Adan Labib, nou ka touvé istwa a moun ki té jis men ki vin dé moun ki pa jis. Pa ègzanp, ni wa Salomon. I té konnèt Jéova, i té sav kijan pou i té adoré-y é Jéova té béni-y onlo. Men plita, i mété-y ka adoré fo-dyé. Jéova fè kòlè akòz dè sé péché-la i fè la. É akòz dè sa Salomon fè, pèp-la soufè pannan plizyè syèk. Labib ka di kè Salomon « fèmé zyé a-y pou pozé kò a-y èvè zansèt a-y » é nou sav kè pawmi zansèt a-y té ni wa David, on nonm ki té fidèl (1 Wa 11:5-9, 43 ; 2 Wa 23:13). Konm yo téré-y konsa, ès sa vé di kè i ké résisité ? Labib pa ka palé dè sa. Larézirèksyon sé on kado Pap’an nou ki plen lanmou ka fè-nou. I ka ba moun i vlé laposibilité dè sèvi-y pou touttan (Jòb 14:13, 14 ; Jan 6:44). Ès Salomon ké bénéfisyé dè kado-lasa osi ? Sé Jéova tousèl ki konnèt. Pawkont, sa nou sav, sé kè Jéova ké aji èvè jistis. w24.05 4 § 9.

Lèwvwè on moun té ka envité ondòt moun anba tant a-y, an jénéral, moun-lasa té sèten kè moun-la ki té envité-y la té’é pran swen a-y byen konm i fo. Lè nou ka ba Jéova vi an nou, nou ka antré anba tant a-y é nou ka vin envité a-y. Koté-lasa, nou ni tousa ki fo pou nou rété bon bon zanmi èvè Jéova, é nou pé vin zanmi èvè sélézòt envité-la. Men a pa onsèl koté ou ka touvé tant-lasa. Ou ka touvé tant a Jéova toupatou ni sèwvitè a Jéova ki fidèl (Rév. 21:3). É sèwvitè fidèl a Jéova ki mò alò ? Ès nou pé di kè yo envité anba tant a-y toujou ? Wi ! Ka ki ka fè-nou di sa ? Ében sé pas sé mò-la vivan an mémwa a Jéova. Mi sa Jézi èspliké : « Anrapò èvè lèfètkè Bondyé ka résisité sé mò-la, Moyiz limenm montré sa adan istwa a ti pyébwa plen pikan la, lè i kriyé Jéova “Bondyé a Abraam, Bondyé a Izaak é Bondyé a Jakòb”. I pa Bondyé a sé mò-la, men i sé Bondyé a sé vivan-la, pas pou-y, yotout vivan » (Lik 20:37, 38). w24.06 3 § 6-7.

Zadòk pa ka vin Ébron pou fété èvè nouvo wa-la tousèl men i ka pran zàm a-y èvè-y é i paré pou goumé (1 Kron. 12:38). I paré pou ay goumé koté David é pou défann Israèl kont lènmi a-y. Poutan, pétèt kè i pa té ni labitid sèvi èvè zàm kon sélézòt sòlda-la, men Zadòk té on nonm ki té brav menm. Men ola on prèt kon Zadòk pran tout kouraj-la i té ni la ? I té lantouré èvè dé nonm ki té fò é ki té ni onlo kouraj, é sèten i pran ègzanp asi yo. Pa ègzanp, tèlman David té ni kouraj lèwvwè i té ka menné lawmé a Israèl o konba, tout pèp-la mété-y ka soutyenn-li afon (1 Kron. 11:1, 2). Lèwvwè David té ka goumé èvè lènmi a-y, i toujou té ka konté asi Jéova pou ba-y fòs (Sòm 138:3). Anplisdisa, té ni onlo dòt moun ankò kè Zadòk té pé imité. Pa ègzanp, té ni Joad é gason a-y Bènaya. Bènaya té on sòlda ki té ni labitid fè lagè. Té ni osi ègzanp 22 zòt chèf a tribi ki té vin jwenn David (1 Kron. 11:22-25 ; 12:26-28). w24.07 3 § 5-6.

Avan i vin krétyen, Pòl pèwsékité bon pèwsékité la sé disip-la kè Jézi té enmé la. É pétèt kè lamajorité adan yo té ka kwè kè i pa té’é jen chanjé. Men, Jézi li, a pa konsa i té ka vwè sa. I té sav kè Pòl té pé chanjé é kè i té pé rèpanti-y. Jézi é Pap’a-y vwè bèl kalité a Pòl. Mi sa Jézi di : « Nonm-lasa, sé ja-la an chwazi la » (Akt 9:15). I jous fè on mirak pou pousé Pòl a rèpanti-y (Akt 7:58–8:3 ; 9:1-9, 17-20). Kifè Pòl rèpanti-y é i vin krétyen. Jézi chwazi-y pou i vin apòt a-y. Souvantfwa, Pòl té ka di kijan i té ni rèkonésans pou sa Jéova é Jézi té fè ba-y (1 Tim. 1:12-15). On jou, Pòl aprann kè lasanblé Korent té ka wousoulé on frè ki té ka fè péché sèksyèl é sé té onsèl manjé kochon. Ka Pòl di-yo fè ? Lè nou ka gadé sa i di-yo, sa ka montré-nou jan Jéova ka aji èvè sèwvitè a-y épi lanmou lèwvwè i ka korijé-yo é jan i ka padonné-yo lèwvwè yo ka rèpanti-yo. Nou ka pé vwè osi kijan nou pé imité-y. w24.08 13 § 15-16.

