Yohaannisi Beꞌido Ajjuutaa 5:1-14
5 Laappun maatafatun mintti attamido, naaꞌꞌu baggan* xaafettida maxaafaa* araatan uttidaagee ushachcha kushiyan oyqqidoogaa beꞌaas.
2 Qassi taani, “Maatafata denttidi maxaafaa dooyana bessiyay oonee?” yaagiya wolqqaama kiitanchchaa beꞌaas.
3 Shin he maxaafaa dooyanawu woy A giddon deꞌiyabaa xeellanawu danddayiday saluwan woy saꞌan woy biittaa garssan ooninne baawa.
4 He maxaafaa dooyana woy A giddon deꞌiyabaa xeellana bessiyay ooninne baynna gishshawu, taani keehippe yeekkaas.
5 Shin cimatuppe issoy taayyo hagaadan giis: “Yeekkoppa. Hekko! Yihudaa yara Gaammoy, Daawita xaphoy laappun maatafata denttananne maxaafata dooyana mala xooniis.”
6 Qassi taani shuhettidaba milatiya dorssay oyddu kiruubetu giddooninne cimatu giddon araataa matan eqqidaagaa beꞌaas; ayyo laappun kacetinne laappun ayfeti deꞌoosona; A ayfeti kumetta saꞌaa kiitettida Xoossaa ayyaanatu laappunatu gishshaa eqqiyabata.
7 I sinttawu kiyidi, araatan uttidaagaa ushachcha kushiyappe he maxaafaa ekkiis.
8 I he maxaafaa ekkido wode, oyddu kiruubetinne 24 cimati Dorssaa sinttan gulbbatidosona, qassi he cimati ubbati diittaanne tonggu giyabay kumido worqqa keriya oyqqidosona. (Tonggu giyabay geeshshatu woosaa gishshaa eqqiyaba.)
9 Eti hagaadan giidi ooratta yettaa yexxoosona: “Neeni maxaafaa ekkanawunne A maatafata denttanawu bessaasa; ayssi giikko, neeni shuhettadasanne ne suuttan yara ubbaappe, doona* ubbaa haasayiyageetuppe, asa sheeshsha ubbaappenne dere ubbaappe Xoossaayyo asaa shammadasa,
10 qassi neeni eta nu Xoossaayyo kawotettanne kahineta oottadasa, eti kawo gididi saꞌaa haarana.”
11 Qassi hagaa beꞌaas: taani araataa, oyddu kiruubetanne cimata yuuyi aadhdhida daro kiitanchchati haasayiyogaa siyaas; eta qooday daro tammu shaꞌa, qassi daro shaꞌa,*
12 qassi eti bantta qaalaa xoqqu oottidi hagaadan goosona: “Wolqqay, duretay, hayyoy, minotettay, bonchchoy, gitatettaynne anjjoy shuhettida Dorssawu bessees.”
13 Qassi saluwan, saꞌan, biittaa garssaaninne abban deꞌiya meretati ubbay, ee, etan deꞌiya ubbabay hagaadan giishin taani siyaas: “Anjjoy, bonchchoy, gitatettaynne minotettay araatan uttidaagawunne Dorssawu meri merinawu gido.”
14 Oyddu kiruubeti, “Aminꞌꞌi!” yaagidosona, qassi cimati gulbbatidi goynnidosona.
