Unsa ang Palaaboton sa Propesyon sa Pagpanambal?

ANG pangutana bahin sa palaaboton sa mga doktor sagad moresulta sa paghunahuna bahin sa mga kauswagan sa teknolohiya ug kon kini ba magpahigawas na sa mga doktor sa ordinaryong mga buluhaton aron mas daghan na silag panahon nga igugol sa matag pasyente. Siyempre, ang palaaboton sa mga doktor dakog koneksiyon sa mas malangkobong isyu bahin sa palaaboton sa katawhan. Duha ka basahon sa Bibliya nga naghatag ug impormasyon bahin sa maong palaaboton nag-asoy sa kasaysayan ni Jesus ug sa iyang mga apostoles. Kining duha ka basahon gisulat sa usa ka doktor.

Nganong makapaikag man kaayo nga masayran ang panglantaw sa usa ka doktor bahin nianang maong mga kasaysayan? Unsa may labot niana sa palaaboton sa mga doktor ug mga pasyente? Nganong naglaom man ang ubang mga doktor nga moabot ang panahon nga dili na gikinahanglan ang ilang propesyon?

Daghang doktor ang maayong maniid sa mga butang. Si Lucas, nga gitawag nga “hinigugmang mananambal,” mao ang magsusulat sa duha ka basahon sa Bibliya, ug detalyado niyang gisaysay ang bahin sa pipila ka mga tawong masakiton nga giayo ni Jesus ug sa mga apostoles usab. (Colosas 4:14) Sa ingon, si Lucas makatabang kanato sa pagpalandong niining mga pangutanaha: Nahitabo ba gayod kini? Ug kon mao, unsay kahulogan niini alang sa mga doktor ug mga pasyente karon?

Medikal nga Pamatuod Gisusi

May kahigayonan si Lucas nga pamatud-an kon milagro ba gayod ang maong mga pagpang-ayo pinaagi sa pagpangutana sa mga nakasaksi. Dugang pa, miadto siya sa daghang dapit uban kang apostol Pablo. Dayag nga anaa si Lucas samtang giayo ni Pablo ang ubay-ubayng mga tawo. Samtang atong tukion ang mga asoy ni Lucas bahin sa duha ka pagpang-ayo, matikdi kon unsa ka daghang detalye ang iyang gihisgotan.

Gihatag ni Lucas ang takna, adlaw, ug dapit sa mosunod nga panghitabo: Tungang gabii kadto sa unang adlaw sa semana, ug usa ka grupo sa mga  Kristohanon anaa sa ikatulong andana nga lawak sa Troas, sa Romanhong probinsiya sa Asia. (Buhat 20:4-8) Atong mabasa ang mga detalye: “Usa ka batan-ong lalaki nga ginganlag Eutiko ang nahikatulog pag-ayo samtang si Pablo nagpadayon sa pagsulti, ug, kay gidaog gayod sa katulogon, siya nahulog gikan sa ikatulong andana ug gialsa nga patay na.” Dayon pinaagi sa gahom sa Diyos, giayo ni Pablo ang mga samad sa batan-ong lalaki ug gibanhaw siya. Human mangaon, “ilang gidala ang batang lalaki nga buhi ug dili masukod ang ilang kalipay.”​—Buhat 20:9-12.

Si Lucas mitaho nga kauban usab siya ni Pablo sa Malta. Giabiabi sila ni Publio, “ang punoan” sa maong pulo, sa dihang mihimog laing milagro si Pablo. Kini naglangkit sa usa ka tawo nga ang kahimtang ikaingong makamatay niadtong panahon nga wala pay modernong mga antibiotiko. Si Lucas miasoy: “Ang amahan ni Publio naghigda nga nag-antos sa hilanat ug pagkalibag dugo, ug si Pablo miadto kaniya ug nag-ampo, mitapion sa iyang mga kamot kaniya ug giayo siya. Human kini nahitabo, ang ubang mga tawo sa pulo nga may mga sakit nangadto usab kaniya ug nangaayo.”​—Buhat 28:7-9.

Unsay Nakapakombinsir sa Mananambal?

