ké régné èvè Jézi adan « wayòm a Bondyé » (Ébr. 8:6, 10 ; 9:15). Pannan Rèpa a Ségnè-la, pawòl a Jézi té ka vizé « ti twoupo-la ». Sé apòt-la ki té ansanm èvè-y jouswa-lasa, sé yo prèmyé ki fè pati a ti gwoup-moun-lasa. Sé ba gwoup-moun-lasa tousèl Jézi té’é préparé on plas an syèl-la. w24.12 11 § 9-10.

Yo trayi Jézi, yo arété-y, yo di bétiz anlè-y, yo di kè i fè dé biten kè i pa jen fè é yo fè-y bon atrosité. É pou fin, ni sòlda ki kloué Jézi asi on poto pou tchouyé-y. Mésyé, pannan yo té ka fè Jézi bon abominasyon é pannan i té ka soufè, ni on moun ki té ka soufè plis ankò. Sé té Jéova. Puisans a-y pa ni pon limit, é i té’é pé fè on biten pou anpéché Gason a-y soufè, men i pa fè-y. Poukwasa ? Sé pas Jéova enmé-w. Pi bèl mannyè i montré lanmou-lasa, sé lèwvwè i sakrifyé vi a Jézi. Kifè, sa Jéova fè la ka montré kè i enmé-w onlo onlo onlo. I té sav kè sa té’é fè-y soufè bon soufè la, men magrésa i jous sakrifyé Gason a-y pou woté-nou anba jouk a péché-la é anba jouk a lanmò ! (1 Jan 4:9, 10). Wi, sa Jéova vlé sé édé-nouchak goumé èvè péché-la é gangné konba-la ! w24.08 6 § 13-14.

Lè nou ka sonjé jan sa dwèt fè Jéova lapenn lè i vwè gason a-y soufè, sa ka fè-nou vwè jan i enmé-nou. Satan di kè anba éprèv, pon sèwvitè a Jéova pé’é rété fidèl a-y. Alò pou montré kè Satan ka manti, Jéova lésé Gason a-y soufè joustan i mò (Jòb 2:1-5). Jéova vwè kijan moun té ka fè jé èvè Gason a-y, i vwè kijan sé sòlda-la ba-y bon fwèt é kijan yo maré-y asi on poto. I vwè Gason a-y soufè bon soufè-la joustan i rann dènyé souf a-y (Mat. 27:28-31, 39). Jéova té’é pé arété sa a nenpòt ki moman. (Mat. 27:42, 43). Men si Jéova té fè sa, Jézi pa té’é péyé ranson-la é lèwgadé nou pa té’é ni pon èspwa pou dèmen. Sé pousa Jéova lésé Gason a-y soufè joustan i mò. w25.01 22 § 7.

Nou lè 16 nizan 33. Sé disip-la tris toubònman é yo pè. Ni 2 adan yo ki ka lésé Jérizalèm pou ay Émayis. On misyé yo pa konnèt ka vin jwenn-yo é i ka koumansé maché ansanm èvè yo. Sé disip-la ka rakonté-y sa ki rivé Jézi é kijan sa té rèd ba yo toubònman. Aprésa, boug-la ka koumansé palé dè biten yo pé’é jen oubliyé. « I koumansé pa sa Moyiz é tout sé Pwofèt-la té maké » é i ka di-yo poukwa fò Mési-la té soufè é poukwa fò i té mò. Lè sé 3 nonm-la ka rivé Émayis, boug-la ka di-yo kimoun i yé : i sé Jézi kè Bondyé résisité ! Pannan sé 40 dènyé jou-la Jézi fè asi latè la, i parèt douvan sé disip-la a plizyè rèpriz. Jézi ankourajé-yo, kifè yo pa té tris é yo pa té pè ankò. A moman-lasa, yo touvé-yo ni tchè-kontan é yo té ni kouraj pou yo té ay préché é anségné bon nouvèl a Wayòm la. w24.10 12 § 1-3.

On timoun ka grandi san fòsé, sé on biten ki ka fèt natirèlman. Men a pa menm biten pou on krétyen ki bizwen vin mati. Si i pa fè éfò, biten-la pé’é fèt tousèl a-y. Pa ègzanp, sé frè é sè Korent la té aksèpté bon nouvèl-la, yo té pran lèbatèm é Bondyé té voyé lèspri sen a-y asi yo. Yo té aprann onlo biten osi grasa sa Pòl té anségné-yo (Akt 18:8-11). Men déotwa lanné apré yo té pran lèbatèm, ni onlo adan yo ki poto’o vin dé krétyen ki byen doubout adan lavérité (1 Kor. 3:2). Pou nou vin on krétyen ki mati, dabò pou yonn, fò-nou anvi vin mati. Moun ki « pa konnèt ayen » é ki anvi rété konsa pé ké jen vin dé krétyen ki mati (Pwov. 1:22). Nou pa anvi sanm sèwten granmoun ki ka kontinyé mandé manman-yo oben pap’a yo ka pou yo fè, olyé yo pran pwòp désizyon a yo. Okontrè, nou vé pran rèsponsabilité an nou é nou vé kontinyé vin pibon zanmi èvè Jéova. Si ou ka chèché a vin on krétyen ki mati, priyé Jéova é mandé-y ba-w « lanvi-la é fòs-la anmenmtan pou [ou] pé aji » (Filip. 2:13). w24.04 4 § 9-10.

