Giingnan ni Jehova si Moises: ‘Tungas sa bukid kay isulat nako sa lapad nga mga bato ang akong mga balaod ug ako ning ihatag nimo.’ Miadto si Moises sa bukid ug nagpabilin didto sulod sa 40 ka adlaw ug gabii. Naghulat siya samtang gisulat ni Jehova ang Napulo ka Sugo sa duha ka lapad nga bato ug gihatag kini kaniya.

Pero ang mga Israelinhon nagtuo nga dili na mobalik si Moises. Ilang giingnan si Aaron: ‘Gusto namog lider. Paghimog diyos para namo!’ Si Aaron miingon: ‘Ambi inyong mga bulawan.’ Iyang gitunaw ang bulawan ug gihimo kining estatuwa nga baka. Ang katawhan miingon: ‘Kini ang atong Diyos nga nagpagawas nato sa Ehipto!’ Ilang gisimba ang bulawang baka ug naglipaylipay sila. Husto ba ang ilang gihimo? Dili, kay misaad sila nga si Jehova lang ang ilang simbahon. Pero wala nila tumana ang ilang saad.

Nakita ni Jehova ang ilang gihimo, ug iyang giingnan si Moises: ‘Adtoa ang mga Israelinhon kay sila misupak  nako ug misimbag diyosdiyos.’ Busa nanaog si Moises sa bukid dala ang duha ka lapad nga bato.

Sa duol na si Moises, nakadungog siyag mga tawo nga nanganta. Dayon iyang nakita sila nga nanayaw ug nangyukbo sa baka. Puwerteng sukoa ni Moises. Iyang gibundak ang duha ka bato, ug nabuak kini. Dihadiha iyang gidugmok ang estatuwa ug gipangutana si Aaron: ‘Unsa may gipakaon niining mga tawhana nimo nga misunod man ka sa ilang gisulti?’ Si Aaron miingon: ‘Ayawg kasuko. Kabalo bitaw ka sa ilang kinaiya. Gusto nila nga dunay diyos, maong giitsa nako ang ilang bulawan sa kalayo ug nahimo kining estatuwang baka!’ Dili to angayng himoon ni Aaron. Mibalik si Moises sa bukid ug nagpakiluoy kang Jehova nga pasayloon ang katawhan.

Gipasaylo ni Jehova kadtong gustong mosunod niya. Nakita ba nimo kon nganong kinahanglang sundon sa mga Israelinhon ang ilang lider nga si Moises?