XANNAˈIYO HUUPHE YOHUWAA 10
Yihoowa Siiqiyoogeenne Galatiyoogee Xammaqettanawu Nena Denttettana
“Xammaqettiyoogaa tana diggiyai aibee?”—OOS. 8:36.
MAZAMURE 37 Kumetta Wozanaappe Yihoowawu Haggaaziyoogaa
HA XINAATIYAN *
1-2. Oosuwaa 8:27-31, 35-38y yootiyoogaadan, Toophphiyaa biittaa sunttay xammaqettanaadan denttettidabay aybee?
XAMMAQETTIDA Kiristtoosa erissiyo ashkkara gidanawu koyay? Siiqoynne galatay daroti hegaa dooranaadan denttettiis. Toophphiyaa kaweessi oottida he biittaa suntta gidida bitaniyaabaa ane qoppoos.
2 He bitanee Geeshsha Maxaafaappe tamaaridi sohuwaara xammaqettiis. (Oosuwaa 8:27-31, 35-38 nabbaba.) A denttettidabay aybee? I Xoossaa Qaalaa nashshiyoogee qoncce; I gaariyaa bolli uttidi Isiyaasa maxaafaappe nabbabees. Qassi he bitanee Piliphphoosaara haasayidi, I Yesuusi bawu oottidobawu galatiis. SHin he bitanee Yerusalaame biidoy aybissee? I koyrokka Yihoowa siiqiyo gishshataassa. Hegaa waati eriyoo? I Yerusalaamen Yihoowawu goynni simmees. He bitanee ba kase haymaanootiyaa laggidi tumu Xoossa sheerettida mexi issi deriyaara walahettiis. I Yihoowa siiqiyoogee hara keehi koshshiyaabaa, hegeekka xammaqettidi Kiristtoosa erissiyo ashkkara gidanaadan A denttettiis.—Maa. 28:19.
3. Issi uri xammaqettennaadan diggana danddayiyaabay aybee? (“ Tana Loytti Qonccissiya Biittaa Qommoy Awugee?” giya saaxiniyaa xeella.)
3 Yihoowa siiqiyoogee neeni xammaqettanaadan denttettana danddayees. SHin siiqoy neeni xammaqettennaadankka diggana danddayees. Waatidi? Amarida leemisota beˈa. Neeni ammanenna so asaanne laggeta keehi siiqana danddayaasa, qassi neeni xammaqettikko eti nena ixxana gaada hirggana danddayaasa. (Maa. 10:37) Woy Xoossay ixxiyoogaa neeni eriyo iita meeziyaa siiqana danddayaasa, qassi hegaappe laˈa kiyiyoogee nena keehi metana danddayees. (Maz. 97:10) Woy neeni worddo haymaanootiyaara gayttida baalata bonchchaydda diccennan aggakka. Neeni hegeeta oottido ufayssiya wodeta dosana danddayaasa. Hegaappe denddidaagan, Yihoowa ufayssenna baalata bonchchiyoogaa aggiyoogee nena metana danddayees. (1 Qor. 10:20, 21) Hegaa gishshawu, neeni ubbaappe aaruwan aybaa woy oona siiqiyaakkko kuuyana koshshees.
NUUNI UBBAAPPE AARUWAN SIIQANA KOSHSHIYAAGAA
4. Neeni xammaqettanaadan oottiya ubbaappe aadhdhiya gaasoy aybee?
4 Neeni siiqiyoonne hegaa gishshawu galatiyo darobay deˈees. Leemisuwawu, Yihoowa Markkatuura xannaˈanaappe kasekka, neeni Geeshsha Maxaafaa keehi nashshiyaagaa gidana danddayaasa. Qassi Yesuusa siiqiyaagaa gidana danddayaasa. Haˈˈi Yihoowa Markkata erada neeni etaara wodiyaa aattiyoogaa dosana danddayaasa. SHin neeni dosiyo he loˈˈobati neeni nena Yihoowawu sheedhdhada xammaqettanawu koyanaadan oottennan aggana danddayees. Neeni xammaqettanaadan denttettana waanna gaasoy neeni Xoossaa Yihoowa siiqiyo siiquwaa. Hara aybippenne aaruwan neeni Yihoowa siiqiyo wode, Yihoowawu haggaaziyoogaa aybinne woy ooninne digganaadan oottakka. Neeni Yihoowa siiqiyoogee xammaqettanaadan nena denttettana, qassi xammaqetta simmada ayyo ammanetta deˈanaadankka maaddana.