Èvè onlo bonté, Jéova ka di-nou sa i ka rèsanti lè i ka jijé moun. I pé’é jen présé détwi on moun pou touttan. Tèlman i ni mizérikòd, dépi sa posib, i ka aji èvè moun èvè mizérikòd. Ka nou sav anrapò èvè moun ki pé’é résisité ? Adan Labib, nou ka touvé enki déotwa ègzanp. Jézi ni lokazyon di kè pa ni rézirèksyon pou Jida Iskaryòt (Mawk 14:21 ; gadé osi Jan 17:12 é nòt-la ki adan Bib-la ki fèt pou étidyé la an fransé). Jida té sav byen kè sa i té kay fè la té kont Jéova é kont Gason a-y Jézi, men i désidé fè-y kanmenm (gadé Mawk 3:29 é sé nòt-la ki adan Bib-la ki fèt pou étidyé la an fransé). Anplisdisa, Jézi di kè sèwten adan sé chèf a rèlijyon juif la, ki té kont li, pa té’é résisité (Mat. 23:33 ; gadé Jan 19:11 é nòt-la ki asi « l’homme » ki adan Bib-la ki fèt pou étidyé la an fransé). É lapòt Pòl ni lokazyon di kè moun ki apòsta é ki pa’a rèpanti-yo pé’é résisité nonplis (Ébr. 6:4-8 ; 10:29). w24.05 4 § 10-11.

Lè nou ka rété bon zanmi èvè Jéova, menmsi Satan ka fè dé biten ki ka fè-nou dimal, sa pé’é diré pou touttan (1 Jan 3:8). Adan nouvo mond-la, Jéova ké kontinyé pwotéjé zanmi a-y pou ayen pa anpéché-yo rété bon bon zanmi èvè-y, men osi pou yo pa mò (Rév. 21:4). Jéova fè-nou on bèl lonnè toubònman lèwvwè i envité-nou anba tant a-y (Ézék. 37:27). Nou pé vin bon bon zanmi èvè-y é sa pé diré pou touttan. Men kijan pou nou konpòwté-nou si nou vlé rété pawmi moun i envité anba tant a-y ? Lèwvwè on moun envité-w akaz a-y, sèten ou anvi fè dé biten ki ka fè-y plézi. Menmjan-la, nou anvi sav sa Jéova ka atann dè moun ki envité a-y. Konm nou enmé Jéova, sa ka pousé-nou fè tousa nou pé pou ‘fè-y plézi a san pou san’ (Kol. 1:10). Fò pa nou jen oubliyé kimoun i yé é fò nou toujou ni onlo rèspé ba-y. Konsa, nou pé’é konpòwté-nou on mannyè ki pa ka fè-y plézi. Asirésèten, sa nou anvi sé ‘rèkonnèt limit an nou lè nou ka maché èvè Bondyé an nou’ ! (Mich. 6:8). w24.06 4 § 8-9.

Jéova mandé Abraam, on nonm ki té ni onlo fwa, fè on biten ki té rèd toubònman. I mandé-y sakrifyé gason a-y, Izaak. Mésyé, sèten pa té ni pon biten ki té’é pé raché tchè a Abraam plis ki sa. Men i fè tousa Bondyé té mandé-y fè. É lèwgadé, pannan i té kay tchouyé gason-la, Jéova anpéché-y fè sa. Jéova té sav jan tchè a Abraam té’é sengné si i té tchouyé gason a-y. Ègzanp-lasa ka montré-nou ka Jéova té’é fè apré. I té’é dakò pou sakrifyé Gason-la i té pi enmé la. A pa ti enmé Jéova enmé lézimen ! (Jén. 22:1-18). Lè Jéova ba sé Israélit-la Lwa-la, i mandé-yo sakrifyé zannimo pou i pé sa padonné péché a yo (Lév. 4:27-29 ; 17:11). Sé sakrifis-lasa té ka montré kè Jéova té’é fè on pi gwo sakrifis ankò, on sakrifis ki té’é woté-nou anba jouk a péché-la poudèbon. Jéova mandé pwofèt a-y maké dé biten anrapò èvè pitit-la i té pwomèt la, kivédi pwòp Gason a-y. Sé pwofèt-la èspliké kè gason-lasa té’é soufè é i té’é mò. Yo té’é tchouyé-y kon lèwvwè yo ka sakrifyé on timouton (Iz. 53:1-12). Ou ka imajiné ? Jéova té kay sakrifyé Gason a-y kè i té enmé pou woté-nou anba jouk a péché-la é anba jouk a lanmò, é i fè sa pou vou osi ! (Iz. 53:1-12). w24.08 4 § 7-8.

