Filemone 1:1-25
1 Ine ne Paulo, ne mufungwa+ pa mulandu wa kwa Kristu Yesu, ndi na munyinefwe Timote,+ kabili twakulembela Filemone, umutemwikwa wesu kabili umubomfi munensu,+
2 twalembela na Afia, nkashi yesu, na Arkipi,+ umushilika+ munensu, ne cilonganino icabela mu ng’anda yobe:+
3 Icikuuku ca kwa Lesa no mutende ukufuma kuli Shifwe na Shikulu Yesu Kristu fibe na imwe.+
4 Lyonse ndatootela Lesa wandi ilyo nakulumbula mu mapepo yandi,+
5 pantu ndomfwa ifyo watemwa Shikulu Yesu na ba mushilo bonse ne fyo wabatetekela;+
6 pa kuti ulenge na bambi banonkelemo mu icitetekelo+ ico wakwata pantu walishiba ukuti na ifwe twapokelele ifisuma ifingi ifyakuma Kristu.
7 Pantu nalisekelele no kusansamuka nga nshi pa mulandu wa kutemwa+ kobe munyinane, ico nausansamusha+ imitima ya ba mushilo.
8 E mulandu wine nangu ca kuti ndi na maka ya kukweba+ mwi shina lya kwa Kristu ico ulingile ukucita,
9 ndekukonkomesha pa mulandu wa kutemwa+ kobe, pa kwishiba ukuti ine, ne Paulo, ne mukote, kabili pali nomba ndi mufungwa+ pa mulandu wa kwa Kristu Yesu;
10 ndekukonkomesha pa mwana wandi,+ Onesimu,+ uo nafyele+ ilyo bankakile mu cifungo,
11 uushali kale uwa mulimo kuli iwe lelo uuli nomba uwa mulimo kuli ine na kuli iwe wine.+
12 Uyu wine e o ndebwesesha kuli iwe, e kuti uyu uo natemwa.+
13 Kuti natemwa ukuti ndeikala nankwe pa kuti alemombelako fimo ilyo ndi mu cifungo+ pa mulandu wa mbila nsuma, pantu iwe tauliko.+
14 Lelo nshilefwaya ukucita nangu cimo ukwabula iwe ukusuminisha, pa kuti wicita icisuma pa mulandu wa kupatikishiwa, lelo mu kuitemenwa.+
15 Nalimo e mulandu wine afumiine kuli iwe pa nshita iinono, pa kuti ukabe nankwe pe na pe,
16 ukuti eba fye na kabili umusha,+ lelo acile na pa kuba umusha,+ abe uwa bwananyina uwatemwikwa,+ uo natemwa sana, lelo uo iwe wingatemwa ukucilanapo, apo musha obe kabili ni munonko muli Shikulu.
17 E ico, nga ca kutila umona ine ukuti ndi mubomfi munobe,+ umupokelele+ bwino fintu wingampokelela.
18 Kabili, nga alikubifishe nelyo alikukwatila inkongole, ukalipilishe ine.
19 Ine Paulo ndelemba ku minwe yandi nati:+ Nkabwesha. E lyo ibukisha ukuti na iwe wine walikwata inkongole kuli ine.
20 We munyinane, leka nsekelele muli iwe apo bonse tukonka Shikulu: sansamusha umutima+ wandi apo bonse tukonka Kristu.
21 Ndekulembela pa mulandu wa kuti nalicetekela ukuti uli wa cumfwila, pantu ninjishiba ukuti ukacita ukucila na pa fyo nasosa.+
22 Lelo ukulunda pali ifi, umpekanishishe kabela no mwa kwikala,+ pantu ndesubila ukuti ukupitila mu mapepo+ yenu kuti nalubuka+ pa kuti cikamuwamine.
23 Epafra,+ umufungwa munandi pa mulandu wa kwa Kristu Yesu, amuposha,
24 na Marko, Aristaaki,+ Dema+ na Luka, ababomfi banandi.
25 Icikuuku ca kwa Lesa ico Shikulu Yesu Kristu akwata cibe na imwe bonse pa mulandu wa mibele yenu.+