Piti-a-piti, Jéova montré kè moun ki ka fè péché pé vin zanmi a-y. Abèl, 2^èm gason a Adan é Èv, sé té prèmyé moun asi latè ki té ni fwa adan Jéova apré sa ki pasé adan Jadendédèn-la. Konm i té enmé Jéova, kè i té ka chèché a fè-y plézi é a vin zanmi a-y, i fè on sakrifis ba-y. Abèl té bèwjé alò i tchouyé déotwa timouton i té ni la pou ba Jéova. Kijan Jéova réyaji lè i vwè sa ? I « aksèpté Abèl é ofrann-la i fè la » (Jén. 4:4). Aprésa, dòt moun ki té enmé-y é ki té ka fè-y konfyans, kon Noé pa ègzanp, fè sakrifis ba-y é i aksèpté sé sakrifis-lasa (Jén. 8:20, 21). Davwa Jéova aksèpté sakrifis a yo, i montré kè magré péché yo ka fè, lézimen pé fè-y plézi é vin zanmi a-y. w24.08 3 § 5-6.

Lèwvwè on moun ka fè-nou on méchansté sa pé fè-nou mal é nou pé kòlè toubònman (Ékl. 7:7). Sé sa dé nonm fidèl kon Jòb é Abakik rèsanti (Jòb 6:2, 3 ; Abak. 1:1-3). Menmsi sa nòwmal kè nou rèsanti sa, fò-nou fè atansyon pou nou pa fè ayen kè nou ké règrété é ki pé pwokiré-nou plis pwoblèm ankò. Délè, ou pé ni lenprésyon yo pa jen ka pini moun ki ka fè lézòt méchansté. Alò ou pé koumansé kwè apa lapenn fè sa ki byen. On sèwvitè a Jéova té ka vwè jan zafè a moun ki méchan té ka maché é jan sé bon moun-la té ka pran fè adan sa. I di : « Mi konsa sé méchan-la yé, toutlè yo ka viv trankil-trankil » (Sòm 73:12). Tèlman sa té ka chouboulé-y, i manké fin pa di sa pa vo lapenn sèvi Jéova. I di : « Lèwvwè an té ka éséyé konprann sa, sa té ka tèwbolizé lèspri an mwen » (Sòm 73:14, 16). w24.11 3 § 5-7.

Nou ka ba Jéova lonnè pas nou ni onlo rèspé ba-y. Nou ni onlo rézon pou nou rèspèkté-y. Sé-y ki Toupuisan-la é puisans a-y pa ni pon limit (Sòm 96:4-7). Nou ka vwè jan i ni sajès adan tousa i fè. I ban-nou lavi é i ban-nou tousa nou bizwen pou viv (Rév. 4:11). I fidèl (Rév. 15:4). Sa i ka fè toujou ka maché. É i toujou ka tchenn pwomès a-y (Joz. 23:14). Sé pousa pwofèt Jérémi di Jéova : « Pawmi tout moun ki ni sajès adan sé nasyon-la, é pawmi tout wayòm ki tini, pa ni ponmoun ki kon vou » (Jér. 10:6, 7). Nou ni onlo rézon pou nou rèspèkté Pap’an-nou ki an syèl-la. Men Jéova a pa on Bondyé ki mérité yo rèspèkté-y tousèl. I ni dé bèl kalité ki ka fè-nou enmé-y osi. É nou ka ba Jéova lonnè pas nou enmé-y onlo toubònman. w25.01 3 § 5-6.

Lòwganizasyon ka fè dé bon biten, men moun ki kont Bondyé ka éséyé fè sé biten-lasa pasé pou dé mové biten. An-nou pran on ègzanp. Jéova vé kè sèwvitè a-y rété pwòp, kè yo maché dwèt é kè yo adoré-y kon i ka mandé. É i ka di kè siwvwè on moun fè on biten ki grav é kè moun-lasa vé pa chanjé, i pé pa rété adan lasanblé-la ankò (1 Kor. 5:11-13 ; 6:9, 10). Nou ka obéyi komandman-lasa ki an Bib-la. É pas nou ka fè sa, sé moun-la ki kont nou la ka di kè nou pa enmé moun, kè nou ka jijé moun rèd menm é kè lè on moun pa menm biten ki nou, nou ka mété-y akoté. Lè yo ka ataké òwganizasyon-la, fò-nou sonjé kimoun ki dèyè do a sa. Sé Satan ki dèyè do a sé manti-la yo ka fè monté é désann asi lòwganizasyon. I sé « papa a mansonj-la » (Jan 8:44 ; Jén. 3:1-5). Kifè, sa pa ka siwprann-nou si i ka sèvi èvè bannélo a-y pou simé manti asi lòwganizasyon. w24.04 10-11 § 13-14.