Gisulat ni Lucas ang maong mga asoy diha sa basahon sa Mga Buhat niadtong panahon nga mahimo pang pamatud-an sa mga mobasa niini ang maong mga impormasyon pinaagi sa pagpakigsulti sa mga tawong giayo ug nakasaksi niini. Bahin sa iyang mga sinulat diha  sa basahon sa Bibliya nga ginganlan sa iyang ngalan, si Lucas misulat: “Nasubay ko uban ang katukma ang tanang butang gikan sa sinugdan . . . aron bug-os mong mahibaloan ang pagkatino sa mga butang.” (Lucas 1:​3, 4) Ang nakita ug napanukiduki niini nga mananambal nakapakombinsir kaniya nga tinuod ang mga pagtulon-an ni Jesus. Ang milagrosong mga pagpang-ayo maoy bahin niana nga mga pagtulon-an, nga naghatag ug basehanan sa pagtuo sa tagna sa Bibliya nga sa ngadtongadto ang sakit wad-on na sa Diyos. (Isaias 35:​5, 6) Ingong usa ka doktor nga naanad na nga makakitag nag-antos, tino nga nadasig gayod si Lucas sa paghanduraw sa panahon sa dihang dili na gikinahanglan ang iyang propesyon. Sa imong hunahuna maanindot ba kini nga paglaom?

Makaiikag, mao kini ang paglaom nga nagpaabot sa mga nahigugma sa Diyos, bisag asa pa sila nagpuyo sa yuta. Ang Bibliya nagsaad nga ilalom sa Gingharian sa Diyos, “walay pumoluyo nga moingon: ‘Ako masakiton.’” (Isaias 33:24) Daghang doktor karon ang nakahinapos nga dunay makataronganong basehanan ang pagtuo sa mga saad sa Bibliya.

‘Makapadani Kaayo Kini Kanako’

“Sama sa kadaghanang tawo, mieskuyla ako sa pagka-doktor aron makatabang sa mga tawong nag-antos sa sakit,” matod pa ni Dr. Jon Schiller, usa ka doktor sa Amerika del Norte. “Makapadani kaayo kanako ang paglaom bahin sa usa ka kalibotan nga wala nay sakit. Nagsugod ako sa pagtambong sa mga tigom sa mga Saksi ni Jehova human makakuhag kurso sa kolehiyo bahin sa kasaysayan sa sibilisasyon sa Kasadpan. Nasayran nako sa maong kurso nga ang mga relihiyon maoy hinungdan sa daghang problema, ug nasabtan nako nga daw gigamit usab nila ang Bibliya sa salingkapaw nga paagi. Busa naglibog ako, ‘Unsa ba gayoy tinuod nga giingon sa Bibliya?’

 “Sa Kingdom Hall sa mga Saksi ni Jehova, ang unang nakadani kanako mao ang mahigalaong mga tawo, nga lahi kay sa daghan nakong mga kaila. Usa ka Saksi ang miduol kanako ug mitanyag sa pagduaw kanako aron hisgotan ang Bibliya. Nakadayeg gayod ako tungod kay bisag unsay akong pangutana, iyang gipakita kanako ang tubag diha sa Bibliya.

“Sa nagkaedaran ako, mas napabilhan nako ang pagkahimong Saksi ni Jehova. Sa dihang magsugod ka ingong usa ka batan-ong doktor, naglaom ka nga aduna kay mahimong butang nga mapuslanon. Apan kanunay akong makahimamat ug mga tawong nahigawad kay mibati nga wala gayod silay dakong nahimo. Sa akong hunahuna ang usa sa labing hinungdanong mga butang bahin sa pagkahimong Saksi ni Jehova mao nga kami dunay paglaom sa umaabot ug dunay kahulogan ang kinabuhi. Doktor man kami, mekaniko, o dyanitor, kami nahibalo nga mapuslanon gayod ang among ginahimo sa pag-alagad sa Diyos; ang among ginahimo maoy para kang Jehova. Ug kana nakahatag kanamo ug katagbawan.”

“Miuswag ang Among Pamilya Tungod sa Pagpadapat sa mga Prinsipyo sa Bibliya”

Si Dr. Krister Renvall maoy usa ka doktor sa Pinlandia, ug ganahan kaayo siya nga makig-estorya sa mga bata. “Usa ka adlaw niana akong gikaestorya ang usa ka 12-anyos nga batang babaye nga gitagalan na ang kinabuhi tungod sa kanser,” siya miingon. “Iya kong gihatagan sa librong may ulohang Matuod nga Kalinaw ug Kasegurohan​—Asa Gikan? * Nakadayeg gayod ako sa iyang mga pahayag sa pagtuo bisan pag gitagalan na ang iyang kinabuhi, apan wala koy higayon sa pagbasa sa maong libro. Sa pagkatinuod, nianang panahona puliki kaayo ako sa akong trabaho sa usa ka klinika sa Helsinki nga nakahatag kinig dili maayong epekto sa akong pamilya.

