Lèwvwè Jéova woté pèp a-y anba men a sé Éjipsyen-la ki té ka fè-yo sèvi èsklav, Jéova chwazi sèwten adan sé Israélit-la pou yo vin prèt é pou yo travay ba-y adan tabèwnak-la. Anplisdisa, i ba sé Lévit-la dòt biten a fè anrapò èvè tabèwnak-la. Ès Jéova té ka okipé pibyen dè séla ki té ka travay ba-y adan tabèwnak-la oben dè séla ki té ka rété toupré a tabèwnak-la ? Awa ! Bondyé an nou pa ka fè préférans. Chak Israélit té pé vin bon bon zanmi èvè Jéova. Pa ègzanp, Jéova té ka fè ansòt pou toutmoun adan pèp-la té pé sa vwè kolòn niyaj la é kolòn difé la ki té anho a tabèwnak-la (Ègz. 40:38). Lèwvwè kolòn niyaj la té ka koumansé déplasé pou ay ondòt koté, menm sé moun-la ki té ka kanpé lwen lwen lwen a tabèwnak-la té pé vwè sa. A moman-lasa, yo té ka sanblé tout zéfé a yo, yo té ka démonté tant-la fanmi a yo té ka rété anba a-y la é yo té ka pati an menm tan ki tout rèstan a nasyon-la (Nonb 9:15-23). Sé menm biten jòdijou. Kèlkanswa koté-la nou ka viv la, Jéova ka pwotéjé-nou é i ka pran swen an nou èvè onlo lanmou. w24.06 4 § 10-12.

Vi a David andanjé. Gason a-y, Absalon, byen désidé a vin wa anplas a-y (2 Sam. 15:12, 13). Fò David sòti Jérizalèm tousuit ! Alò, tout sèwvitè a-y ka pati. Men David ka di kè fò déotwa adan yo rété Jérizalèm pou di-y ka Absalon ni lentansyon fè. Alò, i ka mandé Zadòk é déotwa prèt viré Jérizalèm pou véyé jès a Absalon é pou di-y sa ki ka pasé (2 Sam. 15:27-29). Fò-yo ké pran bon prékosyon. Misyon-la David ba-yo la danjéré toubònman. Yo pé pèd vi a yo. Absalon sé on boug ki ka sonjé enki li, i enmé vanjé-y é i trèt. David mèt on plan si pyé é i mandé Zadòk é ondòt zanmi a-y édé-y. Non a zanmi-lasa sé té Ouchay (2 Sam. 15:32-37). Alò Ouchay fè kon yo té prévwa, i fè sanblan soutyenn Absalon é i di-y kijan pou ataké David. Konsa David té’é ni tan préparé-y avan Absalon ataké-y. Aprésa, Ouchay rakonté Zadòk é Abyata tousa ki té pasé (2 Sam. 17:8-16). Alò yo fè ansòt pou David okouran a sa Absalon té ni lentansyon fè. Kifè, Zadòk é Abyata édé David pou ayen pa rivé-y (2 Sam. 17:21, 22). w24.07 4-5 § 9-10.

Sèwten moun ki ka sèvi Jéova ka santi-yo koupab parapòt a péché yo ni lokazyon fè. Sé pé dé biten yo fè avan yo té pran lèbatèm oben apré yo batizé. Men on biten pou nou pa jen oubliyé sé kè Jéova enmé-nou onlo toubònman é i bay vi a Gason a-y an ranson pou padonné péché an nou. Sé on bèl kado i fè-nou é i vé nou aksèpté kado-lasa. Dépi nou « woumèt zafè an nou annòd » èvè-y, i ka padonné-nou é i pa’a fè-y adèmi. Kijan nou fè sav sa ? Ében sé Bondyé limenm a-y ki ka pwomèt-nou sa. Ou ka imajiné-w, Jéova pa ka sonjé sé péché-la nou ni lokazyon fè la. A pa lanmou sa ? Pawkont ni on biten i pé’é jen oubliyé, sé tout sé bon biten-la nou ka fè pou-y la (Sòm 103:9, 12 ; Ébr. 6:10). Si sa ou fè dan lèpasé ka tèwbolizé lèspri a-w toujou, fè tousa ou pé pou sonjé sa ou ka fè konnyéla é sa ou ké kapab fè an paradi-la. Ou pé pa chanjé lèpasé. Men ou pé ba Jéova glwa é fè-y plézi konnyéla é ou pé konsantré-w asi bèl biten Jéova pwomèt-nou pou dèmen. w24.10 8 § 8-9.

