Mga Tagna Mahitungod han Aton Tidaraon

HAN naghisgot hi apostol Pedro mahitungod han tidaraon han tawo ngan han tuna, hiya nagsurat: “Sumala ha iya [kanan Dios] saad, naghuhulat kita hin mga bag-o nga langit ngan bag-o nga tuna, diin mag-uukoy an katadongan.” (2 Pedro 3:13) An ‘bag-o nga langit ngan bag-o nga tuna’ siyahan nga iginsaad pinaagi kan propeta Isaias. (Isaias 65:17; 66:22) Pinaagi ha pag-unabi hito nga tagna, iginpakita ni Pedro nga ha iya panahon waray pa ito matuman hin bug-os.

Ha urhi, ha Pahayag nga iginhatag pinaagi kan apostol Juan han mga 96 K.P., iton “bag-o nga tuna” iginkaw-ing ha mga bendisyon nga  makakarawat ilarom han Ginhadian han Dios. (Pahayag 21:1-4) Natutuman na yana an ginsiring ni Jesus ngan ni apostol Pablo mahitungod han magigin kahimtang ha kalibotan antes gud umabot an Ginhadian han Dios. Salit, makakalaom kita nga diri na mag-iiha pahihinaboon hito nga Ginhadian an bag-o nga kalibotan. Ano an magigin kahimtang ha bag-o nga kalibotan? An libro ha Biblia nga Isaias nagsusumat ha aton.

Mga Bendisyon ha Bag-o nga Kalibotan

Kamurayawan ha Bug-os nga Kalibotan Ngan Nagkakaurosa nga Pagsingba. “Ira pamamandayon an ira mga kampilan nga mga punta hin arado, ngan an ira mga bangkaw nga mga garab nga ipangarapon; an nasud diri na mabikyaw han kampilan patok ha nasud, diri na man nira mababatasan an away.”—Isaias 2:2-4.

Kamurayawan Butnga han Tawo ngan Hayop. “An lobo malungon han nati nga karnero, ngan an leopardo maluob upod han nati nga kanding; ngan an nati nga baka ngan an nati nga leon ngan an yubo maglululungon; ngan an usa nga gutiay nga bata magmamando ha ira. Ngan an baka ngan an oso manhahangrab; an ira mga nati magtatarampo pagluob; ngan an leon makaon han dagami sugad han baka nga lalaki. . . . Diri hira magdadaot o diri maggugunaw ha bug-os ko nga bukid nga baraan; kay an tuna mapupuno han hibaro ni Jehova, sugad nga an katubigan nagpupuno han dagat.”—Isaias 11:6-9.

Hura nga Pagkaon Para ha Ngatanan. “Dida hini nga bukid hihimoon ni Jehova han mga kasundalohan ngada ha ngatanan nga mga katawohan an usa nga piyesta han magtambok nga mga butang, an piyesta han mga alaksiw ha mga lagod, han magtambok nga mga butang nga puno hin utok, han mga alaksiw nga pinatin-aw hin maopay ha bawbaw han lagod.”—Isaias 25:6.

Mawawaray Na Kamatayon. “Iya [Dios] linamoy ha kadayonan an kamatayon; ngan an Ginoo nga hi Jehova magpapahid han mga luha tikang ha ngatanan nga nawong; ngan an pakaalo ha iya katawohan iya kukuhaon tikang ha bug-os nga tuna; kay hi Jehova nagyakan hini.”—Isaias 25:8.

Babanhawon an mga Patay. “Mabubuhi gihapon adton amon mga tawo nga nagkamatay! Mababanhaw an ira mga lawas! An ngatanan nga nangangaturog didto han ira mga lubnganan magmamata ngan magkakanta tungod hin kalipay! . . . Pagbubuhion man han Ginoo adton mga maiha na nga nagkamatay.”—Isaias 26:19, An Maopay nga Sumat.

An Mesias Matadong nga Hukom. “Hiya diri maghuhukom sumala han hikikit-an han iya mga mata, diri man mahatag hin kahusayan sumala han hinbabatian han iya mga talinga; kondi pinaagi ha katadongan hiya maghuhukom han mga kablas, ngan mahatag hin husay pinaagi han kaangayan para ha mga maaghop ha tuna.”—Isaias 11:3, 4.

 Matatambal an mga Buta Ngan Bungol. “An mga mata han buta pangangabrihon, ngan an mga talinga han mga bungol pangunguhaan han sarop.”—Isaias 35:5.

Magigin Mabungahon an Waray-Pulos nga Tuna. “An kamingawan ngan an mamara nga tuna magmamalipayon; ngan an kabadsan malilipay, ngan mabukad sugad han rosas. Ini mabukad hin damu gud, ngan malilipay bisan han kahimongaya ngan han kanta.”—Isaias 35:1, 2.

Bag-o nga Tuna. “Ako nagbuhat hin bag-o nga langit [bag-o nga langitnon nga gobyerno] ngan hin bag-o nga tuna [matadong nga bag-o nga sosiedad han mga tawo]; ngan an una nga mga butang diri na hinunumdoman, o diri na maabot ha panumdoman. Kondi magkalipay kamo ngan manrayhak ha gihapon dida hadton akon ginbuhat. . . . Hira [an mga mag-uukoy ha bag-o nga kalibotan nga iginsaad han Dios] magtutukod hin mga balay ngan maukoy hini; ngan hira magtatanom hin mga urubasan, ngan makaon han mga bunga hini. Diri hira magtutukod, ngan an iba an maukoy; diri hira magtatanom, ngan an iba an makaon: kay masusugad han mga adlaw han usa nga kahoy an mga adlaw han akon katawohan, ngan an akon mga pinili ha maihaan magpapahimulos han buhat han ira mga kamot. Diri hira magkakabudlay hin kawang, o manganganak para ha mapait nga kapalaran; kay hira an tulin han binendisyonan ni Jehova, ngan an ira mamat upod ha ira. Ngan mahinanabo nga ha diri pa hira matawag, ako mabaton na; ngan samtang nga nagyiyinakan pa hira, ako mamamati.” “Sugad nga an bag-o nga mga langit ngan an bag-o nga tuna, nga akon paghihimoon, mapabilin ha akon atubangan, nasiring hi Jehova, amo man an iyo tulin ngan an iyo ngaran mapabilin.”—Isaias 65:17-25; 66:22.

Igintagna an Makalilipay nga Tidaraon

Diri la an libro han Isaias an nagtagna hin mga bendisyon ha tidaraon. An Biblia puno hin mga tagna nga naghuhulagway han urusahon nga mga butang nga bubuhaton han Dios pinaagi han iya Ginhadian nga ginmamandoan ni Kristo. a Karuyag mo ba mabuhi ha sugad nga mga kahimtang ha paraiso? Mahimo ka makapahimulos hito! Usisaha kon ano gud an igintututdo han Biblia mahitungod han mag-opay nga katuyoan han Dios ha tidaraon, ngan hibaroi kon paonan-o ka makakapahimulos hito. Malilipay an mga Saksi ni Jehova ha pagbulig ha imo.

[Footnote]

[Retrato ha pahina 8]

Magigin mamurayawon an mga tawo ha usa kag usa ngan ha mga hayop

[Retrato ha pahina 9]

Mababanhaw an mga patay

[Retrato ha pahina 10]

Magigin paraiso an bug-os nga tuna