“Apan, sa ulahi gikuha sa akong asawa ang libro gikan sa estante ug gibasa kini. Nakombinsir dayon siya nga ang iyang gibasa mao ang kamatuoran. Giduaw siya sa usa ka Saksi ni Jehova ug gisugdan ang pagtuon sa Bibliya uban kaniya. Sa primero medyo mahadlok pa ang akong asawa sa pagsulti kanako bahin niini. Apan sa dihang gisultihan ko niya, ako miingon, ‘Dili daotan ang bisan unsa nga makatabang sa atong pamilya.’ Nagsugod ako sa pag-apil sa pagtuon. Ang pagpadapat sa mga prinsipyo sa Bibliya nakapauswag sa among pamilya ug nakahatag kanamo ug bag-ong panglantaw sa kinabuhi. Nalipay ako sa pagkahibalo sa paglaom bahin sa usa ka kalibotan nga wala nay sakit; morag natural lang nga mao kanay katuyoan sa Diyos alang sa katawhan. Wala madugay, kami sa akong asawa, ug sa ulahi ang among tibuok pamilya, gibawtismohan. Ang batang babaye nga nakaestorya nako kaniadto namatay na, apan sa usa ka paagi, ang iyang pagtuo buhi gihapon.”

Nagkasamot ang kapit-os sa kinabuhi sa mga doktor niining atong kalibotan nga kusog nga nagakausab, busa dalayegon gayod ang ilang mga sakripisyo sa pagtabang sa mga masakiton. Apan ang kinadak-ang mga kausaban nga mag-apektar sa katawhan hapit nang mahitabo. Daghang doktor karon ang masaligong nagpaabot sa palaaboton nga gisaad sa Diyos​—usa ka kalibotan nga wala nay sakit! (Pinadayag 21:1-4) Kini maoy usa ka impormasyon nga takos tukion sa personal.

[Footnote]

[Kahon/Mga hulagway sa panid 10, 11]

“AKONG NAAMGOHAN NGA ADUNA DIAY KATUYOAN ANG KINABUHI”

“Sa dihang nag-atiman sa baldadong mga bata nga estudyante, akong namatikdan nga lahi gayod ang mga ginikanan nga Saksi ni Jehova. Morag mas nakasagubang sila sa mga suliran sa pag-atiman ug baldadong anak kon itandi sa ubang mga ginikanan sa samang kahimtang. Namatikdan usab nako nga mas edukado sila kay sa imong madahom sa mga tawong sama nilag mga trabaho. Nakadayeg ako sa ilang pagtuo. Ang akong pagtuo halos gidaot sa mga magtutudlo sa teoriya sa ebolusyon. Bisan pa niana, tungod sa akong pagtuon sa medisina, naikag ako sa pagkakahibulongan sa kinabuhi.

“Sa samang higayon, naamgohan nako nga wala koy kalibotan kon unsaon pagmatuto ang akong mga anak. Unsay akong idili? Unsay akong idasig? Unsay akong ikatudlo kanila ingong katuyoan sa kinabuhi? Ang akong kinabuhi mismo nawad-an nag kahulogan. Miampo pa gani ako alang sa tabang.

“Mao kadtong higayona nga gidad-an ako sa mga Saksi ni Jehova ug magasin nga naghisgot kon unsaon pagtul-id ug pagbadlong sa mga bata sa mahigugmaong paagi. Akong nakita nga mapuslanon kaayo ang mga prinsipyo sa Bibliya nga gipatin-aw diha niana, busa gidawat nako ang ilang tanyag sa pagtuon sa Bibliya. Sa dihang akong nakat-onan kon nganong gilalang ni Jehova ang kinabuhi ug kon nganong namatay si Jesus, akong naamgohan nga aduna diay katuyoan ang kinabuhi. (Juan 3:16; Roma 5:​12, 18, 19) Natuis sa ebolusyon ang akong hunahuna. Nahupay kaayo ako sa dihang akong nasayran nga ang sakit ug kamatayon dili diay bahin sa orihinal nga katuyoan sa Diyos! Gibati gihapon nako karon ang tinuod nga katagbawan sa pagtudlo sa sinserong mga tawo kon sa unsang paagi ayohon sa Diyos ang tanang sakit sa dili madugay.”

[Mga hulagway]

Si Helena Bouwhuis nagtrabaho ingong usa ka doktor sa mga batang estudyante sa Netherlands

[Hulagway sa panid 9]

Ang mananambal ug magsusulat sa Bibliya nga si Lucas maoy kauban ni Pablo sa pagbiyahe sa dihang giayo sa apostol ang amahan ni Publio ug gibanhaw si Eutiko

[Hulagway sa panid 10]

Si Dr. Jon Schiller, sa Tinipong Bansa

[Hulagway sa panid 10]

Si Dr. Krister Renvall, sa Pinlandia