Ang Pagwali ni Saulo Nakapukaw sa Pagkamabatokon

KADTO wala hisabti sa mga Hudiyo sa Damasco. Sa unsang paagi naapostata ang usa ka hugot nga tigdepensa sa tradisyonal nga mga tinuohan? Si Saulo ilado nga usa ka tawong nanghasi sa mga nagtawag sa ngalan ni Jesus sa Jerusalem. Miadto siya sa Damasco aron lutoson ang mga tinun-an didto. Apan niadtong higayona siya mismo nagwali nga kadtong tinamay nga tagsala nga gilansang tungod sa pagpasipala mao ang Mesiyas! Nabuang na ba si Saulo?—Buhat 9:1, 2, 20-22.

Tingali adunay usa ka katin-awan. Ang ubang nagbiyahe gikan sa Jerusalem nga kauban ni Saulo sa panon sa mga magpapanaw tingali naghisgot kon unsay nahitabo sa dalan. Sa dihang sila nagsingabot na sa Damasco, ang sanag nga kahayag kalit nga mikidlap sa ilang palibot, ug silang tanan nangatumba. May nadunggan usab nga tingog. Walay nasakitan gawas lamang kang Saulo. Nahilukapa siya sa yuta. Sa dihang sa kataposan siya mibangon, ang ubang mga magpapanaw nag-agak kaniya paingon sa Damasco, tungod kay siya dili na makakita.—Buhat 9:3-8; 26:13, 14.

Usa ka Tigsupak Nahimong Tigdepensa

Unsay nahitabo kang Saulo sa dalan paingon sa Damasco? Naluya ba siya tungod sa dugay nga panaw o sa naglagiting nga kainit sa kaudtohon? Kay matinguhaon kaayo nga makakaplag ug mga katin-awan nga nahiuyon sa kinaiyahan, ang mga maduhaduhaon karon naghatag ug posibleng mga kahimtang lakip ang pagdeliryo, panghanduraw, grabe nga kadaot sa kaisipan nga natukbil sa gihasol nga tanlag ni Saulo, emosyonal nga kadaot, ug bisan ang ideya nga lagmit siya giatake sa patol.

Ang tinuod nga nahitabo mao nga si Jesu-Kristo nagpakita kang Saulo diha sa makapabuta nga kahayag, nga nagkombinsir kaniya nga Siya mao ang Mesiyas. Ang pipila ka dibuho bahin sa maong talagsaong hitabo nagpakita kang Saulo nga nahulog sa kabayo. Bisan pag kana posible, ang Bibliya nag-ingon lang nga siya “natumba sa yuta.” (Buhat 22:6-11) Ang bisan unsang pisikal nga pagkahulog nga nasinati ni Saulo dili kaayo makauulaw kon itandi sa iyang pagkahulog gikan sa iyang madungganong posisyon. Kinahanglang ilhon niya niadtong higayona nga tinuod ang giwali sa mga sumusunod ni Jesus. Ang angay lang nga buhaton ni Saulo mao ang pagduyog kanila. Gikan sa isog nga tigsupak sa mensahe ni Jesus, si Saulo nahimong labing hugot nga tigdepensa niini. Human mahibalik ang iyang panan-aw ug magpabawtismo, “si Saulo padayong nakabatog dugang pa nga gahom ug nagpakutaw sa hunahuna sa mga Hudiyo nga nagpuyo sa Damasco samtang gipamatud-an niya sa makataronganong paagi nga kini mao ang Kristo.”—Buhat 9:22.

Napakyas ang Sabotsabot sa Pagpatay Kang Saulo

Diin moadto si Saulo, nga sa ulahi ginganlag Pablo, human sa iyang pagkakombertir? Sa dihang nagsulat ngadto sa mga taga-Galacia, siya miingon: “Miadto ako sa Arabia, ug ako mibalik pag-usab sa Damasco.” (Galacia 1:17) Ang terminong “Arabia” ikapadapat sa usa ka pagpanaw ngadto sa bisan unsang bahin sa Arabianhong Peninsula. Ang pipila ka eskolar nag-ingon nga si Pablo tingali miadto sa Desyerto sa Sirya o  sa laing dapit sa gingharian ni Aretas IV sa Nabataea. Lagmit kaayo nga si Saulo miadto sa usa ka hilom nga dapit aron magpalandong human sa iyang bawtismo, sama nga si Jesus miadto sa kamingawan human sa iyang bawtismo.—Lucas 4:1.

Sa pagbalik ni Saulo sa Damasco, “ang mga Hudiyo nagsabot sa pagpatay kaniya.” (Buhat 9:23) Ang gobernador nga nagsilbing hawas ni Haring Aretas sa Damasco nagbantay sa siyudad aron dakpon si Saulo. (2 Corinto 11:32) Apan samtang ang mga kaaway nagsabot sa pagpatay kang Saulo, ang mga tinun-an ni Jesus nagplano sa iyang pag-ikyas.

Apil sa mga mitabang kang Saulo aron makaikyas mao si Ananias ug ang mga tinun-an nga gikauban sa apostol human gayod sa iyang pagkakombertir. a (Buhat 9:17-19) Ang pipila nga nahimong mga magtutuo tungod sa pagwali ni Saulo sa Damasco tingali mitabang usab, kay ang Buhat 9:25 nag-ingon: “Gikuha siya sa iyang mga tinun-an ug gikanaog siya sa pagkagabii agi sa usa ka gawang sa paril, nga nagtunton kaniya sa usa ka bukag.” Ang mga pulong “iyang mga tinun-an” mahimong nagpasabot sa mga tawo nga natudloan ni Saulo. Sa bisan unsang kahimtang, ang kalamposan sa iyang ministeryo lagmit nakapasamot sa pagkamabatokon nga gibati na batok kaniya.

Usa ka Pagtulon-an nga Makat-onan

Sa dihang atong susihon ang pipila ka hitabo maylabot sa pagkakombertir ug pagkabawtismo ni Saulo, tin-aw natong masabtan nga siya dili kaayo mabalak-on kon unsay paghukom kaniya sa uban; ni siya mihunong tungod sa grabeng pagsupak. Ang labing bililhon alang kang Saulo mao ang buluhatong pagwali nga iyang nadawat.—Buhat 22:14, 15.

Ikaw ba dili pa dugay nakombinsir sa kahinungdanon sa pagwali sa maayong balita? Kon mao, ikaw nahibalo nga ang tanang matuod nga mga Kristohanon kinahanglang mahimong mga magwawali sa Gingharian. Dili ka angayng matingala kon ang imong ministeryo usahay makapukaw sa pagkamabatokon. (Mateo 24:9; Lucas 21:12; 1 Pedro 2:20) Ang sanong ni Saulo sa pagsupak maoy sulondan. Makabaton sa pag-uyon sa Diyos ang mga Kristohanon nga moantos sa mga pagsulay ug dili mohunong. Giingnan ni Jesus ang iyang mga tinun-an: “Kamo pagadumtan sa tanang kanasoran tungod sa akong ngalan.” Bisan pa niana, siya nagpasalig kanila: “Pinaagi sa paglahutay sa inyong bahin mabatonan ninyo ang inyong mga kalag.”—Lucas 21:17-19.

[Footnote]

[Hulagway sa panid 28]

Si Saulo “natumba sa yuta” sa dihang si Jesus nagpakita kaniya

[Hulagway sa panid 29]

Nakaikyas si Saulo sa usa ka sabotsabot sa pagpatay kaniya sa Damasco