Eesotiyoogaa Aggennaadan Naagetta
Eesotiyoogaa Aggennaadan Naagetta
“Qaalaa yoota. Wodee injjetin injjetana xayin, minnada [“eesuwan,” NW] yoota.”—2 XIM. 4:2.
QONCCISSANA DANDDAYAY?
Koyro xeetu layttaa Kiristtaaneti eesuwan sabbakidoy aybissee?
Nuuni eesotiyoogaa aggennaadan naagettana danddayiyoy ayba ogiyaanee?
․․․․․Kawotettaabaa sabbakiyoogee awudeegaappenne aaruwan eesoyiyaaba gididoy aybissee?
1, 2. ‘Nuuni eesuwan yootanaadan’ imettida azazuwaara gayttidaagan ayba oyshay denddii?
SHEMPPO ashshiyo oosuwaa oottiya asay darotoo eesuwan oottees. Leemisuwau, Tamay gattiyo daafabaa teqqiyaageeti asay xeesiyo wode eesuwan boosona; ayssi giikko, shemppo miyaabi gakkana danddayiyoogaa eroosona.
2 Nuuni Yihoowa Markka gidiyoogaadan, asay attana mala maaddanau koyoos. Hegaa gishshau, Kawotettaa mishiraachuwaa sabbakanau nuuyyo imettida oosuwaa xoqqu oottidi xeelloos. Nuuni aybanne qoppennan coo jaamennaagee tuma. Yaatin PHauloosi, “Qaalaa yoota. Wodee injjetin injjetana xayin, [eesuwan] yoota” giidi zorido wode woygana koyidee? (2 Xim. 4:2) Nuuni eesuwan sabbakana danddayiyoy ayba ogiyaanee? Qassi nu oosoy eesoyiyaagaa gididoy aybissee?
NUUNI SABBAKIYO OOSOY EESOYIYAABA GIDIDOY AYBISSEE?
3. Asay Kawotettaa kiitaa ekkiyaaba gidikko aybi hanana danddayii, ekkennaba gidikko shin?
3 Nuuni sabbakiyo oosoy shemppo ashshana danddayiyoogaa qoppiyo wode, haratussi mishiraachuwaa eesuwan yootana koshshiyoogaa akeekennan aggakka. (Roo. 10:13, 14) Xoossaa Qaalay hagaadan gees: “Taani nagaranchcha asa, ‘Neeni tuma haiqqana’ yaagido wode, i ba nagaraappe simmidi, pirddaanne suure oosuwaa oottikko, . . . i tuma paxa de7anaappe attin haiqqenna. I kase oottido nagarai issoinne qofettenna.” (Hiz. 33:14-16) Geeshsha Maxaafay Kawotettaa kiitaa tamaarissiyaageetuyyo, “Nenanne neeni giyoogaa siyiyaageeta [ashshaasa]” yaagees.—1 Xim. 4:16; Hiz. 3:17-21.
4. Kaddiyaageetu timirttee koyro xeetu layttan sabbakiyo oosoy eesoyiyaagaa gidanaadan oottidoy ayba ogiyaanee?
4 Eesuwan sabbakanaadan PHauloosi Ximootiyoosa zoridoy aybissakko akeekanau, ha huuphe yohuwau waanna xiqisiyaa yuushuwan deꞌiya qofaa ane beꞌoos. Xiqisee hagaadan gees: “Qaalaa yoota. Wodee injjetin injjetana xayin, [eesuwan] yoota. Daro danddayan asaa tamaarissaidda bora, seeranne zora. Aissi giikko, asai tumu timirttiyaa ezggennan ixxiyo wodee yaana. SHin asai bantta amuwaa kaallidi, siyanau ufaissiyaabaa yootiya tamaarissiyaageeta gujji gujji shiishshana. Eti tumu yohuwaa siyiyoogaa aggidi, . . . bantta haittaa wora zaarana.” (2 Xim. 4:2-4) Yesuusi kaddiyaageeti denddanaagaa kasetidi yootiis. (Maa. 13:24, 25, 38) Kiristtaaneti kaddidaageetu worddo timirttiyan cimettidi eta kaallenna mala, Ximootiyoosi gubaaꞌe giddonkka ‘qaalaa yootiyoogee’ keehi koshshiyaaba. Hegee eta shemppuwau hirggissiyaaba. Ha wodiyan shin?