5. Nuuni pilggana oyshati awugeetee?
5 Yesuusi nuuni Yihoowa nu kumetta wozanaappe, nu kumetta shemppuwaappe, nu kumetta qofaappenne nu kumetta wolqqaappe siiqana koshshiyoogaa yootiis. (Mar. 12:30) Hegaadan kumetta hanotan Yihoowa siiqanawunne bonchchanawu waata tamaarana danddayay? Yihooway nuna ay keenaa siiqiyaakko nuuni qoppiyoogee, nuunikka A siiqanaadan maaddana. (1 Yoh. 4:19) He keehi koshshiya siiquwaa siiqiyoogee ay qoppanaadaaninne oottanaadan nena denttettanee? *
6. Roome 1:20y yootiyoogaadan, neeni Yihoowabaa tamaarana danddayiyo issi ogee aybee?
6 Yihooway medhdhidobaa baggaara abaa tamaara. (Roome 1:20 nabbaba; Ajj. 4:11) I medhdhido maatan mittan, qassi mehiyan doˈan qonccida A aadhdhada eratettaa wotta dentta qoppa. Ne bollay merettido maalaalissiya ogiyaabaa amaridabaa tamaara. (Maz. 139:14) Biilooniyan qoodettiya xoolinttetuppe issuwaa xalla gidida awawu Yihooway immido wolqqaabaa qoppa. * (Isi. 40:26) Neeni yaatiyo wode, kaseegaappe aaruwan Yihoowa bonchchana. SHin Yihooway aadhdhida eranchchanne wolqqaama gidiyoogaa eriyoogee neeni aara dabbotiyo dabbotawu doometta xalla. Neeni Yihoowa siiqiyo siiquwaa minttanawu, kaseegaappe aaruwan abaa erana koshshees.
7. Kaseegaappe aaruwan Yihoowa siiqanawu, neeni ammanana koshshiyaabay aybee?
7 Yihooway nena wozanappe siiqiyoogaa neeni ammanana koshshees. Saluwaanne saˈaa Medhdhidaagee nena wudidi xeelliyoogaanne neessi qoppiyoogaa ammananawu metootay? Yaatikko, Yihooway “nuuppe ooyyoonne haaho [gidennaagaa]” hassaya. (Oos. 17:26-28) I “wozanaa ubbaa qorees,” qassi Daawiti Solomonayyo yootidoogaadan, “Neeni a koyikko, i neeyyo beettana” giidi qaalaa geliis. (1 Odi. 28:9) Neeni haˈˈi Geeshsha Maxaafaa xannaˈaydda deˈiyoogee, Yihooway, “Taani inttena taakko shiishshaas” giidoogaa bessiyaabaa. (Erm. 31:3) Yihooway neeyyo oottido ubbabaa neeni loytta akeekiyo wode, neeni A kaseegaappe aaruwan siiqana.
8. Neeni Yihoowa A siiquwaa gishshawu galatiyoogaa waata bessana danddayay?
8 Yihoowa A siiquwaa gishshawu galatiyo issi ogee woosan aara haasayiyoogaa. Nena qofissiyaabaa Xoossaayyo yootiyo wodenne I neeyyo oottiyo ubbabaa gishshawu A galatiyo wode neeni A kaseegaappe aaruwan siiqana. Qassi Yihooway ne woosaa zaariyoogaa neeni akeekiyo wode, Yihoowaara neeni dabbotido dabbotay kaseegaappe aaruwan minnana. (Maz. 116:1) Yihooway neessi qoppiyoogaa neeni ammanana. SHin neeni kaseegaappe aaruwan Yihoowakko shiiqanawu, I qoppiyo ogiyaa akeekana koshshees. Qassi I neeppe koyiyoobaa neeni erana koshshees. Neeni he eraa demmana danddayiyoy A Qaalaa, Geeshsha Maxaafaa xannaˈiyoogaa xallaana.
Xoossaakko shiiqanawunne I nuuppe koyiyoobaa eranawu maaddiya ubbaappe aadhdhiya ogee Geeshsha Maxaafaa xannaˈiyoogaa (Mentto 9 xeella) *
9. Neeni Geeshsha Maxaafaa nashshiyoogaa waata bessana danddayay?
9 Xoossaa Qaalaa, Geeshsha Maxaafaa nashshiyoogaa tamaara. Neessi Yihoowabaanne A halchchuwaabaa tumaa yootiyay Geeshsha Maxaafaa xalla. Geeshsha Maxaafaa galla galla nabbabiyoogan, xinaatiyaawu giigettiyoogaaninne tamaaridobaa oosuwan peeshshiyoogan A nashshiyoogaa bessaasa. (Maz. 119:97, 99; Yoh. 17:17) Geeshsha Maxaafaa nabbabiyo prograamee neeyyo deˈii? Geeshsha Maxaafaa galla galla nabbabay?
10. Geeshsha Maxaafaa dumma oottiya issibay aybee?
10 Geeshsha Maxaafaa dumma oottiya issibay Yesuusa beˈida asati yootidobay an deˈiyoogaa. Yesuusi neeyyo oottido tumubaa qonccissiya maxaafay A xalla. Yesuusi haasayidobaanne oottidobaa neeni tamaariyo wode aara dabbotanawu koyana.
