Ibuuku lya Bubili Ilya Ishamfumu 2:1-25
2 Ilyo Yehova ali mu kusenda Eliya+ mu muulu mu cikuuku ca mwela,+ Eliya na Elisha+ bafumine ku Gilgali.+
2 Eliya aebele Elisha ati: “Shala kuno, pantu Yehova nantuma ku Betele.” Lelo Elisha amwaswike ati: “Na pali fye Yehova na imwe bene,* nshalekane na imwe.” E ico baile bonse ku Betele.+
3 Lyena abana abaume aba bakasesema* abali ku Betele baile kuli Elisha e lyo bamweba abati: “Bushe nawishiba ukuti buno bushiku Yehova alesenda sokulu kabili tatwalilile ukuba intungulushi yobe?”+ Na o abaswike ati: “Ninjishiba kale. Lekeni ukulandapo.”
4 Nomba Eliya aebele Elisha ati: “Elisha, shala kuno, pantu Yehova nantuma ku Yeriko.”+ Lelo amwaswike ati: “Na pali fye Yehova na imwe bene,* nshalekane na imwe.” E ico baile bonse ku Yeriko.
5 Lyena abana abaume aba bakasesema abali ku Yeriko baile kuli Elisha e lyo bamweba abati: “Bushe nawishiba ukuti buno bushiku Yehova alesenda sokulu kabili tatwalilile ukuba intungulushi yobe?” Na o abaswike ati: “Ninjishiba kale. Lekeni ukulandapo.”
6 Nomba Eliya aebele Elisha ati: “Shala kuno, pantu Yehova nantuma ku Yordani.” Lelo amwaswike ati: “Na pali fye Yehova na imwe bene,* nshalekane na imwe.” E ico baile bonse.
7 Kabili abana 50 aba bakasesema baileiminina akatalamukila baletamba, ninshi Eliya na Elisha nabeminina mu lulamba lwa Yordani.
8 Lyena Eliya abuulile ica kufwala cakwe ica bukasesema,+ acipomba e lyo auma pa menshi, kabili amenshi yalipaatukene uku no ku, ica kuti bonse babili balyabwike apauma.+
9 Ilyo ba-abukiile fye kwi shilya, Eliya aebele Elisha ati: “Lomba ifyo ulefwaya nkucitile ilyo Lesa talansenda.” E ico Elisha amwebele ati: “Mpeeleni ifiputulwa fibili+ ifya mupashi wenu.”+
10 Na o amwebele ati: “Ico walomba nacafya. Nga walamona ilyo Lesa alansenda, ninshi ifyo walomba fyalacitika, nomba nga tawamone, ninshi tafyacitike.”
11 Ilyo bale-enda uku ninshi balelanshanya, mu kupumikisha fye iceleta lya mulilo na bakabalwe ba mulilo+ fyalibalekenye, kabili Lesa asendele Eliya mu muulu mu cikuuku ca mwela.+
12 Ilyo Elisha alemona fyonse ifi, alebilikisha ati: “Tata, tata! Moneni iceleta lya kwa Israele na baume bakwe abanina pali bakabalwe!”+ Ilyo alekele ukumumona, aikete ica kufwala cakwe e lyo acilepulamo fibili.+
13 Pa numa atoolele ica kufwala ca bukasesema+ ico Eliya aponeshe e lyo abwelelamo ayaiminina na mu lulamba lwa Yordani.
14 Lyena abuulile ica kufwala ca bukasesema ico Eliya aponeshe, auma pa menshi e lyo alanda ati: “Ali kwi Yehova Lesa wa kwa Eliya?” Ilyo aumine pa menshi, yalipaatukene uku no ku, kabili Elisha alyabwike.+
15 Ilyo abana abaume aba bakasesema aba ku Yeriko bamumwene akatalamukila, batile: “Umupashi wa kwa Eliya nomba uli pali Elisha.”+ E ico bailekumana nankwe, bamufukamina no kumufukamina.
16 Bamwebele abati: “Moneni, ababomfi benu bali na baume 50 aba maka. Lekeni bayefwaya shikulwinwe. Nalimo umupashi* wa kwa Yehova naumwimya kabili wilemupoosa pa lupili lumo nangu mu mupokapoka umo.”+ Lelo abebele ati: “Mwibatuma.”
17 Na lyo line batwalilile fye ukumupatikisha mpaka aumfwa ububi. E ico abebele ati: “Batumeni.” Lyena batumine aba abaume 50 mu kumufwaya, kabili bamufwaile pa nshiku shitatu, lelo tabamusangile.
18 Ilyo babwelele kuli ena ku Yeriko+ uko aleikala, abepwishe ati: “Bushe nshamwebele nati mwiya?”
19 Mu kupita kwa nshita, abaume ba mu musumba baebele Elisha abati: “Mwe shikulu, kuti mwamona ukutila apo uno musumba wabela pasuma;+ nomba amenshi tayawama kabili umushili tawakwata umufundo.”*
20 E lyo abebele ati: “Ndeteleni imbale yafonka iinono iipya, mubikemo no mucele.” E ico balimuleteele.
21 Lyena aile pa kamfukumfuku ka menshi kabili apooselepo umucele+ e lyo alanda ati: “Yehova atila, ‘Nalenga aya amenshi yabe ayasuma. Tayakalenge umuntu nangu umo akafwe kabili yakalenga umushili ukabe no mufundo.’”*
22 Kabili nga fintu Elisha alandile aya menshi yaba fye ayasuma ukufika na lelo.
23 Ilyo afumine kulya, aile ku Betele. Ilyo aleya, kwali utulumendo utwafumine mu musumba utwalemuseka atuti:+ “Kabiye, ube pala! Kabiye, ube pala!”
24 Asukile apilibuka, atulolesha e lyo atutiipila mwi shina lya kwa Yehova. Lyena ba bere babili abakota+ bafumine mu mutengo, basantaulapo no tulumendo 42.+
25 Ilyo afumine kulya, atwalilile fye ukuya ku Lupili lwa Karmele,+ kabili ilyo afumine kuli ulu ulupili, abwelelemo ku Samaria.
Amafutunoti
^ Nelyo “na pali fye umweo wenu.”
^ Amashiwi ya kuti “abana ba bakasesema” nalimo yalola mu kuti isukulu uko bakasesema basambilila nelyo akabungwe ka bakasesema.
^ Nelyo “na pali fye umweo wenu.”
^ Nelyo “na pali fye umweo wenu.”
^ Nelyo “umwela.”
^ Nelyo kuti yapilibula no kuti, “ulalenga abanakashi amafumo yalepona.”
^ Nelyo kuti yapilibula no kuti, “tayakalenge abanakashi bakaleponya amafumo.”
