‘Imilimo Yabo Naibakonka’

MUNYINEFWE Theodore Jaracz, uwali mwi Bumba Litungulula ilya Nte sha kwa Yehova, kabili uwakwete isubilo lya kuya ku muulu, afwile pali Citatu ulucelo pa 9 June, 2010. Ali ne myaka 84 kabili asha abakashi abo aikele nabo imyaka 53. Bambi balupwa abo ashile ni bankashi yakwe bamo e lyo na bepwa batatu, umwaume umo na banakashi babili.

Munyinefwe Jaracz afyelwe pa 28 September, mu 1925, mu Pike County, mu Kentucky, ku America. Ba Jaracz balangile ukuipeela kwabo kuli Yehova ilyo babatishiwe pa 10 August, mu 1941, ninshi bali ne myaka 15. Ilyo papitile imyaka ibili, batendeke ukubomba bupainiya bwa nshita yonse ninshi bali ne myaka 17. Kanshi babombele umulimo wa nshita yonse pa myaka 67.

Mu 1946, ilyo Munyinefwe Jaracz ali ne myaka 20, aile kwi Sukulu lya Gileadi kabili ali mwi kalasi lyalenga 7. Pa numa ya kupwisha ili isukulu, Munyinefwe Jaracz bamutumine ku Cleveland, mu Ohio, mu citungu caba mu United States umo ali kangalila enda. Mu 1951, bamutumine ukuya mu kwangalila umulimo pa maofeshi ya Nte sha kwa Yehova mu Australia. Muli Yearbook ya Nte sha kwa Yehova iya mu 1983 mwali lipoti yalandile pali Munyinefwe Jaracz ati: “Alikoseleshe sana bamunyinefwe mu Australia kuli filya abikile amano ku kucita ifya kwa Lesa mu muyano na kuli filya acincile mu mulimo wa kushimikila.”

Ilyo abwelelemo ku United States, Munyinefwe Jaracz aupile nkashi Melita Lasko pa 10 December, mu 1956. Ilyo baupene ba Jaracz ninshi bali mu mulimo wa kwenda, kanshi balibombeshe capamo na bena mwabo mu muputule na mu citungu kabili balyendele mu fifulo ifingi mu United States. Ku kupwa kwa 1974, ba Jaracz balibetile ukuba mwi Bumba Litungulula ilya Nte sha kwa Yehova.

Ico tukalaibukisha sana pali Munyinefwe Jaracz ca kuti ilyo ali pano calo, ali mubomfi wa kwa Yehova uwaipeela kabili uwa cishinka, uwalebomba imilimo ya kwa Lesa no mutima onse. Alitemenwe abena mwakwe kabili alebasakamana, e lyo alibikile amano ku bantu bambi ukucila ku fintu ifyo umwine alefwaya. (1 Kor. 13:4, 5) Alangile ukuti alibikile amano ku bantu bambi mu fyo aleba ne cikuuku kuli bonse no kubasakamana. Na kabili, ukucincila kwakwe mu mulimo wa kushimikila kwalilangile ukuti alitemenwe abantu kabili alibabikileko sana amano.

Nangu ca kuti fwe ba bwananyina isonde lyonse pamo no lupwa lwa Bethel apo alebombela tuli no bulanda sana pa mfwa yakwe, pa nshita imo ine tulesekelela pa fyo Munyinefwe Jaracz abombeele Yehova muli bucishinka pa myaka iingi. Natucetekela ukuti ‘aali uwa cishinka ukufika na ku mfwa, kabili nabamupeela ne cisote ca bufumu ica mweo.’ (Ukus. 2:10) Natucetekela no kuti ‘imilimo yakwe naimukonka.’—Ukus. 14:13.