Pétèt kè apré gwo tribilasyon-la koumansé, lèwvwè sèwten moun ké vwè Bondyé détwi « Gran Babilòn-la », yo ké sonjé sa sé Témwen a Jéova la té ka di asi sa dépi onpakèt lanné. Lè yo ké vwè sé biten-lasa fèt, ès yo ké koumansé ni fwa an Jéova ? (Rév. 17:5). Siwvwè sé sa ki fèt, sèten nou ké sonjé sa ki pasé an Éjipt an tan a Moyiz. Lèwvwè sé Israélit-la sòti an Éjipt, ni « onpakèt dòt moun » ki pati èvè yo. Pétèt sèwten adan sé moun-lasa koumansé ni fwa adan Jéova lè yo vwè kè sé 10 gran malè-la Moyiz té anonsé la fèt ègzaktèman kon i té di (Ègz. 12:38). Pétèt sé on biten konsa ki ké fèt lè Bondyé ké détwi Gran Babilòn-la. Siwvwè sé sa ki rivé, ès sa ké désèvwa-nou lè nou ké vwè sèwten moun vin jwenn-nou jis avan lafen rivé ? Awa ! Anponjan ! Nou vé sanm Pap’an nou ki an syèl-la, « on Bondyé ki ka aji èvè pityé é ki ka pran penn a moun, ki pa ka fè kòlè vit, ki plen lanmou, on lanmou ki fidèl é ki toujou ka di lavérité » (Ègz. 34:6). w24.05 11 § 12-13.

Si nou arété « suiv sé bon pawòl-la », ka ki pé rivé-nou ? An-nou palé dè sa ki fèt o 1^é syèk. Sèwten krétyen té ka di kè jou a Jéova té rivé é yo té ka fè sé pawòl-lasa monté-é-désann adan lasanblé-la. Pétèt yo té ka simé sé pawòl-lasa, akòz dè on lèt kè lapòt Pòl té maké swadizan. San menm yo vérifyé si sa té vré, sèwten krétyen Tésalonik pran sa pou lajan-kontan é yo jous ay répété sa ba dòt moun. Si yo té sonjé sa lapòt Pòl té anségné-yo lè i té èvè yo, yo pa té’é lésé moun kouyonné-yo (2 Tés. 2:1-5). Sé pousa Pòl té di-yo kè fò pa yo té kwè tousa yo té ka tann. É pou yo pa woufè menm érè-la, mi sa i di an fen a 2^è lèt a-y : « Mi konsa an ka di bonjou, mwen Pòl, an ka maké sa èvè pwòp men an mwen ; sé grasa sa zò ké rèkonnèt chak sé lèt-la an maké la ; sé konsa an ka ékri. » (2 Tés. 3:17). w24.07 12 § 13-14.

Sé krétyen Jidé la té bizwen andirans pou kontinyé sèvi Jéova pas yo té kay jwenn bon difikilté talè. Pawmi sé krétyen-lasa, ni sèwten adan yo yo té ja pèwsékité onlo, men ni onlo dòt ki poto’o viv sa vréman pas lè yo té vin krétyen, biten-la té on ti jan pi kalm. Sé pousa lapòt Pòl fè-yo sonjé kè fò-yo té préparé-yo pou lè biten-la té’é vin pi rèd. É i di-yo osi kè fò-yo té paré a rété fidèl a Jéova menm douvan lanmò, kon Jézi fè-y (Ébr. 12:4). Lèwvwè sé Juif-la té ka vwè tousa moun ki té ka vin krétyen, yo té égri toubònman é sa té ka menné onlo vyolans menm. Kèlkè lanné avan lapòt Pòl maké lèt a-y pou sé Ébré-la, plis ki 40 Juif « pwomèt kè yo pa té’é ni manjé ni bwè toutotan yo pa té’é tchouyé Pòl » (Akt 22:22 ; 23:12-14). Alò menmsi sé moun-la té hay sé krétyen-la é kè yo té ka pèwsékité-yo, fò sé krétyen-la té kontinyé ay an réinyon, préché bon nouvèl-la é fè ansòt pou konsolidé fwa a yo. w24.09 12 § 15.

Jan té bon zanmi a Jézikri é apòt a-y osi (Mat. 10:2). I pasé onlo tan ka préché èvè Jézi é i vwè-y fè onlo mirak. Sé té on apòt fidèl ki toujou rété èvè Jézi menm lè Jézi jwenn difikilté. I té la lè yo tchouyé Jézi é i vwè-y apré Jézi résisité. I vwè osi lè lasanblé krétyèn la koumansé gwosi. Davwa Jan viv lontan, i vwè jan yo préché bon nouvèl-la « toupatou anba syèl-la » (Kol. 1:23). Lè Jan vin ni on bèl laj, i maké liv a Larévélasyon. Maké on liv konsa, sé té on bèl lonnè pou Jan. Lè ou ka li-y, i ka lésé-w èstèbèkwè (Rév. 1:1). Jan maké on Évanjil é i maké 3 lèt osi. Yo ka kriyé sé lèt-lasa 1 Jan, 2 Jan é 3 Jan. Sé ba Gayis i ékri twazyèm lèt-la. Jan té enmé Gayis é i té ka konsidéré-y kon timoun a-y davwa i té édé-y vin krétyen (3 Jan 1). Tousa grannonm-lasa maké ka kontinyé ankourajé disip a Jézi jis a lajouné-jòdi. w24.11 12 § 15-16.