5, 6. Nuuni haggaazuwan demmiyo asay ammaniyo erettida qofati awugeetee?
5 Tumu ammanuwaa kaddiyoogee ha wodiyan kaseegaappe dariisinne aakkiis. (2 Tas. 2:3, 8) Ha wodiyan asay siyanau ufayttiyo timirtteti awugeetee? Darosan, lodda laamiyaa timirttiyaa asay haymaanootiyau mishettiyoogaadan mishettidi yootees. Lodda laamiyaa qonccissanau darotoo saynisiyaa goꞌettiyaaba gidikkonne, lodda laamee ha wodiyan haymaanoote mala gidiis; gidoppe attin, Xoossi baawa giidi tamaarissees. Hegee asay Xoossaanne hara asaa xeelliyo ogiyaa mooriis. Daro asay ammaniyo harabay qassi, Xoossay asaassi qoppenna gishshau, nuunikka abaa qoppana koshshenna giyaagaa. Daroti ayyaanaaban xiskkanaadan oottiya ha timirtteta ezggiyoy aybissee? Ha naaꞌꞌu qofaykka, ‘Nena oychiyay baynna gishshau, neeni koyidobaa aybanne oottana danddayaasa’ giyoogaa mala. Daroti siyanau ufayttiyoobay tumuppe hegaa.—Mazamure 10:4 nabbaba.
6 SHin asay siyanau ufayttiyo harabaykka deꞌees. Woosa keettaa biya issoti issoti, ‘Intte aybanne oottikko, Xoossay inttena siiqees’ giya asttamaareta koyoosona. Woosa keettaa asttamaaretinne qeeseti baalati, qurbbaanaa siraataynne goynuwau misileta goꞌettiyoogee Xoossaa anjjuwaa demissiyaabadan yootiyoogan harati siyanau ufayttiyoobaa tamaarissoosona. Woosa keetti biya ha asati bantta deꞌiyo hanotay ay keena iitakko akeekokkona. (Maz. 115:4-8) SHin eti Geeshsha Maxaafay tamaarissiyoobaa akeekiyoogan ayyaanaaban beegottanaadan nuuni maaddiyaaba gidikko, Xoossaa Kawotettaappe goꞌettana danddayoosona.
EESUWAN SABBAKIYOOGAA GIYOOGEE WOYGIYOOGEE?
7. Eesuwan oottiyaageeta gidiyoogaa ayba ogiyan bessana danddayiyoo?
7 Asaa shukkiya gooba aakimee i shukkiyo uri hayqqana danddayiyo gishshau, qofay shaahettennan ba oosuwaa oottana koshshees. Nuunikka Kiristtaane haggaazuwan demmiyo asatu koshshaa denttettana danddayiya qofaa woy oyshaa qoppiyoogaaninne hegaa malaban qofay shaahettennan nu oosuwaa oottiyoogan, eesuwan sabbakiyoogaa bessana danddayoos. Eesotidi oottiyoogee asay nu kiitaa siyana danddayiyo wodiyan etakko baana mala nu hanotaa giigissanaadankka denttettana danddayees.—Roo. 1:15, 16; 1 Xim. 4:16.
8. Eesuwan oottiyoogaa giyoogee woygiyoogee?
8 Eesotiyoogee kaseyana bessiyaabaa kaseyiyoogaakka gujjees. (Doomettaabaa 19:15 nabbaba.) Leemisuwau, neeni maramaretta simmin dottoree nena ba biiruwaa xeesidi, “Ne sahoy eesuwan akkamettana bessiyaabaa. Ne harggiyaa xeelliyaagan issibaa oottanau deꞌiya wodee aginappe darenna” giidi, minttidi yootidabadan qoppa. Tamay gattiyo daafabaa teqqanau biya uradan eesuwan a biiruwaappe kiyennan aggana danddayaasa. SHin dottoriyaa zoriyaa siyada, ay kaseyana bessiyaakko soo baada loytta qoppana danddayaasa.
