Ang Pulong ni Jehova Buhi

Mga Haylayt Gikan sa Basahon sa Ikaduhang Samuel

ANG pag-ila ba sa soberanya ni Jehova nagkahulogan ug hingpit nga pagkamasinugtanon sa atong bahin? Ang tawo ba nga nagpasundayag ug integridad kanunayng nagabuhat kon unsay husto sa panan-aw sa Diyos? Unsang matanga sa tawo ang ‘gikahimut-an sa kasingkasing’ sa matuod nga Diyos? (1 Samuel 13:14) Ang basahon sa Bibliya sa Ikaduhang Samuel naghatag ug makapatagbawng mga tubag niining mga pangutanaha.

Ang Ikaduhang Samuel gisulat ni Gad ug Natan, duha ka manalagna nga suod kang Haring David sa karaang Israel. a Nakompleto niadtong mga 1040 W.K.P., sa naghinapos na ang 40-ka-tuig nga pagmando ni David, ang basahon naghisgot ilabina bahin kang David ug sa iyang relasyon kang Jehova. Kining makaiikag nga sugilanon nag-asoy kon sa unsang paagi ang usa ka nagusbat-sa-gubat nga nasod nahimong usa ka mauswagon ug nahiusa nga gingharian ubos sa pagmando sa usa ka maisogong hari. Kining kulbahinam nga sugilanon tugob sa lalom nga tawhanong mga emosyon.

SI DAVID “NAG-ANAM UG KABANTOG”

(2 Samuel 1:1–10:19)

Ang reaksiyon ni David sa balita bahin sa kamatayon ni Saul ug Jonatan nagpadayag sa iyang pagbati alang kanila ug kang Jehova. Sa Hebron, si David gitudlo nga hari sa tribo sa Juda. Ang anak ni Saul nga si Is-boset gihimong hari sa nahibiling bahin sa Israel. Si David “nag-anam ug kabantog,” ug mga pito ug tunga ka tuig sa ulahi, siya nahimong hari sa tibuok Israel.—2 Samuel 5:10.

Giilog ni David ang Jerusalem gikan sa mga Jebusihanon ug gihimo kini nga kaulohan sa iyang gingharian. Ang una niyang paningkamot sa pagbalhin sa arka sa pakigtugon ngadto sa Jerusalem miresulta ug katalagman. Apan, nagmalamposon ang ikaduha niyang paningkamot, ug si David misayaw sa kalipay. Si Jehova naghimog pakigsaad kang David alang sa usa ka gingharian. Gibuntog ni David ang iyang mga kaaway samtang ang Diyos nagpadayon sa pag-uban kaniya.

Tubag sa mga Pangutana Bahin sa Kasulatan:

2:18—Nganong si Joab ug ang iyang duha ka igsoong lalaki gipaila ingong anak ni Zeruia, nga ilang inahan? Sa Hebreohanong Kasulatan, ang mga kagikan kasagarang itala pinaagi sa ngalan sa amahan. Ang bana ni Zeruia basin nasayo ug kamatay, o basin dili siya angayan nga ilakip diha sa Balaang Kasulatan. Posible nga si Zeruia ang gitala sanglit igsoon siya ni David o kaha igsoon siya ni David sa amahan. (1 Cronicas 2:15, 16) Ang bugtong higayon nga gihisgotan ang amahan niining tulo ka magsoon mao kadtong higayon nga gihisgotan ang iyang lubnganan sa Betlehem.—2 Samuel 2:32.

3:29—Unsay buot ipasabot sa “usa ka tawo  nga magagunit sa usa ka nagtuyok nga kalinyas”? Mga babaye ang naandang maghabol ug panapton. Busa, kini nga pamulong mahimong nagtumong sa mga lalaki nga dili angayan sa mga kalihokan sama sa pakiggubat ug busa naobligar sa paghimo sa buluhaton nga kasagarang himoon sa usa ka babaye.

5:1, 2—Unsa ka dugay pa human gipatay si Is-boset una si David nahimong hari sa tibuok Israel? Daw makataronganon ang paghinapos nga gisugdan ni Is-boset ang iyang duha-ka-tuig nga pagmando wala madugay human mamatay si Saul, sa samang panahon nga si David misugod pagmando sa Hebron. Samtang nagpuyo sa Hebron, si David nagmando sa Juda sa pito ug tunga ka tuig. Wala madugay human siya nahimong hari sa tibuok Israel, iyang gibalhin ang iyang kaulohan sa Jerusalem. Busa, mga lima ka tuig pa ang milabay human namatay si Is-boset una nahimong hari si David sa tibuok Israel.—2 Samuel 2:3, 4, 8-11; 5:4, 5.