Lè ou ka li Labib é kè ou anvi mèt sa ou aprann an pratik, délè ou pé ni lenprésyon kè ou ni twòp biten a chanjé é kè ou pé’é jen rivé. An-nou pran on ègzanp pou nou konprann sa. Imajiné kè jòdla ou ka li Bib a-w é sa ou li la ka montré-w kè sa enpòwtan kè ou pa fè préférans pou ponmoun (Jak 2:1-8). Lèwgadé ou ka réfléchi é ou ka rann-vou kont kè fò ou fè dé ti chanjman adan jan ou ka aji èvè lézòt é ou ka désidé fè sé chanjman-lasa. Lèlandèmen aprézan, adan lèkti a-w, ou ka vwè kè sa enpòwtan kè ou tchenn lang a-w (Jak 3:1-12). Alò ou ka pran on tan pou réfléchi é ou ka rann-vou kont kè délè, ou ka di dé biten ki pa tèlman pozitif. Alò ou ka désidé kè alèla ou ké ankourajé lézòt plis lè ou ké palé. Lèlandèmen, adan sa ou li la, yo ka èspliké-w jan sa danjéré lè ou zanmi èvè mond-la (Jak 4:4-12). Lèwgadé sa ka tonbé an jaden a-w é ou ka rann-vou kont kè fò ou fè atansyon a jan ou ka anmizé-w. Lèlandèmen ankò, lè ou ka gadé tout sé chanjman-la ou ni a fè la, ou pé santi kè tèt a-w ka pété. Men pa dékourajé. Sonjé osi kè pou mèt « nouvo pèwsonalité-la » anlè-w, sa ka mandé éfò akontinyé. w24.09 5-6 § 11-12.

Jézi té sav kè sa ki té pi enpòwtan, sé kè Jéova té ka vwè méchansté yo té ka fè-y. É i té ka fè-y konfyans, i té sav Jéova té’é mèt on milyé adan sa, o bon moman. Lèwvwè yo ka fè-nou on biten ki pa bon, an-nou pran ègzanp asi Jézi é an-nou véyé sa nou ka di. Délè sa yo fè-nou pa si grav ki sa, alò nou ka lésé sa tonbé. Oben nou pé désidé nou pa’a di ayen pou nou pa mèt luil asi difé (Ékl. 3:7 ; Jak 1:19, 20). Ni dòt lè, pétèt fò nou ké palé pou nou défann on moun yo ka mal aji èvè-y, oben pou nou èspliké kwayans an nou (Akt 6:1, 2). Men si nou désidé palé, nou ké éséyé fè sa èvè rèspé é nou ké rété kalm. Ondòt mannyè nou pé imité Jézi, sé lèwvwè nou ka lagé tout biten an men a « Sila ki ka jijé èvè jistis » (1 Pyè 2:23). w24.11 5-6 § 10-12.

Lè on moun ki péché ka rèpanti-y, sa ka mèt onlo jwa an tchè an nou ! (Lik 15:7). Sé vré sé ansyen-la ka fè onlo éfò pou édé on moun rèpanti-y, men kimoun ki dèyè do a sa vréman ? Sonjé sa Pòl di anrapò èvè sé moun-la ki té ka péché la : « Pétèt Bondyé ké pèwmèt-yo rèpanti-yo » (2 Tim. 2:25). Kifè a pa on moun ki ka fè si moun-la ka chanjé létadèspri a-y é konpòwtasyon a-y, men sé Jéova. Pòl èspliké kè apré moun-la rèpanti-y, ni on biten pozitif ki ka pasé : i ka konprann vérité-la plibyen é sa ka édé-y woté kò a-y adan zatrap a Dyab-la (2 Tim. 2:26). Lè moun-la ki péché la ka rèpanti-y, sé ansyen-la ka pran dispozisyon pou yo kontinyé ay vwè-y. Konsa yo ké konsolidé fwa a-y é yo ké kontinyé édé-y pou pon tantasyon pa pran lanmen asi-y é pou i kontinyé fè sa ki byen (Ébr. 12:12, 13). w24.08 23 § 14-15.

Sé moun-la Jézi té ba-yo manjé la té ka sonjé enki sa yo té bizwen é sa yo té anvi. Ka ki ka montré sa ? Lèlandèmen-la, sé moun-la konstaté kè Jézi é apòt a-y té pati. Konm té ni bato ki té sòti Tibéryad, sé moun-la monté adan sé bato-la pou yo ay jwenn Jézi Kafawnaòm (Jan 6:22-24). Ès yo té k’ay pou yo té aprann plis biten asi Wayòm-la ? Awa ! Sa ki té ka entérésé-yo sé té vant a yo. Kijan nou fè sav sa ? An-nou vwè ka ki pasé lèwvwè foulmoun-la jwenn Jézi ki té toupré Kafawnaòm. Jézi di-yo kè yo té ka vin owa a-y sèlman pas yo té anvi manjé. Men i di-yo osi kè menmsi manjé-la yo té manjé la té plen vant a yo, sé té on ‘manjé ki té ka gaté’. Alò, i di-yo kè fò yo té travay pou yo té ni ‘on manjé ki ka rété pou lavi étèwnèl’ (Jan 6:26, 27). Aprésa, i di-yo kè manjé-lasa, sé Pap’a-y ki té’é ba-yo li. w24.12 5 § 8-9.

