Kay ano nga natoo ka hadto han ebolusyon?

Bisan kon nagdaku ako sugad nga Katoliko, nagruhaduha ako ha Dios. Pananglitan, diri ko makarawat nga an Dios nagsusunog hin mga tawo ha impyerno. Salit han sumiring an akon mga propesor nga an buhi nga mga butang basta la nag-eksister ngan waray laranga han Dios, ginkarawat ko ito, nasarig nga ginsusuportahan ito hin mga ebidensya. Sulibangko ngay-an, diri iginsasalikway han akon relihiyon an ebolusyon kondi nagtututdo nga gin-giyahan ito han Dios.

Kay ano nga nagkainteres ka ha Biblia?

An akon asawa, hi Susana, nag-aram han Biblia upod han mga Saksi ni Jehova. Iginpakita nira ha Biblia nga diri ginpapasakitan han Dios an mga tawo ha naglalaga nga impyerno. a Iginpakita liwat nira an saad han Dios ha paghimo ha aton planeta nga paraiso. b Dida hito, inabat namon nga nabilngan na namon an mga katutdoan nga makatadunganon! Han 1989, usa nga Saksi nga an ngaran Nick an nagtikang pagbisita ha akon. Ha amon pag-istorya mahitungod han lawas han tawo ngan han gintikangan hito, nagkainteres ako ha simple nga pangatadongan han Biblia ha Hebreo 3:4 nga nasiring nga “an tagsa nga balay may nagtukod, pero an naghimo han ngatanan nga butang amo an Dios.”

An imo ba pag-estudyo ha lawas han tawo nakabulig ha imo ha pagkarawat nga may-ada Maglalarang?

Oo. Pananglitan, maopay gud an pagkadisenyo ha paagi han aton lawas ha pag-ayad ha iya la ngahaw. An proseso ha pagpaopay han samad nag-uupod hin upat nga bahin nga nagpapahinumdom ha akon sugad nga surgeon nga ginbubuligan ko la an sistema han lawas ha pag-ayad ha iya la ngahaw.

Ano an nahitatabo kon nasasamaran an aton lawas?

Mga segundo la, nagios dayon an siyahan nga bahin han proseso nga gindisenyo ha pagpaundang  han pagdinugo. Ini nga mga proseso komplikado ngan epektibo. Dugang pa, masisiring ko nga hihingyapon gud han mga plumbing engineer an aton circulatory system, nga may mga 100,000 ka kilometro nga ugat kay may mga pamaagi ito ha pagsarop han mga luho ngan kapasidad ha pag-ayad ha iya la ngahaw.

Ano an nahiuupod ha ikaduha nga bahin han proseso ha pagpaopay?

Ha sulod hin pipira ka oras, naundang an pagdinugo ngan nagtitikang paghubag an samad. An paghubag nag-uupod hin urusahon nga sunod-sunod nga proseso. Siyahan, an mga ugat nga ha tinikangan kinupos basi maibanan an pagdinugo yana nadaku. Ini nadaku basi mas damu nga dugo an makaagos ha samad. Katapos, tungod han likido nga puno hin protina, an samad nahubag. Ini nga likido importante ha pag-ato han impeksyon, pagpalapsaw han nakakahilo nga substansya, ngan pagkuha han nadaot nga tisyu. An tagsa nga proseso ginkikinahanglan basi mahimo an minilyon nga espesyal an pagkadisenyo nga molekula ngan selyula. An iba hini nga mga proseso nag-aaghat han sunod nga proseso, katapos naundang ito.

Paonan-o nagpapadayon an proseso han pag-opay?

Ha sulod hin mga adlaw, an aton lawas nagtitikang paghimo hin materyales para ha pag-ayad, an proseso nga nagtitigaman han tinikangan han ikatulo nga bahin ngan natatapos ha sulod hin mga duha ka semana. An mga selyula nga nagigin mga lanot ha palibot han samad nabalhin ngadto ha samad ngan nagdadamu. Nagkakaada liwat gudtiay nga ugat nga natubo tipakadto ha samad, diin didto ira ginkukuha an mga hugaw ngan ginsusuplay an dugang nga sustansya durante han proseso han demolisyon ngan pag-ayad. Ha iba nga komplikado nga sunod-sunod nga proseso, napuporma an mga selyula nga gindisenyo ha pagkipot han samad.

Damu gud ito nga proseso! Mationan-o kaiha antes makompleto an proseso han pagpaopay?

An ultimo nga proseso nga amo an pagpahiuli mahimo matapos ha sulod hin mga bulan. An nabari nga mga tul-an naibabalik ha orihinal nga karig-on hito, ngan an mga lanot nga ha tinikangan nakahanig ha samad naliliwanan hin mas marig-on nga materyales. Ha kabug-osan, an proseso han pag-opay han samad urusahon nga ehemplo han ekselente nga sistema han pagbinuligay.

May-ada ba pasyente nga an sitwasyon diri mo gud mahingangalimtan?

Oo. May nagin pasyente ako nga 16 anyos nga daragita nga biktima hin grabe nga aksidente ha awto. Kritikal an iya kahimtang kay nasamad an iya hagudila ngan nagkaada hiya internal bleeding. Hadto, operasyon dayon an solusyon ha sugad nga sitwasyon basi tahion o tangtangon an hagudila. Pero yana, nasarig an mga doktor ha abilidad han aton lawas ha pag-opay ha iya la ngahaw. Gintambal ko la an iya impeksyon, kakulang hin likido, anemia, ngan kangutngot han samad. Mga semana la, nakita ha scan nga nag-opay na an iya hagudila! Nahipapausa gud ako ha abilidad han lawas ha pagpaopay ha iya kalugaringon. Ngan yana, mas kombinsido ako nga gindisenyo kita han Dios.

Ano an nakadani ha imo ha mga Saksi ni Jehova?

Makisangkayon hira, ngan ginbabaton nira pirme an akon mga pakiana gamit an Biblia. Naruyagan ko liwat an ira kaisog ha pagsumat han ira pagtoo ngan ha pagbulig ha iba nga mahibaro mahitungod ha Dios.

Nakabulig ba ha imo propesyon an pagin Saksi ni Jehova?

Oo. Nakabulig ini ha akon nga malamposan an compassion fatigue, usa nga klase hin panluya ha emosyon nga agsob makaapekto ha mga doktor ngan mga nars nga pirme nakikig-upod ha mga may sakit o naaksidente. Ngan kon karuyag makiistorya han mga pasyente, naisasaysay ko ha ira an saad han aton Maglalarang ha pagwara han ngatanan nga sakit ngan pag-antos c ngan ha pagpahinabo hin kalibotan diin waray na masiring, “Ako masakit.” d