Yohaannisi Beꞌido Ajjuutaa 10:1-11
10 Qassi taani shaaran alleeqettidi* saluwappe wodhdhiya hara mino kiitanchchaa beꞌaas; A huuphiyan zuullay deꞌees, A somꞌꞌoy awa ayfiya mala, qassi A gedeti* tuussaa malanne tama milatoosona;
2 qassi I birshshettibeenna guutta maxaafaa* ba kushiyan oyqqiis. I ba ushachcha tohuwan abban, qassi ba haddirssa tohuwan saꞌan eqqiis,
3 I gudiya gaammuwa cenggurssaadan keehi gunttidi haasayiis. I gunttidi haasayido wode, laappun dadati haasayiyogaa taani siyaas.
4 Laappun dadati haasayido wode, taani xaafana hanidaba gidikkonne, saluwappe hagaadan giyogaa siyaas: “Laappun dadati haasayidobaa attamada gorddappe attin, xaafoppa.”
5 Taani abbaaninne saꞌan eqqidaagaa beꞌido kiitanchchay ba ushachcha kushiya pude saluwa denttiis,
6 qassi I saluwanne an deꞌiyabata, saꞌaanne an deꞌiyabata, qassi abbaanne an deꞌiyabata medhdhida, meri merinawu deꞌiya Xoossan caaqqidi, hagaadan giis: “Naagiyo wodee wuriis.
7 Shin laappuntto kiitanchchay ba malkkataa punnana haniyo gallassatun, Xoossay gentti wottidobay tumukka polettiis. Hegee hiraagaa* yootiya ba aylletuyyo I awaajjido mishiraachchuwa.”
8 Taani saluwappe haranttuwa taayyo hagaadan giishin siyaas: “Baada, abbaaninne saꞌan eqqida kiitanchchay kushiyan oyqqido, dooyetti uttida maxaafaa ekka.”
9 Taani baada, he guutta maxaafaa taayyo immanaadan kiitanchchaa oychchaas. I taayyo hagaadan giis: “Maxaafaa ekkada ma baya, qassi I ne uluwa camo kessana, shin ne doonan eessaadan malꞌꞌana.”
10 Taani he guutta maxaafaa kiitanchchaa kushiyappe ekkada maas; yaatin, ta doonan eessaadan malꞌꞌiis, shin taani min, ta uluwa camo kessiis.
11 Qassi eti taayyo hagaadan giidosona: “Neeni haꞌꞌikka asa sheeshshatuyyo, deretuyyo, doona* ubbaa haasayiyageetuyyonne daro kawotuyyo hiraagaa yootana bessees.”
