Yohaannisi Beꞌido Ajjuutaa 4:1-11
4 Hegaappe guyyiyan, taani hagaa beꞌaas: saluwan issi penggee dooyetti uttiis, qassi malkkataadan guummiiddi taayyo hagaadan giya koyro haasayaa siyaas: “Haa kiya, hanana bessiyabata taani nena bessana.”
2 Hegaappe guyyiyan, sohuwara Xoossaa ayyaanay tanan oottiyogaa doommiis; qassi saluwan issi araataanne he araatan uttidaagaa beꞌaas.
3 Araatan uttidaagee yasphphiidiya shuchchaadaaninne sarddiyoniya shuchchaadan* phoolees, qassi araataa yuuyi aadhdhidi meregidiya shuchchaadan phooliya zuullay deꞌees.
4 He araataa yuuyi aadhdhidi 24 araatati deꞌoosona, qassi bootta maayuwa maayidanne bantta huuphiyan worqqa kallachchaa wottida 24 cimati araatatun uttidosona.
5 He araataappe wolqqanttay wolqqammiisinne daday guummiis, qassi taani haasayaa siyaas; hegaa bollikka, araataa sinttan eexxiya laappun xomppeti deꞌoosona; hegeeti Xoossaa laappun ayyaanatu gishshaa eqqiyabata.
6 Araataa sinttan qulxxuxxa* burccukkuwadan phooliya abba malabay deꞌees.
Sinttaaranne guyyeera ayfeti kumido oyddu kiruubeti* araatay deꞌiyosan gidduwaninne araataa yuuyi aadhdhidi deꞌoosona.
7 Koyro kiruubee gaammuwa mala, naaꞌꞌantto kiruubee mirgguwa mala, heezzantto kiruubiya somꞌꞌoy asaagaa mala, qassi oyddantto kiruubee paalliya argganttaa mala.
8 Oyddu kiruubetussi issuwawu issuwawu usuppun qefeti deꞌoosona; eta qefiya bolli yuuyi aadhdhidinne garssa baggaara ayfeti kumidosona. Eti gallassinne qammi ubbatoo, “Kase deꞌida, haꞌꞌikka deꞌiya, qassi yiiddi deꞌiya, A Wolqqawu Zawi Baynna Xoossay Yihoowi* geeshsha, geeshsha, geeshsha” yaagoosona.
9 Kiruubeti araatan uttida, meri merinawu deꞌiyagaa sabbiyo, bonchchiyonne galatiyo wode awudenne
10 araatan uttidaagaa sinttan 24 cimati gulbbatoosonanne meri merinawu deꞌiyagawu goynnoosona, qassi bantta kallachchaa araataa sinttan olidi, hagaadan goosona:
11 “Nu Xoossawu Yihoowa,* ubbabaa neeni medhdhido gishshawunne eti ne shenen deꞌiyonne merettido gishshawu, sabay, bonchchoynne wolqqay neeyyo bessees.”