On mari ki enmé madanm-y ka pran swen a-y é i ka ba-y onlo valè. Pou-y sé on bèl kado ki ka vin dè Jéova (Pwov. 18:22 ; 31:10). I ka aji èvè bonté é rèspé èvè-y, menm lèwvwè yo ni rèlasyon sèksyèl. I pa ka fòsé-y fè dé biten ki ka mété-y malalèz, ki ka fè-y wont, oben dé biten konsyans a-y pa’a pèwmèt-li fè pannan yo ni rèlasyon sèksyèl. É limenm a-y mari-la, i pa’a fè pon biten konsyans a-y pa’a pèwmèt-li fè nonplis (Akt 24:16). Sé mari-la, zò pé sèten Jéova kontan-zòt, davwa zò ka ba madanm a zòt lonnè lè zò ka palé ba yo é lè zò ka aji èvè yo. Fò ou byen désidé a pa jen fè madanm a-w pon biten pou fè-y santi kè i pa vo ayen. Okontrè, fò ou janti èvè-y, fò ou ni rèspé ba-y é fò ou fè dé biten pou montré-y ou enmé-y. Lè ou ka fè sa, ou ka montré madanm a-w kè ou enmé-y é kè i ni valè ba-w. Ba madanm a-w lonnè, konsa ou ké pwotéjé ondòt lanmityé ou ni ki pi enpòwtan ankò : lanmityé a-w èvè Jéova (Sòm 25:14). w25.01 13 § 17-18.

Sèwvitè a Jéova ka pòté bon mannèv pou yo préché bon nouvèl-la. É sé yo tousèl ki ka rivé fè sa. Adan on ka konsa, ka ki pé édé-nou pou nou kontinyé préché èvè balan oben pou nou ni plis balan ankò ? Ègzanp a Jézi pé montré-nou kijan pou nou ni balan adan travay a prédikasyon la. Pannan i té asi latè, i toujou préché èvè onlo balan. Anfèt, pi tan-la té ka pasé é pi i té ka travay rèd. Jézi pran on ègzanp pou montré kè travay a-y ka sanm ta on agrikiltè. Boug-lasa travay rèd pannan 3 lanné pou pran swen a on pyé-fig, men pyé-fig-la pa jen fè pon fwi. Menmjan agrikiltè-lasa pa jen arété èspéré kè pyébwa-la ké fè fwi on jou, sé menmjan-la osi Jézi pa pèd èspwa é i pa jen moli adan prédikasyon-la (Lik 13:6-9). Nou osi nou ké ni bon balan siwvwè nou ka gadé byen kijan i té ka palé é kijan i té ka aji é kè nou ka imité-y. w25.03 14-15 § 1-4.

Vinvwè ou ka pansé kè ou touvé on moun ki ké ay byen èvè-w, ka pou-w fè ? Ès ou dwètèt ay vwè moun-lasa onfwa-onfwa pou di-y kè i ka entérésé-w ? Labib ka di kè on moun ki saj ka chèché a sav ka pou i fè avan i aji. Alò, avan ou ay di on moun kè i ka entérésé-w, vométan ou aji èvè sajès. Sa vé di kè sa té’é myé si ou té ka pran on tan pou gadé jan moun-la ka aji èvè diféran moun é jan i ka aji adan diféran sitiyasyon san i suiv kè ou ka gadé-y. Si ou touvé on moun ki ka entérésé-w é kè ou bizwen òbsèwvé-y, kijan ou pé fè sa pou sa pa jenné moun-la ? Pannan sé réinyon-la oben pannan sé moman-la zò ka détann-zòt la, pétèt ou pé rivé a vwè sèwten biten anrapò èvè lanmityé a-y èvè Jéova, pèwsonalité a-y, é konpòwtasyon a-y. Mi sa pou mandé-w : « Kimoun ki zanmi a-y, é dè ki biten i enmé palé ? (Lik 6:45). Ès i ni menm òbjèktif ki mwen ? » Ou té’é pé mandé sé ansyen-la ki adan lasanblé a-y la oben dòt frè é sè ki mati é ki konnèt-li byen ki répitasyon a-y é ki kalité i ni (Rit 2:11 ; Pwov. 20:18). Men lè ou ka òbsèwvé on moun ki ka entérésé-w, pran prékosyon pou sa pa jenné-y. Fè ansòt pou-w toujou rèspèkté moun-la é pa rantré two fon adan vi a-y. w24.05 22 § 7-8.