11. Yihoowa siiqiyoogaa waata tamaarana danddayay?
11 Yesuusa siiqiyoogaa tamaariyoogee neeni kaseegaappe aaruwan Yihoowa siiqanaadan oottana. Aybissi? Yesuusi ba Aawaa eeshshaa wottiyoobi baynna ogiyan kaallido gishshataassa. (Yoh. 14:9) Hegaa gishshawu, kaseegaappe aaruwan Yesuusabaa neeni tamaariyo wode, Yihoowa loyttada erananne nashshana. Hiyyeesa, hargganchchanne daafuranchcha gidido gishshawu asay karido asatuyyo Yesuusi ay keenaa qarettidaakko qoppa. Ne galla galla deˈuwaassi I immiyo zoriyaa, qassi neeni he zoriyaa kaalliyo wode ne deˈoy ay keenaa giiga gidiyaakko qoppa.—Maa. 5:1-11; 7:24-27.
12. Neeni Yesuusabaa tamaariyoogee ay oottanaadan nena denttettanee?
12 Nu nagaray atto geetettana mala Yesuusi yarshshettidoogaa neeni wotta dentta qoppiyo wode, A siiqiyo siiqoy kaseegaappe aaruwan minnana. (Maa. 20:28) Yesuusi ne gishshawu hayqqanawu eeno giidoogaa neeni akeekiyoogee, ne nagaraappe simmanaadaaninne Yihoowa maarotaa oychchanaadan nena denttettennan aggenna. (Oos. 3:19, 20; 1 Yoh. 1:9) Neeni Yesuusanne Yihoowa kaseegaappe aaruwan siiqiyo wode, neegaadan eta siiqiya asatuura gidanawu kaseegaappe aaruwan koyana.
13. Yihooway neessi immidobay aybee?
13 Yihoowa siiqiya asata siiqiyoogaa tamaara. Ammanenna soo asaynne ne kase laggeti neeni nena Yihoowawu sheedhdhanawu koyiyoy aybissakko akeekennan aggana danddayoosona. Eti nena eqettanakka danddayoosona. Yihooway neeyyo ayyaanaaban so asa immiyoogan maaddana. He ayyaanaa so asaakko neeni shiiqada deˈikko, neessi koshshiya maaduwaanne siiquwaa demmana. (Mar. 10:29, 30; Ibr. 10:24, 25) Wodeppe, ne so asaa yaratikka Yihoowawu haggaazananne I kessido maarata azazettana danddayoosona.—1 PHe. 2:12.
14. Koyro Yohaannisa 5:3n qonccidoogaadan, Yihoowa azazotubaa ay akeekadii?
14 Yihooway kessido maarata bonchchiyoogaanne oosuwan peeshshiyoogaa tamaara. Neeni Yihoowa eranaappe kase, aybi loˈˈokkonne aybi iitakko nerkka kuuyennan aggakka; shin haˈˈi Yihooway kessido maarati keehi loˈˈo gidiyoogaa akeekadasa. (Maz. 1:1-3; 1 Yohaannisa 5:3 nabbaba.) Geeshsha Maxaafay azinatussi, machchotussi, yelidaageetussinne naatussi immiyo zoriyaa ane qoppa. (Efi. 5:22–6:4) He zoriyaa oosuwan peeshshiyoogan ne so asaa deˈoy giigidee? Laggeta akeekan dooranaadan Yihooway immido kaaletota azazettiyoogan ne eeshshati kaseegaappe loˈˈidonaa? Neeni haˈˈi kaseegaappe aaruwan ufayttay? (Lee. 13:20; 1 Qor. 15:33) Ha oyshata ee gaada zaaranaagee qoncce.
15. Geeshsha Maxaafay yootiyo maarata oosuwan peeshshanawu maadoy neessi koshshiyo wode ay oottana danddayay?
15 Issi issitoo, Geeshsha Maxaafay yootiyo, neeni tamaaraydda deˈiyo maarata waata oosuwan peeshshanaakko metootana danddayaasa. Iitaa kehaappe shaakkanawu maaddiya Geeshsha Maxaafaa qofay deˈiyo xuufeta neessi giigissanawu Yihooway ba dirijjitiyaa goˈettiyoy hegaassa. (Ibr. 5:13, 14) Ha xuufeta neeni nabbabiyoonne xannaˈiyo wode, he qofaa ne deˈuwan oosuwan peeshshiyoogee nena waati maaddanaakko akeekana, qassi neeni Yihoowa dirijjitiyaa yame gidanawu koyana.