9. PHauloosi Efisoonan deꞌido wode eesuwan markkattiis gaana danddayiyoy aybissee?
9 PHauloosi Isiyaa awuraajjan mishiraachuwaa sabbakidoogaa xeelliyaagan Efisoona gubaaˈiyaa cimatussi yootidobaa qoppiyoogan, i eesuwan oottidoogaa akeekana danddayoos. (Oosuwaa 20:18-21 nabbaba.) I yaa gakkido gallassaappe doommidi sooppe soo biidi asau mishiraachuwaa sabbakennan aggenna. Hegaa bollikka, “Xiraanoosa giyo tamaare keettan ubba gallassi” paci baynnan haasayaa haasayiis. (Oos. 19:1, 8-10) PHauloosi eesuwan oottiyoogee i galla galla oottiyoobankka qonccidoogee tuma. Nuuni ‘eesuwan sabbakanaadan’ zoree imettidoy sabbakiyo oosoy nuna unꞌꞌissiyaabadan qoppanaadaana gidenna. Gidoppe attin, sabbakiyo oosuwaa nu deꞌuwan kaseyana bessees.
10. Kiristtaaneti 100 layttappe kase eesuwan oottidoogan nuuni ufayttiyoy aybissee?
10 Mishiraachuwaa sabbakiyoogaa 1914ppe kase doommida, Geeshsha Maxaafaa Tamaaretu amaridaageetu leemisoy eesotiyoogee woygiyoogaakko qonccissees. Eta qooday amarida shaꞌa xalla gidikkokka, eti eesotana koshshiya wodiyan deꞌiyoogaa akeekidi, Kawotettaabaa mishettidi sabbakidosona. Eti Geeshsha Maxaafaa timirtteti xeetan qoodettiya gaazeexatun attamettanaadan oottidosona; qassi “Meretaa Pootuwaa Diraamaa” geetettiya silimaanne silaydiyaa bessidosona. Yaatiyoogan, miilooniyan qoodettiya asau mishiraachuwaa yootidosona. Eti eesuwan oottidoy baynnaakko, nu giddoppe aappunati Kawotettaa kiitaa siyanee?—Mazamure 119:60 nabbaba.
EESOTIYOOGAA AGGENNAADAN NAAGETTA
11. Issooti issooti eesotiyoogaa agganaadan oottiday aybee?
11 Qofay shaahettanaadan oottiyaabay issi uri sabbakiyo oosoy ay keena koshshiyaabakko qoppennaadan oottana danddayees. Seexaanay nuuni nu qofaa kaallanaadaaninne daro koshshennabatun wodiyaa wurssanaadan oottanau ha siraataa goꞌettees. (1 PHe. 5:8; 1 Yoh. 2:15-17) Issi wode Yihoowayyo haggaaziyoogaa kaseyiya issoti issoti eesuwan oottiyoogaa aggidosona. Leemisuwau, Deemaasa giyo Kiristtaanee koyro xeetu layttan PHauloosaara ‘issippe oottiis,’ shin Xoossaappe haakkida siraatay Deemaasa qofay shaahettanaadan oottiis. Deemaasi meto wodiyan ba ishaa minttettiyoogaa kaseyiyoogaappe, PHauloosa aggidi biis.—Pilm. 23, 24; 2 Xim. 4:10.
12. Ha wodiyan ay oottana danddayiyoo, sinttappe nuuni merinau ay oottanau injjetiya hanotay deꞌanee?
12 Nuuni eesotana bessiyoogaa ubbatoo akeekanau, deꞌuwan demmana danddayiyoobaa kaseegaappe gujjanaadan denttettiya koshshaa eqettana bessees. Nuuni “tumu de7uwaa” mintti oyqqanau baaxetana koshshees. (1 Xim. 6:18, 19) Xoossaa Kawotettaa haaruwan saꞌan merinau deꞌiyo wode, loꞌꞌo oosuwaa oottiyoogan ufayttanau injjetiya zawi baynna hanotay deꞌanaagaa neeni ammaniyoogau siree baawa. SHin ha wodiyan, asay Armmageedoona olaappe attanaadan maaddiyoogee zaaretti demmenna maata.
13. Nuuni Kiristtaane gidiyo gishshau, eesotiyoogaa aggennan deꞌana danddayiyoy ayba ogiyaanee?
13 Nu yuushuwan deꞌiya daroti Yihoowa erokkona. Yaatiyo gishshau, eesotiyoogaa aggennaadan nuna aybi maaddana danddayii? Nuunikka issi wode xuman xiskkiya asa mala gidiyoogaa qoppana danddayoos. SHin PHauloosi giidoogaadan nuuni beegottida, qassi Kiristtoosi nuuyyo pooꞌissiis. Haꞌꞌi nuuyyo pooꞌuwaa pooꞌissiyo maatay deꞌees. (Efisoona 5:14 nabbaba.) PHauloosi hegaa yooti simmidi hagaadan giis: “Intte waani de7iyaakko akeekite; aadhdhida eratettaara de7iya asadan de7iteppe attin, aadhdhida eratetti bainna asadan de7oppite. Wodee iita gidiyo gishshau, intte lo77o wodiyaa coo xaissoppite.” (Efi. 5:15, 16) Ha iita alamiyan, Yihoowakko shiiqidi deꞌanaadan maaddiyaabaa oottanau wodiyaa goꞌettiyoogee keehippe koshshiyaaba.