Sé ansyen-la ka imité Jézi é yo pa ka mèt an tèt a yo kè moun-la ki péché la pé’é rèpanti-y. Ni sèwten frè é sè ki ké rèpanti-yo lèwvwè sé ansyen-la ké vwè-yo prèmyé fwa-la. Men pou dòt moun sa ké pran plis tan. Sé pousa pétèt sé ansyen-la ké bizwen vwè moun-la ki péché la plizyè fwa. Pétèt kè apré prèmyé ti kozé-la yo ké fè la, moun-la ki péché la ké koumansé réfléchi asi sa yo di-y, é pétèt kè èvè imilité i ké mandé Jéova padonné-y (Sòm 32:5 ; 38:18). Lèwvwè sé ansyen-la ké fè ondòt ti kozé èvè-y, moun-la pé ni ondòt létadèspri ki lè yo té fè prèmyé ti kozé-la. Pou édé on moun ki péché rèpanti-y, sé ansyen-la ka aji èvè onlo bonté é yo ka éséyé mèt-yo an plas a moun-la. Yo ka priyé Jéova pou i béni éfò a yo é pou moun-la chanjé konpòwtasyon a-y é rèpanti-y (2 Tim. 2:25, 26). w24.08 22-23 § 12-13.

Jéova vé pa ponmoun détwi ! Sa i vlé sé kè sé moun-la ki péché la wouviré an 2 bra a-y (2 Kor. 5:20). Sé pousa, dépi an tan lontan i pa té ka las mandé sèwvitè a-y ki té lagé-y pou yo rèpanti-yo é viré owa a-y. Lèwvwè sé ansyen-la ka pòté mannèv pou édé moun ki péché rèpanti-yo, yo ka travay ansanm ansanm èvè Jéova ! (Wom. 2:4 ; 1 Kor. 3:9). Ou ka imajiné jan toutmoun kontan an syèl-la lèwvwè on moun ka rèpanti-y ! Kanta Papa Jéova, pa menm palé ! I ka kontan vwè ti mouton a-y ka viré adan lasanblé-la. Pi nou ka réfléchi asi jan Jéova ni konpasyon, jan i ni mizérikòd é jan i ka ban-nou favè-la nou pa mérité la, pi nou ka vin enmé Jéova fò (Lik 1:78). w24.08 31 § 16-17.

Si Jézi té lésé sé moun-la mété-y wa, i té’é mélé-y adan politik a sé Juif-la ki té anba dominasyon a sé Women-la a moman-lasa. Jézi pa fè ni yonn ni dé, i pati adan montangn-la. Magré yo mèt présyon asi-y, Jézi pa jen mélanjé-y adan politik. Mi ondòt bèl lèson pou nou mi ! Sé vré kè ponmoun pé’é mandé-nou fè on mirak pou ba-yo onpakèt pen oben pou géri-yo é yo pé’é mandé-nou vin chèf a péyi-la. Men ni sa ki pé éséyé pran tèt an nou pou nou soutyenn on moun adan lapolitik oben pou fè-nou voté ba on moun, pas pou yo moun-lasa ké gouvèné byen. Men li Jézi té karé asi sa. I pa jen mélanjé-y adan zafè a politik. Limenm ni lokazyon di : « Wayòm an mwen pa adan mond-lasa » (Jan 17:14 ; 18:36). Jòdijou, nou ka imité jan Jézi té ka rézonné é jan i té ka aji : nou ka soutyenn Wayòm-la, nou ka préché Wayòm-la é nou ka priyé pou i pé sa vini (Mat. 6:10). w24.12 4 § 5-6.

Lèwvwè ou ka étidyé, éséyé vwè kijan ou pé mèt sa ou aprann an pratik. Pa ègzanp, Jéova sé on Bondyé ki jis é ou pé imité-y lèwvwè ou pa’a fè préférans lè ou ka aji èvè lézòt. Ou pé montré ou enmé Jéova kon Jézi té enmé Pap’a-y si ou paré à fè tousa Jéova ka mandé-w, é si ou paré a édé frè é sè a-w menmsi ou ka soufè adan sa. Ou pé imité Jézi osi lèwvwè ou ka fè sé moun-la konnèt tout sé bèl biten-la Jéova ja fè pou limanité. Konsa, yo ké ni laposibilité montré yo ni fwa adan ranson-la. Pli nou ké aprann dé biten asi ranson-la, pli nou ké enmé Jéova é Jézi. É konm nou ké enmé-yo pli fò, yo osi yo ké enmé-nou pli fò (Jak 4:8). Alò an-nou pwofité dè tousa Jéova mèt a dispozisyon an nou pou nou toujou aprann plis biten asi ranson-la. w25.01 25 § 16-17.

Mi konsa yo té’é pé tradui tèks-di-jou a jòdla : « Ou woté péché an mwen douvan zyé a-w ». Ègzanp-lasa ka montré kè lèwvwè on moun ka rèpanti-y, Jéova ka menné péché a moun-lasa alé pou i pé sa jété-yo é pou i pa vwè-yo ankò. Sé konsi Ézékyas té di : « Ou ka fè konsi péché an mwen pa jen ègzisté. » Adan Labib yo ka sèvi èvè ondòt ègzanp pou montré jan lidé-lasa enpòwtan. Nou ka touvé ègzanp-lasa an Miché 7:18, 19. Sé vèwsé-lasa ka di kè Jéova ka jété péché an nou anfon a lanmè-la. An tan a Labib, pa té ni pon mwayen pou on moun té touvé on biten yo té jété anfon a lanmè-la. Sé ègzanp-lasa ka montré-nou kè lèwvwè Jéova ka padonné-nou, i ka menné péché an nou lwen an nou, kifè, nou pa bizwen santi-nou koupab ankò. Kon David ni lokazyon di : « Tchè-kontan pou moun Bondyé padonné mové biten yo fè, moun Bondyé padonné péché a yo » (Wom. 4:7). Mi sé sa ki padonné, mi ! w25.02 9 § 7-8.