Lè ou ka li Bib a-w, mandé-w kijan pou-w apliké sa ou ka aprann. Chakfwa ou fin fè lèkti a-w, pozé-w kèsyon-lasa : « Kijan an ké pé sèvi èvè sa an aprann jòdijou, é kijan an ké pé sèvi èvè-y apré ? » An-nou pran on ègzanp. Imajiné kè ou li 1 Tésalonisyen 5:17, 18. Lè ou li sé 2 vèwsé-lasa, ou té’é pé mandé-w ès ou ka priyé souvan é ès ou ka fè sa èvè tout tchè a-w. Ou té’é pé éséyé sonjé osi déotwa biten ki ka ba-w anvi di Jéova mèsi. É pétèt ou ké désidé di-y mèsi pou 3 biten an pawtikilyé. Lè ou ka pran déotwa minit tousèl pou réfléchi konsa, piti-a-piti, ou ka vin on moun ki ka tann Pawòl a Bondyé é ki ka mété-y an pratik. É sonjé tousa bon biten sa ké menné ba-w si ou ka fè sa chakjou. Nonsèlman ou ké vin on moun ki ka mèt Pawòl a Bondyé an pratik, men ou ké vin filé toubònman adan domenn-lasa. w24.09 4-5 § 9-10.

Jéova fè-nou on mannyè ki ka fè kè nou kontan lèwvwè nou ka rèsèvwa, men nou pi kontan ankò lè nou ka bay. Lèwvwè nou ka édé frè é sè an nou, sa ka ban-nou tchè-kontan. É nou kontan lè yo ka montré kè yo ni rèkonésans pou sa nou fè ba yo. Men ki yo montré rèkonésans a yo ki yo pa fè-y, nou pé ni tchè-kontan davwa nou aji byen konm i fo. An-nou pa jen oubliyé kè ‘Jéova pé ban-nou lontan plis ki sa’ (2 Kron. 25:9). Nou pé’é jen pé bay plis ki sa Jéova ka ban-nou ! É lè sé Jéova ki ka rékonpansé-nou, pa ni pi bèl biten ki sa. Alò fò nou byen désidé a kontinyé imité Pap’an nou ki an syèl-la é ki i donan. w24.09 31 § 20-21.

Jéova ka aji èvè pityé èvè nou, é i ni konpasyon pou nou (Sòm 103:13 ; Iz. 49:15). I sav mété-y anplas a moun, é lè nou ka soufè, i ka soufè ansanm èvè nou (Zak. 2:8). Si a pa té li, nou pa té’é pé konnèt li é nou pa té’é pé vin zanmi èvè-y (Sòm 25:14 ; Akt 17:27). I ni imilité, « i ka bésé-y pou i gadé syèl-la é tè-la, é i ka woté toupiti-la an pousyè-la » (Sòm 113:6, 7). Lè nou ka gadé tousa, pa ni mwayen nou pa ba Bondyé an nou lonnè ! Nou ka ba Jéova lonnè pas nou vlé toutmoun konnèt-li. Onlo moun pa konnèt lavérité asi-y. Poukwa sa ? Paskè Satan simé onlo manti asi Bondyé é sé moun-la ka pran sa pou lajan-kontan (2 Kor. 4:4). I ka fè-yo konprann kè Jéova sé on Bondyé ki enmé vanjé-y, ki pa’a pran penn a moun é kè sé akòz dè-y si yo ka soufè. Men nou, nou sav kimoun i yé vréman é nou pé fè-yo konnèt lavérité asi-y. Konsa nou ka ba Bondyé an nou lonnè (Iz. 43:10). w25.01 3 § 6-7.