KEEHI DUMMA WODIYAN DEꞌOOS
14-16. Kawotettaabaa sabbakiyoogaa awudeegaappenne eesoyiyaaba oottiyay aybee?
14 Nu haggaazoy ubbatoo eesoyiyaaba gidikkokka, ha wodiyan awudeegaappenne aaruwan eesoyiyaaba. Geeshsha Maxaafan odettida, daro macaray deꞌiyo malaatay 1914ppe doommidi polettiiddi deꞌees. (Maa. 24:3-51) Asaa naata xayssana danddayiya, awudeegaappenne aaruwan yashshiyaabay haniiddi deꞌees. Alamiyaa wolqqaama kawotettati sarotettaa ehaanau maacettidaba gidikkokka, saꞌan ay sohuwaaninne xuussana danddayiyo, 2,000 gidiya niyukileere ola miishshati etau deꞌoosona. Hegaara gayttidaagan aawatettay deꞌiyoogeeti niyukileere miishshati bayido, xeetan qoodettiya hanotata yootoosona. Hegeetuppe amaridaageeta shabbirssiyaageeti demmidonaashsha? Issi issi asay shabbirssiyaageeti denttiyo olan asaa naati xayanaagaa yootees. Gidikkokka, asaa naati banttana xayssana giidi yayyiyoy ola xalla gidenna.
15 Zi Lanset giyo maxeetiyaanne Londdone Yuniveristte Kolloojjiyaa iripporttee, “Carkkuwaa hanotay laamettiyoogee 21tta xeetu layttan alame yuushuwan aybippenne aaruwan payyatettau hirggissiyaaba” yaagiis. He iripporttee, carkkuwaa hanotay laamettiyoogee daro asaa payyatettaa qohanaagaanne biilooniyan qoodettiya asaa deꞌuwau yashshiyaaba gidanaagaa yootiis. Abbaa haattay dariyoogaa, away suulliyoogaa, diꞌuwaa, wurssiya harggiyaa, gotiyaa, qassi koshshiyaabay qaxuhatiyoogan denddiya olaa gaasuwan daro heeran bashshay gakkana danddayees. Olaynne bashshay asaa naata xayssana danddayiya yashshiyaaba gidiyoogee tuma.
16 Issi issi asay niyukileere olay gattana daafabay, ‘malaataa’ polo gidiyaabati hananaadan oottana giidi qoppana danddayees. SHin, daroti he malaatay tumuppe woygiyoogaakko erokkona. Kiristtoosa yuussay tuma gidiyoogaa, qassi ha siraatay xayiyo wodee keehi matidoogaa qonccissiya malaataa daro wodiyau beꞌida. (Maa. 24:3) Yesuusi hanana giido darobati ha wodiyaagaadan polettin beꞌi erokko. Asay ayyaanaabaa xiskkuwaappe beegottiyo wodee haꞌꞌa. Nu haggaazoy eti beegottanaadan maaddees.
17, 18. (a) Wurssetta wodiyan deꞌiyoogee nuna maaddiyoy ayba ogiyaanee? (b) Kawotettaa kiitau bau deꞌiya xeelaa asay laammanaadan denttettana danddayiyaabay aybee?
17 Nuuni Yihoowa siiqiyoogaa qonccissanau, qassi ha wurssetta wodiyan oottanaadan imettida oosuwaa polanau deꞌiya wodee keehi guutta. PHauloosi koyro xeetu layttan, Roomen deꞌiya Kiristtaanetuyyo giidobay he wodeegaappe aaruwan ha wodiyan koshshiyaaba. I hagaadan giis: “Xiskkuwaappe intte beegottiyo saatee ha77i gakkido gishshau, ha wodiyaa akeekite; aissi giikko, nuuni koiro ammaniyo wodeppe, nuuni attiyo wode[e] ha77i nuukko matattiis.”—Roo. 13:11.
