May usa ka tawo didto sa Uz nga nagsimba kang Jehova. Siya si Job. Dato kaayo siya ug daghag anak. Maayo siyang tawo, ug gitabangan niya ang mga pobre, biyuda, ug mga bata nga walay ginikanan. Pero wala na ba siyay problema kay gibuhat niya kon unsay husto?

Wala kabalo si Job nga nagtan-aw niya si Satanas nga Yawa. Si Jehova miingon kang Satanas: ‘Nakita ba nimo ang akong alagad nga si Job? Walay pareho niya sa yuta. Matarong siya ug matinumanon.’ Mitubag si Satanas: ‘Misunod si Job nimo kay imo man siyang gitabangan ug gipanalanginan. Gihatagan nimo siyag yuta ug mga hayop. Pero kon imo nang bawion, dili na gyod siya mosimba nimo.’ Si Jehova miingon: ‘Puwede nimong sulayan si Job. Ayaw lang siyag patya.’ Ngano kahang misugot si Jehova nga sulayan ni Satanas si Job? Kay segurado si Jehova nga si Job dili moundang sa pagsimba niya.

Gisulayan ni Satanas si Job. Una, nagpadala siyag mga tawong Sabeanhon aron kawaton ang mga baka ug asno ni Job. Dayon nasunog ang tanang karnero ni Job. Gikawat sab sa mga taga-Caldea ang iyang mga kamelyo ug gipatay ang mga nag-atiman niini. Dayon dihay grabe kaayong nahitabo. Dihang ang mga anak ni Job nagtapoktapok, nahugno ang balay ug namatay silang tanan. Naguol kaayo si Job, pero nagpadayon gihapon siya sa pagsimba kang Jehova.

Gusto ni Satanas nga mosamot ang pag-antos ni Job, busa iyang gipatuboan ug mga hubag ang tibuok lawas ni Job. Gisakitan pag-ayo si Job. Wala siya mahibalo kon nganong nahitabo kining  tanan. Pero nagpadayon gihapon siya sa pagsimba kang Jehova. Ang Diyos nakakita niining tanan, ug nalipay kaayo siya kang Job.

Dayon nagpadala si Satanas ug tulo ka tawo aron sulayan si Job. Giingnan nila siya: ‘Basig nakasala ka ug wala ka motug-an maong gisilotan ka sa Diyos.’ Si Job miingon: ‘Wala koy nahimong sala.’ Pero nagtuo siya nga ang Diyos maoy hinungdan sa iyang mga problema, ug iyang gibati nga dili husto ang gihimo sa Diyos kaniya.

Naminaw pag-ayo ang batan-ong si Elihu sa ilang estoryahanay. Dayon siya miingon: ‘Sayop ang tanan ninyong gisulti. Gamay ra kaayo ang atong nahibaloan kompara kang Jehova, ug dili gyod siya mobuhat ug daotan. Makita niya ang tanan ug iyang tabangan ang mga tawo sa ilang problema.’

Dayon si Jehova miingon kang Job: ‘Asa man ka dihang gihimo nako ang langit ug yuta? Nganong gikuwestiyon nimo ang akong hustisya? Sayop ang imong gipanulti kay wala ka mahibalo sa tinuod.’ Giangkon ni Job ang iyang sayop ug miingon: ‘Nasayop ko. Nakadungog ko bahin nimo, pero karon nakaila na gyod ko nimo. Mabuhat nimo ang tanan. Pasayloa ko sa akong nasulti.’

Pagkahuman sa pagsulay, gibalik ni Jehova ang maayong panglawas ni Job ug mas daghan pa ang iyang gihatag kang Job kay sa mga butang ni Job sa una. Nabuhi pag dugay si Job ug nagmalipayon siya. Gipanalanginan si Job kay mituman siya kang Jehova bisan sa lisod nga kahimtang. Sundogon ba nimo si Job nga mosimba kanunay kang Jehova bisag unsay mahitabo?