O 1^é syèk, moun ki té èvè Satan simé onpakèt manti asi Gason a Bondyé, alòskè Jézi té pawfè é kè i té ka fè mirak. Pa ègzanp, sé chèf a rèlijyon juif la té ka di pèp-la kè si Jézi té ka rivé woté démon asi moun, sé pas chèf a sé démon-la ba-y pouvwa-lasa (Mawk 3:22). É jou-la yo té ka jijé Jézi la, sé chèf a rèlijyon la di kè Jézi dérèspèkté non a Bondyé, é yo monté tèt a sé moun-la ki té adan foul-la pou yo té mandé mò a Jézi (Mat. 27:20). Plita, pannan disip a Jézikris té ka préché bon nouvèl-la, sé moun-la ki té kont yo la « monté tèt a moun a sé nasyon-la » pou yo té pèwsékité sé disip-la (Akt 14:2, 19). Niméwo a 1^é désanm 1998 a Tou dè Gad la bay on ti èsplikasyon asi Akt 14:2. I di konsa kè non sèlman sé moun-la ki té pou Satan la pa té vé tann mésaj-la, men anplisdisa, yo té ka di onpakèt mové biten asi sé krétyen-la pou fè moun hay-yo é pou ponmoun pa té kouté-yo. Menmjan Satan té ka manti o 1^é syèk, sé konsa i ka manti jòdijou ankò. w24.04 11 § 15-16.

Lèwvwè on moun ka mò, a pa moman-la i ka mò la ki ké fè si i ké ni oben si i pé’é ni lavi étèwnèl. Jéova sé on Jij ki pawfè, é i toujou ka pran désizyon ki jis (Sòm 33:4, 5). Alò nou pé sèten kè « Jij a tout latè » ké fè sa ki jis. Ondòt biten nou pé pansé, sé kè Bondyé pé’é jen bazé-y asi koté-la on moun ka rété la pou désidé si i ké ba-y lavi étèwnèl. É sa toutafè rézonab kè nou pansé sa. Jéova pé’é jen di kè milyon é milyon moun « sé dé kabrit » enki pas yo ka rété adan dé péyi yo pa jen ni lokazyon tann bon nouvèl-la (Mat. 25:46). Jij a tout latè jis, é i ka sousyé-y dè sé moun-lasa lontan plis ki nou. Nou pa sav kijan Jéova ké gidonné sé évènman-la pannan gwo tribilasyon-la. Pétèt ni sèwten adan sé moun-lasa ki ké ni laposibilité aprann konnèt Jéova, ni fwa adan-y é koumansé sèvi-y, lèwvwè i ké fè ansòt pou non a-y vin sen anba zyé a tout sé nasyon-la (Ézék. 38:16). w24.05 12 § 14-15.

Lè fò yo vin a sèkou a frè é sè a yo, sèwvitè a Jéova ka fè sa èvè plézi (2 Kor. 8:4). Men délè sa ka mandé kouraj pou fè sa. Pa ègzanp, lèwvwè on lagè pété, sé ansyen-la sav kè sé frè é sè la bizwen yo ankourajé-yo é kè yo soutyenn-yo. Sé ansyen-la sav osi kè pétèt fò yo ké édé sé frè é sè la a ni piblikasyon pou yo rété bon bon zanmi èvè Jéova é kè fò yo ké édé frè é sè a yo a ni sa yo bizwen pou viv. Adan dé ka konsa, sa enpòwtan kè nou rété soudé. Sé pousa, lè lafilyal ka mandé-w fè on biten, fè-y (Ébr. 13:17). Sa enpòwtan kè sé ansyen-la pran labitid gadé enstriksyon ki ka di kijan pou nou préparé-nou pou sianka ni on katastwòf é ka pou nou fè siwvwè ni on katastwòf (1 Kor. 14:33, 40). Fò ou ni kouraj, men fò ou pran prékosyon a-w osi (Pwov. 22:3). Fò ou ni bon jijman. É pa mèt vi a-w andanjé initilman. Fèfon asi Jéova. Sonjé kè Jéova vé pa ayen rivé sé frè é sè la, é i vé pa ayen rivé-w nonplis. Kifè, i pé édé-w vin a sèkou a frè é sè a-w san mèt vi a-w andanjé. w24.07 4 § 8 ; 5 § 11.

David té konnèt Jéova é i té ka apiyé-y anlè-y. Lè lènmi a-y té ka kouri dèyè do a-y pou tchouyé-y, kon Sayil fè pa ègzanp, i mandé Jéova édé-y. Bondyé réponn a priyè a-y é i sové-y. Alò mi sa David di : « Jéova vivan ! » (Sòm 18:46). Lè David di sa, i montré kè i té sav kè Bondyé té ka ègzisté, men a pa sa tousèl i té vé di. On liv ki ka palé dè sé Sòm-la ka èspliké kè David di sa pou montré jan i té ni konfyans an Jéova. Pou-y, Jéova sé té « on Bondyé ki vivan é ki ka pòté mannèv pou sèwvitè a-y akontinyé ». Parapòt a sa David té ja viv, i té sav kè Bondyé a-y té « vivan », é tèlman i té sèten dè sa, sa té ka ba-y bon balan pou kontinyé sèvi-y é pou ba-y louwanj (Sòm 18:28, 29, 49). Si nou sèten kè Jéova sé Bondyé-la ki vivan la, sa ké ban-nou bon balan pou sèvi-y. Sa ké ban-nou fòs pou tchenbé anba éprèv, é sa ké ban-nou gou pou nou kontinyé travay rèd ba-y. Anplisdisa, nou ké byen désidé a rété bon bon zanmi èvè-y. w24.06 20-21 § 3-4.