Sé frè-la, pou ansègnman a zòt éfikas, fò zò bazé sa zò ka anségné é konsèy zò ka bay asi Pawòl a Bondyé. Pousa fò zò étidyé Labib é piblikasyon an nou byen menm (Pwov. 15:28). Lè zò ka étidyé, gadé byen pou vwè kijan piblikasyon an nou ka èspliké sé vèwsé-la pou zò pé sa apliké-yo byen konm i fo. É lè zò ka anségné, fè tousa zò pé pou touché tchè a sé moun-la ki ka kouté-zòt la. Zò ké pé amélyoré jan zò ka anségné si zò ka mandé sé ansyen-la ki ni plis èkspéryans la konsèy, é si zò ka mèt sé konsèy-lasa an pratik (1 Tim. 5:17). On ansyen dwètèt ‘kapab ankourajé’ frè é sè a-y, men dépawfwa, fò i ba-yo konsèy oben délè ‘korijé-yo’. Kèlkèswa sitiyasyon-la, on ansyen dwèt toujou aji èvè bonté. Si zò ka aji èvè dousè, lanmou, é kè sa zò ka anségné bazé asi Pawòl a Bondyé, zò ké vin dé bon anségnan menmjan ki Jézi (Mat. 11:28-30 ; 2 Tim. 2:24). w24.11 24 § 16.

Nou pé ba Jéova lonnè grasa sa nou ka di asi-y. Sé prèmyé vèwsé-la ki adan Sòm 96 la ka di kè « fò nou chanté ba Jéova », fò nou ba non a-y louwanj, fò nou « fè moun konnèt bon nouvèl a délivrans-la i ka pòté la » é fò nou « fè sé nasyon-la konnèt tout lonnè-la i ni la » (Sòm 96:1-3). Lè nou ka fè tout sé biten-lasa, nou ka ba Pap’an-nou ki an syèl-la lonnè (Akt 4:29). Nou pé osi sèvi èvè sa nou ni pou nou ba Jéova lonnè. Dépi an tan lontan, sèwvitè a Jéova sèvi èvè sa yo té ni pou yo té bay lonnè (Pwov. 3:9). Pa ègzanp, sé Israélit-la bay lajan é dòt biten ki té ni valè, pou yo té konstwi Tanp-la é pran swen a-y (2 Wa 12:4, 5 ; 1 Kron. 29:3-9). Sèwten disip a Jézi sèvi èvè sa yo té ni pou yo té ba Jézi é apòt a-y sa ki té fò yo (Lik 8:1-3). Labib ka di osi kè o 1^é syèk, konm sèwten krétyen té ka soufè pas pa té ni manjé, frè é sè a yo ki té ka rété dòt koté voyé lajan ba yo (Akt 11:27-29). Jòdijou, nou pé ba Jéova lonnè lè nou ka fè ofrann. w25.01 4 § 8 ; 5 § 11.

Ka ki édé Kòwnèy pran lèbatèm ? Adan Labib nou ka li kè ‘li é fanmi a-y té ka krenn Bondyé’. É Kòwnèy té ka sipliyé Bondyé toutlè (Akt 10:2). Lè Pòl palé-y dè bon nouvèl-la, Kòwnèy é fanmi a-y vin ni fwa adan Jézikri é yo pa pèd tan pou yo pran lèbatèm (Akt 10:47, 48). Sèten Kòwnèy té dakò pou fè tout sé chanjman-la ki fo la pou li é fanmi a-y té pé sa sèvi Jéova (Joz. 24:15 ; Akt 10:24, 33). Kòwnèy té ni on bèl plas é i té’é pé lésé bèl plas-lasa anpéché-y vin krétyen. Men a pa sa i fè. É vou, èskè ou ni dé gwo chanjman a fè adan vi a-w pou-w pé sa pran lèbatèm ? Si sé sa, Jéova ké soutyenn-vou. I ké béni-w si ou byen désidé a mèt sé prensip-la ki an Bib-la an pratik pou-w pé sa sèvi-y. w25.03 5 § 12-13.

Si ou ka tann ti pawòl ka monté é désann asi do a frè an nou ki an tèt a lòwganizasyon, sonjé kijan lènmi a Bondyé aji èvè Jézi é disip a-y. Jézi té ja di kè moun té’é pèwsékité sèwvitè a Bondyé é kè yo té’é manti asi yo é sé ègzaktèman sa nou ka vwè alèla (Mat. 5:11, 12). Menmsi nou ka tann ti pawòl ka monté é désann asi do a lòwganizasyon, nou pé’é pran sa yo ka rakonté la pou lajan-kontan pas nou sav kimoun ki dèyè do a sa. Okontrè, tousuit nou ké chèché a pwotéjé-nou pou sa pa aji asi nou. Kijan nou ké fè sa ? Pa kouté enfòwmasyon ki pa vré. Lapòt Pòl montré ka pou nou fè lèwvwè nou ka tann dé biten ki pa vré. I mandé Timoté « di sèwten moun défandi […] pran tan kouté istwa ki pa vré » é kè fò yo « rèfizé kouté istwa ki pa vré ki ka dérèspèkté Bondyé » (1 Tim. 1:3, 4). Menmjan-la, nou pa ka kouté enfòwmasyon ki pa vré pas nou sav kimoun ki dèyè do a sa. Nou ka kouté enki « bon pawòl » a vérité-la (2 Tim. 1:13). w24.04 11 § 16 ; 13 § 17.