8:2—Pila ka Moabihanon ang namatay human nakigsangka kanila ang Israel? Ang gidaghanon nahibal-an pinaagig pagsukod inay kay pag-ihap. Daw gipahigda ni David ang mga Moabihanon tapad sa usag usa diha sa yuta sa usa ka lumbay. Dayon, iyang gisukod ang gitas-on sa lumbay pinaagig pisi. Mopatim-aw nga duha ka sukod sa pisi, o dos-tersiya sa mga Moabihanon, ang gipatay, ug usa ka sukod sa pisi, o un-tersiya kanila, ang gitipigang buhi.

Mga Leksiyon Alang Kanato:

2:1; 5:19, 23. Si David mikonsulta kang Jehova una siya mipuyo sa Hebron ug una siya misulong sa iyang mga kaaway. Kita usab kinahanglang magpagiya kang Jehova una mohimog mga desisyon nga makaapektar sa atong espirituwalidad.

3:26-30. Ang pagpanimalos adunay daotang mga sangpotanan.—Roma 12:17-19.

3:31-34; 4:9-12. Sulondan si David tungod kay siya wala manimalos ug wala magdumot.

5:12. Dili gayod nato angayng kalimtan nga si Jehova nagtudlo kanato sa iyang mga dalan ug nagpaposible kanato sa pagbaton ug maayong relasyon uban kaniya.

6:1-7. Bisan tuod maayo ang tuyo ni David, ang iyang paningkamot sa pagbalhin sa Arka sakay sa usa ka karomata supak sa sugo sa Diyos ug miresulta ug kapakyasan. (Exodo 25:13, 14; Numeros 4:15, 19; 7:7-9) Ang pagkupot ni Uzah sa Arka nagpakita usab nga ang maayong intensiyon dili makausab sa buot nga ipatuman sa Diyos.

6:8, 9. Diha sa usa ka masulayon nga kahimtang, si David primero nasuko, dayon nahadlok—tingali gibasol pa gani si Jehova sa maong katalagman. Kinahanglang magbantay kita nga dili nato basolon si Jehova sa mga suliran nga moresulta tungod sa pagsupak sa iyang mga sugo.

7:18, 22, 23, 26. Ang pagpaubos, bug-os nga pagkamahinalaron kang Jehova, ug kaikag sa pagbayaw sa ngalan sa Diyos maoy mga hiyas ni David nga angay natong sundogon.

8:2. Usa ka tagna nga giingon mga 400 ka tuig nga abante natuman. (Numeros 24:17) Ang pulong ni Jehova kanunayng matuman.

9:1, 6, 7. Gituman ni David ang iyang saad. Kita usab angayng maningkamot sa pagtuman sa atong saad.

SI JEHOVA NAGPATUNGHA UG KATALAGMAN BATOK SA IYANG DINIHOGAN

(2 Samuel 11:1–20:26)

“Ania, ako magpatungha ug katalagman batok kanimo gikan sa imong kaugalingong balay,” si Jehova miingon kang David, “ug ako magkuha sa imong mga asawa atubangan sa imong mga mata ug maghatag kanila ngadto sa imong isigkatawo, ug siya makigdulog gayod sa imong mga asawa ilalom sa panan-aw niini nga adlaw.” (2 Samuel 12:11) Unsay hinungdan niini nga paghukom? Tungod kini sa sala ni David uban kang Bat-seba. Bisan tuod gipasaylo ang mahinulsolong si David, siya wala makalingkawas sa sangpotanan sa iyang sala.

Una, ang bata nga gipanganak ni Bat-seba namatay. Dayon ang ulay nga anak ni David nga si Tamar gilugos ni Amnon nga iyang igsoon sa amahan. Ang pursosong igsoon ni Tamar nga si Absalom nanimalos pinaagig pagpatay kang Amnon. Si Absalom nakigkunsabo batok sa iyang kaugalingong amahan ug nagproklamar sa iyang kaugalingon nga hari sa Hebron. Si David napugos sa pagkalagiw gikan sa Jerusalem. Si Absalom nakigsekso sa napulo sa mga puyopuyo sa iyang  amahan nga gibilin aron sa pag-atiman sa balay. Si David nakabalik lang pagmando human nga si Absalom gipatay. Usa ka pag-alsa sa Benjaminhon nga si Sheba natapos sa dihang siya namatay.

