Ibuuku lya Bubili Ilya kwa Samwele 22:1-51
22 Kabili ulu e lwimbo ulo Davidi aimbiile Yehova pa bushiku Yehova+ amupuswishe ku balwani bakwe bonse+ na kuli Shauli.+
2 Aimbile ati:
“Yehova e cilibwe candi,+ e uncingilila kabili e umpususha.+
3 Lesa wandi e cilibwe candi,+ muli ena e mo nguba,Ni nkwela+ yandi kabili e lusengo* lwandi ulwe pusukilo,* e cubo candi* umo ncingililwa+Kabili e ko mfulumukila,+ e mupusushi wandi;+ nimwe mumpususha ku bankalwe.
4 Ndalilila kuli Yehova uwalinga ukulumbanya,Kabili akampususha ku balwani bandi.
5 Amabimbi ya mfwa yalinshingulwike;+Ibumba lya baume ifinangwa lyalintiinishe kwati ni mulamba umukalamba.+
6 Intambo sha Nshiishi* shalimpombele;+Nakumene ne fiteyo fya mfwa.+
7 Ilyo nalecula nalilile kuli Yehova,+Nalelilila kuli Lesa wandi.
Lyena mwi tempele lyakwe alyumfwile ishiwi lyandi,Kabili alyumfwile ukupaapaata kwandi ukwa kuti angafwe.+
8 Isonde lyalitendeke ukusunkana no kutenta;+Amashinte ya myulu yalitentele+Kabili yalisunkene pantu balimukalifye.+
9 Mu myona yakwe mwafuukile icushi,No mulilo uukali wafumine mu kanwa kakwe;+Amalasha ayaleaka yafumine kuli ena.
10 Asendeke imyulu ilyo aleikila,+Kabili mwi samba lya makasa yakwe mwali imfifi iyafiitisha.+
11 Aninine pali kerubi+ kabili aishile alepupuka.
Alemoneka pa mapindo ya kwa malaika.*+
12 Lyena aikupile imfifi kwati litenti,+Imfifi yali nga menshi ayafiita kabili nga makumbi ayafiita sana.
13 Ukubengeshima ukwafumine kuli ena kwalengele amalasha ayaleaka ya-aka sana.
14 Lyena Yehova atampile ukubulukuta ku muulu;+Uwapulamo alengele ishiwi lyakwe lyaumfwika.+
15 Apoosele imifwi yakwe+ kabili alisalangenye abalwani bandi;Abyashishe inkuba no kubafulunganya.+
16 Panshi ya bemba palimoneke;+Umufula wa calo washele pa mbilibili pa mulandu wa kuti Yehova alikalipe,Pa mulandu wa mupu wa maka uwalefuma mu myona yakwe.+