Rété soudé èvè moun ki fidèl a Jéova. Jéova vé sèwvitè a-y ini lè yo ka adoré-y. Nou ké rété ini toutotan nou ka tchenbé vérité-la é kè nou pa ka lagé-y. Séla ki ka lagé vérité-la ka divizé lasanblé-la. Sé pousa Bondyé ka di-nou « ba-yo gran lè a yo ». Sinon, noumenm an nou osi, nou pé rivé a lagé lavérité (Wom. 16:17). Si nou kapab rèkonnèt lavérité é kè nou pa ka lagé-y, nou ké rété bon bon zanmi èvè Jéova é fwa an nou ké rété solid (Éféz. 4:15, 16). Nou pé’é lésé ni sé fo-ansègnman-la, ni sé manti-la Satan ka simé la kouyonné-nou nonplis. É nou ké rété anba zèl a Jéova pannan gwo tribilasyon-la. Alò, pa jen lagé lavérité, konsa ‘Bondyé a lapé la ké èvè-w’ (Filip. 4:8, 9). w24.07 13 § 16-17.

Jézi té ka édé toutmoun, men moun i té ka édé menm, sé moun ki té ka santi-yo tris parapòt a péché yo té ka fè. I mandé-yo si yo té anvi vin disip a-y. I té sav kè si moun ka soufè, sé akòz dè péché-la. Sé pousa lè té ni moun ki té ka fè péché é kè toutmoun té sav sa, i té ka pòté bon mannèv pou édé-yo. On jou, mi sa Jézi èspliké : « Moun ki byen pòtan pa bizwen dòktè, men sé moun ki malad ki bizwen dòktè. » É èvè ègzanp-lasa, mi sa i èspliké : « An pa vin mandé moun ki jis rèpanti-yo, men an vin mandé moun ki ka menné on vyé vi rèpanti-yo » (Mat. 9:12, 13). Ès sé vréman sa i fè ? Asiré pa pétèt ! Lè on madanm lavé pyé a Jézi èvè dlo ki té ka sòti an zyé a-y, Jézi palé ba-y jantiman é i padonné péché a-y (Lik 7:37-50). I anségné Samaritèn-la dé vérité enpòwtan menmsi i té sav kè madanm-lasa té ni on vyé vi (Jan 4:7, 17-19, 25, 26). Moun ka mò akòz dè péché-la. Men Bondyé jous ba Jézi pouvwa pou résisité ki madanm ki misyé, ki timoun (Mat. 11:5). w24.08 4 § 9-10.

Kijan Jéova ké ba non a-y lonnè talè ? Sé lèwvwè i ké fè ansòt pou ni jistis asi latè. Pousa i ké détwi Gran Babilòn-la pas i sali non a-y ki sen (Rév. 17:5, 16 ; 19:1, 2). Pétèt sèwten moun ki ké vwè sa ké mété-yo ka adoré Jéova ansanm èvè nou. Aprésa pannan Awmagédon, Jéova ké détwi mond a Satan. I ké détwi moun ki hay li é ki ka sali non a-y men i ké sové moun ki enmé-y, ki ka obéyi-y é ki vé ba-y lonnè (Mawk 8:38 ; 2 Tés. 1:6-10). Lè sé 1 000 an la ké fin, apré dènyé éprèv-la, Jéova ké ba non a-y tout lonnè-la i mérité la (Rév. 20:7-10). Jou-lasa, « menmjan lanmè-la plen èvè dlo, sé menmjan-la osi toutmoun asi latè ké sav kè Jéova ni glwa » (Abak. 2:14). Sa ké bèl toubònman lèwvwè toutmoun ké ba Bondyé lonnè-la i mérité la ! w25.01 7 § 15-16.

Ka ki té’é édé sé krétyen ébré la andiré sé pèwsékisyon-la yo té ka jwenn la ? Lapòt Pòl té vé édé sé krétyen-la vwè ki bon biten andirans a yo té ka menné ba yo. I èspliké-yo kè lèwvwè yo ka jwenn éprèv, Bondyé ka sèvi èvè sa pou fòwmé-yo Grasa fòwmasyon-lasa, yo té’é pé ni onlo bèl kalité ki ka fè Jéova plézi. Si yo té ka konsantré-yo asi tout sé bon biten-la yo té’é ni la an bout a éprèv a yo, yo té’é rivé andiré pli fasilman (Ébr. 12:11). Pòl ankourajé sé krétyen-la pou yo pa té lagé lè yo té’é anba éprèv. I té byen plasé pou ba-yo konsèy adan domenn-lasa. Avan i té vin krétyen, i té ka pèwsékité sé krétyen-la é i ni lokazyon vwè jan yo té ka fè-yo bon abominasyon. Anplisdisa limenm osi té sav ka sa vé di andiré pèwsékisyon davwa yo té pèwsékité-y an tout sans apré i té vin krétyen (2 Kor. 11:23-25). w24.09 12-13 § 16-17.

