Tit 3:1-15
3 Kontinyé fè sé frè-la sonjé kè fò yo soumèt-yo douvan sé gouvènman-la é sé otorité-la é kè fò yo kouté-yo, kè fò yo paré pou fè tout biten ki bon,
2 kè fò pa yo malpalé ponmoun, kè fò pa yo chèché moun tren, men kè fò yo rézonab, kè fò yo toujou aji èvè dousè épi toutmoun.
3 Pas avan, nou osi, nou té sòt, nou pa té ka obéyi, nou pa té asi bon chimen-la, nou té èsklav a tout kalté lanvi é a tout kalté plézi, nou té méchan, nou té jalou moun, nou té mové toubònman é yonn té hay lòt.
4 Men Bondyé, Sovè an-nou, montré i ni bonté é i montré i enmé limanité.
5 A pa pas nou fè biten ki jis i sové-nou, men sé pas i aji épi nou èvè mizérikòd. I sové-nou lèwvwè i pwòpté-nou grasa ben-la ki fè-nou wouviv la é lèwvwè i sèvi èvè lèspri sen a-y pou fè-nou vin dé nouvo moun.
6 I sèvi èvè Jézi Kris Sovè an-nou, pou ban-nou lèspri-lasa adébòdé.
7 Konsa, lèwvwè Bondyé ké di kè nou jis grasa bonté èstraòwdinè a-y, nou ké érité lavi étèwnèl é éritaj-lasa annakò èvè èspwa-la nou ni la.
8 Sé pawòl-lasa sé vérité, é lè ou ka di sa, an vé ou apiyé asi sé biten-lasa byen. Konsa, moun ki kwè an Bondyé ké toujou sonjé kè fò yo fè bèl biten. Sé biten-lasa bèl é yo itil ba toutmoun.
9 Men fò pa ou rantré adan pon déba initil, ni adan pon déba anrapò èvè lis a zansèt a moun, fò pa ou mélanjé-w adan pon babyé ki anrapò èvè Lwa-la, pas tousa initil é sa pa’a pòté ayen dè bon.
10 Siwvwè on moun ka simé on ansègnman ki pa vré alòskè ou ja avèti-y on prèmyé fwa é kè ou wouavèti-y on dézyèm fwa ankò, fò pa ou ni ayen a vwè èvè-y,
11 pas boug-lasa pran on chimen kochi, sé péché i ka péché é i ka kondanné-y limenm a-y.
12 Lè an ké voyé Awtémas oben Tichik owa a-w, fè tousa ou pé pou vin vwè-mwen a Nikopolis, pas sé la an désidé an ké pasé livè.
13 Fè tousa ou pé pou édé Zénas, ki konnèt Lwa-la byen, é pou édé Apolòs préparé vwayaj a-yo. Konsa pé’é manké-yo ayen.
14 Men fè ansòt osi pou frè an-nou aprann fè bon biten, édé-yo pran labitid-lasa, é siwvwè ni moun ki bizwen yo édé-yo vitman, yo ké pé soutyenn-yo. Konsa, yo ké toujou fè bon biten*.
15 Tout sé moun-la ki èvè mwen la ka voyé bonjou ba-w. Di tout frè an-nou ki krétyen é ki enmé-nou kè an ka voyé bonjou ba yo.
An ka swété kè Bondyé aji èvè on bonté ki èstraòwdinè épi zòtout.
Noté sa
^ Pi ègzaktèman « pé’é rété san pòté fwi ».