Jòdila ni on paradi ki ka ègzisté asi latè. Paradi-lasa ranpli èvè moun ki byen okipé pas yo ka fè onlo bon biten. Adan-y ni milyon é milyon moun ki ka viv anpé toubònman. Yo byen désidé a pa jen sòti adan paradi-lasa. É yo vlé kè on maksimòm dè moun vin jwenn-yo, pas pa ni pondòt koté konsa. Ki paradi ésa ? Sé Paradi èspirityèl la ! Jéova kréyé on koté pou pèp a-y pé sa viv anpé é i fè sa anmitan mond a Satan, on mond ki danjéré, on koté moun paré a manjé moun tèlman yonn hay lòt é tèlman ni méchansté. Ès ou pa’a touvé sa Bondyé fè la èstraòwdinè ? (1 Jan 5:19 ; Rév. 12:12). Bondyé an nou ki plen lanmou ka vwè tout sé mové biten-la ki ka fèt la alèla é sé pousa i ka fè ansòt pou nou santi-nou ansékirité é pou nou kontinyé sèvi-y èvè tchè-kontan. Adan Pawòl a-y, lè yo ka palé dè paradi èspirityèl la yo ka di kè sé on « abri » ki sèten é yo ka di osi kè sé on « jaden yo ka wouzé byen konm i fo » (Iz. 4:6 ; 58:11). Konm Jéova ka béni sé moun-la ki ka viv adan paradi èspirityèl la, yo ni tchè-kontan é yo ka santi-yo anpé magré yo ka viv adan sé dènyé jou-la, ki rèd toubònman (Iz. 54:14 ; 2 Tim. 3:1). w24.04 20 § 1-2.

Si ou bizwen mayé, sèten ou ja priyé Jéova pou palé-y dè sa. Jéova pa ka pwomèt ponmoun kè i ké touvé on moun pou mayé é nou sav sa byen. Men i ka sousyé-y dè sa ou ka rèsanti é dè sa ou bizwen, é i pé édé-w toupannan ou ka chèché on moun. Alò kontinyé di-y sa ou anvi é sa ou ka rèsanti (Sòm 62:8). Mandé-y ba-w sajès é édé-w ni pasyans (Jak 1:5). Menmsi ou ni dimal a touvé on moun ki té’é pé ay èvè-w, sonjé kè Jéova ka pwomèt kè i ké ba-w tousa ou bizwen pou viv é tout lanmou-la ou bizwen la (Sòm 55:22). Menmsi ou ka chèché on moun pou mayé, fò ou fè atansyon pou ou pa sonjé enki sa (Filip. 1:10). A pa paskè on moun ka mayé oben kè i ka rété tousèl a-y kè i ké ni tchè-kontan men sé si i bon bon zanmi èvè Jéova (Mat. 5:3). Lèfètkè ou sélibatè ou pé fè onlo biten é sa pé wouvè onlo pòt ba-w pou fè plis pou Jéova (1 Kor. 7:32, 33). Alò pannan ou sélibatè, sèvi èvè tan-la ou ni la méyè fason ki tini. Jessica, sé on sè ki ka rété o Zétazini. Lè i mayé, i té ja ni prèskè 40 an. Mi sa i ka èspliké : « Lè an té sélibatè, an té ka pòté bon mannèv adan prédikasyon-la kifè an té ni tchè-kontan menmsi an té anvi mayé. » w24.05 21 § 4 ; 22 § 6.

Si ou ka frékanté on moun, pannan konmen tan pou zò frékanté-zòt ? Lè ou pa’a pran asé tan pou réfléchi avan ou pran on désizyon, byensouvan sa pa ka pasé byen (Pwov. 21:5). Alò, sa vé di kè fò pa tan-la zò ka frékanté-zòt la two kout, men fò-zòt pran tout tan-la ki nésésè la pon yonn konnèt lòt byen. Pawkont, si zò ja konnèt-zòt byen, pa kontinyé frékanté-zòt initilman. Labib ka di : « Lè on moun ka atann on biten é kè biten-lasa ka pran tan pou rivé, sa ka fè-y pèd èspwa » (Pwov. 13:12). Ka lézòt pé fè lè 2 moun ka frékanté ? Nou pé envité-yo akaz an nou pou yo manjé èvè nou, nou pé envité-yo adan étid familyal an nou oben nou pé envité-yo pasé on ti moman èvè nou (Wom. 12:13). Pétèt yo ké bizwen kè on moun la èvè yo pou sòti oben pou fè dòt biten. Yo pé bizwen on koté pou yo palé trankilman oben kè on moun menné-yo on koté. Si yo bizwen sa, ès ou té’é pé édé-yo ? (Gal. 6:10). Si on frè é on sè ki ka frékanté-yo ka mandé-w vin on koté èvè yo pou yo pa touvé-yo tousèl, kijan pou-w vwè sa ? Kon on bèl lokazyon pou édé-yo. Fè atansyon pou-w pa lésé-yo tousèl men aji osi èvè bon jijman siwtou si yo bizwen palé dè biten ki ka konsèwné enki yo. w24.05 30 § 13-14.