Pi tan ka pasé é pi sa enpòwtan kè nou préché. Poukwa nou ka di sa ? Pas adan on ti moman lafen ké asi nou. Sonjé sa Jézi ni lokazyon di an Mawk 13:10. I palé dè prédikasyon-la ki té’é fèt pannan sé dènyé jou-la. Dapré liv a Matyé, Jézi di kè yo té’é préché bon nouvèl-la asi tout latè joustan « lafen » rivé (Mat. 24:14). Lèwvwè yo ka palé dè lafen, sé pou palé dè lè Bondyé ké détwi mond méchan a Satan. Sé dé biten ki ké fèt talè é Jéova ja désidé ‘ki jou’ sa ké fèt é ‘a ki lè’ sa ké fèt osi (Mat. 24:36 ; Akt 1:7). Alò pi tan ka pasé, pi jou-lasa toupré rivé (Wom. 13:11). Sé pousa annatandan, fò-nou kontinyé préché. Mi on kèsyon enpòwtan pou noutout pozé-nou : « Poukwa nou ka préché bon nouvèl-la ? » An dé mo kat pawòl, sé lanmou ki ka pousé-nou préché. Lè nou ka préché, nou ka montré kè nou enmé bon nouvèl-la, kè nou enmé sé moun-la é siwtou, kè nou enmé Jéova é non a-y. w24.05 14-15 § 2-3.

Sé paran-la, ankourajé timoun a zòt réfléchi asi biten ki èstraòwdinè adan lakréyasyon. Lè zò ka ponmlé lakanpagn oben lè zò ka fè jaden, pa ézité atiré atansyon a timoun a zòt asi fòwm a diféran biten ki adan lananti. Poukwa ? Paskè sé fòwm-lasa ké édé-y konprann kè sé on moun ki vréman entélijan ki fè tout sé biten-lasa. Pa ègzanp, onlo biten adan lanati ni fòwm a kolimason kivédi an fransé on spirale é ni lanné é lanné sé syantifik-la ka étidyé sé biten-lasa. On syantifik non a-y sé Nicola Fameli, ka èspliké kè lè ou ka pran tan konté sé spirale-la ki adan sèwten biten adan lanati, ou toujou ka touvé on nonb ki ka fè pawti a sa yo ka kriyé suite de Fibonacci. Suite-lasa sé on séri nonb byen prési. Adan lanati, ni onpakèt biten ki ni fòwm a on spirale. Pa ègzanp : fòwm a sèwten galaksi, zékal a èskawgo-la, jan-la sé fèy-la ranjé asi on tij, tchè a sé flè-la yo ka kriyé solèy oben dòt biten ankò. w24.12 16 § 7.

Moyiz, David é Jan pa viv a menm épòk ki nou é yo pa té ka viv menmjan nou ka viv konnyéla. Men nou ka sanm-yo onlo. Menmjan ki yo, nou ka sèvi vré Dyé-la. Menmjan ki yo, nou ka priyé Jéova é nou ka konté asi-y pou i édé-nou é pou i ban-nou konsèy. É menmjan ki yo, nou sèten Jéova ka béni moun ki ka obéyi-y. An-nou kouté konsèy a sé grannonm-lasa : an-nou obéyi komandman a Jéova. Anfinaldikont, nou ké réyisi tousa nou ké fè. Nou ‘ké viv lontan’, nou ké jous viv pou touttan ! É nou ké kontan fè Pap’an nou ki an syèl-la plézi. Tèlman i enmé-nou, i ké rékonpansé-nou on mannyè pli èstraòwdinè ki sa nou ka imajiné ! (Éféz. 3:20). w24.11 13 § 20-21.

O 1^é syèk, yo té ka chwazi sèwten frè pou yo té vin asistan (1 Tim. 3:8). I ka sanmsa kè lèwvwè lapòt Pòl té ka palé dè sèwten moun ki té ka édé lézòt, sé dè sé asistan-la i té ka palé. Travay-la yo té ka fè la té itil é sa té enpòwtan. Grasa sa, sé ansyen-la té pé konsantré-yo asi sa yo té ka fè pou anségné lasanblé-la é yo té pé pran swen a chakmoun adan lasanblé-la pibyen. Pa ègzanp, pétèt kè lèwvwè moun té ka kopyé Lézékriti, sé asistan-la té ka bay on pal adan travay-lasa oben yo té ka prévwa a tousa sé moun-la ki té ka fè travay-lasa té’é bizwen pou fè-y. An-nou vwè sèwten biten kè sé asistan-la ka fè jòdijou ki itil (1 Pyè 4:10). Souvantfwa, yo ka konté lajan a sé ofrann-la, yo ka okipé-yo dè sé téritwa-la, é yo ka komandé sé piblikasyon-la pou ba sé pwoklamatè-la. Yo ka okipé-yo dè sono-la é dè sé vidéo-la pannan sé réinyon-la. Yo la pou akéyi lézòt adan sé réinyon-la é lèwvwè ni travo adan sal di Wayòm la, yo ka bay on pal osi. Tout sé biten-lasa nésésè é yo ka pèwmèt kè tout biten pasé byen adan lasanblé-la (1 Kor. 14:40). w24.10 19 § 4-5.

