Bahin sa Pasko, ang pipila moingon nga si Jesus ang “rason sa selebrasyon.” Sila mosaulog niana aron sa paghandom sa iyang adlawng natawhan.

Ang popular nga mga awit sa Pasko ug mga kostumbre niini wala kaayoy kalabotan kang Jesus. Minilyon nga nagsaulog niini walay pagtuo kaniya; ang uban wala gani motuo nga siya naglungtad. Sa kalibotan sa komersiyo, ang Pasko maoy panahon sa pag-anunsiyo sa mga baligya inay okasyon sa paghandom kang Jesus.

“Ang Anak sa tawo mianhi . . . sa paghatag sa iyang kalag nga usa ka lukat baylo sa daghan.” (Marcos 10:45) Dayag nga gisulti ni Jesus ang mga pulong nga gikutlo sa ibabaw, dili sa iyang adlawng natawhan, kondili sa gabii una siya mamatay. Nianang gabhiona, naghatag siyag simpleng instruksiyon kon unsaon paghandom ang iyang kamatayon. Apan, nganong buot man ni Jesus nga handomon sa iyang mga sumusunod ang iyang kamatayon inay ang iyang pagkatawo? Tungod kay ang halad lukat ni Jesus naghatag ug kahigayonan sa matinumanong katawhan nga makadawat ug kinabuhing dayon. Ang Bibliya nag-ingon: “Ang suhol nga ginabayad sa sala mao ang kamatayon, apan ang gasa nga ginahatag sa Diyos mao ang kinabuhing walay kataposan pinaagi ni Kristo Jesus nga atong Ginoo.” (Roma 6:23) Busa, matag tuig, sa anibersaryo sa iyang kamatayon, ang mga sumusunod ni Jesus naghandom kaniya, dili ingong masuso, kondili ingong “manluluwas sa kalibotan.”—Juan 4:42.

“Si Kristo nag-antos alang kaninyo, nga nagbilin kaninyog sulondan aron kamo managsunod pag-ayo sa iyang mga tunob.” (1 Pedro 2:21) Aron mapasidunggan ug mahandom si Jesus, kinahanglan nimong tun-an ang iyang panig-ingnan ingong hingpit ug intelihenteng tawo. Palandonga usab ang iyang paagi sa pagpakitag kaluoy, pailob, ug kaisog sa pagbuhat ug matarong, ug pangitag kahigayonan nga masundog nimo siya.

“Ang gingharian sa kalibotan nahimo nang gingharian sa atong Ginoo ug sa iyang Kristo, ug siya magamando ingong hari hangtod sa kahangtoran.” (Pinadayag 11:15) Sa paghandom nimo kang Jesus, tagda kon unsay iyang gibuhat karon. Siya nagmando na ingong langitnong Hari. Ang Pulong sa Diyos nagtagna bahin kang Jesus: “Uban sa pagkamatarong siya magahukom sa mga timawa, ug uban sa katul-id siya magabadlong sa mga maaghop sa yuta.” (Isaias 11:4) Kanang makapadaning mga hiyas dili iya sa usa ka bag-ong natawo nga bata, kondili sa usa ka gamhanang Magmamando.