Tubag sa mga Pangutana Bahin sa Kasulatan:

14:7—Unsay gisimbolohan sa “akong nagsigang mga baga”? Ang siga sa dugay-mapalong nga baga nagtumong sa usa ka buhing kaliwat.

19:29—Nganong ingon niadto ang pagsanong ni David sa katin-awan nga gihatag ni Mepiboset? Sa pagkadungog kang Mepiboset, lagmit nga naamgohan ni David nga nasayop siya sa dihang mituo dayon siya sa giingon ni Ziba. (2 Samuel 16:1-4; 19:24-28) Lagmit gayod nga nakapikal kini kang David, ug dili na siya gustong makadungog ug dugang pa bahin niadtong butanga.

Mga Leksiyon Alang Kanato:

11:2-15. Ang prangka nga asoy bahin sa mga kasaypanan ni David nagpamatuod nga ang Bibliya maoy inspirado nga Pulong sa Diyos.

11:16-27. Sa dihang makahimo kita ug grabe nga sala, kinahanglan nga dili kita mosulay pagtago niana sama sa gibuhat ni David. Hinunoa, angay natong isugid ang atong sala kang Jehova ug mangayog tabang sa mga ansiyano sa kongregasyon.—Proverbio 28:13; Santiago 5:13-16.

12:1-14. Si Natan naghatag ug maayong panig-ingnan alang sa tinudlong mga ansiyano sa kongregasyon. Angay nilang tabangan ang mga nakasala sa pagtul-id sa ilang dalan. Ang mga ansiyano angayng mohimo niini nga responsabilidad sa mataktikanhong paagi.

12:15-23. Ang pagbaton ug hustong panglantaw bahin sa nahitabo kaniya nakatabang kang David sa pagsanong sa kalisdanan sa hustong paagi.

15:12; 16:15, 21, 23. Sa dihang mipatim-aw nga si Absalom mahimo nang hari, ang garbo ug ambisyon mitultol sa makinaadmanon nga magtatambag nga si Ahitopel sa pagluib. Ang pagkamakinaadmanon nga wala duyogi ug pagpaubos ug pagkamaunongon mahimong usa ka lit-ag.

19:24, 30. Si Mepiboset mapabilhon kaayo sa mahigugmaong-kalulot ni David. Siya kinabubut-ong nagpasakop sa desisyon sa hari bahin kang Ziba. Ang pagpabili kang Jehova ug sa iyang organisasyon angayng motukmod kanato nga magmapinasakopon.

20:21, 22. Ang kaalam sa usa ka tawo makatabang sa daghan sa paglikay sa katalagman.—Ecclesiastes 9:14, 15.

ITUGOT NGA KAMI “MANGAHULOG SA KAMOT NI JEHOVA”

(2 Samuel 21:1–24:25)

Adunay kagutom sa tulo ka tuig tungod sa sala ni Saul sa pagpapatay sa mga Gabaonhon. (Josue 9:15) Agig bayad sa maong sala, ang mga Gabaonhon mihangyo sa pagpatay sa pito ka anak ni Saul. Gitugyan sila ni David sa mga kamot sa mga Gabaonhon,  ug ang hulaw natapos pinaagig pagbundak sa ulan. Upat ka Filistehanong mga higante ang “nangapukan pinaagi sa kamot ni David ug pinaagi sa kamot sa iyang mga alagad.”—2 Samuel 21:22.

Si David grabeng nakasala tungod sa pagpasugo niya ug ilegal nga senso. Siya naghinulsol ug mipili nga makaagom ug silot “sa kamot ni Jehova.” (2 Samuel 24:14) Ingong resulta, 70,000 ang namatay tungod sa kamatay. Gisunod ni David ang sugo ni Jehova, ug ang hampak mihunong.

Tubag sa mga Pangutana Bahin sa Kasulatan:

21:8—Nganong gikaingon man nga ang anak nga babaye ni Saul nga si Mikal adunay lima ka anak nga lalaki, samtang ang 2 Samuel 6:23 nag-ingon nga siya namatay nga walay anak? Ang labing dinawat nga katin-awan mao nga kini maoy mga anak sa igsoong babaye ni Mikal nga si Merab, kinsa naminyo kang Adriel. Lagmit nga si Merab sayong namatay, ug ang walay-anak nga si Mikal mao ang nagpadako sa mga bata.