17 Atambike ukuboko kwakwe ninshi ali ku muulu;Alinjikete e lyo anjabula mu menshi ayengi.+
18 Alimpuswishe ku balwani bandi abali na maka,+Ampuswishe ku bampata, abali na maka ukuncila.
19 Balinjimiine pa bushiku nali na mafya,+Lelo Yehova alingafwile.
20 Antwele ku cifulo uko nali no kucingililwa;*+Alimpuswishe pantu alintemenwe.+
21 Yehova alanambula pa mulandu wa kuti nalilungama;+Alanambula pa mulandu wa kuti iminwe yandi ya kaele.*+
22 Pantu ndakonka inshila sha kwa Yehova,Kabili nshacita icabipa, e kutila nshasha Lesa wandi.
23 Nshalaba ubupingushi bwakwe bonse;+Nshakaleke ukukonka amafunde yakwe.+
24 Nkatwalilila ukuba uwa kaele+ kuli ena,Kabili nkataluka ku membu.+
25 Yehova nanambule pa mulandu wa kuti ndi mulungami,+Pa mulandu wa kuti ndi wa kaele kuli ena.+
26 Ku wa cishinka mulaba aba cishinka;+Ku wa kaele, uwa maka, mulaba aba kaele;+
27 Ku wasanguluka mulaba abasanguluka,+Lelo ku ncenjeshi mulaba abacenjela.+
28 Pantu mulapususha abaicefya,+Lelo mulamona aba matutumuko kabili mulabacefya.+
29 Pantu muli nyali yandi, mwe Yehova;+Yehova e usanika ulubuuto nga ndi mu mfifi.+
30 Nga mwangafwa kuti nalwisha ifipondo;Lesa nga ampeela amaka kuti nanina icibumba.+
31 Inshila ya kwa Lesa wa cine yalipwililika;+Ifyo Yehova alanda fyalilopololwa.+
Ni nkwela ya bantu bonse abooba muli ena.+
32 Pantu ni Lesa nshi uwaba nga Yehova?+
Kabili cilibwe nshi icaba nga Lesa wesu?+
33 Lesa wa cine e cubo candi icakosa,+Kabili akalenga inshila yandi ikabe iyaololoka.+
34 Alenga amakasa yandi yaba nga ya nsebula;Alenga naiminina pa fifulo ifyasansuka.+
35 Asambilisha iminwe yandi ifya kulwa inkondo;Amaboko yandi yalishiba ifya kubomfya ubuta bwa mukuba.
36 Mulampeela inkwela yenu iye pusukilo,Kabili ukuicefya kwenu kulankusha.+
37 Mulakusha inshila umupita amakasa yandi;Amakasa yandi tayakashelemuke.*+
38 Nkapepeka abalwani bandi kabili nkabalofya;Nshakabwele mpaka bakalobe.
39 Nkabashonaula kabili nkabalofya ica kuti tabakeme;+Bakawila pa makasa yandi.
40 Mukampeela amaka ya kulwa inkondo;+Mukalenga abalwani bandi bakawile pa ntanshi yandi.+
41 Mukalenga abalwani bandi bakambutuke;*+Nkalofya* abampata.+
42 Balapunda mutuule, lelo takuba uubapususha;Balalilila na kuli Yehova, lelo tabaasuka.+
43 Nkabashonaula mpaka bakabe ngo lukungu;Nkabakandaula kabili nkabanyantaula nga matipa ya mu misebo.
44 Mukampususha ku bantu bandi abafwaya ifilubo muli ine.+
Mukancingilila pa kuti nkabe intungulushi ya nko;+Abantu abo nshaishiba bakamombela.+
45 Aba ku fyalo fimbi bakesa kuli ine ninshi nabaipetamika;+Ifyo bakomfwa pali ine fikalenga bakaleng’umfwila.*
46 Aba ku fyalo fimbi bakaba no mwenso,Bakesa baletutuma ukufuma mu malinga yabo ayakosa.
47 Yehova wa mweo! Icilibwe candi cicindikwe!+
Acindamikwe Lesa icilibwe ce pusukilo lyandi.+
48 Lesa wa cine alanandwilako;+Alancimfishako abantu;+
49 Alampususha ku balwani bandi.
Munjimisha pa muulu+ wa bantu abansansa;Mulampokolola ku munkalwe.+
50 E co nkamutashisha mu nko, mwe Yehova,+Kabili ishina lyenu nkalimbila amalumbo:*+
51 Alacita ifikalamba pa kuti apusushe imfumu yakwe;+Alalanga uo asuba ukutemwa ukushipwa,Davidi na bana* bakwe umuyayaya.”+
Amafutunoti
^ Nelyo “uwa kumpususha uwa maka.”
^ Nelyo “ulupili lwa kubutukilako pa kuti umuntu acingililwe.”
^ Nelyo “Sheol,” e kutila inshiishi ya bantu bonse. Moneni Amashiwi ya mu Baibo ne fyo Yapilibula.
^ Nelyo “pa mapindo ya mupashi.”
^ Nelyo “ku cifulo icikalamba.”
^ Mu ciHebere, “yalisanguluka.”
^ Nelyo “inkolokoso shandi tashakashelemuke.”
^ Nelyo “Mukampeela inuma sha balwani bandi.”
^ Mu ciHebere, “Nkatalalika.”
^ Mu ciHebere, “Nga baumfwa fye na matwi yabo, bakang’umfwila.”
^ Nelyo “nkalishikila inyimbo.”
^ Mu ciHebere, “ulubuto lwakwe.”
