Tit 2:1-15
2 Men vou, kontinyé palé dè sé biten-la ki annakò èvè ansègnman-la ki bon la*.
2 Fò sé misyé-la ki ja ni on laj ni métriz adan tout domenn a vi a-yo, fò yo séryé, fò yo ni bon jijman, fò yo ni on fwa ki fò, fò yo enmé lézòt é fò yo andiré lè yo ka jwenn bout-rèd.
3 Menmjan-la osi, fò sé madanm-la ki ja ni on laj aji on mannyè ki ka ba Bondyé lonnè, fò pa yo ka manti pou fè moun méchansté, fò pa yo ni labitid bwè onpakèt diven, men fò yo anségné sa ki bon.
4 Konsa, yo ké pé ba sé madanm-la ki pi jenn la konsèy pou yo enmé mari a-yo, pou yo enmé timoun a-yo,
5 pou yo ni bon jijman, pou yo ni lidé ki pwòp é on konduit ki pwòp osi, pou yo okipé-yo dè kaz a-yo, pou yo janti é pou yo soumèt-yo a mari a-yo. Konsa, moun pé’é malpalé pawòl a Bondyé.
6 Menmjan-la, kontinyé ankourajé sé jennboug-la pou yo ni bon jijman,
7 é voumenm, bay lègzanp, fè tout kalté bon biten. Anségné sa ki vré é fò ou séryé lè ou ka fè sa.
8 Sèvi èvè bèl ti pawòl* kè ponmoun pé pa kritiké. Konsa, moun ki kont nou ké hont, pas yo pé’é pé di pon mové biten asi nou.
9 Fò sé èsklav-la soumèt-yo a mèt a-yo adan tout domenn, fò yo fè éfò pou fè mèt a-yo plézi, fò pa yo wouklé,
10 fò pa yo volé biten a mèt a-yo, men fò yo sé dé moun yo pé fè konfyans. Konsa, yo ké pé montré adan tousa yo ka fè jan ansègnman a Bondyé, Sovè an-nou, bèl.
11 Pas Bondyé montré jan i bon* é grasa sa, tout kalté moun pé sové.
12 Sa mond-la anvi é tousa ki ka dérèspèkté Bondyé, bonté-lasa ka aprann-nou voyé-yo alé. Anplisdisa, adan mond-lasa*, i ka aprann-nou viv èvè bon jijman, menné on vi ki dwèt é viv on mannyè ki ka montré kè nou fidèl a Bondyé*.
13 An menm balan-la, annou kontinyé atann kè sé bèl biten-la nou ka èspéré la réyalizé é kè Bondyé an-nou ki puisan é Jézi Kris Sovè an-nou, montré jan yo gran.
14 Jézi Kris bay vi a-y ban nou, pou i woté-nou anba jouk* a tout kalté mové biten é pou i pwòpté-nou. Konsa, nou té pé vin pèp a-y ki ta-y, on pèp ki ni balan pou fè bon biten.
15 Kontinyé anségné sé biten-lasa, kontinyé ankourajé moun é kontinyé korijé moun, pas ou rèsèvwa otorité-la pou fè sa. Pa lésé ponmoun méprizé-w.
Noté sa
^ Oben « ki ka pòté bon biten ».
^ Oben « èvè pawòl ki ka fè dibyen ».
^ Oben « aji èvè on bonté ki èstraòwdinè ».
^ Oben « épòk-lasa », « sistèm-lasa ». Ay adan Èsplikasyon a sé mo-la (Mond).
^ Ay adan Èsplikasyon a sé mo-la.
^ Pi ègzaktèman « péyé on ranson ».