Nou ké pé tchenbé anba nenpòt ki éprèv, ki i piti ki i gwo, si nou ka sonjé kè Jéova vivan, é kè i toujou paré pou édé-nou. I pé fè sa, pas pa ni pon pwoblèm ki two fò ba-y. I sé Toupuisan-la, é i pé ban-nou fòs pou nou andiré. Kifè, nou ka fè Jéova konfyans lè nou ka jwenn éprèv. É lè nou ka vwè jan Jéova ka soutyenn-nou lè nou ka jwenn dé ti éprèv, nou sèten i ké la pou nou osi lè nou ké jwenn éprèv ki pi difisil. Wa David viv plizyè sitiyasyon ki édé-y fè Bondyé konfyans plis ankò. An-nou arété-nou asi 2 adan yo. Lèwvwè David té jenn é kè i té bèwjé, pannan i té ka véyé twoupo mouton a pap’a-y, on liyon chapé èvè on mouton, é ondòt fwa sé on lous ki fè menm biten-la. Adan sé 2 sitiyasyon-lasa, David aji èvè kouraj. I kouri dèyè do a yo é i sové sé mouton-la. Men, i pa bat lèstonmak a-y pou sa. I té sav kè sé Jéova ki té ba-y fòs pou fè sa (1 Sam. 17:34-37). Davwa David pran tan médité asi sa, i vin sèten kè Bondyé la ki vivan la té’é ba-y fòs plita osi. w24.06 21 § 5-6.

Imajiné yo ka envité-w adan on fèt : ou k’ay oben ou pa k’ay ? Si ou pa konnèt moun-la ki ka òwganizé fèt-la, pétèt fò ou ké pozé kèsyon kon pa ègzanp : « Ola é kitan yo ké fè fèt-lasa ? Konmen moun ki envité ? Ès yo chwazi on moun ki ké la pou tout biten pasé byen ? Kimoun ki ké la ? Kijan sa ké déwoulé ? Ès i ké ni alkòl ? » Répons a sé kèsyon-lasa ké édé-w pran on désizyon ki saj. Aprésa, dépi ou ni sé enfòwmasyon-la ou bizwen la, pran tan réfléchi asi tout sitiyasyon-la. Pa ègzanp, imajiné ou ka vin sav kè pawmi moun yo envité an fèt-la, ni sa ki pa’a suiv prensip a Labib oben ou ka aprann kè yo ké sèvi alkòl é kè moun ké pé bwè alèz a yo pas pa ni ponmoun ki ké la pou kontwolé sa. Ès sa pé’é pozé pwoblèm ? (1 Pyè 4:3). Lè ou ké pran tan réfléchi asi tout sé biten-lasa, sa ké édé-w pran bon désizyon-la. w25.01 15 § 4-5.

Jéova ka sèvi èvè ègzanp pou montré-nou kè grasa ranson-la, i ka éfasé péché a moun ki ka rèpanti-yo. Lèwvwè ni tach wouj asi on lenj, sa pa’a sòti konsa. Men Jéova ka sèvi èvè ègzanp-lasa pou ban-nou on garanti : I ka di-nou kè i pé lavé péché an nou pou yo pa jen vwè-yo ankò. Lè nou ka fè on péché, sé konsi sé « doué nou ka doué » Jéova (Mat. 18:32-35). Sa vé di kè pi nou ka péché, pi nou ka doué Jéova. A pa ti doué nou ka doué-y ! Men lè Jéova ka padonné-nou, sé konsi i té ka di kè nou pa’a doué-y ankò. I pa’a mandé-nou ranbousé-y pou sé péché-la i padonné-nou la. Kifè menmjan on moun soulajé lè yo ka éfasé sa i ka doué, nou soulajé lè Jéova ka padonné-nou ! w25.02 9-10 § 9-10.

Sé vré kè lè sé paran-la ka vin ni on tilaj, délè yo ka bizwen timoun a yo pran swen a yo, é ni onlo timoun ki kontan fè sa (1 Tim. 5:4). Men sé paran-la ki ka fèfon asi Jéova ka pli kontan édé timoun a yo sèvi Jéova, ki pousé sé timoun-la gangné lajan pou yo pran swen a paran a yo dèmen (3 Jan 4). Toupannan zò ka édé timoun a zòt préparé-y pou dèmen, montré-y kè zò ka fè Jéova konfyans. Pannan yo jenn aprann-yo kè sa enpòwtan kè yo travay rèd (Pwov. 29:21 ; Éféz. 4:28). Édé-yo osi pou yo aprann byen lékòl. Fè rèchèwch osi pou touvé prensip a Labib ki ké édé-yo chwazi èvè sajès ki étid yo ké fè. Òbjèktif-la sé kè lè timoun-la ké gran, i gangné sou a pen a-y men anmenmditan kè i touvé tan pou i préché, é pétèt menm pou i vin pyonyé. w25.03 30-31 § 15-16.