16. Yihooway ba deriyaa waati darajjayidee?
16 Yihoowa dirijjitiyaa siiqiyoogaanne maaddiyoogaa tamaara. Yihooway ba asaa gubaaˈiyan gubaaˈiyan darajjayiis; A Naˈay Yesuusi eta ubba bolli sunttettiis. (Efi. 1:22; 5:23) Yesuusi ha wodiyan I oosettana mala koyiyo oosuwaa kaalettidi maara oottanaadan aawatettay deˈiyo ayyaanan tiyettida amarida ishantta sunttiis. Yesuusi he amaridaageeta ‘ammanettida wozannaama ashkkara’ yaagiis; qassi eti nena ayyaanaaban mizanawunne naaganawu banttawu imettida aawatettaa xoqqu ootti xeelloosona. (Maa. 24:45-47) Ammanettida wozannaama ashkkaray nena naagiyo ogetuppe issoy sunttettida kayma cimati gubaaˈiyaa heemmanaadan oottiyoogaa. (Isi. 32:1, 2; Ibr. 13:17; 1 PHe. 5:2, 3) He cimati nena minttettanawunne kaseegaappe aaruwan Yihoowakko shiiqanaadan nena maaddanawu banttawu danddayettida ubbaabaa oottanawu eeno goosona. SHin eti neeyyo oottana danddayiyo keehi koshshiyaabatuppe issoy neeni harata Yihoowabaa tamaarissanaadan nena maaddiyoogaa.—Efi. 4:11-13.
17. Roome 10:10, 13, 14y yootiyoogaadan, nuuni haratussi Yihoowabaa yootiyoy aybissee?
17 Harati Yihoowa siiqiyoogaa tamaaranaadan maadda. Yesuusi bana kaalliyaageeti harata Yihoowabaa tamaarissanaadan yootiis. (Maa. 28:19, 20) Nuuni hegaa oottiyoy he azazuwaa azazettanawu koshshiyoogaa eriyo gishshataassa gidana danddayees. SHin neeni Yihoowa siiqiyo siiqoy dicciyo wode, “Nuuni be7idobaanne siyidobaa yootennan agganau danddayokko” giida kiitettida PHeexiroosaagaadaaninne Yohaannisaagaadan gaana danddayaasa. (Oos. 4:20) Issi uri Yihoowa siiqanaadan nuuni maaddana danddayikko hegee nuna keehi ufayssana. Wonggeliyaa mishiraachuwaa yootiya Piliphphoosi Toophphiyaa bitanee Geeshsha Maxaafaa tumaa eranaadaaninne xammaqettanaadan maaddido wode ay keenaa ufayttidaakko qoppa! Neeni Piliphphoosa leemisuwaa kaalliyo wodenne Yesuusi sabbakanaadan immido azazuwaa azazettiyo wode, Yihoowa Markka gidanawu koyiyoogaa bessaasa. (Roome 10:10, 13, 14 nabbaba.) He wode, “Xammaqettiyoogaa tana diggiyai aibee?” giidi oychchida Toophphiyaa bitaniyaagaadan oychchana danddayaasa.—Oos. 8:36.
18. Kaalliya huuphe yohuwan nuuni ay beˈanee?
18 Neeni xammaqettanawu kuuyiyo wode, ne deˈuwan ubbabaappe aadhdhiyaabaa oottaasa. Hegee neeni kuuyiyo gitabaa gidiyo gishshawu hegaa giyoogee woygiyoogaakko loytta qoppana koshshees. Xinqqatiyaabaa neeni erana koshshiyaabay aybee? Xammaqettanaappe kase, qassi hegaappe simmin neeni ay oottana koshshii? Ha oyshatu zaaruwaa kaalliya huuphe yohuwan beˈana.
MAZAMURE 2 Ne Sunttay Yihoowa
^ MENT. 5 Yihoowa siiqiya issoti issoti xammaqettida Yihoowa Markka gidanawu giigettidaakkonne shaakki erokkona. Neeyyo hegaadan siyettikko, neeni xammaqettanaadan maaddana danddayiya issi issibata zaarettada qoppanaadan ha huuphe yohoy nena maaddana.
^ MENT. 5 Asay issoy issuwaappe dummatees; yaatiyo gishshawu, ha huuphe yohuwan odettida qofaa hagaappe dummatiya kasiyaa kaaluwan issoti issoti oosuwan peeshshana danddayoosona.
^ MENT. 6 Gujo leemisota demmanawu, Deˈon Deˈiyaabay Merettidee? (Amaarattuwaa) giyoonne Deˈuwaa Doomettaa—Oychana Koshshiyo Ichashu Oyshata (Amaarattuwaa) giyo brooshureta xeella.
^ MENT. 61 MISILIYAA QONCCISSUWAA: Issi michchiya giyaappe issi issibaa shammaydda issi yelageeyyo trakttiyaa immawusu.