18 Wodiyaa wurssettan hanana geetettidabati issi issi asati Xoossaara dabbotana koshshiyoogaa akeekanaadan maaddana danddayoosona. Harati asa kawotettay ikkonoomiyaa metuwaa, niyukileere daafaabaa hirggaa, danuwaa woykko heeray moorettidaagaa giigissana danddayennaagaa qoppiyo wode, asaa naatussi maadoy koshshiyoogaa akeekoosona. Harata qassi eta son gakkiyaabay, giishin sahuwaa, machiyo yeddiyoogaa woy azinaappe anjjettiyoogaa woy siiqiyo uri hayqqiyoogaa malabay ayyaanaaban banttau koshshiyaabaa eti akeekanaadan oottees. Nuuni haggaaziyo wode, he asata maaddana danddayoos.
EESOTIYOOGEE ETA DENTTETTIIS
19, 20. Eesotiyoogee daro Kiristtaaneti bantta deꞌuwan issi issibaa laammanaadan denttettidoy ayba ogiyaanee?
19 Eesotiyoogee daro Kiristtaaneti kaseegaappe aaruwan haggaazanaadan denttettiis. Leemisuwau, Ekuwadore biittan issi yelaga azinaynne machiyaa 2006n, “Intte Ayfee Ubbatoo Payya Gido” giya dumma shiiquwaa gallassaa prograamiyaa shaakki simmidi, sima deꞌuwaa deꞌanau kuuyidosona. Eti banttau deꞌiyaabaappe koshshennabata xaafidosona; yaatidi heezzu agina giddon heezzu hiixa kifileti deꞌiyo bantta keettaa aggidi issi hiixa kifilee deꞌiyo keettaa biidosona, issi issibaa bayzzidosona, qassi acotido acuwaa qanxxidosona. Sohuwaara kaafiya aqinye gididosona, qassi aassiyaageeti keehi koshshiyoosan oottanaadan woradaa bollaara geeddiyaagee zoridobaa siyidosona.
20 Huuphessa Amarkkan deꞌiya issi ishay hagaadan giidi xaafiis: “Taaninne ta machiyaa 2006n issi gita shiiquwan beettiyo wode xammaqettoosappe nuuyyo 30 laytta. SHiiquwaappe kaamiyaa laaggiiddi soo simmiyo wode, sima deꞌuwaa deꞌiyoogaa xeelliyaagan imettida zoriyaa waati oosuwan peeshshana danddayiyaakko tobbida.” (Maa. 6:19-22) Etayyo motoriyan qaaxxiya wolwoloynne keettay, biittay, alꞌꞌo kaametinne heezzu keettay deꞌees. Eti bantta wodiyaanne wolqqaa aquwaa shiishshiyoogan xayssidabadan qoppido gishshau, kumetta wodiyaa haggaazanau qofaa qachidosona. Eti 2008n, aqinye gidida bantta naꞌeera kumetta wodiyaa haggaaziyoogaa doommidosona. Asay Xoossaa Qaalaa tumaa siyiyoonne akeekiyo wode keehippe ufayttiyoogaa beꞌiyoogee etau gita anjjo. Ishay hagaadan giis: “Ishatuura kaseegaappe aaruwan matattidi oottiyoogee ayba ufayssiyaabee! Aassiyaageeti keehi koshshiyoosaa biidi haggaazida. Qassi Yihoowau kaseegaappe loytti oottiyoogee, nuuni kaseegaappe aaruwan akko shiiqanaadan maaddiis.”
21. Nuna oosuwau denttettiya eray awugee?
21 “Xoossau goinnenna asati pirddettiyo gallassainne xayiyo gallassai” matan yiidi, ha iita alamiyaa xayssanaagaa eroos. (2 PHe. 3:7) Nuuni Xoossaa Qaalaa eriyoogee, matan yaana gita waayiyaabaanne appe simmin yaana ooratta alamiyaabaa mishettidi yootanaadan denttettees. Asaayyo sintta wodiyaa tumu hidootaabaa yootiyoogan ubbatoo keehippe eesotiyo qofay deꞌiyoogeeta gidoos. Ha eesoyiya oosuwan danddayiyo ubbabaa oottiyoogan, Xoossaanne asaa tumuppe siiqiyoogaa bessoos.
[Oyshata]
