• UMWAKA BAFYELWE: 1964

  • ICALO: ENGLAND

  • IFYO BAALI: BALI NI BACINTOMFWA KABILI BAPULILE IFUMO NINSHI BALI FYE ABAICE

INKULILO YANDI

Nafyalilwe mu Paddington, incende umwafula sana abantu iyaba ku London, mu England. Naleikala na bamayo na bakalamba bandi abanakashi batatu. Batata bali ni bacakolwa, e ico ilingi line baletubutuka.

Ilyo nali umwaice, bamayo balinsambilishe ukulapepa lyonse pa kulaala. Nalikwete na ka Baibolo akanono umwali fye ibuuku lya Amalumbo, kabili nalipangile inyimbo ukubomfya amashiwi nalebelenga. Ndebukisha amashiwi yamo ayo nabelengele mwi buuku limo ayaleti: “Bushiku bumo tukafwa.” Aya amashiwi yalimfufishe utulo ica kuti naletontonkanya fye pa fyo ifintu fikaba ku ntanshi. Natampile ukulatontonkanya nati, ‘Bushe ico twabela pano calo kulafwa fye? Cinshi nafyalilwe?’ Nshalefwaya ukufwa!

Nalitendeke ukufwaisha ukwishiba ifingi pa finjelengwe. Natampile ukwesha ukulanda na bafwa, ukulaya ku manda na banandi ba ku sukulu, no kulatamba amafilimu umuba ifiwa. Ukucita ifi kwaletutiinya, lelo twalemona kwati cali fye bwino.

Ilyo nali ne myaka 10 naishileba cintomfwa. Natendeke ukupeepa fwaka, kabili nalikunkwime. Pa numa natendeke ukupeepa ibange. Ilyo nalefisha imyaka 11, ninshi nalitampa ukunwa ubwalwa. Nangu ca kuti nshatemenwe ifyo bumfwika, naleumfwa bwino nga nakolwa. Nalitemenwe ne nyimbo no kucinda. Naleya sana ku maparte na mu fikuulwa fya kucindilamo no kunwa ubwalwa ubushiku. Ilingi nalefyuka ubushiku pa ng’anda kabili nalebwela lucelocelo ninshi tapalabuuta. Apo nalebuuka ninaka, ilingi line nshaleya ku sukulu kabili nga naya ku sukulu, nalitemenwe ukunwa ubwalwa mu kalasi.

Ilyo napwile isukulu, naliponene sana. Ici calengele bamayo beshibe ifyo nalecita kabili balifulilwe icine cine. Ilyo baishibe ifyo nalecita, twaleumana sana nabo ne ci calengele mbutuke pa ng’anda. Ilyo nabutwike pa ng’anda, natendeke ukwikala no mwaume uo naleenda nankwe Tony, uwali umuRasta. Tony aleba sana mu milandu kabili balimwikete pantu aleshitisha imiti yabindwa kabili aishibikwe ukuti ali no lubuli sana. Tapakokwele nalikwete ifumo ninshi ndi fye ne myaka 16, kabili nalikwete umwana umwaume.

IFYO BAIBOLO YAYALWILE UBUMI BWANDI

Pa muku wa kubalilapo ilyo nakumene ne Nte sha kwa Yehova, naleikala pa cikuulwa apo basungila banamayo abakwata  abana, lelo abashaupwa. Ubuteko bwalimpeeleko umuputule umo naleikala pali ici icikuulwa. Ba Nte babili abanakashi baleisa lyonse mu kulanshanya na bakashana bambi abaice abakwete abana. Bushiku bumo nalisangilweko uko balelanshanya ifya mu Baibolo. Nalefwaya ukubashinina ukuti ifyo balesambilisha fya bufi. Na lyo line, balyaswike amepusho yonse ayo nabepwishe mu mutekatima ukubomfya Baibolo. Nalitemenwe sana pa fyo baali ne cikuuku. E ico nalisumiine ukulasambilila Baibolo nabo.