Ka sé pawòl-la lapòt Pòl maké ba sé Tésalonisyen-la ka aprann-nou ? Lèwvwè nou ka tann moun ka palé dè on biten ki pa annakò èvè sa Labib ka di, oben kè nou ka tann on biten ki ka fè-w mèt men si tèt, fò-nou aji èvè sajès. On jou, adan sa yo té ka kriyé Linyon sovyétik avan, lenmi an nou ba frè an nou on lèt ki té ka vin dè biwo mondyal la swadizan. Lèt-lasa té ka di sé frè-la kè fò-yo té mèt-yo apa parapòt a òwganizasyon a Jéova é kè fò-yo té mèt pwòp òwganizasyon a yo si pyé. Lè ou té ka gadé lèt-lasa, ou pa té’é jen di kè a pa té sé frè a biwo mondyal la ki té voyé-y. Men sé frè-la pa pri adan zatrap-lasa, pas sa lèt-la té ka di-yo la pa té annakò èvè sa yo té aprann adan Bib-la. Jòdijou osi, lènmi an nou pé sèvi èvè dé biten kon Entèwnèt é sé rézo sosyo la pou yo éséyé kouyonné-nou é pou yo mèt divizyon adan pèp a Bondyé. Alò olyé nou ‘lésé sé biten-lasa chouboulé-nou é fè-nou pèd bon jijman an nou’, an-nou pwotéjé-nou é an-nou mandé-nou si sa yo ka di la oben sa yo maké la annakò èvè sa nou aprann adan Bib-la (2 Tés. 2:2 ; 1 Jan 4:1). w24.07 12 § 14-15.

Désizyon-la nou ni a pran la ki pli enpòwtan la, sé lè nou ka désidé ba Jéova vi an nou é lè nou ka rantré an fanmi a-y. Sé sa Jéova vlé pou toutmoun. Poukisa ? I vlé nou vin zanmi a-y é kè nou viv pou touttan (Dét. 30:19, 20 ; Gal. 6:7, 8). Men nou ka tou konprann kè Jéova pa’a fòsé ponmoun sèvi-y. I ka lésé-noutout désidé dè sa nou ké fè. Men vinvwè on moun ki batizé ka fè on péché ki grav, ka ki ké pasé ? Ében siwvwè i pa’a rèpanti-y, yo ké woté-y adan lasanblé-la (1 Kor. 5:13). Men a pa paskè yo woté-y adan lasanblé-la kè Jéova pa anvi vwè moun-lasa viré koté a-y. An réyalité, si i bay vi a Gason a-y konm ranson, sé pas i té anvi padonné péché a moun ki ka rèpanti-yo. Pap’an-nou ki plen lanmou ka sipliyé moun ki péché rèpanti-yo (Zak. 1:3 ; Wom. 2:4 ; Jak 4:8). w24.08 14 § 1-2.

Lè lapòt Jan maké twazyèm lèt a-y, té ni déotwa moun ki té ka anségné mansonj é sa té ka mèt dézòd adan lasanblé-la. Men érèzman, té ni dòt krétyen ki té ka kontinyé ‘maché adan lavérité’. Yo té ka obéyi Jéova, é yo té ka ‘maché dapré komandman a-y’ (2 Jan 4, 6). Sé krétyen-lasa té fidèl, é sa té ka fè Jan é Jéova plézi toubòlman (Pwov. 27:11). Ka sa ka aprann-nou ? Si nou ka rété fidèl a Jéova, nou ké kontan é nou ké fè lézòt plézi osi (1 Jan 5:3). Nou kontan pas nou sav nou ka fè Jéova plézi. Li Jéova, i kontan lè i ka vwè-nou ka goumé pou nou pa fè sa ki mal é pou nou fè sa i ka mandé-nou. Sé zanj-la osi an syèl kontan lè yo ka vwè sa (Lik 15:10). Nou osi nou ka kontan lè frè é sè an nou ka rété fidèl (2 Tés. 1:4). Kanta lèwvwè Jéova ké détwi mond-lasa ki an men a Satan, nou ké kontan davwa nou rété fidèl a Jéova. w24.11 12 § 17-18.