21:9, 10—Unsa ka dugay nga nagbilar si Rizpa alang sa iyang duha ka anak nga lalaki ug sa lima ka apo nga lalaki ni Saul nga gipatay sa mga Gabaonhon? Kining pito gibitay “sa unang mga adlaw sa ting-ani”—Marso o Abril. Ang ilang lawas gipasagdang naladlad diha sa usa ka bukid. Gibantayan ni Rizpa ang pito ka lawas sa adlaw ug gabii hangtod nga gipakita ni Jehova nga nawala na ang iyang kasuko pinaagi sa pagtapos sa hulaw. Wala gayoy kalagmitan nga mobundak ang ulan sa dili pa matapos ang yugto sa ting-ani sa Oktubre. Busa, si Rizpa lagmit nga nagbilar sulod sa gidugayong lima o unom ka bulan. Human niadto, gipalubong ni David ang mga bukog sa mga lalaki.

24:1—Nganong ang pagkuhag senso nahimo mang usa ka grabeng sala alang kang David? Ang pagkuha mismo ug senso wala idili sa Balaod. (Numeros 1:1-3; 26:1-4) Ang Bibliya walay giingon kon unsa ang nagtukmod kang David sa pag-ihap sa mga tawo. Apan, ang 1 Cronicas 21:1 nagpaila nga si Satanas nag-aghat kaniya sa paghimo niana. Bisan unsa pay hinungdan, ang iyang pangulo sa kasundalohan, si Joab, nasayod nga ang desisyon ni David sa pagrehistro sa katawhan maoy sayop, ug siya misulay pagbadlong kang David batok sa paghimo niana.

Mga Leksiyon Alang Kanato:

22:2-51. Ang awit ni David nindot kaayong naglarawan kang Jehova ingong ang matuod nga Diyos, nga takos sa atong bug-os nga pagsalig!

23:15-17. Lalom kaayo ang pagtahod ni David sa balaod sa Diyos bahin sa kinabuhi ug dugo nga niining higayona, siya midumili sa pagbuhat bisan sa butang nga daw nahisama rag pagsupak niana nga balaod. Angay natong ugmaron ang ingon niana nga tinamdan sa tanang mga sugo sa Diyos.

24:10. Ang tanlag ni David nagtukmod kaniya sa paghinulsol. Ang ato bang konsensiya sensitibo usab nga mopalihok kanato sa paghinulsol?

24:14. Kombinsido si David nga si Jehova mas maluluy-on kay sa mga tawo. Kombinsido ba usab kita niana?

24:17. Si David naguol nga ang tibuok nasod nag-antos tungod sa iyang kasal-anan. Ang mahinulsolong mamumuhat ug daotan angayng maguol sa kaulawan nga maagoman sa kongregasyon tungod sa iyang binuhatan.

Ang Pagkahimong ‘Kahimut-anan sa Kasingkasing sa Diyos’ Posibleng Makab-ot

Ang ikaduhang hari sa Israel napamatud-ang ‘usa ka tawo nga gikahimut-an sa kasingkasing ni Jehova.’ (1 Samuel 13:14) Wala gayod dudahi ni David ang matarong nga mga sukdanan ni Jehova, ug wala siya magtinguha sa pagsubay sa dalan nga bulag sa Diyos. Matag higayon nga makasala si David, iyang giangkon ang iyang sala, gidawat ang disiplina, ug gitul-id ang iyang mga dalan. Si David maoy tawo nga may integridad. Dili ba maalamon nga sundogon nato siya, ilabina sa dihang kita makasala?

Ang sugilanon sa kinabuhi ni David tin-awng nagpakita nga ang pag-ila sa soberanya ni Jehova nagkahulogan ug pagdawat sa Iyang mga sukdanan sa maayo ug daotan ug pagpaningkamot sa pagsunod niana ingong mga tighupot ug integridad. Mahimo nato kini. Mapasalamaton gayod kita sa mga pagtulon-an nga atong nakat-onan gikan sa basahon sa Ikaduhang Samuel! Ang dinasig nga mensahe nga makaplagan niining basahona maoy buhi ug gamhanan gayod.—Hebreohanon 4:12.

[Footnote]

[Hulagway sa panid 16]

Ang paghinumdom kon kinsa gayoy nagtudlo kaniya ingong hari nakatabang kang David sa pagpabiling mapaubsanon

[Mga hulagway sa panid 18]

“Ania, ako magpatungha ug katalagman batok kanimo gikan sa imong kaugalingong balay”

Bat-seba

Tamar

Amnon3