Nalisambilile fimo muli Baibolo ifyayalwile ubumi bwandi. Ukutula ku bwaice naletiina ukufwa. Nomba nalisambilile ifyo Yesu alandile pa kubuushiwa. (Yohane 5:28, 29) Na kabili, nasambilile ukuti Lesa alimbikako amano. (1 Petro 5:7) Amashiwi yaba pali Yeremia 29:11 yalimfikile sana pa mutima, aya amashiwi yatila: “‘Pantu ninjishiba amatontonkanyo ayo ndetontonkanya pali imwe,’ e fyasosa Yehova, ‘amatontonkanyo ya mutende, te ya bubi iyo, aya kumupeela inshita ya ku ntanshi iisuma ne subilo.’” Natendeke ukutontonkanya ukuti na ine kuti naikala umuyayaya mu Paradaise pa calo.—Amalumbo 37:29.

Ifyo ba Nte balecita fyalelanga ukuti balintemenwe. Ilyo nalongene nabo pa muku wa kubalilapo, nalitemenwe sana kabili bonse bali ne nsansa. (Yohane 13:34, 35) Ifyo namwene ilyo naile mu kulongana fyalipusene sana ne fyo aba mu calici naleyako balecita. Ba Nte balimpokelele bwino te mulandu ne fyo nali. Balimbikileko amano kabili balengafwa sana. Naleumfwa kwati naba mu lupwa ulukalamba ulwantemwa sana.

Ifyo nalesambilila muli Baibolo fyalengele namona ukuti nalingile ukwaluka pa kuti ndecita ifyo Lesa afwaya. Calingafishe ukuleka ukupeepa fwaka. Na kabili nalimwene ukuti inyimbo shimo shalelenga ndefwaisha ukupeepa ibange, kanshi nalilekele ukukutika ku nyimbo sha musango uyo. Apo nalefwaisha no kuleka ukunwa ubwalwa, nalilekele ukuya ku maparte na ku fikuulwa banwena ubwalwa no kucinda ubushiku. Nalitendeke ukupanga ifibusa fimbi abaali ne mibele iisuma pa kuti bengangafwa ukuba ne mibele iisuma.—Amapinda 13:20.

Pali iyi inshita ninshi ba Tony nabo balitendeka ukusambilila Baibolo ne Nte sha kwa Yehova. Ifyo ba Nte baleyasuka amepusho balebepusha pa fya mu Baibolo, fyalengele nabo bashininkishe ukuti ifyo balebasambilisha fyali fya cine. Balyalwikwe sana ica kuti balilekele ukwangala na banabo abali abankalwe, balilekele ukupanga imilandu, kabili balilekele no kupeepa ibange. Pa kuti tulecita ifyo Lesa afwaya, twalimwene ukuti twalingile ukwalula imibele yesu no kucita ifingalenga umwana wesu akakule bwino. E ico mu 1982 twalyupene.

“Nalileka ukufufya utulo ukulatontonkanya pa fyo ifintu fikaba ku ntanshi nelyo pa mfwa”

Nalitendeke ukubelenga ifipande ifiba muli magazini ya Ulupungu lwa kwa Kalinda na Loleni! * ifilanda pa bantu abalekele ukucita ifyabipa ifyo na ine nalefwaya ukuleka. Ifyo abantu nalebelengapo bayalwike fyalinkoseleshe. Ifyo nalebelenga fyalilengele nakosapo ukuleka ukucita ifyabipa. Nalitwalilile ukupepa kuli Yehova ukuti akatwalilile ukungafwa. Mu July, mu 1982, ine na ba Tony twalibatishiwe no kuba Inte sha kwa Yehova.

IFYO NANONKELAMO

Ukuba cibusa wa kwa Yehova Lesa kwalilenga natwalilila ukuba uwa mweo. Ine na ba Tony twalimona ifyo Yehova atwafwa nga twaba na mafya. Twalisambilila ukulacetekela sana Lesa ilyo tuli na mafya, kabili tulamona ukuti Yehova lyonse alatwafwa mu lupwa lwesu.—Amalumbo 55:22.

Naletemwa sana ukusambilisha umwana wesu umwaume no mwanakashi pali Yehova. Ndatemwa nga namona uko abeshikulu bandi nabo balesambilila pali Lesa.

Nalileka ukufufya utulo ukulatontonkanya pa fyo ifintu fikaba ku ntanshi nelyo pa mfwa. Cila mulungu, ine na ba Tony tulabombesha ukukoselesha aba mu filonganino fyalekanalekana ifya Inte sha kwa Yehova. Tulabombela pamo na ba mu filonganino ukusambilisha abantu ukuti nga bacetekela muli Yesu, nabo kuti baisaikala umuyayaya.

^ para. 17 Abalemba iyi magazini ni Nte sha kwa Yehova.