Adan Izayi chapit 65, Jéova ka èspliké kijan lavi té’é yé adan paradi èspirityèl la. Pwofési-lasa ja réyalizé on prèmyé fwa an 537 avan épòk an nou. An tan-lasa, onlo Juif ki rèpanti-yo viré adan péyi a yo. Tibwen tan avan, yo té chayé-yo pa fòs Babilòn é pa té ni lontan yo té lagé-yo. Jéova béni pèp a-y. Kijan i fè sa ? Konm Jérizalèm té détwi, Jéova édé pèp a-y woukonstwi-y é fè-y wouvin bèl. I édé-yo fè ansòt osi pou Tanp-la wouvin koté pi enpòwtan la pou adoré Jéova an Israèl (Iz. 51:11 ; Zak. 8:3). Sa Izayi anonsé réyalizé on dézyèm fwa an 1919, lèwvwè sèwvitè a Jéova ki té ka viv a épòk-lasa sòti anba men a Gran Babilòn-la. Aprésa, paradi èspirityèl la koumansé grandi asi toutlatè. Sèwvitè a Jéova té ka préché Wayòm-la èvè onlo balan é yo fòwmé onlo lasanblé. Ondòt biten ankò sé kè sèwvitè a Bondyé té ka montré kè yo ni sé bèl kalité-la ki adan fwi a lèspri. Avan, sèwten adan yo té ka aji èvè vyolans èvè lézòt é yo té ka aji kon zannimo, men konnyéla yo « mèt nouvo pèwsonalité-la asi [yo], on pèwsonalité kè Bondyé kréyé sèlon volonté a-y. » w24.04 20-21 § 3-4.

Adan sèwten péyi, délè, sé sé paran-la ki ka prévwa a on moun pou mayé èvè timoun a yo. Délè osi sé pé ondòt moun ki mati ki pou chwazi èvè kimoun timoun-la ké mayé. Adan dòt péyi, fanmi-la oben sé zanmi-la ka édé on moun ki sélibatè a touvé on moun pou mayé èvè-y. Yo ka fè ansòt pou sé 2 moun-la jwenn pou yo palé é sé sé sélibatè-la ki ka désidé si yo ké frékanté-yo. Siwvwè yo ka mandé-w pou édé on sélibatè ki ka chèché on moun pou mayé, tchenn kont dè sa sé 2 moun-la enmé é dè sa yo bizwen. Si ou ka pansé kè tèl moun té’é ay byen èvè sélibatè-la ou ka édé la, éséyé ni tout sé enfòwmasyon-la ou pé ni la asi pèwsonalité a moun-la, asi kalité a-y, é siwtou asi lanmityé a-y èvè Jéova. É mi sa pou-w pa jen oubliyé : préféré moun-lasa bon bon zanmi èvè Jéova olyé i ni lajan, kè i fè gran lékòl oben kè i sé on gwotchak. É pa oubliyé kè anfinaldikont, sé frè-la é sè-la ki sélibatè la ki ké désidé si yo ké mayé. w24.05 23 § 11.

On biten nou pé fè pou soutyenn frè é sè an nou ki ka frékanté, sé fè atansyon a sa nou ka di-yo. Délè, fò nou ké métrizé-nou é pa di ayen (Pwov. 12:18). Pa ègzanp, siwvwè nou anvi di toutmoun alantou an nou kè tèl frè é tèl sè koumansé frékanté-yo, mi sa pou nou mandé-nou : « Ès yo pa té’é préféré anonsé sa yomenm a yo ? » Anplisdisa, nou pa dwètèt mèt-nou ka fè pawòl monté é désann asi yo, kritiké-yo é mélanjé-nou adan vi a yo (Pwov. 20:19 ; Wom. 14:10 ; 1 Tés. 4:11). Èvè sa osi, nou pa dwètèt di-yo pon biten oben pozé-yo pon kèsyon ki té’é pé mèt présyon asi yo pou yo mayé. É si on frè é on sè ka désidé arété frékanté ? Fò pa nou mélé-nou é fò pa nou di kè nou pou entèl oben pou entèl (1 Pyè 4:15). Lè 2 moun ka arété frékanté, a pa échwé yo échwé. Okontrè, byensouvan sa vé di kè yo atenn òbjèktif a yo pannan yo té ka frékanté-yo, kivédi sa sèvi-yo pou yo pran on bon désizyon. Alò an-nou chèché a soutyenn-yo. w24.05 31 § 15-16.

Lè on moun an fanmi an nou oben on bon zig an nou ka lésé Jéova, sé yonn adan sé pi gwo éprèv-la nou pé jwenn la (Sòm 78:40). An jénéral, pi nou enmé moun-la é pi nou ni dimal a aksèpté sitiyasyon-lasa. Si ou ka viv on sitiyasyon konsa, ègzanp a Zadòk, on nonm ki té fidèl, pé ankourajé-w. Lèwvwè Abyata, bon zig a Zadòk, désidé kè i pé’é rété fidèl a Jéova, Zadòk li, désidé kè i té’é rété fidèl a Jéova. Sé sa ki fèt lèwvwè dominasyon a David antankè wa té kay bout. Jéova té pwomèt kè sé Salomon ki té’é wa anplas a David. Men alòskè David té toupré mò, gason a-y Adoniya, éséyé vin wa anplas a Salomon (1 Kron. 22:9, 10). Abyata désidé soutyenn Adoniya (1 Wa 1:5-8). Lèwvwè i fè sa, non sèlman i pa rété fidèl a David, men i pa rété fidèl a Jéova nonplis ! Zadòk é Abyata sèvi Jéova ansanm antankè prèt pannan plis ki 40 an (2 Sam. 8:17, 15:29, 19:11-14). w24.07 6 § 14-15.

