AN PUNTO DE BISTA HAN BIBLIA
Kamatayon
Hain an mga patay?
“Kay tapotapo ka man, ngan ha tapotapo ikaw hiuuli.”—Genesis 3:19.
AN GINSISIRING HAN MGA TAWO
An iba naghuhunahuna nga katapos han kamatayon, an usa mahimo mabuhi ha langit, impyerno, purgatoryo, o Limbo. An iba natoo nga hira matatawo utro ha iba nga porma han kinabuhi. Ha luyo nga bahin, adton diri natoo ha mga doktrina han relihiyon natoo nga an kamatayon amo an kataposan han kinabuhi han tawo.
AN GINSISIRING HAN BIBLIA
An Eklesiastes 9:10 nasiring nga “waray buruhaton, o paghunahuna, o hibaro, o kinaadman, didto ha Sheol, ngain ikaw kakadto.” Iginpapatin-aw liwat han Biblia kon ano an nahitatabo kon mamatay an tawo ngan hayop. Ito nasiring: “An ngatanan nakadto ha usa nga lugar; an ngatanan tikang ha tapotapo, ngan an ngatanan mabalik liwat ha pagkatapotapo.”—Eklesiastes 3:20.
Ano an kahimtang han patay?
“An iya gininhawa nagowa, nabalik hiya ngadto ha iya tuna; hito ngahaw nga adlaw an iya mga hunahuna nawawara.”—Salmo 146:4.
AN GINSISIRING HAN MGA TAWO
Damu an natutdoan nga an hingangadtoan han tawo ha iya kamatay depende han iya buhat dinhi ha tuna han buhi pa hiya. Kon maopay hiya, babalosan hiya hin dayon nga himaya; kondi kon maraot hiya, waray kataposan nga pasakit an iya dadangatan. Kon mamatay an usa, kinahanglan anay kuno hiya limpyohan ha sala antes hiya tugotan nga umatubang ha Dios. Adton waray malimpyuhi gintotoohan nga diri na gud makakakarawat hito nga himaya.
AN GINSISIRING HAN BIBLIA
An patay diri naabat hin kalipay o kasakit. Oo, tungod kay waray hira sarabotan, diri na gud hira naabat hin bisan ano, ngan diri na liwat hira nakakabulig o nakakadaot ha mga buhi. An Eklesiastes 9:5, 6 nasiring: “An mga buhi maaram nga hira mapatay: kondi an mga patay diri maaram han bisan ano . . . Sugad man an ira gugma, an ira pagdumot ngan an ira kaawa, nahanaw ha maiha na; waray na man hira bahin han bisan ano ha sirong han adlaw, tubtob ha kadayonan.”
May paglaom ba an mga patay?
“Kon in usa ka tawo mamatay, mabubuhi ba hiya liwat? Ha ngatanan nga adlaw ha akon pakig-away mahulat unta ako, ngada nga an panahon ha pagbuhii ha akon umabot.”—Job 14:14.
AN GINSISIRING HAN MGA TAWO
Damu an naghuhunahuna nga kon an usa mahingadto ha impyerno, waray na hiya paglaom. An pagpasakit ha impyerno gintatagad nga waray kataposan kuno. Ha luyo nga bahin, an aadto ha purgatoryo magmamalipayon kuno ha langit kon malimpyohan na hira tikang ha ira mga sala pinaagi hin kalayo.
AN GINSISIRING HAN BIBLIA
Katapos magpahuway ha kamatayon, an mga patay babanhawon dinhi ha tuna han Anak han Dios. An Biblia nasiring: “Ayaw kamo kahipausa hini, kay maabot an oras nga an ngatanan nga aadto ha handumanan nga mga lubnganan makakabati han iya tingog ngan mababanhaw.” (Juan 5:26, 28, 29) Depende han ira buhat, tatagan hira hin waray kataposan nga kinabuhi. a
a Para ha dugang nga impormasyon may kalabotan ha pagkabanhaw, alayon kitaa an kapitulo 7 han libro nga Ano Gud ba an Igintututdo han Biblia? nga iginpublikar han mga Saksi ni Jehova, ngan mababasa ha www.jw.org/war.
