Mga Pakiana Tikang ha mga Magbarasa

Ginhimo ba ni Jehova an iya kauyonan kan Abraham ha Ur o ha Haran?

An pinakasiyahan nga asoy mahitungod han kauyonan ni Jehova kan Abraham mababasa ha Genesis 12:1-3, nga nasiring: “Hi Jehova siniring kan Abram: Gawas ha imo tuna, ngan ha imo mga kaurupdan, ngan ha balay han imo amay, ngan mapakadto ha tuna nga akon ha imo ipakikita. Ngan hihimoon ko ikaw nga daku nga nasud . . . ngan ha imo an ngatanan nga mga panimalay ha tuna mabubulahan.” a Posible nga ginhimo ni Jehova ini nga kauyonan kan Abraham samtang nakadto hi Abraham ha Ur ngan gin-utro ito han nakadto hi Abraham ha Haran.

Ha siyahan nga siglo, gin-unabi ni Esteban an sugo ni Jehova nga sadang bumalhin hi Abraham ngadto ha Kanaan. Ha pakiistorya ha Sanhedrin, hiya nagsiring: “An Dios ha kahimayaan pinakita ha aton amay nga hi Abraham han nakadto hiya ha Mesopotamia ha waray pa hiya uukoy ha Haran, ngan siniring ha iya: Iwas ha imo tuna, ngan ha imo kaurupdan, ngan kadi ha tuna, nga akon igtututdo ha imo.” (Buhat 7:2, 3) Hi Abraham orihinal nga taga-Ur, ngan sugad han ginsiring ni Esteban, didto niya siyahan nga hinbatian an sugo nga kumadto ha Kanaan. (Genesis 15:7; Nehemia 9:7) Waray unabiha ni Esteban an kauyonan han Dios kan Abraham, kondi ha Genesis 12:1-3, ito nga kauyonan nakakaw-ing ha sugo nga kumadto ha Kanaan. Salit makatadunganon nga toohan nga ginhimo ni Jehova an kauyonan kan Abraham ha Ur.

Kondi, an mabinantayon nga pagbasa ha asoy han Genesis nagpapasabot nga gin-utro ni Jehova an iya kauyonan kan Abraham ha Haran, sugad la nga iya gin-utro ngan gindetalye an pipira nga mga bahin hito ha damu nga mga okasyon ha Kanaan. (Genesis 15:5; 17:1-5; 18:18; 22:16-18) Sumala ha Genesis 11:31, 32, an amay ni Abraham, hi Tera, binaya ha Ur pakadto ha Kanaan, nga gin-updan ni Abraham, Sara, ngan Lot. Inabot hira ha Haran ngan nag-ukoy didto tubtob han mamatay hi Tera. Nag-iha hi Abraham ha Haran salit nakatirok hin damu nga bahandi. (Genesis 12:5) Ngan ha usa ka panahon, hi Nahor, nga bugto nga lalaki ni Abraham, binalhin liwat ngadto.

Katapos igrekord an kamatayon ni Tera, an Biblia nagsusumat han mga pulong ni Jehova kan Abraham ngan nagpapadayon: “Hi Abram linakat, sugad han kan Jehova iginyakan ha iya.” (Genesis 12:4) Salit, an Genesis 11:31–12:4 nagpapasabot gud nga iginyakan ni Jehova an mga pulong nga nakarekord ha Genesis 12:1-3 han patay na hi Tera. Kon amo ito, binaya hi Abraham ha Haran ngan binalhin ngadto ha tuna nga ginsiring ni Jehova ha pagsugot han sugo nga iya pa la hinbatian, sugad man han sugo nga iya hinbatian ha Ur mga tuig na an naglabay.

Sumala ha Genesis 12:1, hi Jehova nagsugo kan Abraham: “Gawas ha imo tuna, ngan ha imo mga kaurupdan, ngan ha balay han imo amay.” Ha usa ka panahon an “tuna” ni Abraham amo an Ur, ngan aadto didto an “balay” han iya amay. Kondi, iginbalhin han amay ni Abraham an iya panimalay ngadto ha Haran, ngan gintawag ni Abraham ito nga lugar nga iya tuna. Paglabay hin damu nga katuigan ha Kanaan, han iya ginsugo an iya tinaporan ngadto ha ‘iya nasud ngan ha iya mga paryente’ basi mamiling hin maarasawa ni Isaak, an tinaporan kinadto ha “bungto ni Nahor” (ha Haran o ha kahirani nga lugar). (Genesis 24:4, 10) Didto nakita han tinaporan hi Rebeka ha mga paryente ni Abraham, an daku nga pamilya ni Nahor.—Genesis 22:20-24; 24:15, 24, 29; 27:42, 43.

Ha iya pahayag ha Sanhedrin, hi Esteban nagsiring mahitungod kan Abraham: “Han patay na an iya amay, ginpabalhin hiya han Dios nganhi hini nga tuna, nga iyo yana inuukyan.” (Buhat 7:4) Nagpapasabot ini nga nakiistorya hi Jehova kan Abraham ha Haran. Makatadunganon nga toohan nga hito nga okasyon gin-utro ni Jehova an iya kauyonan kan Abraham sugad han ginsiring ha Genesis 12:1-3, tungod kay nagtikang matuman an kauyonan han binalhin hi Abraham ngadto ha Kanaan. Salit, an pagtagad han ngatanan nga mga kamatuoran nagtutugway ha konklusyon nga posible nga ginhimo ni Jehova an iya kauyonan kan Abraham ha Ur ngan gin-utro ito ha Haran.

[Footnote]