Yohaannisi Beꞌido Ajjuutaa 15:1-8
15 Qassi taani hara malaaliya, gita malaataa saluwan beꞌaas; hegeekka, laappun boshata oyqqida laappun kiitanchchata. He boshatun Xoossaa hanqqoy wuriyo gishshawu, hegeeti wurssettaageeta.
2 Qassi taani tamaara walahettida, burccukkuwa abbaa milatiyabaa beꞌaas; doꞌaa, A misiliyanne A sunttaa payduwa xoonidaageeti Xoossaa diittaa oyqqidi, burccukkuwa abbaa doonan eqqidosona.
3 Eti Xoossaa aylliya Muuse yettaanne Dorssaa yettaa yexxoosona; eti hagaadan goosona:
“Ne Wolqqawu Zawi Baynna Xoossawu Yihoowa,* neeni oottiyobati gitanne malaaloosona. Merinaa Kawuwawu, suurenne tumu ogiyan neeni oottaasa.
4 Yihoowa,* ammanettiya Xoossay ne xalaala gidiyo gishshawu, neeyyo yayyennaynne ne sunttaa bonchchennay tumu oonee? Ayssi giikko, neeni suure pirddiyogee qonccido gishshawu, dereti ubbay yiidi ne sinttan goynnana.”
5 Hegaappe simmin, taani hagaa beꞌaas: markkaa dunkkaaniya geeshsha* sohoy saluwan dooyettiis,
6 qassi laappun boshata oyqqida laappun kiitanchchati phooliya, geeshsha liinuwa maayidinne worqqa danccuwa bantta tiran danccidi geeshsha sohuwappe kiyidosona.
7 Oyddu kiruubetuppe issoy meri merinawu deꞌiya Xoossaa hanqqoy kumido laappun worqqa kereta laappun kiitanchchatuyyo immiis.
8 Xoossaa bonchchuwappenne A wolqqaappe denddidaagan geeshsha sohuwan cuway kumiis, qassi laappun kiitanchchatu laappun boshati wurana gakkanaashin, ooninne geeshsha sohuwa gelana danddayibeenna.
