UBUMI BWABO
Ba Jairo Babomfya fye Amenso pa Kubombela Lesa
Elenganyeni ukuti ifilundwa fyonse ifya mubili wenu tafibomba, amenso fye e yabomba. Ifi fine e fyaba abakalamba bandi ba Jairo, lelo baliba ne nsansa. Ilyo nshilalanda icalenga babe ne nsansa, lekeni imulondolweleko ifyo cali ilyo bafyelwe.
Ba Jairo bafyelwe no bulwele bwa kuli bongobongo ubo beta ati spastic quadriplegia. * Ici calenga ifilundwa fyabo ifya mubili filabomba. Pa mulandu wa kuti bongobongo taitwala amaka ku micincili, amolu na maboko tayabomba bwino kabili yalaselasela. Ici cilenga ukuti limo limo baleicena kabili balecena na bantu abekele mupepi nabo. Kanshi ilingi line amolu na maboko balayakakila ku ncinga ya kwendelapo abalemana pa kuti belaicena nangu ukucena abantu.
AMAFYA BA JAIRO BAKWETE ILYO BALI ABAICE
Ba Jairo balacula sana no bu bulwele. Ilyo bali ne myeshi itatu, balelwala sana ica kuti balefwa icipuupu. Ilingi line bamayo nga babatwala ku cipatala balemona fye kwati nabafwa.
Ubu bulwele bwalilenga amafupa yabo ukonaika. Ilyo ba Jairo bali ne myaka 16, amafupa ya mu nyumbi yalifyutwike ica kuti babatwele ku cipatala ku kuyabalepula. Ilyo babalepwile balelila fye lyonse ubushiku.
Ubulwele bwalilenga ba Jairo ukukanakwata amaka ya kuicitila ifintu. Te kuti bailiile, baifwike kabili te kuti baininine pa busanshi. Kanshi bamayo na batata e babomba iyi imilimo yonse. Apo batata na bamayo balaafwa sana ba Jairo, balabeba no kuti te muntu fye uwingabafwa lelo bafwile no kucetekela Lesa ukuti akulabafwa.
IFYO TWATENDEKE UKULANSHANYA
Abafyashi besu ni Nte sha kwa Yehova, kabili balabengelako ba Jairo amalyashi ya mu Baibolo ukutula fye ilyo bali abaice. Abafyashi besu balishiba ukuti, ukuba cibusa wa kwa Lesa e kulenga umuntu ukuba ne nsansa. Umubili wa ba Jairo walinaka sana, lelo balikwata isubilo lya kuti bakaba fye bwino. Abafyashi besu baletwishika nga ca kuti ba Jairo baleumfwa amalyashi ya mu Baibolo ayo balebabelengela.
Ilyo ba Jairo bali abaice, bushiku bumo batata babebele ati, “Jairo ndefwaya ukulanda na iwe,” kabili batile “nga walintemwa mwana wandi unjasuke!” Ilyo batata balandile ifi, ba Jairo balilukwishe ifilamba. Ba Jairo bale-esha ukulanda, lelo tafyaleumfwika. Batata balyumfwile ububi ifi balengele ba Jairo ukulila. Ifi ba Jairo balilile fyalangile ukuti balyumfwile ifyo batata balandile. Lelo ubwafya bakwete bwakukanalanda.
Tapakokwele, abafyashi besu balimwene ukuti ifyo ba Jairo balelolesha fyalelanga ukuti balomfwa kabili balafwaya no kulanda. Ba Jairo baleumfwa sana ububi pantu ilingi abantu tabaleumfwa nelyo ukwishiba ifyo balefwaya. Lelo ilyo ba Jairo baishibe ukuti abafyashi baleumfwa ifyo balelanda ukubomfya amenso, balemwentula ukulanga ukuti baletemwa ukuti balebomfwa.
Abasambilisha abashaishiba ukulanda bwino batwebele ukuti, pa kwipusha ba Jairo ifipusho ifilekabila ukwasuka ee nelyo iyo, tufwile ukulaimya amaboko mu muulu. Nga balolesha ukuboko kwa ku kulyo ninshi basumina, e lyo nga balolesha ukwa ku kuso ninshi bakaana. Kanshi ba Jairo nga balolekesha ku kwa kulyo ninshi basumina, e lyo nga balolekesha ku kwa kuso ninshi bakaana.
ICINTU ICACINDAMA ICO BA JAIRO BACITILE
Ba Nte balakwata ukulongana kukalamba imiku itatu mu mwaka, uko balanda amalyashi ya mu Baibolo ku bantu abengi sana. Lyonse ba Jairo baletemwa sana ukukutika ku lyashi lya lubatisho. Ilyo ba Jairo bali ne myaka 16, batata babepwishe ukuti, “Jairo, bushe ulafwaya ukubatishiwa?” Ba Jairo baloleshe ku kuboko kwa batata ukwa ku kulyo ukulangilila ukuti balafwaya ukubatishiwa. Batata babepwishe no kuti, “bushe walipepa kuli Lesa no kumweba ukuti wakulamubombela umuyayaya?” Ba Jairo na kabili baloleshe batata ku kuboko kwa ku kulyo. Ifi ba Jairo bacitile fyalangilile ukuti bali-ipela kale kuli Yehova.