Sé ansyen-la ka gadé pou vwè ka ki pousé on moun fè on péché. Pa ègzanp, ka ki aji asi lanmityé a-y èvè Jéova ? Ès sé pas i pa té ka étidyé dè koté a-y ? Ès sé pas i pa té ka préché ankò ? Pétèt avan, i té ka priyé toutlè men ès i pa moli asi sa ? Ès i arété goumé èvè mové lanvi i té ni ? Ès i té ni mové frékantasyon ? Ès i té ka anmizé-y èvè biten ki pa bon ? Ès sa pa détenn asi-y kifè i mété-y ka pansé kon i ka pansé la é sa ba-y sé lanvi-la i té ni la ? Ès i ka rann-li kont kè sé désizyon-la i pran la é konpòwtasyon a-y fè Pap’a-y Jéova lapenn ? Sé ansyen-la pé pozé moun-la ki péché la kèsyon pou fè-y réfléchi asi sa ki fè kè i pa bon bon zanmi èvè Jéova ankò é asi sa ki fè-y péché (Pwov. 20:5). Yo ka fè sa èvè jantiyès é yo pa ka pozé-y pon kèsyon asi détay ki initil. Kon Natan fè-y èvè David, yo pé pran on ègzanp ba-y osi pou fè-y réfléchi asi sa i fè la, é pou fè-y konprann kè sa pa té bon ditou. Pétèt pannan prèmyé ti kozé-lasa, moun-la ké koumansé santi-y tris parapòt a sa i fè la, é pétèt i pé jous rèpanti-y. w24.08 22 § 9-11.

Jézi préché ‘bon nouvèl a Wayòm la’ èvè onlo balan pas i té sav kè sé travay-lasa Jéova té vlé i fè. Pou Jézi, prédikasyon-la sé té sa ki té pli enpòwtan adan vi a-y. Menm lèwvwè travay a prédikasyon a-y té kay bout, i « té ka pasé adan chak vil é adan chak vilaj » pou anségné sé moun-la (Lik 13:22). Ondòt biten i fè, sé kè i fòwmé plis disip ankò pou yo préché bon nouvèl-la osi (Lik 10:1). Jòdijou osi, Jéova é Jézi vlé nou mèt prédikasyon-la prèmyé douvan adan vi an nou kon o 1^é syèk (Mat. 24:14 ; 28:19, 20). Lè nou ka vwè sé moun-la kon Jéova ka vwè-yo, sa ka ban-nou plis balan pou nou préché (1 Tim. 2:3, 4). I vlé kè on maksimòm dè moun tann bon nouvèl-la é kè yo aksèpté lavérité. Davwa bon nouvèl-lasa pé sové vi a moun, Jéova ka fè-nou vin pli filé pou nou palé dè mésaj-lasa. Menmsi sé moun-la pa ka koumansé sèvi Jéova konnyéla, pétèt yo ké fè-y avan gwo tribilasyon-la bout. w25.03 15-16 § 5-7.

Sé chakmoun ki ka vwè si konsyans a-y ka pèwmèt-li di on moun yo woté adan lasanblé-la bonjou. Si i ka vin réinyon, ni sa ki ké di-y bonjou é ki ké di-y kè yo kontan vwè-y é yo pé’é vwè pon pwoblèm adan sa. Men nou pé’é pran pon chapit èvè moun-lasa é nou pé ké frékanté-y. Ni sèwten moun ki pé di : « Men an pa’a konprann ! Ès Labib pa’a di kè moun-la ki ka di-y bonjou ka pawtisipé adan mové biten i ka fè ? » (2 Jan 9-11). Lè nou ka gadé sé pasaj-la ki avan é apré vèwsé-lasa, nou ka vwè kè sé dè moun ki apòsta yo ka palé é dè moun ki ka pousé dòt moun bétizé (Rév. 2:20). Si on moun ka kontinyé défann sa sé apòsta-la ka anségné, oben si i ka ankourajé moun fè biten ki mové, sé ansyen-la pé ké ay vwè-y. Apapoudi tout krab-la mò an bari-la pou moun-lasa. Men toutotan moun-lasa pa chanjé, nou pé’é di-y bonjou é nou pé’é envité-y vin réinyon nonplis. w24.08 30-31 § 14-15.

