Maluwas pa ang Planetang Yuta!

GITIN-AW sa nag-unang mga artikulo nga ang tawo dili mahimong magpadayon sa paggamit sa mga kahinguhaan sa yuta sumala sa presenteng gikusgon. Tinuod, ang mga lider sa kalibotan nakahimog dalayegong mga paningkamot sa pagpakunhod sa polusyon, pagpuril sa kalasangan, ug uban pang  mga suliran labot sa kalikopan. Sugod sa Conference on Human Environment sa HK sa 1972, ug gisundan sa uban pang mga komperensiya matag karon ug unya, mikabat ug 163 ka nasod ang nagkatigom aron ipahayag ang ilang pagpaluyo sa maong giplanong mga aksiyon. Apan unsa nay resulta? “Ikasubo, kining daghang kasabotan, giplanong mga aksiyon, ug uban pang mga pamaagi wala makapausab sa nagakadaot nga kalikopan sa tibuok kalibotan,” nag-ingon si David Hunter, ehekutibong direktor sa Center for International Environmental Law. Gani, si Hunter midugang, “mas grabe ang kadaot karon sa halos tanang dagkong timailhan sa kalikopan kon itandi sa kadaot nga nahitabo panahon sa 1992 nga Komperensiya sa HK.”

Nganong diyutay lamang ug pag-uswag human molabay ang kapin sa 30 ka tuig nga pagpaningkamot sa pagsulbad sa mga suliran labot sa kalikopan? Ang usa ka rason mao ang panginahanglan sa pagpauswag sa ekonomiya. Ang ekonomiya sa mga nasod nagdepende sa paggasto sa konsumedor. Kana nagkinahanglan ug mga negosyo nga mohimog mga produkto, ug ang maong mga negosyo, sa baylo, mogamit ug kinaiyanhong mga materyales. Kini mopatungha ug sunodsunod nga problema nga sa ngadtongadto makadaot sa kalikopan. Nan, unsay solusyon?

Sayop nga mga Lakang

Gipatin-aw sa Bibliya kon nganong ang mga paningkamot sa tawo sa paggahom sa iyang kaugalingon wala gayod molampos. Ang manalagna nga si Jeremias nag-ingon: “Ako nahibalo pag-ayo, Oh Jehova, nga dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Tinuod gayod kanang mga pulonga!

Nakaadto ka na bag usa ka hardin o parke? Mahimuot gayod kitang magtan-aw sa matahom nga nagkadaiyang mga kahoy, kahoykahoy, ug mga bulak! Apan, ang maayong-pagkaatiman nga hardin wala lamang motungha sa kaugalingon. Ang batid nga mga hardinero naggugol ug daghang oras sa pagpul-ong sa mga kahoy, pag-areglar sa mga lagwerta, ug pag-atiman sa mga tanaman aron nindot kining tan-awon. Handurawa lang kon unsa ka nindot ang atong yutang puloy-anan kon ang tibuok globo atimanon sama sa mahigugmaong pag-atiman sa usa ka hardin.

Sa pagkatinuod, katuyoan sa atong Maglalalang nga ang atong planeta atimanon nianang paagiha. Sumala sa asoy sa paglalang diha sa inspiradong Pulong sa Diyos, “si Jehova nga Diyos nagkuha sa tawo ug nagpahiluna kaniya sa tanaman sa Eden aron sa pagtikad niini ug sa pag-atiman niini.” (Genesis 2:15) Gawas pa, ang tawhanong pamilya gisugo dili lamang sa pag-atiman sa Eden kondili sa pagpalapad sa orihinal nga Paraiso hangtod molukop kini sa tibuok yuta.​—Genesis 1:28.

Ikasubo nga tungod sa pagsupak nila ni Adan ug Eva sila nahimong dili-hingpit ug nawad-ag kahigayonan sa pag-atiman ug pagpalapad sa mga utlanan sa Paraiso. (Genesis 3:1-6, 23) Ingong mga kaliwat sa unang tawhanong magtiayon, kita nakapanunod sa ilang sala ug pagkadili-hingpit. (Roma 5:12) Ang sayop nga pagdumala sa kinaiyanhong mga kahinguhaan sa yuta maoy usa lamang ka pananglitan sa sayop nga mga paningkamot sa tawo sa pagmando sa iyang kaugalingon. Dayag nga ang mga tawo walay katakos sa pagsulbad sa ilang mga suliran. Gikinahanglan gayod ang tabang nga dili gikan sa mga tawo.

Ang Dalan Padulong sa Pagkaayo

Samtang dinhi sa yuta, gitudloan ni Jesus ang iyang mga tinun-an sa pag-ampo: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.” (Mateo 6:10) Ang Bibliya nagtudlo nga ilalom sa langitnong Gingharian sa Diyos, ang yuta mahibalik sa paraisonhong kahimtang. (Salmo 37:​10, 11) Nianang panahona ang mga kahoy ug mga tanom molambo gayod diha sa hinlo nga kalikopan. (Salmo 72:16) Ubos sa pagdumala sa Diyos wagtangon usab ang polusyon sa yuta, ug ang katawhan makakat-on sa pagkinabuhi nga bug-os kaharmonya sa kalikopan. Sa unsang paagi makaseguro kita niana?

Ang Bibliya nag-ingon nga ang yuta “dili matarog hangtod sa panahong walay tino, o hangtod sa kahangtoran.” (Salmo 104:5) Sa gitakdang panahon sa Diyos, ang tanang buhi makatagamtam sa walay-kataposang mga panalangin, lakip na sa himsog nga panglawas, dagayang pagkaon, ug maayong mga balay. Gusto ba nimong makakat-on pag dugang bahin sa mga katuyoan sa Diyos? Pakigsulti kang bisan kinsang Saksi ni Jehova. Malipay sila sa pagtabang kanimo nga makasabot gikan sa Bibliya kon sa unsang paagi maluwas​—ug pagaluwason​—ang atong planetang Yuta!

[Mga hulagway sa panid 10]

Ubos sa pagdumala sa Diyos, ang katawhan makakat-on sa pagkinabuhi nga bug-os kaharmonya sa kalikopan

[Credit Line]

Girl and farmer: © Jeremy Horner/Panos Pictures