Ifyo ba Jairo basambilile muli Baibolo fyalengele baishiba ukuti calicindama ku Mwina Kristu ukubatishiwa. Mu 2004, ilyo ba Jairo babepwishe nga ca kuti bali-ipeela ku kucita ukufwaya kwa kwa Lesa, pa kwasuka, baloleshe fye mu muulu. Ifi fine e fyo balecita pa kusumina ifyo babepusha. Ba Jairo balibatishiwe ilyo bali ne imyaka 17.
BABIKILE SANA AMANO KU FYA KWA LESA
Mu 2011, ba Jairo batendeke ukubomfya kompyuta pa kulanshanya na bantu. Kompyuta baipanga mu musango wa kuti nga batonta fye ilinso pe shiwi balefwaya, ninshi iciunda ca ilyo line ishiwi e calaumfwika ukufuma muli kopyunta. Kabili muli iyi kompyuta balibikamo ifikope na mashiwi ayalondolola ifyo fikope, pa kuti ba Jairo balelanda na bantu. Nga batonta ilinso pa cikope, kompyuta ilalanda amashiwi yalipo.
Ilyo ba Jairo batwalilile ukusambilila Baibolo, e lyo balefwaisha ukushimikilako abantu imbila insuma. Nga tuli pe sambililo lya Baibolo ilya lupwa balandolesha e lyo balolesha na pali kompyuta yabo. Nga bacita ifi ninshi balenjeba ukuti mfwile ukubalembelako ifyebo ifyo balefwaya ukuyalanda nga twaya mu kulongana.
Nga balefwaya ukwasukapo, balolesha fye pa fyebo babalembele pali kompyuta, kabili kompyuta ilalanda ifyo fyebo pa kuti bonse bomfwe. Ba Jairo balamwentula sana nga bayasukapo pantu baleshiba ukuti nabakoseleshako bambi mu cilonganino. Ba Alex, abanabo ba ba Jairo batile, “ndatemwa sana nga naumfwa Jairo ayasukapo nga tuli mu kulongana.”
Ba Jairo babomfya fye amenso na kompyuta pa kwasukapo pa kulongana e lyo na pa kushimikila abantu ifyo basuminamo.
Ba Jairo balashimikilako abantu imbila nsuma ukubomfya fye amenso yabo. Pa kushimikila balolesha fye pa cikope muli kompyuta icilanga inama na bantu bonse nabekala umutende. Nga baloleshapo, kompyuta ilalanda amashiwi yabapo aya kuti, “Baibolo itila icalo cikaba paradaise, kabili tamwakabe ukulwala nangu imfwa, Ukusokolola 21:4.” Nga ca kuti uo bashimikilako atemwa, balamwipusha ukubomfya kompyuta, nga kuti atemwa ukusambilila Baibolo. Icaweme ca kuti, bashikulu balisumine ukulasambilila Baibolo na ba Jairo. Pa kubasambilisha Baibolo, ba Jairo baleya na Nte, kabili mu August mu 2014, balibatishiwe pa kulongana kwa cintungu ukwabelele ku Madrid.
Ba kafundisha pa sukulu pa sambilila ba Jairo balishiba ukuti ba Jairo balitemwa sana ifya kwa Lesa. Ba Rosario, abasambilishako ba Jairo ifyakulanshanya na bantu batile: “Nga nkatontonkanyapo pa kutendeka ukupepa, ni ku Nte sha kwa Yehova fye e ko ningaya. Nalimona ukuti ifyo Jairo asambilila e fyalenga abe ne nsansa nangu ca kuti alilwalilila.”
Ba Jairo balatemwa sana nga nababelengela ubulayo bwa kwa Lesa ubwaba pali Esaya 35:6, apatila: “Uwalemana amolu akacilauka nge nsebula, kabili ululimi lwa kwa cibulu lukaula akapundu.” Nangu ca kuti limo limo balafuupulwa, baliba ne nsansa, pantu balitemwa Lesa kabili balikwata ne fibusa ifyatemwa Lesa. Ifyo baba aba nsansa ne fyo baba ne citetekelo icakosa filanga ukuti umuntu uubombela Yehova alaba ne nsansa nangu ifintu fyafye shani.
^ par. 5 Ubu ubulwele bwa kuli bongobongo bulwele ubulenga umuntu ukuleka ukwenda, kabili limo limo bulenga umuntu ukuba ne cipumputu, ukukaanafwaya ukulya nelyo ukulya sana, kabili bulalenga umuntu ukulafilwa ukulanda bwino. Ubu ubulwele bubi sana pantu bulenga amolu na mabako ukukanalabomba, e lyo no mukoshi ukuba uwanaka ica kuti umuntu lyonse akontamina fye panshi.