Apré i fin ba on foul manjé, Jézi lésé sé disip-la rètouné Kafawnaòm èvè bato-la é li i pati an montangn-la pou foul-la pa té fè-y vin wa (Jan 6:16-20). Pannan yo té ka travèsé lanmè-la, on gwo tanpèt lévé é té ni dé manman vag. Lèwgadé Jézi maché asi dlo-la pou i vin owa yo é i pèwmèt lapòt Pyè fè menm biten (Mat. 14:22-31). Lèwvwè Jézi rivé an bato-la, van-la arété onsèl kou. Sé disip-la rété èstèbèkwè é yo di-y : « Ou sé Gason a Bondyé menm ! » (Mat. 14:33). Sé disip-la po’o té konprann kè Jéova té ba Jézi pouvwa pou i té fè plis ki on mirak pou ba moun pen. Dayè Mawk ka di : « Lè [sé apòt-la] vwè sa, yo rété sézi pas yo pa té konprann ka mirak-la i té fè èvè sé pen-la té vlé di » (Mawk 6:50-52). Kon nou sòti vwè-y, sé apòt-la po’o té konprann kantité puisans Jéova té ba Jézi pou i té fè mirak. w24.12 5 § 7.

Nou pé montré Jéova jan nou ka aprésyé lanmou a-y lèwvwè nou ka pwofité dè péryòd a Mémoryal-la pou montré-y rèkonésans an nou pou ranson-la. Nonsèlman nou ké pran dispozisyon pou nou vin adan Mémoryal-la, men nou ké envité on maksimòm dè moun pou yo pé sa vin osi. Nou pé èspliké-yo kijan Mémoryal-la ké pasé. Pou nou fè sa, nou ké pé sèvi èvè sé vidéo-la Poukwa Jézi mò ? é Sonjé sakrifis a Jézi, kè nou ka touvé asi jw.org. Sé ansyen-la ké fè ansòt pou yo envité sé frè é sè-la ki pa’a vin lasal ankò. Imajiné jwa-la i ké ni an syèl-la si déotwa ti mouton ki té pèd chimen a Jéova, ka santi yo anvi wouviré adan lasanblé-la ! (Lik 15:4-7). Alò sé vré, jou a Mémoryal-la nou ké kontan di-nou bonjou kon nou ni labitid fè-y. Men ni sèwten moun sé prèmyé fwa yo ké vin adan on sal di Wayòm oben lontan yo pa vin lasal, an-nou sonjé akéyi-yo. Nou vlé toutmoun santi-yo alèz a yo ! (Wom. 12:13). w25.01 29 § 15.

Jéova sakrifyé pwòp Gason a-y pas i ka fè sa ki jis, men i fè sa siwtou pas i enmé-nou (Jan 3:16 ; 1 Jan 4:9, 10). Jéova voyé gason a-y mò ban nou nonsèlman pas i vlé nou viv asi latè pou touttan, men osi pas i vlé nou fè pawti a fanmi a-y. Ou ka sonjé lè Adan péché ? I pa té pé rété adan fanmi a Jéova ankò. É dépi sa, pa ni ponmoun ki ka fèt adan fanmi-lasa. Men grasa ranson-la, Jéova ka padonné péché an nou, é on jou, tout moun ki ni fwa adan-y é ki ka obéyi-y ké fè pawti a fanmi a-y. Anplisdisa, dépi konnyéla nou pé vin bon zanmi èvè Jéova, men osi èvè sélézòt moun-la ki ka adoré-y la. Vréman, nou pé di Jéova enmé-nou ! (Wom. 5:10, 11). w25.01 21 § 6.

Sèten ou ké dakò pou di kè pa ni pi bèl kado ki ranson-la ! (2 Kor. 9:15). Sé enki pas Jézi bay vi a-y an sakrifis kè nou pé vin bon zanmi èvè Bondyé é kè nou ni èspwa kè nou ké pé viv pou touttan. Si Jéova péyé ranson-la pou nou, sé pas i té enmé-nou onlo é nou pé’é jen las di-y mèsi pousa (Wom. 5:8). Pou nou kontinyé montré rèkonésans an nou pou tousa Jéova é Jézi fè é pou nou pa jen oubliyé tousa yo fè, Jézi mandé-nou sélébré Mémoryal a mò a-y chak lanné (Lik 22:19, 20). Lanné-lasa, nou ké sélébré Mémoryal-la lè jédi 2 avril 2026. Sèten noutout ké òwganizé-nou pou nou la jou-lasa. Si pannan péryòd a Mémoryal nou ka pran tan médité asi sa Jéova é Jézi fè ban-nou, sa ké pwokiré-nou onlo byenfé. w25.01 20 § 1-2.

Pi ou ké pran tan réfléchi asi sa Jéova é Jézi fè ba-w, pi ou ké vwè jan Jéova é Jézi enmé-w. Pétèt kè lanné-lasa, pannan péryòd a Mémoryal-la, ou té’é pé li on Évanjil oben plizyè adan yo. Ka ou ka pansé ? Lè ou ka fè lèkti a-w, ou pa oblijé li onpakèt vèwsé onsèl kou. Vométan ou li atètipo pou touvé dé nouvo biten ki ké fè-w enmé Jéova é Jézi pi fò ankò. Si sa ja ka fè bon tibwen tan ou adan lavérité, pétèt ou ka mandé-w si sa posib ou dékouvè dé nouvo biten asi dé sijé ou konnèt byen, kon jistis a Jéova, lanmou a-y, oben asi ranson-la. On biten ki sèten sé kè nou pé’é jen fin aprann dé biten asi sé sijé-lasa oben asi dòt sijé. Alò pran tan li é étidyé piblikasyon an nou. w25.01 24-25 § 13-15.