Konmen tan pou-w rété ka gadé kijan on moun ka fonksyonné avan ou di-y kè i ka entérésé-w ? Si ou k’ay two bonnè, i ké di an tchè a-y kè ou sé on moun an kouyonnad (Pwov. 29:20). Men si moun-la ja vwè kè ou ka touné alantou a-y, men kè ou pa’a fè pon jès pou vin palé ba-y, i pé mèt an tèt a-y kè ou pa sav sa ou vé (Ékl. 11:4). On biten pou-w pa oubliyé sé kè pou frékanté on moun, ou pa oblijé sèten a san pou san kè ou ké mayé èvè-y. Pawkont, fò ou byen sèten kè voumenm a-w ja paré pou mayé é kè moun-lasa pé on bon madanm oben on bon mari pou-w.Ka pou-w fè si ou ka rann-vou kont kè on moun ni zyé asi-w men kè ou pa entérésé ? Éséyé aji on mannyè pou moun-la konprann byen kè ou pa entérésé. Sa pa té ké janti si ou té ka lésé moun-la kwè kè pétèt ou ké aksèpté frékanté-y, alòskè a pa lentansyon a-w (Éféz. 4:25). w24.05 22-23 § 9-10.

Siwvwè on krétyen wen pa fè atansyon pou ayen pa jouwé adan lanmityé a-y èvè Jéova, i pé’é fè pawti a séla yo ké « chwazi » la pou yo sanblé an syèl-la (Mat. 24:31). Anfinaldikont, tout sèwvitè a Bondyé, kèlkanswa èspérans a yo, dwètèt pran sé pawòl-la Jézi di la oséryé, é yo dwètèt montré-yo véyatif é rété fidèl. Nou konnèt Jéova byen, é nou sav kè i toujou ka aji èvè jistis. Siwvwè a épòk-la nou ka viv la i ka chwazi dé krétyen ki fidèl pou yo vin wen, sa pa ka enkyété-nou. Nou ka sonjé sa Jézi di adan ègzanp a pyé-rézen-la lèwvwè i té ka palé dè sé travayè-la ki koumansé travay lontan apré sé prèmyé-la (Mat. 20:1-16). Sé travayè-la yo chwazi la pou vin travay adan chan-rézen-la an fen a jouné-la trapé menm kantité lajan ki séla ki koumansé travay pi bonnè la. Menmjan-la, kèlkèswa moman-la on krétyen ka vin wen la, i ké ni rékonpans a-y an syèl-la siwvwè i ka kontinyé rété fidèl. w24.09 24 § 15-17.

Si ni on moun nou pé pran ègzanp asi-y pou sav ègzaktèman kijan pou nou réaji lèwvwè yo ka fè-nou méchansté, sé Jézi. Enki réfléchi asi tousa yo fè-y sibi. Adan pwòp fanmi a-y, ni sa ki té ka di tèt a-y pati. Moun ki té chèf an rèlijyon-la akizé-y, yo di i ka travay èvè sé démon-la. Sé sòlda women la fè jé èvè-y, yo simé kou asi-y, aprésa yo tchouyé-y (Mawk 3:21, 22 ; 14:55 ; 15:16-20, 35-37). Magré tousa i sibi, Jézi pa jen éséyé vanjé-y. Ka ègzanp a-y pé aprann-nou ? (1 Pyè 2:21-23). Jézi ban-nou on bèl ègzanp toubònman. Nou pé imité-y lèwvwè yo ka aji mal èvè nou. I té sav a ki moman pou i palé é a ki moman pou i pé (Mat. 26:62-64). Délè yo té ka di bétiz asi-y, men i pa té ka réponn (Mat. 11:19). Lè i té ka désidé palé, i pa té jen ka jiré sé moun-la ki té ka pèwsékité-y la, é i pa jen mennasé-yo nonplis. w24.11 4-5 § 9-10.

Imajiné ou ka fè on moun ou enmé on bèl ti kado. Non sèlman kado-lasa bèl, men ou ka fè ansòt pou kado-lasa itil ba moun-la osi. Sèten sa ké fè-w lapenn si moun-la ka enki fèmé kado-la ou fè-y la adan on lanmwa é kè i pa menm ka sonjé-y ankò. Pawkont, si i ka sèvi èvè kado-la ou fè-y la é kè i ka vin di-w mèsi, sèten sa ké fè-w plézi. Ka ègzanp-lasa ka aprann-nou ? Jéova bay gason a-y pou nou. A pa ti kontan Jéova dwèt kontan lèwvwè nou ka montré nou ni rèkonésans pou ranson-la é pou tout lanmou-la i montré-nou la lèwvwè i fè-nou bèl kado-lasa ! (Jan 3:16 ; Wom. 5:7, 8). Men afòs tan pasé, nou pé rivé a oubliyé kè ranson-la sé on bèl kado toubònman. A moman-lasa, sé konsi nou té ka fèmé kado-la Bondyé ban-nou la adan on lanmwa. Sé vré nou kontan ni-y, men konm i fèmé adan lanmwa-la é kè nou pa’a vwè-y, nou pa’a sonjé-y ankò. Pou nou pa touvé-nou adan on sitiyasyon konsa, fò nou pran labitid sonjé tousa Jéova é Jézi ja fè pou nou. w25.01 26 § 1-2.