Nou pé sèten kè lèwvwè nou ka fè éfò pou nou rété véyatif, a pa pou ayen nou ka fè sa. Lèwvwè on moun ka fè on péché, i ka « pran plézi pannan on ti tan », men lèwvwè i ka obéyi Jéova, i ka lontan pibyen (Ébr. 11:25 ; Sòm 19:8). Poukwa nou ka di sa ? Paskè Jéova kréyé-nou on jan pou nou viv annakò èvè prensip a-y (Jén. 1:27). Lèwvwè nou ka viv on mannyè ki ka fè Jéova plézi, sa ka pèwmèt-nou ni on konsyans ki nèt é sa ka ban-nou lèspwa kè on jou nou ké pé viv pou touttan (1 Tim. 6:12 ; 2 Tim. 1:3 ; Jid 20, 21). Sé vré, « chè-la fèb » (Mat. 26:41). Men sa vé pa di kè nou pé pa fè ayen kont sa. Jéova toujou paré pou i édé-nou (2 Kor. 4:7). Fò pa nou oubliyé kè puisans-la Jéova ka ban-nou la ka dépasé sa ki nòwmal. Men prèmyé biten pou nou fè sé fè tousa nou pé pou goumé èvè sé tantasyon-la nou ka jwenn la. Jéova ké réponn priyè an nou : i ké ban-nou plis fòs lèwvwè nou ké bizwen (1 Kor. 10:13). Wi, asirésèten, grasa Jéova, nou pé rété véyatif pou tantasyon-la pa pran lanmen asi nou. w24.07 19 § 19-21.

Lapòt Pòl maké sé pawòl-la ki adan tèks-di-jou a jòdla ba Timoté, ki té ansyen kon limenm, pou èspliké-y kijan pou i té aji èvè « moun ki ni labitid fè péché ». Lè i maké « douvan toutmoun », ka i té vlé di pa la ? Ès sa té vlé di kè sé té douvan tout lasanblé-la ? Pa oblijé. Délè sé pé déotwa moun tousèl ki okouran a péché-la, é sé dè yo Pòl té vlé palé. Pétèt yo vwè sa i fè oben yo okouran a sa i fè pas sé-y menm ki di-yo sa. Alò sé sé moun-lasa fò sé ansyen-la ay vwè pou fè-yo sav kè yo korijé moun-la ki péché la. Délè, ni onlo moun ki okouran a péché-la oben yo ké fin pa sav sa. A moman-lasa, lè Pòl ka di « douvan toutmoun » sé pou palé dè tout lasanblé-la. Kifè, on ansyen ké di lasanblé-la kè yo korijé frè-la oben sè-la. Pou ki rézon ? Mi sa Pòl ka di : « pou sa sèvi lézòt lèson », kivédi pou sélézòt moun-la adan lasanblé-la pa tonbé adan menm péché-la. w24.08 23-24 § 16-17.

Fò nou pòté bon mannèv adan travay-la nou ka fè la pou Jéova joustan lafen rivé. Fò sé krétyen wen la rété véyatif si yo vé Jézi « chwazi »-yo é ba-yo rékonpans a yo an syèl-la (Mat.24:40). A pa ti présé yo présé pou vwè jou-la yo ké « sanblé koté » Jézi an syèl-la ! Apré lagè a Awmagédon, ké ni mayé a timouton-la, é a moman-lasa, yo ké ni on bèl lonnè toubònman pas yo ké vin madanm a-y (2 Tés. 2:1). Menmsi lè-la pou Jézi jijé lézimen ka vin vit, nou pa bizwen pè. Siwvwè nou ka rété fidèl a Pap’an nou ki an syèl-la é ki plen lanmou, i ké ban-nou « puisans-la ki ka dépasé sa ki nòwmal » pou nou « rivé rété doubout douvan Gason a lòm » (2 Kor. 4:7 ; Lik 21:36). Ki nou ni lèspwa dè viv an syèl-la oben asi latè, si nou ka tchenn kont dè konsèy a Jézi, nou ké fè Jéova plézi. É grasa favè-la nou pa mérité la i ka ban-nou la, i ké maké non an nou « adan liv a lavi » (Dan. 12:1 ; Rév. 3:5). w24.09 24-25 § 19-20.

Ou pé goumé èvè lidé ki négatif é ou pé rivé about a yo kon nonm-la ki maké Sòm 73 la. Ka ou pé fè ? Pran tan sonjé tout sé bon biten-la ou ni la é sé bénédisyon-la Jéova ka ba-w la. Pran tan gadé osi kijan moun ki pa ka sèvi Jéova yé davwa yo pa ni Jéova pou édé-yo. Lamajorité a moun ki pa ka sèvi Jéova ka mèt travay a yo prèmyé douvan adan vi a yo pas yo pa ni pon èspwa pou dèmen. Men vou, non sèlman ou ni bénédisyon a Jéova dépi alè men anplisdisa i ka pwomèt-vou onlo bèl biten ankò pou dèmen (Sòm 145:16). Pran on tan pou réfléchi asi sa : Ès nou konnèt kijan biten-la té’é yé ban nou vréman si nou pa té fè sé chwa-la nou fè la ? Pa oblijé ! Pawkont ni on biten nou pé sèten : désizyon nou ka pran pas nou enmé Jéova é pas nou enmé lézòt, pé ké jen anpéché-nou ni bon biten. w24.10 27 § 12-13.