Hibrus 7:1-28
7 Melkisedek ya, hem i king blong Salem, mo hem i pris blong Hae God. Hem i faenem Ebraham long rod mo i blesem hem. Hemia long taem ya we Ebraham i go faet long ol king, i kilim olgeta i ded, nao i stap kambak.
2 Nao Ebraham i seraot* olgeta samting we hem i gat i go long ten hip, nao i givim wan hip i go long hem. Nem blong hem i minim “King Blong Stret Fasin,” mo tu hem i king blong Salem, we i minim “King Blong Pis.”
3 Hem i no gat papa mo mama, mo i no gat laen blong hem. Mo i no gat stori we i tokbaot taem we hem i bon, mo taem we hem i ded. Be hem i kam olsem Pikinini blong God, nao hem i wan pris blong olwe.*
4 !Yufala i luk, man ya i wan haeman ya! Ebraham we i hed blong famle, i seraot olgeta beswan samting we hem i winim long faet i go long ten hip, nao i givim wan hip long hem.
5 I tru, Loa i talem se ol pikinini blong Livae we oli pris, oli mas kasem taet we ol man oli givim, hemia ol brata blong olgeta, nating se olgeta oli kamaot long laen* blong Ebraham.
6 Be man ya we i no kamaot long laen blong Livae, hem i kasem taet long Ebraham, mo i blesem man ya we i gat promes blong God.
7 Nao i klia se man we i hae moa, hem i blesem man we i daon moa.
8 Ol Livaet oli kasem taet mo olgeta oli man nomo we oli save ded, be narafala man ya we i kasem taet, Baebol i talem se hem i laef.
9 Ebraham i givim taet, taswe yumi save talem se Livae we i stap kasem taet, hem tu i givim taet,
10 hemia from we hem i wan bubu blong Ebraham we i no bon yet,* taem Melkisedek i mitim Ebraham.
11 Plan ya se ol pris oli mas kamaot long laen blong Livae, hem i wan loa we God i givim long ol man Isrel. Sipos ol pris we oli kamaot long laen blong Livae oli naf blong mekem ol man oli kam stret gud olgeta, ?from wanem i nidim yet wan pris we i olsem Melkisedek, be i no olsem Eron?
12 Taem fasin blong jusumaot pris i jenis, be Loa tu i mas jenis.
13 Mo man ya we olgeta samting ya oli tokbaot hem, hem i kamaot long wan narafala laen, mo ol man long laen ya oli neva mekem wok long olta.
14 I klia se Masta blong yumi i kamaot long laen blong Juda, be Moses i no tokbaot nating se wan pris bambae i kamaot long laen ya.
15 Be naoia, samting ya i stap kam klia moa, from we i gat wan narafala pris we i olsem Melkisedek.
16 Hem i kam pris, i no from laen we Loa i talem, be from we hem i gat paoa ya we i givim laef long hem we i no save kam nogud.
17 Baebol i tokbaot hem i se: “Yu yu wan pris olsem Melkisedek, mo bambae yu pris oltaem gogo i no save finis.”
18 God i tekemaot loa ya we i stap fastaem, from we i no gat paoa, mo i no save givhan long yumi.
19 Loa i no save mekem evri samting we God i wantem. Be God i givim wan narafala hop we i moa gud. Hop ya i save mekem olgeta samting we God i wantem, mo i save mekem yumi kam klosap long God.
20 Taem God i putumap Jisas i kam pris, hem i mekem wan strong promes,
21 (i tru, i gat sam man we oli kam pris be God i no mekem wan strong promes long saed blong olgeta. Be i gat wan man nomo we God i mekem wan strong promes long saed blong hem, taem hem i talem se: “Jehova* i mekem strong promes finis, mo bambae hem i no jenisim tingting ya blong hem* se: ‘Bambae yu pris oltaem gogo i no save finis’”),
22 taswe Jisas i kam olsem wan pruf we i soemaot wan kontrak we i gud moa i bitim hemia blong bifo.
23 Mo tu, bifo ol pris oli stap ded, nao oli no save gohed long wok blong olgeta, from samting ya ol narafala oli mas tekem ples blong olgeta,
24 be pris ya i no save ded samtaem, taswe bambae i no gat narafala man i tekem ples blong hem.
25 Hem i naf gud blong sevem olgeta we oli prea long God long nem blong hem, from we hem i laef oltaem blong askem long God blong i givhan long olgeta.
26 I stret nomo blong yumi gat wan hae pris olsem we i holemstrong long God, i no gat rong, i klin, mo hem i defren long ol man we oli stap mekem sin, mo God i leftemap hem i hae moa i bitim heven.
27 Hem i no olsem ol narafala hae pris we oli mas mekem sakrefaes evri dei, fastaem from sin blong olgeta mo biaen from sin blong ol narafala man. Hem i givim sakrefaes wan taem nomo mo blong olwe, taem hem i givim hem wan olsem wan sakrefaes.
28 Loa i stap putumap ol man blong oli hae pris, be olgeta oli no gat paoa, oli save mekem sin. Be strong promes ya we i kam biaen long Loa, hem i putumap wan pikinini we hem i kam naf gud, mo bambae i stap olsem blong olwe.
Ol futnot
^ PT: “seraotem.”
^ NT: “wan pris gogo i no save finis.”
^ PT: “oli kamaot insaed long Ebraham.”
^ PT: “hem i stap insaed long Ebraham.”
^ Yu luk Diksonari.
^ NT: “bambae hem i no sore biaen.”