On frè ki ka ranpli sé kondisyon-la pou vin ansyen, a pa « on nonm ki toufré vin disip ». Menmsi ou pa oblijé batizé dépi onlo lanné pou yo nonmé-w ansyen, ou bizwen tan pou ou pé sa vin on krétyen ki byen doubout adan lavérité. Avan yo nonmé-w antankè ansyen, ou dwètèt montré kè kon Jézi, ou sé on nonm ki ni imilité, é kè ou ka atann kè Jéova ba-w plis rèsponsabilité adan lasanblé-la, a moman-la i ké désidé la (Mat. 20:23 ; Filip. 2:5-8). Ou pé montré kè ou « fidèl » lè ou ka viv on mannyè ki ka fè Jéova plézi, é lè ou ka suiv dirèksyon-la i ka ban-nou la grasa òwganizasyon a-y. Lézékriti ka di on mannyè ki klè kè on rèsponsab dwètèt « kapab anségné ». Ès sa vlé di kè fò ou sé on zouti-filé pou fè diskou ? Awa. A pa tout sé ansyen-la ki sav fè bèl diskou, men yo sé dé zouti-filé lè yo ka préché é lè yo ka pran swen a sé frè é sè la. w24.11 23-24 § 14-15.

Lè ou ka tonbé asi on pasaj adan Labib ou pa byen konprann, fè rèchèwch. Aprésa, pannan jouné-la pran tan réfléchi asi sa ou sòti dékouvè, é asi sa sa ka aprann-vou asi Jéova, asi gason a-y, é asi jan yo enmé-w (Sòm 119:97, gadé nòt-la an fwansé). Pa dékourajé-w si chakfwa ou ka étidyé Labib ou pa’a touvé dé nouvo biten oben dé biten ou poto’o jen vwè avan. Ou on ti jan kon sé moun-la ki ka chèché lò an sab-la. Fò yo ni pasyans. Yo pé pasé konben lè oben konben jou ka chèché an sab-la pou yo touvé enki on ti grennpousyè an lò. Men yo pa ka lagé, pas ti grennpousyè an lò lasa ni valè ba yo. Sé menm biten ban nou. Chak ti vérité nou touvé an Bib-la ni plis valè ban nou ki lò ! (Pwov. 8:10). Alò aji èvè pasyans é kontinyé ti pwogram a lèkti a Labib a-w (Sòm 1:2). w25.01 25 § 14-15.

Jéova vé kè nou padonné volontyé moun ki fè-nou ditò (Sòm 86:5 ; Lik 17:4 ; Éféz. 4:32). Délè, nou pé ka soufè toubònman akòz dè sa on moun di-nou oben dè sa i fè-nou. Sa pi rèd ankò lèwvwè sé on bon zanmi an nou oben on moun an fanmi an nou ki ka fè-nou sa (Sòm 55:12-14). Dépawfwa, tèlman nou ka soufè akòz dè sa nou ka rèsanti, nou pé ni lenprésyon sé on koudkouto yo ban-nou (Pwov. 12:18). Fò pa nou éséyé fè konsi sa pa’a fè-nou ayen. Siwvwè nou ka éséyé toufé sa nou ka rèsanti, sé konsi nou ka lésé kouto-la adan bobo-la, é nou pé’é jen arété soufè. Délè, lèwvwè on moun ka fè-nou on biten ki fè-nou mal, prèmyé biten nou ka fè, sé kè nou ka fè kòlè. Labib menm ka di kè sa pé rivé kè nou fè kòlè. Men i ka ban-nou on konsèy osi. I ka di-nou kè fò pa nou lésé sa nou ka rèsanti pran lanmen asi nou (Sòm 4:4 ; Éféz. 4:26). Poukisa ? Paskè lèwvwè nou ka fè on biten tou kòlè, anjénéral, a pa bon biten sa ka menné (Jak 1:20). Alò sa pou nou pa jen oubliyé, sé kè lè nou ka fè on koudkòlè, sé réyaji nou ka réyaji, men lè nou ka kontinyé ni on moun si tchè, sé on chwa nou ka fè. w25.02 15 § 4-6.

