Hibrus 3:1-19
3 Ol tabu brata, yufala tu God i singaot* yufala blong go long heven, taswe yufala i mas tingbaot Jisas ya we i aposol mo i hae pris we yumi stap talemaot se yumi bilif long hem.
2 Hem i folem gud ol tok blong God ya we i putumap hem long wok ya, stret olsem we Moses tu i mekem long haos blong God.
3 Be nem blong hem* i hae moa i bitim nem blong Moses, mo hemia i stret nomo from we man we i wokem haos, nem blong hem i hae moa i bitim haos ya.
4 Yes i tru, evri haos i gat man we i wokem, be God i wokem olgeta samting we i stap.
5 Moses i wan gudfala man blong wok long haos blong God. Wok blong hem i soemaot ol samting we God bambae i talemaot biaen,
6 be Kraes i lukaot gud long haos blong God mo hem i olsem wan pikinini we i folem gud ol tok blong papa blong hem. Sipos yumi gohed blong holem fasin ya we yumi no fraet blong toktok mo yumi holemtaet hop ya we yumi stap tokflas from, mo yumi mekem olsem go kasem en, yumi nao yumi haos blong Hem.
7 Taswe olsem tabu spirit i talem: “Tede sipos yufala i lesin long voes blong mi,*
8 yufala i no mas mekem stronghed olsem ol olfala blong yufala we oli mekem mi mi kros tumas, long taem ya we oli traem mi long draeples.
9 Nomata se ol olfala blong yufala oli luk ol samting we mi mekem blong foti yia, be oli gohed yet blong traem mi long draeples ya.
10 From samting ya, mi mi kros tumas long ol man we oli laef long taem ya, mo mi talem se: ‘Oltaem hat blong olgeta i gowe long mi, mo oli no save ol rod blong mi.’
11 Taswe mi kros tumas nao mi mekem strong promes ya se: ‘Bambae oli no kasem spel blong mi.’”
12 Ol brata, yufala i mas lukaot gud blong bambae i no gat wan long yufala we hat blong hem i stap kam nogud, nao hem i no moa bilif from we hem i gowe long God ya we i laef.
13 Be taem tok ya “Tede” i stap yet, yufala i mas gohed blong leftemap tingting blong yufala evri dei, blong mekem se sin we i gat paoa blong trikim man, i no mekem wan long yufala i kam stronghed.
14 Long stat finis yumi trastem fulwan se bambae yumi evriwan i kasem samting we Kraes bambae i kasem,* be yumi mas gohed blong mekem olsem gogo kasem en blong laef blong yumi.
15 Taswe olsem Baebol i talem: “Tede sipos yufala i lesin long voes blong mi,* yufala i no mas mekem stronghed olsem ol olfala blong yufala we oli mekem mi mi kros tumas.”
16 ?Be hu olgeta ya we oli harem tok blong God, nao oli girap, oli mekem hem i kros tumas? Hemia, olgeta evriwan ya we Moses i lidim olgeta oli kamaot long Ijip.
17 ?Mo hu olgeta ya we God i kros tumas long olgeta long foti yia? Hemia olgeta ya nomo we oli mekem sin, nao dedbodi blong olgeta i stap olbaot long draeples.
18 ?Mo hu olgeta ya we God i mekem strong promes long olgeta se bambae oli no kasem spel blong hem? Hemia olgeta ya we oli no obei.
19 Taswe yumi luk se oli no save kasem spel ya from we oli no gat bilif.
Ol futnot
^ NT: “invaetem.”
^ Hemia Jisas.
^ PT: “hem.”
^ NT: “yumi evriwan i joen wetem Kraes blong kasem ol samting we bambae hem i kasem.”
^ PT: “hem.”
