Internasyonal nga mga Kombensiyon sa 2003

SA Sabado, Oktubre 6, 2001, ang tinuig nga tigom sa mga membro sa Watch Tower Bible and Tract Society of Pennsylvania gipahigayon sa Jersey City, New Jersey, T.B.A. Human sa maong tigom, usa ka espesyal nga programa ang napahimuslan sa mga membro ug sa ilang mga bisita. Pagkasunod adlaw, diha sa dugang mga tigom nga gihimo sa upat ka siyudad sa Canada ug sa Tinipong Bansa, ang mga membro sa Nagamandong Lawas sa mga Saksi ni Jehova nagpahibalo sa mosunod human sa ilang pangataposang pakigpulong:

“Samtang molantaw kita sa umaabot, hinungdanon kaayo nga dili talikdan sa tanang katawhan sa Diyos ang ilang panagkatigom. Si apostol Pablo nagtambag nga kini, duyog sa pagdinasigay sa usag usa, ilabina gayong pagahimoon samtang atong makita nga ang dako ug makalilisang nga adlaw ni Jehova nagkaduol na. (Hebreohanon 10:24, 25) Kaharmonya niining Kasulatanhong sugo, kita naglaom nga dunay distritong mga kombensiyon sa tanang dapit sa kalibotan sa sunod tuig [2002]. Dayon sa tuig 2003, kon kabubut-on man ni Jehova, tingali posibleng ipahigayon ang espesyal nga internasyonal nga mga kombensiyon diha sa pipila ka rehiyon sa kalibotan. Karon na ang panahon nga magtukaw ug pabiling magbantay, nga nagaila kon sa unsang paagi naugmad ang mga panghitabo sa kalibotan.”

Bisan pa sa grabeng kawalay-kasegurohan ug mga tensiyon samtang talitapos na kining presenteng sistema, ang kalihokan sa katawhan sa Diyos kinahanglang magpadayon. Ang maayong balita sa Gingharian, nga naglakip sa pasidaang mensahe sa Bibliya, kinahanglang ipahayag sa matag nasod, tribo, pinulongan, ug katawhan, nga mag-awhag kanila nga ‘kahadlokan ang Diyos ug ihatag kaniya ang himaya tungod kay ang takna sa iyang paghukom labi pang nagkaduol.’ (Pinadayag 14:6, 7) Busa, sumala sa kabubut-on ug gikahimut-an pag-ayo sa atong langitnong Amahan, ginaplano ang internasyonal nga mga kombensiyon sa nagkalainlaing mga rehiyon sa kalibotan alang sa tuig 2003.

Una, ang maong mga panagkatigom tentatibong gieskedyul alang sa pipila ka siyudad sa Amerika del Norte ug di madugay human niana sa Uropa. Sa ulahing bahin sa 2003, himoon ang mga kahikayan alang sa mga grupo sa mga delegado nga mobiyahe ngadto sa pipila ka siyudad sa Asia; ug sa maghinapos ang tuig, dugang mga grupo ang mangadto sa Aprika, Amerika del Sur, ug sa dapit sa Pasipiko. Ang pipila ka sanga hangyoon nga magpadalag limitadong gidaghanon sa mga delegado ngadto sa tinong mga dapit sa kombensiyon, busa dili posible nga imbitahon ang tanan sa pagtambong. Hinunoa, makapadasig ang pagbaton ug limitadong mga delegasyon nga maghawas sa nagkalainlaing mga nasod sa matag dapit.

Sa dili madugay ang mga kongregasyon sa mga Saksi ni Jehova makadawat ug impormasyon maylabot niining mga tigoma. Ang mga impormasyon bahin sa eksaktong mga petsa ug espesipikong mga siyudad diin mahimong motambong ang dinapit nga mga delegado ipahibalo ra unya sa ilang tagsatagsa ka sangang buhatan. Busa, gihangyo kamo nga dili mosulat o magpakisayod maylabot niining mga butanga sa pagkakaron.

Ang pagapilion sa ulahi ingong mga delegado mao lamang kadtong dedikado ug bawtismado nga mga Saksi nga maoy maayong mga panig-ingnan ug magpakitag inigsoong pagbati sa lokal nga mga igsoon. Sa baylo, kini sila makabaton ug maayong mga kahigayonan sa pagpakita ngadto sa mga bisita ug mahigugmaong pag-abiabi ug tiunayng pagkamaabiabihon. (Hebreohanon 13:1, 2) Kini moresulta sa “pagdinasigay.” (Roma 1:11, 12) Ang dugang mga detalye bahin niining mga kahikayana ipahibalo ra unya sa mga sanga nga gidapit sa pagpadala ug mga delegado ngadto sa partikular nga nasod o mga nasod.

Ang tulo ka adlaw nga mga kombensiyon alang sa tuig 2003 pagahikayon diha sa kadaghanang mga nasod sama sa naandan. Pinaagi sa pagtambong niini, ang tanan makabaton ug kahigayonan sa ‘pagpamati, pagkat-on, ug madasig.’ (Deuteronomio 31:12; 1 Corinto 14:31) Makahatag kinig kahigayonan sa tanang katawhan sa Diyos sa ‘pagtilaw ug pagtan-aw nga si Jehova maayo.’ (Salmo 34:8) Diha sa tanang internasyonal nga mga kombensiyon, maingon man sa daghang distritong mga kombensiyon, motambong ang mga misyonaryo, nga ang pipila kanila dunay bahin sa programa.

Niining tuiga, mapahimuslan nato ang “Masibotong mga Magmamantala sa Gingharian” nga Distritong mga Kombensiyon, nga magpalihok kanato sa paghatag ug mas dakong pagpamatuod. Samtang buhaton nato kini, tinong mosamot ang atong kahinam alang sa giandam ni Jehova sa umaabot nga tuig. Motabang kini kanato nga ‘padayong magbantay, magtukaw, ug pamatud-an ang atong kaugalingon nga andam’ tungod niining makuyaw ug hinungdanong mga panahon.—Mateo 24:42-44.