Jézi pran on ègzanp pou montré kè on moun ki ka séré onpakèt lajan men « ki pa rich douvan Bondyé », sé on moun ki pa ni sajès (Lik 12:16-21). Sé vré, ponmoun pa konnèt ka ki ké fèt dèmen (Pwov. 23:4, 5 ; Jak 4:13-15). Anplisdisa, Jézikri ni lokazyon di kè fò on disip a-y paré a « lagé » tousa i ni (Lik 14:33). Sé sa ki rivé sé krétyen Jidé la o 1^é syèk. Yo té paré a pèd tousa yo té ni (Ébr. 10:34). Jòdijou, onlo frè é sè aksèpté pèd travay a yo pas yo pa té vlé soutyenn on pawti politik (Rév. 13:16, 17). Ka ki édé-yo fè sa ? Sé pas yo té ni konfyans adan pwomès a Jéova ki ka di : « An pé’é jen kité-w, é an pé’é jen lagé-w » (Ébr. 13:5). Kifè, nou ka fè sa nou pé pou mèt on ti lajan a koté pou dèmen. É menmsi dé biten nou pa té prévwa ka rivé-nou, nou ké kontinyé fèfon asi Jéova. w25.03 29 § 13-14.

Jéova pa ka mandé-nou vin on krétyen ki mati tousèl an nou. I ka ban-nou sé ansyen-la ki sé dé bèwjé é ki sé dé moun ki ka anségné adan sé lasanblé-la, pou yo édé-nou vin on krétyen ki byen doubout adan lavérité é « pou nou rivé menm nivo ki Jézi, pou nou vin konplé kon-y » (Éféz. 4:11-13). Jéova ka ban-nou lèspri sen a-y osi pou nou ni « mantalité a Kris » (1 Kor. 2:14-16). Anplisdisa, Bondyé ban-nou sé 4 Évanjil-la pou nou sav kijan Jézi rézonné, sa i di é kijan i aji pannan i té asi latè. Siwvwè ou ka fè éfò pou-w pansé é pou-w aji kon Jézi, ou ké vin on krétyen ki mati. Men pou nou pé sa vin on krétyen ki mati, fò pa nou kontanté-nou enki dè « sé ansègnman dè baz la anrapò èvè Kris », kivédi sé 1^é biten-la nou aprann asi Kris lè nou vin krétyen. w24.04 4-5 § 11-12.

Chakjou fò nou pran désizyon. Ni sèwten désizyon ki fasil a pran. Pa ègzanp nou pa ni a réfléchi onlo pou nou sav ka nou kay manjé lèmaten oben akilè nou kay kouché lèswa. Men ni dòt désizyon ki pi difisil a pran. Pa ègzanp séla ki anrapò èvè santé an nou, fanmi an nou, sa ki ké ban-nou lakontantman é sa ki anrapò èvè lanmityé an nou èvè Jéova. Sa nou anvi sé kè sé désizyon-lasa fè-nou dibyen, kè yo fè fanmi an nou dibyen osi é siwtou kè yo fè Jéova plézi (Wom. 12:1, 2). On biten nou pé fè pou nou pran on bon désizyon, sé chèché tout sé enfòwmasyon-la nou bizwen la. Poukwa sa enpòwtan ? An-nou pran on ègzanp : Imajiné on moun ki malad bon malad la k’ay aka on dòktè. Ès dòktè-la ké di i ka ba moun-la tèl ou tèl médikaman avan menm i ègzaminé-y oben avan menm i pozé moun-la kèsyon ? Awa. Menmjan-la, vou osi ou ké pran pibon désizyon si ou ka koumansé pa ègzaminé sé enfòwmasyon-la ou sanblé la anrapò èvè kèsyon-la ki ka entérésé-w la. w25.01 14 § 1-3.

Nou sav kè Jéova ni mizérikòd é kè i « vé pa ponmoun détwi » (2 Pyè 3:9). Ka ki ka montré sa ? An-nou vwè jan i aji èvè mizérikòd èvè sèwten moun ki té fè dé péché ki grav. Pa ègzanp, wa David fè on adiltè é i tchouyé on moun ! Men konm David rèpanti-y, Jéova padonné-y (2 Sam. 12:1-12). Wa Manasé, li kanta-y, fè dé biten ki pa té bon menm pannan bon enpé tan. Poutan, menm adan on ka grav konsa, Jéova aji èvè mizérikòd èvè-y. I padonné Manasé pas i rèpanti-y (2 Kron. 33:9-16). Sé ègzanp-lasa ka fè-nou sonjé kè Jéova ka aji èvè mizérikòd èvè on moun chakfwa i ka vwè kè i ni on bon rézon pou fè sa. Alò i ké résisité moun ki ka rèkonnèt kè sé péché-la yo fè la grav é ki ka rèpanti-yo kon David é Manasé fè. w24.05 4 § 12.